جۇڭحۋا ۇلتى ورتاق تۇلعا قۇرىلىسىن ىلگەرىلەتىپ، جۇڭحۋا ۇلتىنىڭ ۇلى ىنتىماعىن بەكەمدەۋ جانە دامىتۋ كەرەك

9 - ايدىڭ 27 - كۇنى مەملەكەتتىك ۇلتتار ىنتىماعى، العاباسارلىعى جونىندەگى ماداقتاۋ - سيلاۋ جينالىسى بەيجيڭدە وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ جينالىسقا قاتىناستى ءارى ماڭىزدى ءسوز سويلەدى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

9 - ايدىڭ 27 - كۇنى مەملەكەتتىك ۇلتتار ىنتىماعى، العاباسارلىعى جونىندەگى ماداقتاۋ - سيلاۋ جينالىسى بەيجيڭدە وتكىزىلدى. سۋرەتتە: شي جينپيڭ قاتارلىلار ماداقتالىپ - سيلانعان ۇلگىلى جەكەلەر مەن ۇلگىلى كوللەكتيۆتەردىڭ ۋاكىلدەرىنە سيلىق تاراتۋدا.

سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

«حالىق گازەتى»، 9 - ايدىڭ 27 – كۇنى، بەيجيڭ. مەملەكەتتىك ۇلتتار ىنتىماعى، العاباسارلىعى جونىندەگى ماداقتاۋ - سيلاۋ جينالىسى 9 - ايدىڭ 27 - كۇنى تۇستەن بۇرىن بەيجيڭدە وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ جينالىسقا قاتىناستى ءارى ماڭىزدى ءسوز سويلەدى (ءسوزدىڭ تولىق مازمۇنىن «حالىق گازەتىنىڭ» 2 – بەتىنەن وقي الاسىزدار). ول بىلاي دەپ باسا دارىپتەدى: جاڭا ءداۋىر جۇڭگوشا سوتسياليزم يدەياسىن، اسىرەسە، پارتيانىڭ ۇلت قىزمەتىن كۇشەيتۋ جانە جاقسارتۋ جونىندەگى ماڭىزدى يدەياسىن جاپپاي دايەكتىلەندىرىپ، جۇڭحۋا ۇلتى ورتاق تۇلعا تانىمىن بەكەمدەۋدى نەگىزگى جەلى ەتۋگە تاباندى بولىپ، ۇلتتار ىنتىماعى، العاباسارلىعى ىستەرىن ۇزدىكسىز ىلگەرىلەتىپ، جاڭا داۋىردەگى پارتيانىڭ ۇلت قىزمەتىنىڭ جوعارى ساپالى دامۋىن جەبەپ، جۇڭحۋا ۇلتى ورتاق تۇلعا قۇرىلىسىن ىلگەرىلەتىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋ جولىندا قاجىماي - تالماي كۇرەس جۇرگىزۋ كەرەك.

لي چياڭ جينالىستى باسقاردى، ۋاڭ حۋنيڭ ماداقتاۋ - سيلاۋ قاۋلىسىن وقىدى، جاۋ لىجي، ساي چي، ديڭ شۋەشياڭ، لي شي قاتىناستى.

تۇستەن بۇرىن ساعات 10 دا جينالىس باستالدى، بارلىق ادام ورىندارىنان تۇرىپ، جۇڭحۋا حالىق رەسپۋبليكاسىنىڭ مەملەكەت ءانىن اسقاقتاتا شىرقادى.

ۋاڭ حۋنيڭ «جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك كەڭەستىڭ مەملەكەتتىك ۇلتتار ىنتىماعى، العاباسارلىعىنداعى ۇلگىلى كوللەكتيۆتەر مەن ۇلگىلى جەكەلەردى ماداقتاۋ - سيلاۋ جونىندەگى قاۋلىسىن» وقىدى (قاۋلىنىڭ تولىق مازمۇنى بولەك جاريالاندى). 352 ۇلگىلى كوللەكتيۆ، 368 ۇلگىلى جەكە ماداقتالىپ - سيلاندى.

