تاسقىننان ساقتانۋ، تاسقىنعا قارسى اتتانۋ، اپاتتان قۇتقارۋ قىزمەتىن اقىلداسىپ ورنالاستىردى

شينحۋا اگەنتتىگى، 7 - ايدىڭ 25 - كۇنى، بەيجيڭ. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى كوميتەتى 7 - ايدىڭ 25 - كۇنى ءماجىلىس اشىپ، تاسقىننان ساقتانۋ، تاسقىنعا قارسى اتتانۋ، اپاتتان قۇتقارۋ قىزمەتىن اقىلداسىپ ورنالاستىردى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ ءماجىلىستى باسقاردى ءارى ماڭىزدى ءسوز سويلەدى.

ءماجىلىس مىنالاردى اتاپ كورسەتتى: بيىل ەلىمىز كليماتىنىڭ جىلدىق جاعدايىندا اۋىتقۋ بولدى، سۇراپىل نوسەر وتە كوپ جاۋدى، ۋاقىتى ۇزاق بولدى، وزەن ـ داريالاردا تاسقىن ەرتە تۋىلىپ، تەز اسقىندى، كەيبىر جەرلەردە قايتا ـ قايتا نوسەر جاۋىپ، تاسقىننان ساقتانۋ، تاسقىنعا قارسى اتتانۋ جاعدايى اۋىر دا كۇردەلى بولدى. شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ پارمەندى باسشىلىعىندا، ءار دارەجەلى پارتكومدار مەن ۇكىمەتتەر جەدەل ارەكەتتەنىپ، بار كۇشپەن توتەپ بەردى، مەملەكەتتىك تاسقىننان ساقتانۋ باس قولباسشىلىق شتابى، قاتىستى تاراۋلار مەن ورىندار مىندەت اتقارىپ، جاۋاپكەرلىكتى ادا ەتىپ، تىزە قوسا سەلبەستى، ازاتتىق ارميا مەن قارۋلى ساقشى بولىمدەرى، مەملەكەتتىڭ ءورت ءسوندىرۋ، ورتتەن ساقتانۋ امبەباپ قۇتقارۋ ـ كومەكتەسۋ قوسىنى جانە ءتۇرلى كاسىپتىك قۇتقارۋ ـ كومەكتەسۋ كۇشتەرى بۇيرىقتى ەستي سالا اتتانىسقا كەلىپ، اتويلاپ الدا ءجۇردى، قالىڭ كادرلار مەن بۇقارا جاپا ـ ماشاقاتتا بىرگە بولىپ، ەل بىرلىگىنەن بەرىك قامال تۇرعىزدى، اتا مەكەندى قورعاۋدىڭ بەرىك قورعانىس شەبىن بىرگە قۇرىپ، تاسقىننان ساقتانۋ، تاسقىنعا قارسى اتتانۋ، اپاتتان قۇتقارۋدا ماڭىزدى كەزەڭدىك تابىسقا قول جەتكىزدى.

ءماجىلىس مىنالاردى باسا دارىپتەدى: قازىر ەلىمىز تاسقىننان ساقتانۋدىڭ شىلدەنىڭ سوڭى، تامىزدىڭ باسىنداعى شەشۋشى مەزگىلىنە ءدوپ كەلىپ وتىر، چاڭجياڭ وزەنى سياقتى اعارلاردا تاسقىننان ساقتانۋ ەڭ جوعارى ورلەۋگە كوتەرىلدى، تاسقىننان ساقتانۋ توسپاسىنىڭ، تاسقىن سۋىن ىعىستىرۋدىڭ قىسىمى ازايمايدى، حۋاڭحى، حۋايحى، حايحى، سۇڭلياۋ الابىندا ءبىرشاما اۋىر تاسقىن جاعدايى تۋىلۋى مۇمكىن، قاباتتاسقان تايفىڭ داۋىلى كۇشەيۋ مەزگىلىنە ءوتتى، تاسقىننان ساقتانۋ جاعدايى ءتىپتى دە قيىن، كۇردەلى. قاتىستى وڭىرلەر، تاراۋلار جانە ورىندار تاسقىننان ساقتانۋ، تاسقىنعا قارسى اتتانۋ سىندى ارقاۋدى باستان ـ اياق مىقتاپ شيراتىپ، قىزمەتتىڭ ىرىقتىلىق ۇقىعىن مىقتاپ يگەرىپ، تاسقىننان ساقتانۋ، تاسقىنعا قارسى اتتانۋ، اپاتتان قۇتقارۋ سىندى قيان ـ كەسكى شايقاستىڭ جەڭىسىنە باتىل قول جەتكىزۋى كەرەك.

ءماجىلىس مىنالاردى اتاپ كورسەتتى: حالىقتىڭ ءومىرىنىڭ حاۋىپسىزدىگىن قامتاماسىز ەتۋدى باستان ـ اياق ءبىرىنشى ورىنعا قويىپ، باقىلاۋ ـ تەكسەرۋ ءتاسىلىن ونان ارى كەمەلدەندىرىپ، ساقتاندىرۋدىڭ دالدىگىن جوعارىلاتىپ، ساقتاندىرۋ مەن شۇعىل جاعدايعا توتەپ بەرۋدىڭ ىقپالداستىعىن كۇشەيتىپ، ءۇن قوسۋ قارقىنىن جوعارىلاتىپ، ساقتانۋ ءتۇيىنىن كورنەكتىلەندىرىپ، نەگىزگى ساتىنىڭ جيەكتەرىنە قاداعالاي نازار اۋدارىپ، قاتەرلى وڭىرلەردەگى بۇقارانى كۇنى بۇرىن باتىل كوشىرىپ، ءولىم ـ ءجىتىمدى مۇمكىندىكتىڭ بارىنشا ازايتۋ كەرەك. ماڭىزدى توسپا، سۋ قويمالارى مەن نەگىزدىك قۇرىلعىلاردىڭ حاۋىپسىزدىگىنە شىنايى كەپىلدىك ەتىپ، تاسقىننان ساقتانۋ، شارلاۋ، قورعانۋ ءتۇزىمىن تياناقتاندىرىپ، ءالسىز توسپا بولەكتەرىنىڭ، قاتەرلى جۇمىس بولەكتەرىنىڭ، قاتەرلى سۋ قويمالارىنىڭ ءتۇيىندى قورعانۋىن كورنەكتىلەندىرىپ، حاۋىپ ـ قاتەردى تەكسەرۋ، حاۋىپ ـ قاتەردى الاستاۋ تەبىنىن ارتتىرىپ، ۇلكەن وزەن توسپالارىنىڭ ورىلۋىنان، ءىرى جانە ءتۇيىندى ورتا تۇرپاتتى سۋ قويمالارىنىڭ قۇلاۋىنان باتىل ساقتانۋ كەرەك. تاسقىننان ساقتانۋ ينجەنەرياسىن عىلمي ورنالاستىرىپ، تاسقىن ىركۋ رايونىنان پايدالانۋ دايىندىعىن ناقتىلاندىرۋ كەرەك. وڭتۇستىكتىڭ سۋىن سولتۇستىككە جەتكىزۋ، باتىستىڭ گازىن شىعىسقا جەتكىزۋ، تاس جول، تەمىر جول سياقتى ماڭىزدى نەگىزدىك قۇرىلعىلارعا، سونداي - اق قالانىڭ جەر استى كەڭىستىگى، كوپىر، تۋنەل سياقتى ءتۇيىندى ورىندارعا باعىتتاي وتىرىپ، حاۋىپ - قاتەر كومەسكى قاتەرىن ونان ارى تەكسەرىپ، شۇعىل جاعدايعا توتەپ بەرۋ شارالارىن تياناقتاندىرىپ، حاۋىپسىز اينالىمعا كەپىلدىك ەتۋ كەرەك.

ءماجىلىس مىنالاردى باسا دارىپتەدى: قاتەردەن اراشالاۋ، كومەكتەسۋ، اپاتتان قۇتقارۋ قىزمەتىن بار كۇشپەن ورىستەتىپ، ءبىر تۇتاس ورنالاستىرۋدى جانە الدىن الا ورنالاستىرۋدى كۇشەيتۋ كەرەك. ازاتتىق ارميا، قارۋلى ساقشى بولىمدەرى، ءورت ءسوندىرۋ، ورتتەن ساقتانۋ، ورتالىق كاسىپورىندارى سياقتى ءار جاقتاعى كۇشتەر قاي ـ قاشان دا شۇعىل جاعدايعا توتەپ بەرۋ جاعدايىن ساقتاپ، ءبىر تۇتاس ورنالاستىرۋعا بويسۇنىپ، تەز قيمىلداۋعا، جوعارى ءونىمدى قۇتقارۋعا كەپىلدىك ەتۋى كەرەك. اپاتتان قۇتقارۋ قارجىسىن دەر كەزىندە بوساتىپ، اپاتتان قۇتقارۋ زاتتىق ماتەريالدارىن جەتكىزىپ، قامسىزداندىرۋ تولەمىن جەدەل تولەپ، اپاتقا ۇشىراعان بۇقارانى ۇيلەسىمدى ورنالاستىرىپ، بۇقارانىڭ ەمدەلۋى، وقۋشىلاردىڭ وقۋ باستاۋى سياقتى قاجەتىن ويداعىداي قامتاماسىز ەتۋ كەرەك. سۋ يگىلىگى، ەلەكتر قۋاتى، قاتىناس، حابارلاسۋ سياقتى بۇلىنگەن نەگىزدىك قۇرىلعىلاردى جەدەل جوندەپ، اپاتقا ۇشىراعان بۇقارانى ءوندىرىستى قالپىنا كەلتىرۋگە، اتا مەكەندەرىن قايتا قۇرۋعا ۇيىمداستىرۋ جانە باستاۋ كەرەك. اۋىل شارۋاشىلىعىنىڭ اپاتتان ساقتانۋ، اپات زيانىن ازايتۋ قىزمەتىن تىڭعىلىقتى ىستەپ، اۋىل شارۋاشىلىعىنىڭ زيانىن مۇمكىندىكتىڭ بارىنشا ازايتىپ، مەملەكەتتىڭ استىق حاۋىپسىزدىگىن قامتاماسىزداندىرۋ كەرەك. اپاتقا ۇشىراعان قيىنشىلىعى بار بۇقاراعا كوڭىل ءبولىپ، كومەكتەسىپ، اپات سەبەبىنەن كەدەيلەسۋدەن، قايتا كەدەيلەسۋدەن ساقتانۋ كەرەك. شۇعىل جاعدايعا توتەپ بەرۋ، قامتاماسىز ەتۋ قابىلەتى قۇرىلىسىن كۇشەيتىپ، قالانىڭ تاسقىننان ساقتانۋ، تاسقىن سۋىن ىعىستىرۋ قۋاتىن جوعارىلاتىپ، كىناراتتى، قاتەرلى سۋ قويمالارى، ورتا، شاعىن وزەن توسپالارى، تاسقىن ىركۋ رايونى سياقتى تاسقىننان ساقتانۋ ينجەنەريالارى مەن ەگىس اتىزدارىنىڭ تاسقىن سۋىن ىعىستىرۋداعى ولقىلىقتاردى تولىقتاپ، جاراتىلىستىق اپاتتاردىڭ جالپىلىق حاۋىپ ـ قاتەرىن جاپپاي تەكسەرۋ جەتىستىكتەرىنەن ويداعىداي پايدالانىپ، نەگىزگى ساتىنىڭ شۇعىل جاعدايعا توتەپ بەرۋ نەگىزى مەن كۇشىن نىعايتىپ، تۇتاس قوعامنىڭ اپات زيانىن جان ـ جاقتى ازايتۋ قابىلەتىن ۇزدىكسىز جوعارىلاتۋ كەرەك.

ءماجىلىس مىنالاردى تالاپ ەتتى: ءار دارەجەلى پارتكومدار مەن ۇكىمەتتەر پارتيا ورتالىق كوميتەتىنىڭ شەشىمدەرىن، ورنالاستىرۋلارىن مۇقيات دايەكتىلەندىرىپ، تياناقتاندىرىپ، ءبىر جاقتىڭ دامۋىن جەبەۋ، ءبىر جاقتىڭ اماندىعىنا كەپىلدىك ەتۋ ساياسي جاۋاپكەرلىگىن شىنايى ارقالاۋى، مەملەكەتتىك تاسقىننان ساقتانۋ، قۋاڭشىلىققا قارسى اتتانۋ باس قولباسشىلىق شتابى ءبىر تۇتاس جوسپارلاپ سايكەستىرۋدى كۇشەيتۋى، ءار دارەجەلى باسشى كادرلار الدىڭعى شەپتە قولباسشىلىق ەتۋى، قاتىستى جاقتار تىعىز سايكەسىپ، بىرىككەن كۇش ۇيىستىرۋى كەرەك. نەگىزگى ساتى پارتيا ۇيىمدارى مەن قالىڭ پارتيالى كادرلار جاۋىنگەر قامالدىق جانە اۆانگارد ۇلگىلىك رولىن تولىق ساۋلەلەندىرىپ، تاسقىننان ساقتانۋ، تاسقىنعا قارسى اتتانۋ، اپاتتان قۇتقارۋ ءبىرىنشى شەبىندە ەرلىكپەن العا ۇمتىلىپ، جاۋاپكەرلىكتى باتىلدىقپەن ارقالاپ، حالىق بۇقاراسىنىڭ ءومىرى مەن مال ـ مۇلكىنىڭ حاۋىپسىزدىگىن بار كۇشپەن قامتاماسىز ەتۋى كەرەك.

ءماجىلىس باسقا ىستەردى دە اقىلداستى.

كەلۋ قاينارى: حالىق تورابى