شي جينپيڭ شاڭحاي سەلبەستىك ۇيىمىنا مۇشە ەلدەر مەملەكەت باسشىلارى القالار كەڭەسىنىڭ 24 - رەتكى ماجىلىسىنە قاتىناستى

سول جەر ۋاقىتى 7 - ايدىڭ 4 - كۇنى تۇستەن بۇرىن مەملەكەت ءتوراعاسى شي جينپيڭ استانا تاۋەلسىزدىك سارايىندا شاڭحاي سەلبەستىك ۇيىمىنا مۇشە ەلدەر مەملەكەت باسشىلارى القالار كەڭەسىنىڭ 24 - رەتكى ماجىلىسىنە قاتىناستى. سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

سول جەر ۋاقىتى 7 - ايدىڭ 4 - كۇنى تۇستەن بۇرىن مەملەكەت ءتوراعاسى شي جينپيڭ استانا تاۋەلسىزدىك سارايىندا شاڭحاي سەلبەستىك ۇيىمىنا مۇشە ەلدەر مەملەكەت باسشىلارى القالار كەڭەسىنىڭ 24 - رەتكى ماجىلىسىنە قاتىناستى. سۋرەتتە: شي جينپيڭ شاڭحاي سەلبەستىك ۇيىمىنا مۇشە ەلدەردىڭ باسشىلارىمەن توپتىق سۋرەتكە تۇسۋدە. سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن

«حالىق گازەتى»، 7 - ايدىڭ 4 – كۇنى، استانا (تىلشىلەر دۋ شاڭزى، شيە ياحۇڭ). سول جەر ۋاقىتى 7 - ايدىڭ 4 - كۇنى تۇستەن بۇرىن مەملەكەت ءتوراعاسى شي جينپيڭ استانا تاۋەلسىزدىك سارايىندا شاڭحاي سەلبەستىك ۇيىمىنا مۇشە ەلدەر مەملەكەت باسشىلارى القالار كەڭەسىنىڭ 24 - رەتكى ماجىلىسىنە قاتىناستى.

شاڭحاي سەلبەستىك ۇيىمىنىڭ كەزەكتى ءتوراعا ەلى قازاقستاننىڭ زۇڭتۇڭى توقايەۆ ءماجىلىستى باسقاردى، شاڭحاي سەلبەستىك ۇيىمىنا مۇشە ەلدەر بەلورۋسسيانىڭ زۇڭتۇڭى لۋكاشەنكو، قىرعىزستاننىڭ زۇڭتۇڭى جاپاروۆ، پاكيستاننىڭ زۇڭليى شاحباز، رەسەيدىڭ زۇڭتۇڭى پۋتين، تاجىكستاننىڭ زۇڭتۇڭى راحمون، وزبەكستاننىڭ زۇڭتۇڭى ميرزيويەۆ، يراننىڭ ۋاقىتتىق زۇڭتۇڭى موحبەر جانە ءۇندىستاننىڭ ۋاكىلى، سونداي - اق شاڭحاي سەلبەستىك ۇيىمىنىڭ باس حاتشىسى قاتارلىلار قاتىناستى.

شي جينپيڭ شاڭحاي سەلبەستىك ۇيىمىنا مۇشە ەلدەردىڭ باسشىلارىمەن توپتىق سۋرەتكە ءتۇستى، سوڭىنان مەملەكەت باسشىلارى القالار كەڭەسىنىڭ ماجىلىسىنە قاتىناستى.

شي جينپيڭ سوزىندە قازاقستاننىڭ كەزەكتى ءتوراعا ەل مىندەتىن اتقارعان كەزىندە شاڭحاي سەلبەستىك ۇيىمىنىڭ اينالىم مەحانيزمىن كەمەلدەندىرۋ، ءار سالاداعى سەلبەستىكتى تەرەڭدەتۋ ءۇشىن بەلسەندى قۇلشىنىس جاساعانىن جانە ماڭىزدى ۇلەس قوسقانىن جوعارى باعالاپ، بەلورۋسسيانىڭ مۇشە ەل رەتىندە شاڭحاي سەلبەستىك ۇيىمىنىڭ باسشىلار ماجىلىسىنە تۇڭعىش رەت قاتىناسۋىن قارسى الدى.

