شي جينپيڭ ازەربايجاننىڭ زۇڭتۇڭى اليەۆپەن كەزدەستى

سول جەر ۋاقىتى 7 - ايدىڭ 3 - كۇنى تۇستەن كەيىن مەملەكەت ءتوراعاسى شي جينپيڭ استانادا شاڭحاي سەلبەستىك ۇيىمىنىڭ باسشىلار ماجىلىسىنە قاتىناسۋدان بۇرىن ازەربايجاننىڭ زۇڭتۇڭى اليەۆپەن كەزدەستى. سۋرەتتى شينحۋا اگەنتتىگىنىڭ ءتىلشىسى يۋە يۋەۋەي تۇسىرگەن

«حالىق گازەتى»، 7 - ايدىڭ 3 – كۇنى، استانا (تىلشىلەر ۋاڭ جوۋ، باي زى - ۋەي). سول جەر ۋاقىتى 7 - ايدىڭ 3 - كۇنى تۇستەن كەيىن مەملەكەت ءتوراعاسى شي جينپيڭ استانادا شاڭحاي سەلبەستىك ۇيىمىنىڭ باسشىلار ماجىلىسىنە قاتىناسۋدان بۇرىن ازەربايجاننىڭ زۇڭتۇڭى اليەۆپەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن ازەربايجان − شىنايى، ءوزارا سەنىمدى جاقسى دوستار، تەڭ تۇرعىدا ءوزارا پايدا جەتكىزەتىن جاقسى سەرىكتەر. جۇڭگو - ازەربايجان قارىم - قاتىناسى باستان - اياق اقاۋسىز، ورنىقتى دامىپ، ەكى ەلدىڭ سەلبەستىگىندە سۇبەلى تابىستارعا قول جەتكىزىلىپ، ستراتەگيالىق مازمۇنى اناعۇرلىم بايىدى. ءبىز ەكى جاقتى قارىم - قاتىناستىڭ ورنىن ستراتەگيالىق سەرىكتەستىك قارىم - قاتىناس دەڭگەيىنە كوتەردىك، بۇل − جاڭا ورىن ءارى جاڭا باستاما. ەكى جاق ءبىرىن - ءبىرى ۇزدىكسىز قولداپ، ەكى ەل حالىقتارىنا ءتىپتى دە زور باقىت جاراتۋى كەرەك.

شي جينپيڭ مىنالاردى باسا دارىپتەدى: جۇڭگو جاق ازەربايجان جاقتىڭ مەملەكەتتىڭ يەلىك ۇقىعىن، تاۋەلسىزدىگىن جانە تەرريتوريا تۇتاستىعىن قورعاۋىن باتىل قولدايدى، ازەربايجاننىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن قولدايدى. ەكى جاق ”ءبىر بەلدەۋ، ءبىر جولدى“ جوعارى ساپادا بىرگە قۇرۋدى ىلگەرىلەتىپ، ساۋدا، قارجى قوسۋ، مۇناي، تابيعي گاز، فوتوۆولت سياقتى سالالارداعى سەلبەستىكتى تەرەڭدەتىپ، ۇلاستىرۋ - تۇتاستىرۋدى كۇشەيتىپ، كاسپي تەڭىزىنەن اتتاعان حالىقارالىق تاسىمال ءدالىزىن ويداعىداي قۇرىپ، جۇڭگو - ەۆروپا كەزەكشى پويەزدەرىنىڭ اقاۋسىز، ورنىقتى جۇمىس جۇرگىزۋىن قامتاماسىز ەتۋى كەرەك. ەكى جاق وقۋ - اعارتۋ، مادەنيەت، ساياحات، جاستار، جەرگىلىكتى ورىندار سياقتى سالالاردا اناعۇرلىم كوپ اۋىس - كۇيىس ورىستەتىپ، جۇڭگو - ازەربايجان دوستىعىنىڭ حالىق رايى نەگىزىن بەكەمدەۋى كەرەك. جۇڭگو جاق ازەربايجان جاقتىڭ «بىرلەسكەن مەملەكەتتەر ۇيىمىنىڭ كليمات وزگەرىسى جۇلگەلىك شارتىن» جاساسۋشى جاقتاردىڭ 29 - رەتكى جينالىسىن ويداعىداي وتكىزۋىن قولدايدى، ازەربايجانمەن بىرگە دۇنيە ءجۇزىنىڭ بارابار، ءتارتىپتى كوپ ۇيەكتەنۋىن جانە ەكونوميكانىڭ جالپىعا ءتيىمدى، سيىسىمدى جاھاندانۋىن دارىپتەپ، دۇنيە ءجۇزىنىڭ بەيبىتشىلىگىن، ورنىقتىلىعىن، دامۋىن جەبەۋدى قالايدى.

