شي جينپيڭ رەسەيدىڭ زۇڭتۇڭى پۋتينمەن كەزدەستى

سول جەر ۋاقىتى 7 - ايدىڭ 3 - كۇنى كەشتە مەملەكەت ءتوراعاسى شي جينپيڭ استانادا شاڭحاي سەلبەستىك ۇيىمىنىڭ باسشىلار ماجىلىسىنە قاتىناسۋدان بۇرىن رەسەيدىڭ زۇڭتۇڭى پۋتينمەن كەزدەستى. سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن

«حالىق گازەتى»، 7 - ايدىڭ 3 – كۇنى، استانا (تىلشىلەر باي ياڭ، شيە ياحۇڭ). سول جەر ۋاقىتى 7 - ايدىڭ 3 - كۇنى كەشتە مەملەكەت ءتوراعاسى شي جينپيڭ استانادا شاڭحاي سەلبەستىك ۇيىمىنىڭ باسشىلار ماجىلىسىنە قاتىناسۋدان بۇرىن رەسەيدىڭ زۇڭتۇڭى پۋتينمەن كەزدەستى.

شي جينپيڭ بىلاي دەپ اتاپ كورسەتتى: بيىل 5 - ايدا پۋتين زۇڭتۇڭ جۇڭگودا ءساتتى مەملەكەتتىك ساپاردا بولدى، جۇڭگو مەن رەسەيدىڭ ديپلوماتيالىق قارىم - قاتىناس ورناتقانىنىڭ 75 جىلدىعى سىندى ماڭىزدى تاريحي كەزەڭدە ءبىز ەكى ەل قارىم - قاتىناسىنىڭ كەلەسى قادامداعى دامۋى ءۇشىن بىرگە جوبا جانە ورنالاستىرۋ جاسادىق. بىلىقپالىق قاباتتاسقان حالىقارالىق جاعداي الدىندا، ەكى جاق ۇرپاقتان - ۇرپاققا جالعاسقان دوستىق اۋەلگى ماقساتىنان جازباي، حالىقتى باقىتقا كەنەلتۋ تاباندىلىعىنان جازباي، جۇڭگو - رەسەي قارىم - قاتىناسىنىڭ وزگەشە قۇنىن ۇزدىكسىز جەتىلدىرىپ، ەكى ەل سەلبەستىگىنىڭ ىشكى قوزعاۋشى كۇشىن اشىپ، ەكى ەلدىڭ ورىندى ۇقىق - مۇددەسى مەن حالىقارالىق قارىم - قاتىناستىڭ نەگىزگى ولشەمىن قورعاۋعا تىڭ قۇلشىنىس جاساۋى كەرەك.

شي جينپيڭ بىلاي دەپ باسا دارىپتەدى: جۇڭگو مەن رەسەي دامۋ ستراتەگياسىن ۇشتاستىرۋدى جانە حالىقارالىق ستراتەگيالىق سەلبەستىكتى ۇزدىكسىز كۇشەيتۋى كەرەك. جۇڭگو جاق رەسەي جاقتىڭ بريكس ەلدەرىنىڭ كەزەكتى ءتوراعا ەلى مىندەتىن ويداعىداي اتقارۋىن، ”دۇنيە ءجۇزىنىڭ وڭتۇستىگىندەگىلەردى“ ىنتىماقتاستىرىپ، ”جاڭا قىرعي قاباقتىق سوعىستان“ ساقتانۋىن، زاڭسىز سىڭار جاقتى جازالاۋ مەن زورەكەرلىككە قارسى تۇرۋىن قولدايدى. ەرتەڭ شاڭحاي سەلبەستىك ۇيىمىنىڭ استانا باسشىلار ءماجىلىسى وتكىزىلەدى. جۇڭگو جاق رەسەيمەن جانە ءارقايسى مۇشە ەلمەن بىرگە وسى ۇيىم دامۋىنىڭ ورنىقتى قاداممەن الىسقا جەتۋىن ىلگەرىلەتىپ، اناعۇرلىم تىعىز شاڭحاي سەلبەستىك ۇيىمى تاعدىرلاس ورتاق تۇلعاسىن قالىپتاستىرۋدى ءۇمىت ەتەدى. جۇڭگو، رەسەي ەكى جاق جاپپاي ستراتەگيالىق سەلبەستىكتى ۇزدىكسىز كۇشەيتىپ، سىرتقى كيلىگۋگە قارسى تۇرىپ، ءوز ءوڭىرىنىڭ تىنىشتىعىن، ورنىقتىلىعىن بىرگە قورعاۋى كەرەك.