شي جينپيڭ بىلاي دەپ اتاپ كورسەتتى: شاڭحاي سەلبەستىك ۇيىمى عاسىر توعىسىندا قۇرىلدى، سول كەزدە قىرعي قاباقتىق سوعىستان قالعان قاراما - قارسىلىق پەن بولشەكتەنۋ ءالى دە جاراستىرۋدى كۇتىپ تۇرعان بولاتىن. وسى ۇيىمنىڭ قۇرۋشى مۇشەلەرى تاريحي تالعام جاساپ، بەيبىت دامۋعا تالپىنىپ، تاتۋ كورشىلىك دوستىققا كۇش سالىپ، جاڭاشا حالىقارالىق قاتىناس ورناتتى، ”شاڭحاي رۋحى“ مۇشە ەلدەردىڭ ورتاق قۇن ولشەمىنە جانە ارەكەت باعىتىنا اينالدى. شاڭحاي سەلبەستىك ۇيىمى قۇرىلعان 23 جىلدان كەيىن مۇشە ەلدەر 10 عا كوبەيدى، ”شاڭحاي سەلبەستىك ۇيىمى ۇلى شاڭىراعى“ 3 قۇرلىقتاعى 26 مەملەكەتتى شارپىدى، سەرىكتەر بارعان سايىن كوبەيىپ، سەلبەستىك نەگىزى اناعۇرلىم بەكەمدەلدى. قازىر دۇنيە جۇزىندەگى 100 جىلدىق وزگەرىس جەدەل قۇبىلىپ، ادامزات قوعامى تاعى دا تاريحتىڭ جول ايرىعىندا تۇر. شاڭحاي سەلبەستىك ۇيىمى تاريحتىڭ دۇرىس جاعىندا، ادىلدىك پەن ادىلەتتىلىك جاعىندا تۇرادى، دۇنيە ءجۇزى جونىنەن توتەنشە ماڭىزدى.

قىرعي قاباقتىق سوعىس ويىنىڭ رەال قاتەرى الدىندا ءبىز حاۋىپسىزدىك تومەنگى شەگىن ساقتاۋىمىز كەرەك. ورتاق، جالپىلىق، سەلبەستىك، باياندى حاۋىپسىزدىك كوزقاراسىن امالياتتا ايگىلەۋدە تاباندى بولىپ، كۇردەلى حاۋىپسىزدىك سىندارىنا پىكىرلەسۋ جانە سەلبەسۋ ارقىلى توتەپ بەرىپ، تەرەڭ رەتتەلگەن حالىقارالىق جاعدايعا تەڭ يگىلىكتەنۋ وي جەلىسى ارقىلى توتەپ بەرىپ، باياندى، بەيبىت، جاپپاي حاۋىپسىز دۇنيە ءجۇزىن بىرگە قۇرۋ كەرەك.

”شاعىن اۋلا، بيىك داۋال“ سىندى رەال حاۋىپ - قاتەر الدىندا ءبىز دامۋ ۇقىعىن قورعاۋىمىز كەرەك. سيىسىمدى بولۋدا تاباندى بولىپ، عىلىم - تەحنيكادا جاڭالىق اشۋدى بىرلەسىپ ىلگەرىلەتىپ، كاسىپ تىزبەگى مەن قامداۋ تىزبەگىنىڭ ورنىقتىلىعىن، ىركىلىسسىزدىگىن قورعاپ، وڭىرلىك ەكونوميكانىڭ ىشكى قوزعاۋشى كۇشىن تاسقىنداتىپ، بىرگە دامۋ نىساناسىن جۇزەگە اسىرۋدى ىلگەرىلەتۋ كەرەك.

