شي جينپيڭ ”شاڭحاي سەلبەستىك ۇيىمى +“ استانا باسشىلار ماجىلىسىنە قاتىناستى ءارى ماڭىزدى ءسوز سويلەدى

سول جەر ۋاقىتى 7 - ايدىڭ 4 - كۇنى تۇستەن كەيىن مەملەكەت ءتوراعاسى شي جينپيڭ استانادا ”شاڭحاي سەلبەستىك ۇيىمى +“ استانا باسشىلار ماجىلىسىنە قاتىناستى ءارى «شاڭحاي سەلبەستىك ۇيىمىنىڭ اناعۇرلىم كوركەم مەكەنىن قول ۇستاسا قۇرايىق» دەگەن تاقىرىپتا ماڭىزدى ءسوز سويلەدى. سۋرەتتى شينحۋا اگەنتتىگىنىڭ ءتىلشىسى پاڭ شيڭلەي تۇسىرگەن

سول جەر ۋاقىتى 7 - ايدىڭ 4 - كۇنى تۇستەن كەيىن مەملەكەت ءتوراعاسى شي جينپيڭ استانادا ”شاڭحاي سەلبەستىك ۇيىمى +“ استانا باسشىلار ماجىلىسىنە قاتىناستى ءارى «شاڭحاي سەلبەستىك ۇيىمىنىڭ اناعۇرلىم كوركەم مەكەنىن قول ۇستاسا قۇرايىق» دەگەن تاقىرىپتا ماڭىزدى ءسوز سويلەدى. باسشىلار ءماجىلىسى باستالاردان بۇرىن شي جينپيڭ توقايەۆ ۋاكىلدەر ۇيىرمەسىنىڭ باستىقتارىنا ارناپ وتكىزگەن قارسى الۋ قوناعاسىنا قاتىناستى ءارى توپتىق سۋرەتكە ءتۇستى. سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن

«حالىق گازەتى»، 7 - ايدىڭ 4 – كۇنى، استانا (تىلشىلەر ياڭ شۋەبو، ليۋ شۋۋىن). سول جەر ۋاقىتى 7 - ايدىڭ 4 - كۇنى تۇستەن كەيىن مەملەكەت ءتوراعاسى شي جينپيڭ استانادا ”شاڭحاي سەلبەستىك ۇيىمى +“ استانا باسشىلار ماجىلىسىنە قاتىناستى ءارى «شاڭحاي سەلبەستىك ۇيىمىنىڭ اناعۇرلىم كوركەم مەكەنىن قول ۇستاسا قۇرايىق» دەگەن تاقىرىپتا ماڭىزدى ءسوز سويلەدى (ءسوزدىڭ تولىق مازمۇنىن «حالىق گازەتىنىڭ» 3 – بەتىنەن وقي الاسىزدار).

شي جينپيڭ بىلاي دەپ اتاپ كورسەتتى: ءبىز تۇڭعىش رەت ”شاڭحاي سەلبەستىك ۇيىمى +“ فورماسىندا باسشىلار ءماجىلىسىن وتكىزدىك، جاقسى دوستار، جاڭا سەرىكتەر ءبىر ارادا باس قوسىپ، ۇلى جوسپارلاردى بىرگە اقىلداستى، بۇل جاڭا ءداۋىر شارت - جاعدايىندا وسى ۇيىمنىڭ كەڭ كولەمدە قارسى الىنعانىن، مۇشە ەلدەردىڭ دوستارىنىڭ دۇنيە جۇزىنە كەڭىنەن تارالعانىن تۇسىندىرەدى.

