شي جينپيڭ بىرلەسكەن مەملەكەتتەر ۇيىمىنىڭ باس حاتشىسى گۋتتەرەسپەن كەزدەستى

سول جەر ۋاقىتى 7 - ايدىڭ 4 - كۇنى تۇستەن كەيىن مەملەكەت ءتوراعاسى شي جينپيڭ استانادا شاڭحاي سەلبەستىك ۇيىمىنىڭ باسشىلار ماجىلىسىنە قاتىناسۋ كەزىندە بىرلەسكەن مەملەكەتتەر ۇيىمىنىڭ باس حاتشىسى گۋتتەرەسپەن كەزدەستى. سۋرەتتى شينحۋا اگەنتتىگىنىڭ ءتىلشىسى پاڭ شيڭلەي تۇسىرگەن

«حالىق گازەتى»، 7 - ايدىڭ 4 – كۇنى، استانا (تىلشىلەر يۇي ي - چۇن، باي زى ۋەي). سول جەر ۋاقىتى 7 - ايدىڭ 4 - كۇنى تۇستەن كەيىن مەملەكەت ءتوراعاسى شي جينپيڭ استانادا شاڭحاي سەلبەستىك ۇيىمىنىڭ باسشىلار ماجىلىسىنە قاتىناسۋ كەزىندە بىرلەسكەن مەملەكەتتەر ۇيىمىنىڭ باس حاتشىسى گۋتتەرەسپەن كەزدەستى.

شي جينپيڭ بىلاي دەپ اتاپ كورسەتتى: قازىر دۇنيە جۇزىندە 100 جىلدىق وزگەرىس جەدەل قۇبىلىپ، ادامزات بۇرىن بولماعان ورايعا جانە سىن - سايىسقا ءدوپ كەلدى. بىرلەسكەن مەملەكەتتەر ۇيىمى − كوپ جاقتىلىقتى امالياتتا ايگىلەۋدىڭ، دۇنيە جۇزىلىك جونگە سالۋدى ىلگەرىلەتۋدىڭ وزەكتى تۇعىرى، رولىن تەك كۇشەيتۋ كەرەك، السىرەتۋگە بولمايدى. حالىقارالىق جاعداي قالاي وزگەرسە دە، جۇڭگو باستان - اياق ناعىز كوپ جاقتىلىقتا تاباندى بولىپ، بىرلەسكەن مەملەكەتتەر ۇيىمىنىڭ حالىقارالىق ىستەردە ۇيىتقىلىق رولىن ساۋلەلەندىرۋىن قولدايدى.

شي جينپيڭ بىلاي دەپ باسا دارىپتەدى: دۇنيە جۇزىندەگى ءار ەل − بەينەت پەن زەينەتتى بىرگە وتكەرەتىن تاعدىرلاس ورتاق تۇلعا. ادامزات سىندى وسى كەمەنىڭ بولاشاققا ساپارى ءساتتى بولا بەرمەيدى، حالىقارالىق قوعام، ءسوز جوق، تار جول، تايعاق كەشۋلەردەن بىرگە ءوتىپ، كەمەنىڭ باستان - اياق دۇرىس بەتالىستا جۇرۋىنە كەپىلدىك ەتۋى كەرەك. جۇڭگو بىرلەسكەن مەملەكەتتەر ۇيىمىنىڭ بولاشاقتاعى باس قوسۋىن قولدايدى، باسشىلار ءماجىلىسىنىڭ كوپ جاقتىلىقتا تاباندى بولىپ، ىنتىماقتى، سەلبەستىكتى كۇشەيتۋدىڭ بەلسەندى سيگنالىن تاراتىپ، دۇنيە جۇزىلىك باسقارۋدىڭ اناعۇرلىم ءادىل، ۇيلەسىمدى باعىتقا قاراي دامۋىن ىلگەرىلەتۋدى ءۇمىت ەتەدى. جۇڭگو جاق بىرلەسكەن مەملەكەتتەر ۇيىمىنىڭ حالىقارالىق فينانس قۇرىلىمى رەفورماسىن ىلگەرىلەتۋىن، جاساندى زەردەنىڭ دۇنيە جۇزىلىك باسقارۋ جاقتارىندا جەتەكشىلىك رول اتقارۋىن قولدايدى.

گۋتەررەس مىنانى ءبىلدىردى: قازىر اتقارىلىپ وتىرعان حالىقارالىق تارتىپكە، اسىرەسە، حالىقارالىق فينانس مەحانيزمىنە رەفورما جاساپ، حالىقارالىق جاعدايدىڭ دامۋ وزگەرىسىنە ۇيلەسۋ كەرەك. بىرلەسكەن مەملەكەتتەر ۇيىمى حالىقارالىق فينانس قۇرىلىمىن رەتتەۋ مەن جاساندى زەردە ارقىلى دۇنيە جۇزىلىك باسقارۋدى بار كۇشپەن ىلگەرىلەتىپ، دۇنيە جۇزىلىك باسقارۋدىڭ اناعۇرلىم ءادىل، ۇيلەسىمدى بولۋىن ىلگەرىلەتىپ، ونىڭ وركەندەپ كەلە جاتقان ەلدەردىڭ بىرگە دامۋدى جۇزەگە اسىرۋىنا اناعۇرلىم ءتيىمدى بولۋىن قالايدى. جۇڭگو جاقتىڭ بىرلەسكەن مەملەكەتتەر ۇيىمىنىڭ ىستەرىن قولداپ، كوپ جاقتىلىقتى امالياتتا ايگىلەپ، دۇنيە ءجۇزىنىڭ بەيبىتشىلىگى مەن دامۋىن جەبەۋدە شەشۋشى جانە سىندارلى رول اتقارعانىنا العىس ايتامىن. ادامزاتتىڭ بولاشاعى اسا زور دارەجەدەن العاندا جۇڭگوعا بايلانىستى. بىرلەسكەن مەملەكەتتەر ۇيىمى جۇڭگومەن قارىم - قاتىناستى، سەلبەستىكتى اناعۇرلىم كۇشەيتۋدى ءۇمىت ەتەدى.

ساي چي، ۋاڭ ي قاتارلىلار كەزدەسۋدە بىرگە بولدى. 

كەلۋ قاينارى: حالىق تورابى