كيلىگۋ، بولشەكتەۋ سىندى رەال سىن - سايىس الدىندا ءبىز ىنتىماق كۇشىن بەكەمدەۋىمىز كەرەك. سىرتتىڭ كيلىگۋىن قول ۇستاسا تەجەپ، ءبىر - ءبىرىن باتىل قولداپ، ءبىر - ءبىرىنىڭ كوڭىل ءبولىپ وتىرعان ماسەلەلەرىنە قامقورلىق جاساپ، ىشكى الاۋىزدىقتاردى تاتۋلىقتى قىمبات ساناپ ءبىر جاقتى ەتىپ، پارىقتاردى شوعىرلاندىرىپ، سەلبەستىكتەگى قيىن ماسەلەلەردى شەشىپ، ءوز ەلىنىڭ بولاشاعى مەن تاعدىرىن، ءوڭىردىڭ بەيبىت دامۋىن ءوز قولىندا مىقتى ۇستاۋ كەرەك.

شي جينپيڭ بىلاي دەپ باسا دارىپتەدى: شاڭحاي سەلبەستىك ۇيىمىنىڭ حالىقارالىق جاعدايداعى الماعايىپ وزگەرىستەردىڭ سىنىنان وتە الۋىنداعى سەبەپ، ءبىزدىڭ باستان - اياق ىنتىماقتاسىپ، سەلبەسۋ تاڭداۋلى داستۇرىندە، تەپە - تەڭ، ءوزارا تيىمدىلىك جەتكىزەتىن سەلبەستىك جولىندا، ادىلدىك پەن تۋراشىلدىقتىڭ قۇن تالپىنىسىندا، سيىسىمدى بولىپ، ءوزارا ۇلگى الۋ دارقاندىعىندا تاباندى بولعانىمىزدا. ءبىز اۋەلگى ماقساتتان اينىماي، ”شاڭحاي رۋحى“ تۋىن ۇزدىكسىز بيىك ۇستاپ، ءوزارا قارايلاسىپ، ءوزارا تابىسقا جەتىپ، شاڭحاي سەلبەستىك ۇيىمىنىڭ دامۋ بەتالىسىن بىرگە ورنىقتىرىپ، وسى ۇيىمدى مۇشە ەلدەردىڭ بىرگە كوركەيىپ، گۇلدەنۋدى جۇزەگە اسىرۋداعى سەنىمدى سۇيەنىشى ەتىپ تۇلعالاپ شىعۋىمىز كەرەك.