قازىر دۇنيە ءجۇزىنىڭ وزگەرىسى، ءداۋىردىڭ وزگەرىسى، تاريحتىڭ وزگەرىسى بۇرىن بولىپ كورمەگەن تاسىلمەن ورىستەتىلۋدە. ادامزات وركەنيەتى ارشىندى قاداممەن العا باسۋمەن بىرگە، حاۋىپسىزدىك، ورنىقسىزدىق، تۇراقسىزدىق فاكتورلارى دا كورنەكتى ارتتى. وسى وزگەرىسكە ويداعىداي توتەپ بەرۋدىڭ تەتىگى − وزگەرىستى تاني بىلەتىن پاراسات، وزگەرىسكە توتەپ بەرەتىن رەتسەپ، وزگەرىسكە ۇمتىلاتىن باتىلدىق. ءبىز تاعدىرلاس ورتاق تۇلعا تانىمىن بەرىك ورناتىپ، ”شاڭحاي رۋحىن“ باستان - اياق ۇستانىپ، ءوز ەلىمىزدىڭ جاعدايىنا ۇيلەسەتىن، ءوز ءوڭىرىنىڭ ءىس جۇزىندىگىنە ۇيلەسەتىن دامۋ جولىمەن بۇلجىماي ءجۇرىپ، اناعۇرلىم كوركەم شاڭحاي سەلبەستىك ۇيىمى مەكەنىن بىرگە قۇرىپ، ءار ەل حالقىنىڭ تىنىش ءومىر، شات - شادىمان تىرشىلىك كەشىرۋىنە، باقىتقا كەنەلۋىنە مۇمكىندىك جاراتۋىمىز كەرەك.

شي جينپيڭ 5 ءتۇرلى ۇسىنىستى ورتاعا قويدى.

ءبىرىنشى، ىنتىماقتى، ءوزارا سەنىمدى ورتاق مەكەن قۇرۋ كەرەك. ”شاڭحاي رۋحى“ بەيبىت قاتار تۇرۋدىڭ بەس پرينسيبىمەن تامىرلاس، وسى ۇيىمنىڭ ورتاق قۇنى، ونى بارىنشا قاستەرلەۋ، وعان باستان - اياق بويسۇنۋ كەرەك. ءبىز ءوزارا دەربەس تاڭداعان دامۋ جولىنا قۇرمەت ەتىپ، ءبىر - ءبىرىمىزدىڭ وزەكتى مۇددەمىزدى قورعاپ، ستراتەگيالىق قارىم - قاتىناس ارقىلى الاۋىزدىقتاردى جويىپ، ورتاق تانىمدى ۇيىستىرىپ، ءوزارا سەنىمدىلىكتى ارتتىرۋىمىز كەرەك. جۇڭگو جاق مۇشە ەلدەردىڭ ەل باسقارۋ تاجىريبەلەرىن اۋىستىرۋدى كۇشەيتىپ، شاڭحاي سەلبەستىك ۇيىمىنىڭ ساياسي پارتيالار تالقى مىنبەرىن لايىقتى كەزدە وتكىزۋىن ۇسىنىس ەتەدى.

ەكىنشى، بەيبىت، تىنىش ورتاق مەكەن قۇرۋ كەرەك. ءار ەل حاۋىپسىز بولعاندا عانا ناعىز حاۋىپسىزدىك بولادى. حاۋىپسىزدىك جاعىنداعى سەلبەستىك مەحانيزمى ءتاسىلىن كەمەلدەندىرىپ، حاۋىپسىزدىك جاعىنداعى حاۋىپ - قاتەر مەن سىندارعا توتەپ بەرۋدىڭ جالپىلىق ورتالىعىن جانە وعان قاراستى قۇرىلىمداردى قۇرۋدى تەزدەتىپ، ەسىرتكىگە تيىم سالۋ ورتالىعىن قۇرىپ، اقپاراتتىق اۋىس - كۇيىستى كۇشەيتىپ، بىرلەسكەن قيمىل ورىستەتۋ كەرەك. جۇڭگو ”لاڭكەستىككە قارسى تۇرۋ سەلبەستىگى − 2024“ لاڭكەستىككە قارسى تۇرۋ بىرىككەن مانەۆرى سياقتى قيمىلداردى ويداعىداي وتكىزەدى. اۋعانستاننىڭ كورشى ەلدەرى سايكەسۋ، سەلبەسۋ مەحانيزمى سياقتى تۇعىرلاردىڭ رولىن ساۋلەلەندىرىپ، اۋعانستاننىڭ بەيبىت قايتا قۇرۋ جولىمەن ءجۇرۋىن ىلگەرىلەتۋ كەرەك.

