ورتالىق كوميتەت بىرلىكساپ ءبولىمىنىڭ بۇرىنعى ورىنباسار باستىعى، مەملەكەتتىك ءدىن ىستەرى مەكەمەسىنىڭ بۇرىنعى مەكەمە باستىعى سۇي ماۋحۋدىڭ پارا الۋ دەلوسىنا ءبىرىنشى سوتتا ۇكىم شىعارىلدى

شينحۋا اگەنتتىگىنىڭ 7 – ايدىڭ 23 - كۇنى شىنياڭنان بەرگەن حابارى: 7 – ايدىڭ 23 – كۇنى، لياۋنيڭ ولكەسى شىنياڭ قالالىق ورتا دارەجەلى حالىق سوت مەكەمەسى ورتالىق كوميتەت بىرلىكساپ ءبولىمىنىڭ بۇرىنعى ورىنباسار باستىعى، مەملەكەتتىك ءدىن ىستەرى مەكەمەسىنىڭ بۇرىنعى مەكەمە باستىعى سۇي ماۋحۋدىڭ پارا الۋ دەلوسىنا ءبىرىنشى سوتتا اشىق ۇكىم شىعارىپ، ايىپكەر سۇي ماۋحۋدى پارا الۋ قىلمىسى بويىنشا 11 جىلدىق مەرزىمدى قاماق جازاسىنا ۇكىم ەتتى، سونىمەن بىرگە ءبىر ميلليون 500 مىڭ يۋان ايىپ سالدى: پەشەتتەلگەن، ۇستاپ قالىنعان سۇي ماۋحۋدىڭ قىلمىس وتكىزىپ يە بولعان مال - مۇلكى جانە ونىڭ ءوسىمى زاڭ بويىنشا قايتارىپ الىنىپ، مەملەكەت قازىناسىنا تاپسىرىلدى، جەتپەگەن ءبولىمى جالعاستى قايتارىپ الىنادى.

تەكسەرۋ ارقىلى مىنالار انىقتالدى: 2007 - جىلدان 2023 - جىلعا دەيىن ايىپكەر سۇي ماۋحۋ يۇننان ولكەلىك پارتكوم ۇيىمداستىرۋ ءبولىمىنىڭ ورىنباسار باستىعى، ليجياڭ قالالىق پارتكومنىڭ شۋجيى، يۇننان ولكەسىنىڭ ورىنباسار ولكە باستىعى قاتارلى مىندەتتەردى وتەگەن كەزىندە مىندەت قولايلىلىعىنان پايدالانىپ، سونداي - اق قىزمەت ۇقىعى نەمەسە ورنى قالىپتاستىرعان قولايلى شارت - جاعدايدان پايدالانىپ، باسقالارعا قۇرىلىس كوتەرىپ الۋىنا اقشا بوساتىپ بەرۋ، كادرلاردى مىندەتكە تاعايىنداۋ سياقتى جاقتاردان پايدا جەتكىزىپ، قاتىستى ادامداردىڭ بەرگەن مال - مۇلكىن زاڭسىز قابىلداعان، جالپى سوماسى 10 ميلليون 430 مىڭ يۋان بولعان.

شىنياڭ قالالىق ورتا دارەجەلى حالىق سوت مەكەمەسى بىلاي دەپ قارادى: ايىپكەر سۇي ماۋحۋدىڭ ارەكەتى پارا الۋ قىلمىسىن قالىپتاستىرادى، پارا سوماسى توتەنشە كوپ، ونى زاڭ بويىنشا جازالاۋ كەرەك. سۇي ماۋحۋ سوتقا كەلگەننەن كەيىن ءوزىنىڭ قىلمىسىن قاز - قالپىندا مويىنداپ، باقىلاۋ - تەكسەرۋ ورگانى ءالى يگەرمەگەن ءبىر ءبولىم پارا الۋ قىلمىس فاكتىلەرىن ىرىقتىلىقپەن تاپسىرىپ، قىلمىسىن تانىپ، وكىنگەن، پاراعا العان ارام اقشانىڭ، ارام ولجانىڭ ءبىر ءبولىمىن قۋزاپ قايتارىپ العاندىقتان، زاڭدا بەلگىلەنگەن، جاعدايىنا قاراي جەڭىل جازا بەرۋگە ۇيلەسەتىن بولىپ، ونى زاڭ بويىنشا جەڭىل جازالاۋعا بولادى. سوت مەكەمەسى جوعارىداعىداي ۇكىم شىعاردى.

كەلۋ قاينارى: حالىق تورابى