شي جينپيڭ بانگلادەشتىڭ زۇڭليى حاسينامەن كەزدەستى

7 - ايدىڭ 10 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن بانگلادەشتىڭ زۇڭليى حاسينامەن كەزدەستى.

سۋرەتتى شينحۋا اگەنتتىگىنىڭ ءتىلشىسى ديڭ لين تۇسىرگەن

شينحۋا اگەنتتىگى، 7 - ايدىڭ 10 – كۇنى، بەيجيڭ (ءتىلشى جىڭ ميڭدا). 7 - ايدىڭ 10 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن بانگلادەشتىڭ زۇڭليى حاسينامەن كەزدەستى. ەكى ەل باسشىلارى جۇڭگو - بانگلادەش قارىم - قاتىناسىن جالپى بەتتىك ستراتەگيالىق سەلبەستىك سەرىكتەستىك قارىم - قاتىناس دەڭگەيىنە كوتەرۋدى جاريالادى.

شي جينپيڭ بىلاي دەپ اتاپ كورسەتتى: جۇڭگو مەن بانگلادەش ءوزارا تۇسىنەتىن، دوس كورشى ەلدەر، ەكى ەلدىڭ دوستىق بارىس - كەلىسى مىڭ جىلعا جالعاسقان. ديپلوماتيالىق قارىم - قاتىناس ورناتقاننان بەرى ەكى ەل باستان - اياق ءوزارا قۇرمەت ەتىپ، ءبىرىن - ءبىرى قولداپ، تەڭ تۇرعىدا مامىلە جاساپ، سەلبەسىپ تەڭ يگىلىككە كەنەلىپ، مەملەكەتتەر ارا، اسىرەسە، ”جەر شارىنىڭ وڭتۇستىگىندەگى“ ەلدەر اراسىنداعى دوستىق بارىس - كەلىستىڭ، ءوزارا پايدا جەتكىزىپ سەلبەسۋدىڭ ۇلگىسىن ورناتتى. جۇڭگو جاق ەكى ەلدىڭ اعا بۋىن باسشىلارى سومداعان ناعىز دوستىقتى قاستەرلەيدى، كەلەر جىلى ديپلوماتيالىق قارىم - قاتىناس ورناتۋدىڭ 50 جىلدىعىن وراي ەتىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى تەرەڭدەتىپ، ءار سالاداعى سەلبەستىكتىڭ تەرەڭدىگى مەن كەڭدىگىن ارتتىرىپ، جۇڭگو مەن بانگلادەشتىڭ جالپى بەتتىك ستراتەگيالىق سەلبەستىك سەرىكتەستىك قارىم - قاتىناسىنىڭ ورنىقتى، باياندى بولىپ، ۇزاققا جالعاسۋىن ىلگەرىلەتۋدى قالايدى.

شي جينپيڭ بىلاي دەپ باسا دارىپتەدى: ەكى جاق ءوزارا قولداۋ كورسەتەتىن تاڭداۋلى ءداستۇردى ساۋلەلەندىرىپ، ساياسي ءوزارا سەنىمدىلىكتى تەرەڭدەتۋى كەرەك. جۇڭگو جاق بانگلادەش جاقتىڭ دەربەس، ءوز - وزىنە قوجايىن بولۋ ديپلوماتيالىق ساياساتىن تاباندىلىقپەن اتقارىپ، ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن، مەملەكەتتىڭ يەلىك ۇقىعىن، تاۋەلسىزدىگىن، تەرريتوريا تۇتاستىعىن قورعاۋىن، ءارقانداي سىرتقى كيلىگۋگە قارسى تۇرۋىن قولدايدى. جۇڭگو جاق بانگلادەش جاقپەن پارتيانى باسقارۋ، مەملەكەتتى باسقارۋ تاجىريبەسى مەن دامۋ سالاسىندا ساياسات جاقتان اۋىس - كۇيىس ورىستەتىپ، دامۋ ستراتەگياسىن ۇشتاستىرۋدى كۇشەيتىپ، ەكونوميكا - ساۋدا، قارجى قوسۋ، ۇلاستىرۋ - تۇتاستىرۋ سياقتى سالالارداعى سەلبەستىكتى تەرەڭدەتىپ، اناعۇرلىم كوپ جۇڭگو كاسىپورىندارىنىڭ بانگلادەش جاقپەن كاسىپ سالاسى بويىنشا قارجى قوسۋ سەلبەستىگىن كۇشەيتۋىن قولداپ، ەكى ەلدىڭ كاسىپ سالاسى تىزبەگىنىڭ، قامداۋ تىزبەگىنىڭ توعىسا دامۋىن ىلگەرىلەتىپ، بانگلادەشتىڭ مەملەكەتتىڭ دامۋىن جۇزەگە اسىرۋىنا دەم بەرۋدى قالايدى. ەكى جاق كەلەر جىلعى ”جۇڭگو - بانگلادەش گۋمانيتارلىق اۋىس - كۇيىس جىلىن“ ويداعىداي وتكىزىپ، ەكى ەلدىڭ مادەنيەت، ساياحات، اقپارات، دەنە تاربيە سياقتى سالالارداعى اۋىس - كۇيىسىن، سەلبەستىگىن جەبەۋى كەرەك. جۇڭگو جاق بانگلادەش جاقپەن حالىقارالىق جانە وڭىرلىك ىستەردەگى سەلبەستىكتى نىعايتىپ، بىرلەسكەن مەملەكەتتەر ۇيىمى سياقتى كوپ جاقتى جۇلگەدە سايكەسۋ مەن سەلبەسۋدى كۇشەيتىپ، بۇكىل ادامزاتتىڭ ورتاق قۇندىلىعىن اسقاقتاتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.