ءۇشىنشى، گۇلدەنىپ - كوركەيگەن ورتاق مەكەن قۇرۋ كەرەك. جۇڭگو جاق 2025 - جىلدى ”شاڭحاي سەلبەستىك ۇيىمىنىڭ باياندى دامۋ جىلى“ ەتىپ بەلگىلەۋدى ۇسىنىس ەتەدى، ءار جاقپەن ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدىڭ 8 ءتۇرلى ارەكەتىن جاپپاي تياناقتاندىرىپ، اۋىل شارۋاشىلىعىنان ۇلگى كورسەتۋ بازاسى، جەرگىلىكتى ەكونوميكا - ساۋدادان ۇلگى كورسەتۋ رايونى، ەكولوگيالىق ورتانى قورعاۋدا جاڭالىق اشۋ بازاسى سياقتى تۇعىرلاردان ويداعىداي پايدالانىپ، وڭىرلىك سەلبەستىكتى جەبەۋدى قالايدى. جۇڭگو جاق ءار جاقتىڭ بەيدوۋ جاساندى سەرىك جول نۇسقاۋ جۇيەسىن قولدانىپ، حالىقارالىق اي شارىن عىلمي زەرتتەۋ پۋنكتى قۇرىلىسىنا ات سالىسۋىن قارسى الادى. جۇڭگو شاڭحاي سەلبەستىك ۇيىمىنىڭ سيفرلى وقۋ - اعارتۋ وداعىن قۇرۋدى دارىپتەيدى، وسى ۇيىمداعى ەلدەرگە سيفرلى تەحنيكالىق كۋرستان وتكىزۋ سانىن بەرۋدى قالايدى. وسى ۇيىمنىڭ باسقارۋ جۇيەسىنىڭ وسىزاماندانۋىن ىلگەرىلەتىپ، اينالىم ونىمدىلىگىن جوعارىلاتۋ كەرەك.

ءتورتىنشى، تاتۋ كورشىلىك، دوسجار ورتاق مەكەن قۇرۋ كەرەك. شاڭحاي سەلبەستىك ۇيىمى تاتۋ كورشىلىك، دوسجار سەلبەستىك كوميتەتى سياقتى حالىقتىق قۇرىلىمداردىڭ رولىن تولىق ساۋلەلەندىرىپ، ءداستۇرلى مەديتسينا تالقى مىنبەرى، حالىقتىق دوستىق تالقى مىنبەرى، جاستاردىڭ اۋىس - كۇيىس لاگەرى، جاستاردىڭ دامۋ تالقى مىنبەرى سياقتى ايگىلى ماركا قيمىلدارىن ۇزدىكسىز ويداعىداي وتكىزۋ كەرەك. ءار جاقتىڭ چيڭداۋ جاسىل دامۋ تالقى مىنبەرىنە، ايەلدەر تالقى مىنبەرىنە بەلسەنە قاتىناسۋىن قارسى الامىز. الداعى 5 جىلدا جۇڭگو وسى ۇيىمداعى ەلدەرگە 1000 جاستىڭ جۇڭگوعا بارىپ اۋىس - كۇيىس جاساۋ سانىن بەرەدى.