ماجىلىسكە قاتىناسقان مۇشە ەلدەردىڭ باسشىلارى شاڭحاي سەلبەستىك ۇيىمىنىڭ وڭىرلىك بەيبىتشىلىك پەن حاۋىپسىزدىكتى قورعاۋدا اتقارعان سىندارلى رولىنا بەلسەندى باعا بەرىپ، مىنالاردى ءبىلدىردى: ساۋدا، قاتىناس، ەنەرگيا، فينانس، اۋىل شارۋاشىلىعى، سيفرلى ەكونوميكا، عىلىم - تەحنيكادا جاڭالىق اشۋ سياقتى سالالارداعى سەلبەستىكتى اناعۇرلىم كۇشەيتىپ، وقۋ - اعارتۋ، مادەنيەت، ساياحات، جاستار سياقتى گۋمانيتارلىق اۋىس - كۇيىس سەلبەستىگىن تەرەڭدەتۋ كەرەك. باسشىلار بىلاي دەپ قارادى: قازىر دۇنيە ءجۇزىنىڭ ساياسي، ەكونوميكالىق جاعدايىندا جانە حالىقارالىق قاتىناستا كەلەلى وزگەرىس تۋىلۋدا، بىرلەسكەن مەملەكەتتەر ۇيىمى وزەكتى سايكەستىرۋ رولىن ساۋلەلەندىرىپ، اناعۇرلىم ۋاكىلدىك سيپاتتى، اناعۇرلىم دەموكراتيالى، ءادىل كوپ ۇيەكتى دۇنيە ءجۇزى جۇيەسىن قۇرۋدى ىلگەرىلەتىپ، ەكونوميكانىڭ جالپىعا ءتيىمدى، سيىسىمدى جاھاندانۋىن ىلگەرىلەتۋى كەرەك. ءار ەلدىڭ حاۋىپسىزدىككە كوڭىل بولۋىنە قۇرمەت ەتىپ، مەملەكەتتەر اراسىنداعى الاۋىزدىقتاردى، تالاس - تارتىستاردى بەيبىت تاسىلمەن شەشۋگە كۇش سالىپ، سىڭار جاقتىلىقپەن جازالاۋعا، باسقا ەلدىڭ ىشكى ىسىنە كيلىگۋگە قارسى تۇرۋ كەرەك. باسشىلار شاڭحاي سەلبەستىك ۇيىمىنىڭ حاۋىپسىزدىك قاتەرى مەن سىن - سايىسقا توتەپ بەرۋ مەحانيزمىن كەمەلدەندىرىپ، ”ءۇش ءتۇرلى كۇشكە“، ەسىرتكى ساۋدالاۋعا جانە ەل اتتاعان ۇيىمدىق قىلمىسقا باتىل سوققى بەرىپ، حالىقارالىق قوعامنىڭ اۋعانستاننىڭ بەيبىتشىلىكتى، دامۋدى جۇزەگە اسىرۋى ءۇشىن جاساعان قۇلشىنىستارىن قولداۋعا، ”ەكى ەل جوباسى“ نەگىزىندە پالەستينا ماسەلەسىن جاپپاي ءادىل شەشۋگە قولداۋ كورسەتۋگە ماقۇل بولدى.

مۇشە ەلدەردىڭ باسشىلارى «شاڭحاي سەلبەستىك ۇيىمىنا مۇشە ەلدەر مەملەكەت باسشىلارى القالار كەڭەسىنىڭ استانا جارناماسىنا» قول قويىپ جانە ونى جاريالاپ، شاڭحاي سەلبەستىك ۇيىمىنىڭ ءار ەلدىڭ ىنتىماقتاسا وتىرىپ دۇنيە ءجۇزىنىڭ ادىلدىگىن، تاتۋلىعىن، دامۋىن بىرگە جەبەۋ جونىندەگى باستاماسىن، شاڭحاي سەلبەستىك ۇيىمىنىڭ جۇمىس جۇرگىزۋ مەحانيزمىن كەمەلدەندىرۋ جونىندەگى ۇسىنىسىن بەكىتتى، بەرەكەلى كورشىلىك، ءوزارا سەنىم جانە سەرىكتەستىك بايلانىسى پرينسيبى جونىندەگى مالىمدەمەنى، سونداي - اق ەنەرگيا، قارجى قوسۋ، ينفورماتسيا حاۋىپسىزدىگى سياقتى سالالارداعى سەلبەستىككە ساياتىن ءبىرقىدىرۋ قاراردى جاريالادى.

ءماجىلىس بەلورۋسسيانىڭ شاڭحاي سەلبەستىك ۇيىمىنا مۇشە بولۋىن رەسمي بەكىتتى، جۇڭگونىڭ 2024 - جىلدان 2025 - جىلعا دەيىنگى شاڭحاي سەلبەستىك ۇيىمىنىڭ كەزەكتى ءتوراعا ەلى مىندەتىن وتكىزىپ الۋىن ۇيعاردى.

ساي چي، ۋاڭ ي قاتارلىلار جوعارىداعى قيمىلدارعا قاتىناستى.

كەلۋ قاينارى: حالىق تورابى