مەرەيلى مۋزىكا اۋەنى ىشىندە شي جينپيڭ قاتارلىلار ماداقتالىپ - سيلانعان ۇلگىلى جەكەلەر مەن ۇلگىلى كوللەكتيۆتەردىڭ ۋاكىلدەرىنە سيلىق تابىستادى.

قىزۋ قول شاپالاق ءۇنى ىشىندە شي جينپيڭ ماڭىزدى ءسوز سويلەدى. ول الدىمەن پارتيا ورتالىق كوميتەتى مەن مەملەكەتتىك كەڭەس اتىنان ماداقتالىپ - سيلانعان ۇلگىلى كوللەكتيۆتەر مەن جەكەلەردى قىزۋ قۇتتىقتادى، ۇلت قىزمەتى شەبىندەگى جولداستارعا، ۇلتتار ىنتىماعى، العاباسارلىعى ىستەرىنە كوڭىل بولگەن جانە ونى قولداعان ءار جاقتاعى قايراتكەرلەرگە شىنايى سالەم جولدادى.

شي جينپيڭ بىلاي دەپ اتاپ كورسەتتى: جۇڭگو كوممۋنيستىك پارتياسى ەجەلدەن بەرى ۇلت قىزمەتىنە ايرىقشا ءمان بەرىپ كەلەدى. 100 نەشە جىلدان بەرى ءبىز ماركسيزمدىك ۇلت نازارياسىن جۇڭگونىڭ ۇلت ماسەلەسىنىڭ ناقتى ءىس جۇزىندىگىمەن ءوزارا ۇشتاستىرۋعا، جۇڭحۋانىڭ تاڭداۋلى ءداستۇرلى مادەنيەتىمەن ءوزارا ۇشتاستىرۋعا تاباندى بولىپ، ۇلت ماسەلەسىن شەشۋدىڭ جۇڭگوشا دۇرىس جولىن جاسامپازدىقپەن اشتىق. وسى جولدا پارتيا بۇكىل ەلدەگى ءار ۇلت حالقىن ىنتىماقتاستىرىپ، باستاپ، ۇلت تاۋەلسىزدىگى مەن حالىق ازاتتىعىن جۇزەگە اسىرىپ، ۇلتتاردىڭ تەرەزەسى تەڭ، ىنتىماقتى، قارايلاسىمدى، جاراسىمدى قاتىناسىن دامىتۋدىڭ جاڭا جاعدايىن جاراتىپ، ۇلتتار وڭىرلەرىنىڭ ەكونوميكالىق، قوعامدىق دامۋدا جانە از ۇلت بۇقاراسىنىڭ تۇرمىسىندا بۇرىن بولماعان ىلگەرىلەۋشىلىككە قول جەتكىزۋىن ىلگەرىلەتتى، ەلىمىزدە از ۇلتتاردىڭ بەت - بەينەسىندە، ۇلتتار وڭىرلەرىنىڭ بەت - بەينەسىندە، ۇلت قاتىناسىنىڭ بەت - بەينەسىندە، جۇڭحۋا ۇلتىنىڭ بەت - بەينەسىندە وراسان زور تاريحي وزگەرىستەر تۋىلدى.

شي جينپيڭ بىلاي دەپ باسا دارىپتەدى: پارتيا 18 - قۇرىلتايىنان بەرى ءبىز ماركسيزمدىك ۇلت نازارياسىنىڭ جۇڭگوشالانۋىن، زامانالانۋىن ۇزدىكسىز ىلگەرىلەتىپ، جۇڭحۋا ۇلتى ورتاق تۇلعا تانىمىن بەكەمدەۋدى جاڭا داۋىردەگى پارتيانىڭ ۇلت قىزمەتىنىڭ نەگىزگى جەلىسى، ۇلتتار وڭىرلەرىنىڭ ءتۇرلى قىزمەتتەرىنىڭ نەگىزگى جەلىسى ەتۋدى ايقىن العا قويىپ، پارتيانىڭ ۇلت قىزمەتىن كۇشەيتۋ جانە جاقسارتۋ جونىندەگى ماڭىزدى يدەياسىن قالىپتاستىرىپ، ۇلتتار وڭىرلەرىنىڭ بۇكىل ەلمەن بىرگە كەدەيلىكتەن ارىلتۋدان قامال الۋ شايقاسىنىڭ جەڭىسىنە قول جەتكىزىپ، جاپپاي دوڭگەلەك داۋلەتتى قوعام ورناتىپ، جاپپاي سوتسياليستىك وسىزاماندانعان مەملەكەت قۇرۋدىڭ جاڭا جورىعىنا قادام تاستاۋىن جەبەپ، پارتيانىڭ ۇلت قىزمەتىندە تاريحي تىڭ تابىستارعا قول جەتكىزدىك.

شي جينپيڭ بىلاي دەپ اتاپ كورسەتتى: ۇلت ماسەلەسىن شەشۋدىڭ جۇڭگوشا جولى جۇڭحۋا ۇلتىنىڭ ءتۇبىرلى مۇددەسى مەن جالپى تۇلعالىق مۇددەسىن كوزدەپ، ءار ۇلتتى ەڭ جوعارعى شەكتە ۇيىستىرىپ، ۇلتتاردىڭ بىرگە ىنتىماقتاسا كۇرەس جۇرگىزۋىن، بىرگە گۇلدەنىپ - كوركەيۋىن، دامۋىن جۇزەگە اسىردى؛ ۇلتتاردىڭ تەرەزەسىنىڭ تەڭ بولۋىنا تاباندى بولىپ، ۇلتتىق ەزگىگە جانە ۇلتتىق كەمسىتۋگە قارسى تۇرىپ، ءار ۇلت حالقىنىڭ شىن مانىندە تەرەزەسى تەڭ ساياسي ۇقىققا قول جەتكىزۋىنە، بىرگە وزىنە - ءوزى قوجايىن بولۋىنا شىنايى كەپىلدىك ەتتى؛ مەملەكەتتىڭ تۇتاستىعىن قورعاۋ مەن ۇلتتىق وڭىرلىك اۆتونوميانى اتقارۋدىڭ قاتىناسىن دۇرىس يگەرىپ، ءبىر تۇتاستىق پەن اۆتونوميانى ءوزارا ۇشتاستىرۋعا، ۇلت فاكتورى مەن ءوڭىر فاكتورىن ءوزارا ۇشتاستىرۋعا تاباندى بولىپ، جۇڭحۋا ۇلتىنىڭ شىنايى مويىندالۋ دارەجەسى اناعۇرلىم جوعارى، ۇيىسۋ قۋاتى اناعۇرلىم كۇشتى تاعدىرلاس ورتاق تۇلعاعا اينالۋىن جەبەدى. اماليات وسى جولدىڭ بۇكىلدەي دۇرىس ەكەندىگىن دالەلدەدى.

شي جينپيڭ بىلاي دەپ باسا دارىپتەدى: جۇڭحۋا ۇلتى − 5000 جىلدان استام وركەنيەت تاريحى بار ۇلى ۇلت، ءار ۇلت وتانىمىزدىڭ ۇلان - بايتاق جەرىن بىرگە اشىپ، ءبىر تۇتاس، كوپ ۇلتتى مەملەكەتتىڭ نەگىزىن بىرگە قالاپ، شۇعىلالى جۇڭگو تاريحىن بىرگە جازىپ، شۇعىلالى جۇڭحۋا مادەنيەتىن بىرگە جاراتىپ، ۇلى ۇلت رۋحىن بىرگە جەتىلدىردى. ءار ۇلتتىڭ تامىرىنىڭ توعىسۋى − جۇڭحۋا ۇلتى ورتاق تۇلعاسىنىڭ قالىپتاسۋى مەن دامۋىنىڭ تاريحي نەگىزى؛ ءار ۇلتتىڭ سەنىمىنىڭ ۇقساس بولۋى − جۇڭحۋا ۇلتىنىڭ ءبىر تۇتاس كوپ ۇلتتى مەملەكەت قۇرۋىنىڭ ىشكى قوزعاۋشى كۇشى؛ ءار ۇلتتىڭ مادەنيەتىنىڭ ءوزارا توعىسۋى − جۇڭحۋا ۇلتىنىڭ كوپ نەگىزدى، ءبىر تۇلعالى وركەنيەت جاعدايىن قالىپتاستىرۋىنىڭ مادەنيەت گەنى؛ ءار ۇلتتىڭ ەكونوميكادا ءبىر - بىرىنە ارقا سۇيەۋى − جۇڭحۋا ۇلتىنىڭ ءبىر تۇتاس ەكونوميكالىق تۇلعا قۇرۋىنىڭ قۋاتتى كۇشى؛ ءار ۇلتتىڭ ءبىر - بىرىنە ەتەنە سۇيىسپەنشىلىگى − جۇڭحۋا ۇلتىنىڭ ءبىر ءۇيلى جانداي ەتەنە بولۋىنىڭ بەرىك دانەكەرى. جۇڭحۋا ۇلتى ورتاق تۇلعاسىنىڭ قالىپتاسۋى مەن دامۋى − حالىقتىڭ قالاۋى، ۇلكەن اۋقىم، تاريحي سوزسىزدىك.