بەسىنشى، ءادىل، تۋراشىل ورتاق مەكەن قۇرۋ كەرەك. دۇنيە ءجۇزىنىڭ بارابار، ءتارتىپتى كوپ ۇيەكتەنۋى مەن ەكونوميكانىڭ جالپىعا ءتيىمدى، سيىسىمدى جاھاندانۋىن بىرگە دارىپتەپ، ناعىز كوپ جاقتىلىقتى امالياتتا ايگىلەپ، دۇنيە جۇزىلىك جونگە سالۋدىڭ اناعۇرلىم ءادىل، ۇيلەسىمدى بەتالىسقا قاراي دامۋىن ىلگەرىلەتىپ، بەيبىتشىلىك قىزىل سيفرىن، دامۋ قىزىل سيفرىن، حاۋىپسىزدىك قىزىل سيفرىن، جونگە سالۋ قىزىل سيفرىن جويۋعا ”شاڭحاي سەلبەستىك ۇيىمى كۇشىن“ قوسۋ كەرەك.

شي جينپيڭ بىلاي دەپ باسا دارىپتەدى: ىنتىماقتاسۋ، سەلبەسۋ − شاڭحاي سەلبەستىك ۇيىمىنان كەلگەن تابىستى تاجىريبە ءارى جاڭا جورىقتا وزگەرىسكە توتەپ بەرۋدىڭ، جاڭا جاعداي اشۋدىڭ تابيعي تالعامى. استانا باسشىلار ماجىلىسىنەن كەيىن جۇڭگو كەزەكتى ءتوراعا ەل مىندەتىن ۇستىنە الادى. جۇڭگو جاق وسى ۇيىمداعى سەرىكتەستەرمەن ىنتىماقتاسا سەلبەسىپ، ”شاڭحاي رۋحىن“ اناعۇرلىم كوپ مويىندايتىن مەملەكەتتەرمەن جانە حالىقارالىق ۇيىمدارمەن قول ۇستاسا بىرگە ىلگەرىلەپ، ادامزاتتىڭ تاعدىرلاس ورتاق تۇلعاسىن قۇرۋ كەلەشەگىنىڭ اناعۇرلىم جارقىن بولۋىنا مۇمكىندىك جاساۋدى قالايدى.

شاڭحاي سەلبەستىك ۇيىمىنىڭ كەزەكتى ءتوراعا ەلى قازاقستاننىڭ زۇڭتۇڭى توقايەۆ ءماجىلىستى باسقاردى، شاڭحاي سەلبەستىك ۇيىمىنا مۇشە ەلدەر بەلورۋسسيانىڭ زۇڭتۇڭى لۋكاشەنكو، قىرعىزستاننىڭ زۇڭتۇڭى جاپاروۆ، پاكيستاننىڭ زۇڭليى شاحباز، رەسەيدىڭ زۇڭتۇڭى پۋتين، تاجىكستاننىڭ زۇڭتۇڭى راحمون، وزبەكستاننىڭ زۇڭتۇڭى ميرزيويەۆ، يراننىڭ ۋاقىتتىق زۇڭتۇڭى موحبەر جانە ءۇندىستاننىڭ ۋاكىلى، باقىلاۋشى ەل موڭعۇليانىڭ باسشىسى، ءتوراعا ەل قوناقتارى ازەربايجان، كاتار، اراب بىرىككەن امىرلىگى، تۇركيا، تۇركىمەنستاننىڭ باسشىلارى، سونداي - اق بىرلەسكەن مەملەكەتتەر ۇيىمىنىڭ باس حاتشىسى گۋتەررەس سياقتى حالىقارالىق جانە وڭىرلىك ۇيىمداردىڭ جاۋاپتىلارى قاتىناستى.

باسشىلار ءماجىلىسى باستالاردان بۇرىن شي جينپيڭ توقايەۆ ۋاكىلدەر ۇيىرمەسىنىڭ باستىقتارىنا ارناپ وتكىزگەن قارسى الۋ قوناعاسىنا قاتىناستى ءارى توپتىق سۋرەتكە ءتۇستى.

ساي چي، ۋاڭ ي قاتارلىلار جوعارىداعى قيمىلدارعا قاتىناستى.

كەلۋ قاينارى: حالىق تورابى