اليەۆ مىنالاردى ءبىلدىردى: ازەربايجان مەن جۇڭگو − جاقسى سەرىكتەر، ەكى ەلدىڭ ءارقايسى تاراۋلارى، ءارقايسى ساتىلارى تىعىز بارىس - كەلىستى ساقتاپ، ەكى جاقتى ساۋدا سوماسى ۇزدىكسىز ارتىپ، حالىقارالىق ۇيىمداردا ءبىر - ءبىرىنىڭ تاۋەلسىزدىگى مەن تەرريتوريا تۇتاستىعىن قورعاۋدى باتىل قولداۋدا. بۇگىن ءبىز بىرلەسكەن مالىمدەمە جاريالاپ، ازەربايجان مەن جۇڭگونىڭ ستراتەگيالىق سەرىكتەستىك قارىم - قاتىناسىن ورناتۋدى بىرگە جاريالادىق، بۇل ەكى ەل قارىم - قاتىناسىنىڭ دامۋى جونىنەن كەلەلى ماڭىز الادى. ازەربايجان جاق ءبىر جۇڭگو پرينسيبىندە تاباندى بولادى، جۇڭگونىڭ مەملەكەتتى بىرلىككە كەلتىرۋ ۇلى ءىسىن جۇزەگە اسىرۋىن باتىل قولدايدى، بۇل − تاريحتىڭ اۋقىمى، ونى ءارقانداي كۇش توسا المايدى. ازەربايجان جۇڭگومەن ىنتىماقتى، سەلبەستىكتى كۇشەيتىپ، كومەسكى كۇشتى اشىپ، ”ءبىر بەلدەۋ، ءبىر جولدى“ بىرگە قۇرۋ اياسىندا، ەكونوميكا - ساۋدا، قارجى قوسۋ، جاڭا ەنەرگيا، گۋمانيتارلىق سياقتى سالالارداعى سەلبەستىكتى كۇشەيتىپ، شاڭحاي سەلبەستىك ۇيىمى سياقتى اياداعى سەلبەستىكتى جيىلەتىپ، سىرتتىڭ كيلىگۋىنە قارسى تۇرىپ، ءوڭىردىڭ حاۋىپسىزدىگىن، ورنىقتىلىعىن قورعاۋدى قالايدى.

ەكى جاق «جۇڭحۋا حالىق رەسپۋبليكاسى مەن ازەربايجان رەسپۋبليكاسىنىڭ ستراتەگيالىق سەرىكتەستىك قارىم - قاتىناس ورناتۋ جونىندەگى بىرلەسكەن مالىمدەمەسىن» جاريالادى.

ەكى جاقتىڭ قاتىستى تاراۋلارى ”ءبىر بەلدەۋ، ءبىر جولدى“ بىرگە قۇرۋ، ۇلاستىرۋ - تۇتاستىرۋ سياقتى سالالارداعى سەلبەستىك قۇجاتتارىنا قول قويدى.

ساي چي، ۋاڭ ي قاتارلىلار كەزدەسۋدە بىرگە بولدى.

كەلۋ قاينارى: حالىق تورابى