حاسينا مىنالاردى ءبىلدىردى: بانگلادەش جاق جۇڭگومەن تەرەڭ دوستىعى بولعانىن ايرىقشا ماقتانىش ەتەدى، ءتوراعا شي جينپيڭنىڭ ءدانىشپان باسشىلىعىندا جۇڭگونىڭ ءتۇرلى قيىنشىلىقتار مەن سىن - سايىستى جەڭىپ، كۇن سايىن جاڭالانعان ۇلى تابىستارعا قول جەتكىزگەنىنە، حالىقتىڭ تۇرمىس دەڭگەيىن ۇزدىكسىز جوعارىلاتقانىنا ايرىقشا سۇيىنەدى. بانگلادەش ۇلت ازاتتىعىن جانە كەدەيلىكتەن ارىلتۋ، دامۋ ىستەرىن ىلگەرىلەتۋگە تاباندىلىقپەن كۇش سالادى، جۇڭگو جاقتىڭ وسى بارىستا بانگلادەش جاققا باعالى قولداۋ كورسەتكەنىنە العىس ايتادى. بانگلادەش جاق جۇڭگونىڭ تابىستى دامۋ تاجىريبەلەرىنەن ۇيرەنىپ جانە ۇلگى الىپ، ەكى ەلدىڭ ەكونوميكا - ساۋدا، نەگىزدىك قۇرىلعى، كەدەيلىكتەن ارىلتۋ سياقتى سالالارداعى سەلبەستىگىن كەڭەيتىپ، جاستار، مادەنيەت سياقتى گۋمانيتارلىق اۋىس - كۇيىستى كۇشەيتۋدى ءۇمىت ەتەدى. ”ءبىر بەلدەۋ، ءبىر جولدى“ بىرگە قۇرۋ باستاماسى وسى ءوڭىردىڭ ەكونوميكاسىنىڭ دامۋى مەن حالىق تۇرمىسىنىڭ جاقسارۋىن بارىنشا جەبەدى، بانگلادەش ”ءبىر بەلدەۋ، ءبىر جولدى“ بىرگە قۇرۋ سەلبەستىگىنە ۇزدىكسىز بەلسەنە ات سالىسادى. جۇڭگو جاقتىڭ بانگلادەشتىڭ وڭتۇستىگىن ءبىر تۇلعالاندىرىپ كوركەيتۋ جوسپارىنا بەلسەنە ات سالىسۋىن، بانگلادەشتىڭ ”2041 - جىلعا دەيىنگى دامۋ جوسپارىن“ جۇزەگە اسىرۋىنا دەم بەرۋىن قارسى الادى. بانگلادەش جاق ءبىر جۇڭگو پرينسيبىن بۇلجىماستان ۇستانادى، جۇڭگو جاقتىڭ تايۋان ماسەلەسىندەگى مايدانىن قولدايدى، سىرتقى كۇشتەردىڭ جۇڭگونىڭ ىشكى ىسىنە كيلىگۋىنە باتىل قارسى تۇرادى، جۇڭگو جاقتىڭ ءوزىنىڭ وزەكتى مۇددەسىن قورعاۋىن باتىل قولدايدى. بانگلادەش پەن جۇڭگونىڭ جالپى بەتتىك ستراتەگيالىق سەلبەستىك سەرىكتەستىك قارىم - قاتىناسىنىڭ، ءسوز جوق، اناعۇرلىم زور دامۋعا قول جەتكىزەتىنىنە سەنەمىز.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى