شي جينپيڭ فيجيدىڭ زۇڭليى رامبۋكامەن كەزدەستى

8 - ايدىڭ 20 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا رەسمي ساپارمەن كەلگەن فيجيدىڭ زۇڭليى رامبۋكامەن كەزدەستى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

شينحۋا اگەنتتىگى، 8 - ايدىڭ 20 – كۇنى، بەيجيڭ (ءتىلشى ۋىن شين). مەملەكەت ءتوراعاسى شي جينپيڭ 8 - ايدىڭ 20 - كۇنى تۇستەن كەيىن بەيجيڭدەگى حالىق سارايىندا جۇڭگوعا رەسمي ساپارمەن كەلگەن فيجيدىڭ زۇڭليى رامبۋكامەن كەزدەستى.

شي جينپيڭ فيجي ەرلەر 7 ادامدىق زايتۇن دوپ كومانداسىنىڭ پاريج وليمپياداسىندا كۇمىس مەدال العانىن قۇتتىقتادى. شي جينپيڭ بىلاي دەپ اتاپ كورسەتتى: فيجي − جاڭا جۇڭگومەن ەڭ ەرتە ديپلوماتيالىق قارىم - قاتىناس ورناتقان تىنىق مۇحيتتاعى ارال ەلى، كەلەر جىلى جۇڭگو مەن فيجيدىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىن قارسى الامىز. جارىم عاسىرعا تاياۋ ۋاقىتتان بەرى ەكى ەل باستان - اياق ءوزارا قولداۋ كورسەتىپ، ءوزارا كومەكتەسىپ، ۇلكەن - كىشى ەلدەردىڭ تەڭ مامىلە جاساۋىنىڭ، دوستىق سەلبەستىگىنىڭ ۇلگىسىنە اينالدى. جۇڭگو جاق جۇڭگو – فيجي قارىم - قاتىناسىنا ايرىقشا ءمان بەرەدى، فيجيدىڭ ەكونوميكالىق، قوعامدىق دامۋىنا قولىنان كەلگەنىنشە ۇزدىكسىز كومەكتەسىپ، فيجي جاقپەن بىرگە ەكى ەل قارىم - قاتىناسىنىڭ جالپى بەتالىسىن يگەرىپ، جۇڭگو - فيجي تاعدىرلاس ورتاق تۇلعاسىن قۇرۋدى ىلگەرىلەتىپ، ەكى ەل حالىقتارىن اناعۇرلىم ويداعىداي باقىتقا كەنەلتۋدى قالايدى.

شي جينپيڭ رامبۋكانىڭ يۇنناندا، فۋجياندا، جىجياڭدا ساپاردا بولۋ جاعدايمەن جانە اسەرىمەن ۇشتاستىرىپ، جۇڭگونىڭ كەدەيلەردى سۇيەمەلدەۋ، كەدەيلىكتى ازايتۋ جاعىنداعى قولدانعان ادىستەرى مەن تاجىريبەلەرىن تانىستىردى. شي جينپيڭ بىلاي دەپ باسا دارىپتەدى: ءبىر ميلليارد 400 ميلليوننان استام حالىق جاپپاي دوڭگەلەك داۋلەتتى قوعامعا بىرگە قادام تاستادى، مۇنى جۇڭگو كوممۋنيستىك پارتياسىنىڭ جۇڭگو حالقىنا باسشىلىق ەتىپ قول جەتكىزگەن تاريحي تابىسى ءارى جۇڭگونىڭ ادامزاتتىڭ كەدەيلىكتى ازايتۋ جانە دامۋ ىستەرىنە قوسقان تاريحي ۇلەسى دەۋگە بولادى. وسى بارىستا ءبىز ءاربىر ۇلتتىڭ، ءاربىر رايوننىڭ، ءاربىر ادامنىڭ قاعىس قالماۋىنا كەپىلدىك ەتىپ، سوتسياليستىك ءتۇزىمنىڭ كۇشتى شوعىرلاندىرا وتىرىپ ءىرى ىستەردى ىستەۋ ساياسي ابزالدىعىن تولىق ايگىلەپ، بۇكىل جۇڭگوداعى 56 ۇلت حالقىنىڭ شىن جۇرەكتەن قولداۋى مەن قۋاتتاۋىنا يە بولدىق. قازىر جۇڭگودا جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسى، ۇلتتى گۇلدەندىرۋ ۇلى ءىسى جاپپاي ىلگەرىلەۋدە، جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءۇشىنشى جالپى ماجىلىسىندە رەفورمانى ونان ارى جاپپاي تەرەڭدەتىپ، جۇڭگو ۇلگىسىندەگى وسىزامانداندىرۋدى ىلگەرىلەتۋگە ستراتەگيالىق ورنالاستىرۋ جاسالدى. جۇڭگو ۇلگىسىندەگى وسىزامانداندىرۋ − بەيبىت دامۋ جولىمەن جۇرۋگە تاباندى بولاتىن وسىزامانداندىرۋ. جۇڭگو مەن فيجيدىڭ ءار ەكەۋى دە ”جەر شارىنىڭ وڭتۇستىگىندەگىلەرگە“ جاتادى، جۇڭگو فيجي قاتارلى تىنىق مۇحيتتاعى ارال ەلدەرىنىڭ كليمات وزگەرىسىنە توتەپ بەرۋىنە كومەك بەرىپ، دامۋ سەلبەستىگىن كۇشەيتىپ، تىنىق مۇحيتتى تىنىشتىق مۇحيتىنا، دوستىق مۇحيتىنا، سەلبەستىك مۇحيتىنا اينالدىرۋدى قالايدى.

