شي جينپيڭ گۆينەيا - بيساۋدىڭ زۇڭتۇڭى ەمبالومەن كەڭەس وتكىزدى

7 - ايدىڭ 10 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن گۆينەيا - بيساۋدىڭ زۇڭتۇڭى ەمبالومەن كەڭەس وتكىزدى. سۋرەتتە: كەڭەستەن بۇرىن شي جينپيڭ مەن حانىمى پىڭ لييۋان ەمبالو جانە حانىمى دينيسيامەن بىرگە سۋرەتكە تۇسۋدە.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

7 - ايدىڭ 10 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن گۆينەيا - بيساۋدىڭ زۇڭتۇڭى ەمبالومەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا ەمبالونى قارسى الۋ سالتىن وتكىزۋدە.

سۋرەتتى شينحۋا اگەنتتىگىنىڭ ءتىلشىسى راۋ ايمين تۇسىرگەن

شينحۋا اگەنتتىگى، 7 – ايدىڭ 10 – كۇنى، بەيجيڭ (ءتىلشى جىڭ ميڭدا). 7 - ايدىڭ 10 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن گۆينەيا - بيساۋدىڭ زۇڭتۇڭى ەمبالومەن كەڭەس وتكىزدى. ەكى ەلدىڭ مەملەكەت باسشىلارى جۇڭگو مەن گۆينەيا – بيساۋدىڭ قارىم - قاتىناسىن ستراتەگيالىق سەرىكتەستىك قارىم - قاتىناس دەڭگەيىنە كوتەرۋگە ءبىر اۋىزدان ماقۇل بولدى.

شي جينپيڭ بىلاي دەپ اتاپ كورسەتتى: جۇڭگو مەن گۆينەيا - بيساۋدىڭ ەرەكشە دوستىق تاريحى بار. تاياۋ جىلداردان بەرى ەكى ەلدىڭ قارىم - قاتىناسى ۇزدىكسىز تەرەڭدەپ، ساياسي ءوزارا سەنىمدىلىگى اناعۇرلىم بەكەمدەلىپ، ناقتى سەلبەستىگى اناعۇرلىم كەڭەيىپ، حالىقارالىق ىستەردە سايكەسۋى اناعۇرلىم جيىلەدى. جۇڭگو جاق گۆينەيا - بيساۋدىڭ ءوز مەملەكەت جاعدايىنا ۇيلەسەتىن دامۋ جولىن ءوز الدىنا تابۋىن قولدايدى، گۆينەيا - بيساۋمەن ءداستۇرلى دوستىقتى جالعاستىرىپ، ساياسي سەنىمدىلىكتى بەكەمدەپ، ناقتى ىستەر سەلبەستىگىن كەڭەيتىپ، ەكى ەلدىڭ ستراتەگيالىق سەرىكتەستىك قارىم - قاتىناسىنىڭ مازمۇنىن ۇزدىكسىز بايىتىپ، گۆينەيا - بيساۋدىڭ مەملەكەتتىڭ دامۋىن اناعۇرلىم ويداعىداي جۇزەگە اسىرۋىنا دەم بەرۋدى قالايدى.

شي جينپيڭ بىلاي دەپ باسا دارىپتەدى: جۇڭگو جاق گۆينەيا - بيساۋمەن ءار جىكتەگىلەردىڭ دوستىق بارىس - كەلىسىن جيىلەتىپ، ەل باسقارۋ تاجىريبەسى اۋىس - كۇيىسىن كۇشەيتىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى جەتەكشى ەتىپ، اۋىل شارۋاشىلىعى، كەن كاسىبى، نەگىزدىك قۇرىلعى قۇرىلىسى، تەڭىز ەكونوميكاسى سياقتى سالالارداعى سەلبەستىكتى كەڭەيتۋدى قالايدى. جۇڭگو جاق گۆينەيا - بيساۋدىڭ ساپالى اۋىل شارۋاشىلىق ونىمدەرىنىڭ جۇڭگو بازارىنا كىرۋىن قارسى الادى، جۇڭگو كاسىپورىندارىن گۆينەيا - بيساۋعا بارىپ قارجى قوسىپ، سەلبەستىك جاساۋعا شابىتتاندىرىپ، گۆينەيا - بيساۋدىڭ بايلىق كومەسكى كۇشىن دامۋ قوزعاۋشى كۇشىنە اينالدىرۋىنا كومەكتەسەدى. جۇڭگو جاق گۆينەيا - بيساۋدىڭ ەل ءىشى قۇرىلىسىنا قولىنان كەلگەنىنشە ۇزدىكسىز قولداۋ كورسەتىپ، كۇرىش تەحنيكاسى ماماندارى مەن ەمدەۋ اترەتىن ۇزدىكسىز جىبەرىپ، گۆينەيا - بيساۋدىڭ استىق حاۋىپسىزدىگىن قامتاماسىز ەتۋىنە جانە الەۋمەتتىك دەنساۋلىق ساقتاۋ ىستەرىن دامىتۋىنا دەم بەرۋدى قالايدى. ەكى جاق وقۋ - اعارتۋ، جاستار ىستەرى سياقتى سالالارداعى اۋىس - كۇيىستى، سەلبەستىكتى كۇشەيتىپ، ەكى ەل حالىقتارىنىڭ تىلەكتەرىنىڭ توعىسۋىن جەبەۋى كەرەك. جۇڭگو جاق ۇكىمەتتىڭ وقۋ سيلىق قاراجاتىمەن جانە كۋرستا تاربيەلەۋ سانىمەن ۇزدىكسىز قامداپ، گۆينەيا - بيساۋدىڭ مەملەكەتتىڭ دامۋىنا قاجەتتى اناعۇرلىم كوپ ءتۇرلى دارىندىلاردى جەتىلدىرۋىنە كومەكتەسەدى.