پۋتين مىنالاردى ءبىلدىردى: ءتوراعا شي جينپيڭنىڭ بيىل 5 - ايدا جۇڭگودا مەملەكەتتىك ساپاردا بولعانىمدا ىستىق ىقىلاسپەن كۇتىپ العانىنا العىس ايتامىن. ءبىز رەسەي مەن جۇڭگونىڭ ديپلوماتيالىق قارىم - قاتىناس ورناتقانىنىڭ 75 جىلدىعىن بىرگە قۇتتىقتايمىز ءارى رەسەي - جۇڭگو قارىم - قاتىناسىنىڭ بولاشاقتاعى دامۋى جونىندە جوبا جاسايمىز. قازىر رەسەي - جۇڭگو قارىم - قاتىناسى تاريحتاعى ەڭ جوعارى دەڭگەيدە تۇر، ەكى جاق ءوزارا قۇرمەت ەتىپ، تەڭ تۇرعىدا ءوزارا پايدا جەتكىزىپ وتىر، رەسەي - جۇڭگو قارىم - قاتىناسى وداقتاسۋدى نيەت ەتپەيدى، ءۇشىنشى جاققا باعىتتالمادى، بۇل ەكى ەل حالىقتارىنىڭ ىرىس – قۇتىنا ۇيلەسەدى. رەسەي جاق جۇڭگو جاقتىڭ ءوزىنىڭ وزەكتى مۇددەسى مەن ورىندى ۇقىق - مۇددەسىن قورعاۋىن قولدايدى، سىرتقى كۇشتەردىڭ جۇڭگونىڭ ىشكى ىسىنە كيلىگۋىنە، نانحاي تەڭىزى ماسەلەسىنە كيلىگۋىنە قارسى تۇرادى. جۇڭگو شاڭحاي سەلبەستىك ۇيىمىنا كەزەكتى ءتوراعا ەل مىندەتىن ۇستىنە الۋ الدىندا تۇر، رەسەي جۇڭگونىڭ قىزمەتىن بار كۇشپەن قولداپ، باسقا مۇشە ەلدەرمەن بىرگە وسى ۇيىمنىڭ حالىقارالىق ىقپالىن ۇزدىكسىز جوعارىلاتىپ، ءوڭىردىڭ بەيبىتشىلىگىن، حاۋىپسىزدىگىن قورعاپ، حالىقارالىق جۇيەنىڭ اناعۇرلىم ءادىل، ۇيلەسىمدى باعىتقا قاراي دامۋىن ىلگەرىلەتەدى. بيىلعى بريكس ەلدەرىنىڭ كەزەكتى ءتوراعا ەلى رەتىندە رەسەي جاق جۇڭگو جاقپەن بريكس ەلدەرىنىڭ سەلبەستىگىندە قارىم - قاتىناستى، سەلبەستىكتى كۇشەيتۋدى ءۇمىت ەتەدى.

ەكى ەل مەملەكەت باسشىلارى تاعى ورتاق كوڭىل ءبولىپ وتىرعان حالىقارالىق جانە وڭىرلىك ماسەلەلەر جونىندە پىكىر اۋىستىردى. شي جينپيڭ بىلاي دەپ باسا دارىپتەدى: جۇڭگو جاق باستان - اياق تاريحتىڭ دۇرىس جاعىندا تۇرىپ، تاتۋلىققا شاقىرۋدا، كەلىسسوزدى جەبەۋدە تاباندى بولىپ، ۋكراينا داعدارىسى سياقتى وڭىرلىك قولامتالى ماسەلەلەردى ساياسي جولمەن شەشۋدى ىلگەرىلەتۋ ءۇشىن ۇزدىكسىز بەلسەندى قۇلشىنىس جاساۋدى قالايدى.

ساي چي، ۋاڭ ي قاتارلىلار كەزدەسۋدە بىرگە بولدى.

كەلۋ قاينارى: حالىق تورابى