رامبۋكا جۇڭگو دەنە تاربيە ۋاكىلدەر ۇيىرمەسىنىڭ پاريج وليمپياداسىندا ۇزدىك ناتيجەگە قول جەتكىزگەندىگىن قۇتتىقتادى. رامبۋكا مىنانى ءبىلدىردى: مەن 30 جىلدىڭ الدىندا زۇڭلي رەتىندە جۇڭگودا ساپاردا بولعانمىن، وسى رەتكى ساپارىم كەزىندە يۇننان، فۋجيان، جىجياڭ سياقتى جەرلەرگە بارىپ ەكسكۋرسيادا، ساپاردا بولىپ، جۇڭگونىڭ ءتوراعا شي جينپيڭنىڭ باسشىلىعىندا كەدەيلىكتى جويۋ جانە دامۋ جاعىندا قول جەتكىزگەن ۇلى كەرەمەتتەرى مەن وراسان زور تابىستارىنا ءوز كوزىممەن كۋا بولدىم، بۇعان ەرەكشە سۇيىنەمىن. مەن جۇڭگونىڭ وزىق تانىمى مەن تابىستى تاجىريبەلەرىنەن ۇيرەنۋدى، ۇلگى الۋدى، اسىرەسە، نەگىزگى ساتىعا ىشكەرىلەي ارالاسىپ، حالىقتىڭ ۇنىنە قۇلاق اسىپ، جۇڭگو جاقپەن كەدەيلىكتى ازايتۋ، نەگىزدىك قۇرىلعى، ۇلاستىرۋ - تۇتاستىرۋ سياقتى سالالارداعى سەلبەستىكتى كۇشەيتۋدى ءۇمىت ەتەمىن. فيجي جاق جۇڭگو جاقتىڭ بەيبىت قاتار تۇرۋ 5 پرينسيبىنە تاباندى بولعاندىعىن القايدى، ءتوراعا شي جينپيڭ العا قويعان جەلىلەس دۇنيە جۇزىلىك باستامالاردى قولدايدى، جۇڭگو جاقپەن ”ءبىر بەلدەۋ، ءبىر جولدى“ ۇزدىكسىز كۇش سالا بىرگە قۇرىپ، تىنىق مۇحيتتاعى ارال ەلدەرىنىڭ جۇڭگومەن قارىم - قاتىناسىنىڭ دامۋىن جەبەپ، تىنىق مۇحيتتى تىنىشتىق مۇحيتىنا اينالدىرۋدى قالايدى. فيجي جاق جۇڭگو جاقتىڭ تايۋان ماسەلەسىندەگى مايدانىن بۇكىلدەي تۇسىنەدى، ءبىر جۇڭگو ساياساتىن ۇزدىكسىز باتىل اتقارادى.

ەكى جاق «جۇڭحۋا حالىق رەسپۋبليكاسى مەن فيجي رەسپۋبليكاسىنىڭ بىرلەسكەن مالىمدەمەسىن» جاريالادى.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى