ساۋدا مينيسترلىگى: قاتىستى مەملەكەتتەردىڭ ا ق ش – نىڭ ەكونوميكالىق جاقتان قىسىم جاساۋ تاسىلىنە قارسىلىق ءبىلدىرۋىن ءۇمىت ەتەمىز 

جۇڭگو اقپارات تورابىنىڭ ءتىلشىسى لي شياۋيۇي 7 – ايدىڭ 19 – كۇنى بەيجيڭنەن حابارلايدى. اقپارات قۇرالدارىنىڭ جۋىردا ”ا ق ش جارتىلاي وتكىزگىش قاتارلى سالالارداعى ەكسپورتتى تەجەۋدى اناعۇرلىم قاتاڭداتپاقشى“ دەگەن اقپاراتتى جاريالاعانى جونىندە، جۇڭگو ساۋدا مينيسترلىگىنىڭ مالىمدەمەشىسى 7 – ايدىڭ 19 – كۇنى: جۇڭگو جاق بۇعان باتىل قارسى تۇرادى، قاتىستى مەملەكەتتەردىڭ ا ق ش – نىڭ ەكونوميكالىق جاقتان قىسىم جاساۋ تاسىلىنە قارسىلىق ءبىلدىرۋىن ءۇمىت ەتەمىز، _ دەگەن.

اقپارات قۇرالدارى ”ا ق ش قازىر اناعۇرلىم قاتاڭ شارالاردى قولدانىپ، جاپونيا مەن گوللانديا قاتارلى مەملەكەتتەردىڭ كاسىپورىندارىنا قىسىم كورسەتۋدى ارتتىرىپ، وسى ارقىلى جۇڭگوعا باعىتتالعان چيپ ساۋداسىن ونان ارى شەكتەمەكشى“ دەپ حابارلاعان.

وسى جونىندە مالىمدەمەشى مىنانى ءبىلدىردى: جارتىلاي وتكىزگىش — بارىنشا جاھاندانعان كاسىپ سالاسى، نەشە ون جىل بويى دامۋ ارقىلى ءبىر – بىرىمەن بىتە قايناسقان كاسىپ سالاسىنىڭ اۋقىمى قالىپتاسقان، بۇل بازاردىڭ زاڭدىلىعى مەن كاسىپورىندار تالعامىنىڭ بىرگە رول اتقارۋىنىڭ ناتيجەسى. ءبىر مەزگىلدەن بەرى، ا ق ش مەملەكەت حاۋىپسىزدىگى ۇعىمىن قايتا – قايتا شەكتەن تىس كەڭەيتىپ، ەكسپورتتى تەجەۋ شارالارىن الباتى قولدانىپ، دۇنيە جۇزىندەگى جارتىلاي وتكىزگىش بازارىن قالاعانىنشا بولشەكتەپ، باسقا مەملەكەتتەردىڭ كاسىپورىندارىنىڭ اراسىنداعى قالىپتى ساۋدا – ەكونوميكا بارىس – كەلىسىنە بەتالدى كيلىگىپ، ەركىن ساۋدا پرينسيبى مەن كوپ جاقتى ساۋدا ەرەجەسىنە اۋىر دارەجەدە قايشىلىق جاساپ، دۇنيە جۇزىندەگى كاسىپ سالاسى تىزبەگى مەن قامداۋ تىزبەگىنىڭ ورنىقتىلىعىنا اۋىر دارەجەدە سوقتىقتى.

مالىمدەمەشى مىنانى ءبىلدىردى: قاتىستى مەملەكەتتەردىڭ بازار پرينسيبى مەن سوزىندە تۇرۋ رۋحىنا تاباندى بولىپ، ا ق ش – نىڭ ەكونوميكالىق جاقتان قىسىم جاساۋ تاسىلىنە قارسى تۇرىپ، دۇنيە جۇزىلىك كاسىپ سالاسى تىزبەگى مەن قامداۋ تىزبەگىنىڭ ورنىقتىلىعىن بىرگە قورعاۋىن ءۇمىت ەتەمىز.

كەلۋ قاينارى: حالىق تورابى