شي جينپيڭ بىلاي دەپ اتاپ كورسەتتى: پارتيانىڭ باسشىلىعىنا باستان - اياق تاباندى بولىپ، ءار ۇلت بۇقاراسىن ۇلى وتاندى، جۇڭحۋا ۇلتىن، جۇڭحۋا مادەنيەتىن، جۇڭگو كوممۋنيستىك پارتياسىن، جۇڭگوشا سوتسياليزمدى شىنايى مويىنداۋدى ۇزدىكسىز كۇشەيتىپ، بەينەت پەن زەينەتتى بىرگە وتكەرەتىن، داڭق پەن نامىستا بىرگە بولاتىن، اششى - تۇششىنى بىرگە تاتاتىن، تاعدىرلاس بولاتىن ورتاق تۇلعا ۇستانىمىن بەرىك ورناتۋعا جەتەكتەپ، ءار ۇلتتىڭ ىنتىماقتاسا كۇرەس جۇرگىزۋ ورتاق يدەيالىق - ساياسي نەگىزىن ۇزدىكسىز بەكەمدەۋ كەرەك.

شي جينپيڭ بىلاي دەپ باسا دارىپتەدى: جۇڭحۋا ۇلتىنىڭ ورتاق رۋحاني مەكەنىن كۇش سالا قۇرىپ، سوتسياليستىك وزەكتى قۇن كوزقاراسىن جەتەكشى ەتىپ، وتانشىلدىق، كوللەكتيۆشىلدىك، سوتسياليزم تاربيەسىن تەرەڭدەتىپ، ءار ۇلت بۇقاراسىن دۇرىس مەملەكەت كوزقاراسىن، تاريح كوزقاراسىن، ۇلت كوزقاراسىن، مادەنيەت كوزقاراسىن، ءدىن كوزقاراسىن بەرىك ورناتۋعا جەتەكتەپ، جاستار مەن ورەندەردىڭ تاريح، مادەنيەت تاربيەسىن كۇشەيتىپ، مەملەكەتتە ءبىر تۇتاس قولدانىلاتىن ءتىل - جازۋدى جاپپاي كەڭەيتىپ، جالپىلاستىرىپ، جۇڭحۋا ۇلتى ورتاق تۇلعا قۇرىلىسىن ىلگەرىلەتۋگە كۇشتى رۋحاني مادەنيەت تىرەگىن ازىرلەۋ كەرەك.

شي جينپيڭ بىلاي دەپ اتاپ كورسەتتى: جۇڭگو ۇلگىسىندەگى وسىزامانداندىرۋدى ىلگەرىلەتىپ، بىرگە بايۋدى جۇزەگە اسىرۋدا ءبىر ۇلتتىڭ دا قاعىس قالۋىنا بولمايدى. ۇلتتار وڭىرلەرىنىڭ جوعارى ساپالى دامۋىن جەدەلدەتىپ، جەر - جەردىڭ ەكونوميكا جاعىندا اناعۇرلىم تىعىز بايلانىسۋىن، توعىسىپ ءبىر تۇلعاعا اينالۋىن جەبەپ، ءار ۇلتتىڭ بىرگە بايۋىن تىڭعىلىقتى ىلگەرىلەتۋ كەرەك. دامۋ بارىسىندا حالىق تۇرمىسىن قامتاماسىز ەتۋگە جانە جاقسارتۋعا تاباندى بولىپ، حالىق تىلەگىنە ۇيلەسەتىن، حالىق تۇرمىسىنا تيىمدىلىك جاسايتىن، جۇرت جۇرەگىن جىلىتاتىن ناقتى ىستەردى كوبىرەك ىستەپ، ءار ۇلت حالقىنىڭ تاماشا تۇرمىسقا تالپىنىسىن ۇزدىكسىز قاناعاتتاندىرۋ كەرەك.

شي جينپيڭ بىلاي دەپ باسا دارىپتەدى: ۇلتتاردىڭ جان - جاقتى كىرىگۋىن ىلگەرىلەتىپ، ۇلتتاردىڭ ارالاسۋىن، ىشتەسۋىن، توعىسۋىن بەلسەنە جەبەۋ كەرەك. ەكونوميكالىق، قوعامدىق دامۋ جوباسىن جانە الەۋمەتتىك بايلىقتى جايعاستىرۋدى ءبىر تۇتاس جوسپارلاپ، شەكارا وڭىرلەردىڭ جانە ۇلتتار وڭىرلەرىنىڭ قاتىناس سياقتى نەگىزدىك قۇرىلعىلار قۇرىلىسىن كۇشەيتىپ، ادامدى نەگىز ەتكەن جاڭاشا قالا - قالاشىقتاندىرۋدى بەلسەنە ىلگەرىلەتىپ، ءار ۇلت حالىق سانىنىڭ جىلجىمالى توعىسا قونىستانۋىن ءتارتىپتى ىلگەرىلەتىپ، ۇلتتاردىڭ اناردىڭ دانىندەي تىعىز ۇيىسۋىن جەبەۋ كەرەك.

شي جينپيڭ بىلاي دەپ اتاپ كورسەتتى: ۇلت ىستەرىن زاڭ بويىنشا باسقارىپ، ۇلت ىستەرىن باسقارۋ قابىلەتىن جانە دەڭگەيىن ۇزدىكسىز جوعارىلاتۋ كەرەك. ۇلتتىق وڭىرلىك اۆتونوميا تۇزىمىنە تاباندى بولىپ جانە ونى كەمەلدەندىرىپ، قاتىستى زاڭداردى، زاڭ ەرەجەلەردى جانە پارىقتاندىرىلعان وڭىرلىك قولداۋ ساياساتىن بىرتىندەپ كەمەلدەندىرىپ، ءار ۇلت بۇقاراسىنىڭ زاڭدى ۇقىق - مۇددەسىن زاڭ بويىنشا قامتاماسىز ەتۋ كەرەك. زاڭمەن باسقارۋ ۇگىت - تاربيەسىن كۇشەيتىپ، ءار ۇلت بۇقاراسىن مەملەكەت تانىمىن، ازاماتتىق تانىمدى، زاڭمەن باسقارۋ تانىمىن كۇشەيتۋگە جەتەكتەۋ كەرەك.

شي جينپيڭ بىلاي دەپ باسا دارىپتەدى: ءار دارەجەلى پارتكومدار مەن ۇكىمەتتەر ۇلت قىزمەتىن ماڭىزدى كەڭەستىك ىستەر كۇن تارتىبىنە قويىپ، ۇلت قىزمەتىندەگى كەلەلى ماسەلەلەردى دەر كەزىندە زەرتتەپ شەشىپ، ۇلتتار وڭىرلەرىنىڭ كادرلار جانە دارىندىلار قوسىنى قۇرىلىسىن كۇشەيتىپ، از ۇلت كادرلارىن جەتىلدىرۋگە جانە ولاردى ويداعىداي ىستەتۋگە ءمان بەرۋى كەرەك. جۇڭحۋا ۇلتى ورتاق تۇلعا تانىمىن بەكەمدەۋ ءتۇزىم - مەحانيزمىن اقاۋسىزداندىرىپ، وزات تيپتەردىڭ ۇلگىلىك، جەتەكشىلىك رولىن ساۋلەلەندىرىپ، تۇتاس قوعامدا ۇلت قىزمەتىنە كوڭىل بولەتىن، قولداۋ كورسەتەتىن تاماشا راي قالىپتاستىرۋ كەرەك.