شي جينپيڭ بىلاي دەپ اتاپ كورسەتتى: جۇڭگو مەن افريكا ەلدەرىنىڭ بارىندە شۇعىلالى وركەنيەت بار، وتارلانعان، شاپقىنشىلىققا ۇشىراعان ايانىشتى تاريح بار، ءبارى دە ۇلتتىڭ تاۋەلسىزدىگى مەن ازاتتىعىن قاستەرلەيدى جانە وعان تالپىنادى. جۇڭگو مەن افريكا ەلدەرىنىڭ ءوزارا قولداۋى مەن كومەگى − شىنايى، قالتقىسىز، ادال دوس باۋىرلاستاردىڭ جانە وركەندەپ كەلە جاتقان ەلدەردىڭ ىنتىماقتاسا سەلبەسۋىنىڭ ۇلگىسى، جاڭا جاعدايدا ءبىز جاڭا ءداۋىردى بىرلەسىپ قۇرۋىمىز كەرەك. جۇڭگو - افريكا سەلبەستىك تالقى مىنبەسى − جۇڭگو - افريكا حالىقتارىنىڭ بەيبىت قاتار تۇرۋ بەس پرينسيبىن امالياتتا ايگىلەپ، بىرگە دامۋدى جەبەۋىندەگى ماڭىزدى تۇعىر. ەكى اپتانىڭ الدىندا ءبىز بەيجيڭدە بەيبىت قاتار تۇرۋ بەس پرينسيبى جاريالانعاندىعىنىڭ 70 جىلدىعىن ەسكە ءتۇسىرۋ قيمىلىن سالتاناتپەن وتكىزدىك. بيىل كۇزدە بەيجيڭدە جاڭا كەزەكتى جۇڭگو - افريكا سەلبەستىك تالقى مىنبەسىنىڭ باسشىلار ءماجىلىسى وتكىزىلەدى. جۇڭگو گۆينەيا - بيساۋ قاتارلى افريكا ەلدەرىمەن بىرگە بەيبىت قاتار تۇرۋ بەس پرينسيبىن ساۋلەلەندىرىپ، جاڭا داۋىردەگى جۇڭگو - افريكا سەلبەستىگىنىڭ ۇلى جوسپارىن بىرگە اقىلداسىپ، وركەندەپ كەلە جاتقان ەلدەردىڭ ورتاق مۇددەسىن جانە حالىقارالىق تەڭدىك پەن ادىلدىكتى قورعاپ، جوعارى دەڭگەيدەگى جۇڭگو - افريكا تاعدىرلاس ورتاق تۇلعاسىن قول ۇستاسا بىرگە قۇرىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.

ەمبالو مىنالاردى ءبىلدىردى: مەن ۋاكىلدەر ۇيىرمەسىمەن بىرگە بەيجيڭگە قادام باسقان سول ساتتەن باستاپ جۇڭگو حالقىنىڭ افريكاداعى باۋىرلاستارعا دەگەن شىنايى دوستىعىن تەرەڭ سەزىندىم. گۆينەيا - بيساۋ مەن جۇڭگونىڭ قارىم - قاتىناسى وتە جاقسىءارى مىعىم، ەكى جاق باستان - اياق ءبىر - ءبىرىن باتىل قولداپ كەلەدى. گۆينەيا - بيساۋ قيىنشىلىققا تاپ بولعان كەزدە جۇڭگو قاشان دا تيتتەي دە ءارى - ءسارى بولماستان قاستەرلى قولداۋ كورسەتىپ كەلدى، گۆينەيا - بيساۋ حالقى مۇنى ماڭگى ۇمىتپايدى. ءبىز دە بۇرىنعىداي جۇڭگومەن بىرگە بولامىز، ءبىر جۇڭگو پرينسيبىن باتىل ۇستانامىز، جۇڭگو جاقتىڭ تايۋان سياقتى وزەكتى مۇددە ماسەلەسىندەگى مايدانىن باتىل قولدايمىز. گۆينەيا - بيساۋ جۇڭگونىڭ ۇلى دامۋ جەتىستىكتەرىنە سۇيىنەدى، جۇڭگونى ديپلوماتيانىڭ ەڭ الدىمەن ەسكەرەتىن بەتالىسى جانە ەڭ ماڭىزدى سەلبەستىك سەرىگى ەتەدى، جۇڭگونىڭ دامۋ تانىمى مەن تاجىريبەسىن ۇيرەنىپ، ۇلگى الىپ، ەكونوميكا - ساۋدا، قارجى قوسۋ، نەگىزدىك قۇرىلعى، كەن بايلىعى، ەنەرگيا سياقتى سالالارداعى سەلبەستىكتى كۇشەيتىپ، مەملەكەتتىڭ دامۋىنا دەم بەرۋدى ءۇمىت ەتەدى. جۇڭگو ەجەلدەن وتارشىلدىق ىستەپ كورگەن ەمەس، باسقا ەلدىڭ ىشكى ىسىنە كيلىككەن ەمەس، باسقا ەلدەرگە ەشقاشان قوجاڭداپ كورگەن ەمەس، ەجەلدەن كىشى ەلدەرگە تەڭدىك تانىتىپ، قۇرمەت كورسەتىپ كەلەدى، ەجەلدەن ايتقانىن ورىنداپ، ءسوزى مەن ارەكەتى ءبىر جەردەن شىعىپ كەلەدى. جۇڭگو افريكا ەلدەرىنە مەكتەپ، شيپاحانا، تاس جول سياقتى افريكا حالقىنا باقىت جاراتاتىن سەلبەستىك نىساندارىن الا كەلدى. گۆينەيا - بيساۋ جۇڭگونىڭ افريكا ۇلى قۇرلىعىنىڭ دامۋىنا كومەكتەسۋدە اتقارعان ماڭىزدى رولى مەن بەلسەندى ۇلەسىن ايرىقشا القايدى، جۇڭگو جاقتىڭ جاڭا كەزەكتى جۇڭگو - افريكا سەلبەستىك تالقى مىنبەسى باسشىلار ءماجىلىسىن وتكىزۋىن بەلسەنە قولدايدى. گۆينەيا - بيساۋ ءتوراعا شي جينپيڭ العا قويعان ”ءبىر بەلدەۋ، ءبىر جولدى“ بىرگە قۇرۋ باستاماسىن جانە دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن قولدايدى، جۇڭگو جاقپەن كوپ جاقتى ىستەردە بايلانىس جاساۋدى، سەلبەسۋدى جيىلەتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.

كەڭەستەن كەيىن ەكى ەلدىڭ مەملەكەت باسشىلارى دۇنيە جۇزىلىك دامۋ باستاماسىن تياناقتاندىرۋ، ەكونوميكالىق دامۋ، كەدەندىك تەكسەرۋ - كارانتيندەۋ، گەولوگيا جانە كەن كاسىبى سياقتى سالالارداعى كوپتەگەن ەكى جاقتى سەلبەستىك قۇجاتتارىنا قول قويۋعا بىرگە كۋا بولدى.

ەكى جاق «جۇڭحۋا حالىق رەسپۋبليكاسى مەن گۆينەيا - بيساۋ رەسپۋبليكاسىنىڭ ستراتەگيالىق سەرىكتەستىك قارىم - قاتىناس ورناتۋ جونىندەگى بىرلەسكەن مالىمدەمەسىن» جاريالادى.

كەڭەستەن بۇرىن شي جينپيڭ مەن حانىمى پىڭ لييۋان حالىق سارايىنىڭ شىعىس قاقپاسىنىڭ سىرتىنداعى الاڭدا ەمبالو مەن حانىمى دينيسيانى قارسى الۋ سالتىن وتكىزدى.

ەمبالو كەلگەن كەزدە قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن گۆينەيا - بيساۋ ەلدەرىنىڭ مەملەكەت ءانىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى. ەمبالو شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات سابىن كوردى.

سول كۇنى كەشتە شي جينپيڭ مەن پىڭ لييۋان حالىق سارايىنىڭ التىن ءتۇستى زالىندا ەمبالو مەن حانىمىنا ارناپ قارسى الۋ قوناعاسىن وتكىزدى.

ۋاڭ ي جوعارىداعى قيمىلدارعا قاتىناستى.

كەلۋ قاينارى: حالىق تورابى