لي چياڭ جينالىستى باسقارعاندا بىلاي دەپ اتاپ كورسەتتى: باس شۋجي شي جينپيڭنىڭ ماڭىزدى ءسوزى جاڭا جۇڭگو قۇرىلعان 75 جىلدان، اسىرەسە، جاڭا داۋىردەن بەرگى ەلىمىزدىڭ ۇلتتار ىنتىماعى، العاباسارلىعى ىستەرىندە قول جەتكەن ۇلى تابىستارىن جان - جاقتى قورىتىندىلاپ، جۇڭحۋا ۇلتى ورتاق تۇلعا تانىمىن قالىپتاستىرۋدىڭ جانە دامىتۋدىڭ ءتۇپ تامىرى مەن رۋح تامىرىن تەرەڭ ۇعىندىرىپ، جاڭا ءداۋىردىڭ جاڭا جورىعىندا جۇڭحۋا ۇلتى ورتاق تۇلعا تانىمىن بەكەمدەپ، جۇڭحۋا ۇلتى ورتاق تۇلعا قۇرىلىسىن ىلگەرىلەتۋدىڭ جالپى تالابىن ايقىن ورتاعا قويدى، ءسوزدىڭ يدەياسى تەرەڭ، كوزاياسى كەڭ بولىپ، جۇڭحۋا ۇلتى ورتاق تۇلعا قۇرىلىسىن ىلگەرىلەتۋدىڭ تۇعىرنامالىق قۇجاتى سانالادى، ءبىز ونى مۇقيات ۇيرەنۋىمىز، ءتۇسىنۋىمىز، ىشكەرىلەي دايەكتىلەندىرۋىمىز، تياناقتاندىرۋىمىز كەرەك. باس شۋجي شي جينپيڭنىڭ ۇلت قىزمەتىن كۇشەيتۋ جانە جاقسارتۋ جونىندەگى ماڭىزدى يدەياسىن جاپپاي دايەكتىلەندىرىپ، ”ەكىنى تۇراقتاندىرۋدىڭ“ شەشۋشى ءمانىن تەرەڭ ءتۇسىنىپ، ”ەكىنى قورعاۋدى“ باتىل ورىنداپ، جۇڭحۋا ۇلتى ورتاق تۇلعا تانىمىن بەكەمدەۋ سىندى نەگىزگى جەلىنى مىقتاپ ارقاۋ ەتىپ، پارتيانىڭ ۇلت قىزمەتىنىڭ جوعارى ساپالى دامۋىن ىلگەرىلەتىپ، جاپپاي سوتسياليستىك وسىزاماندانعان مەملەكەت قۇرۋ جولىندا قاجىماي - تالماي كۇرەس جۇرگىزۋىمىز كەرەك.

ماداقتالىپ - سيلانعان ۇلگىلى جەكەلەر مەن ۇلگىلى كوللەكتيۆتەردىڭ ۋاكىلدەرى جينالىستا لەبىز ءبىلدىردى.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ ءبىر ءبولىم مۇشەلەرى، ورتالىق كوميتەت شۋجيچۋىنىڭ ءبىر ءبولىم شۋجيلەرى، مەملەكەتتىك حالىق قۇرىلتايى تۇراقتى كوميتەتىندەگى، مەملەكەتتىك كەڭەستەگى، مەملەكەتتىك ساياسي كەڭەستەگى، ورتالىق اسكەري ىستەر كوميتەتىندەگى قاتىستى باسشى جولداستار جينالىسقا قاتىناستى.

ماداقتالىپ - سيلانعان ۇلگىلى كوللەكتيۆ ۋاكىلدەرى مەن ۇلگىلى جەكەلەر، ولكەلەردەگى، اۆتونوميالى رايوندارداعى، توتە قاراستى قالالارداعى جانە شينجياڭ ءوندىرىس - قۇرىلىس بيڭتۋانىنداعى، ورتالىقتاعى پارتيا، ۇكىمەت، ارميا، بۇقارالىق ۇيىمداردىڭ قاتىستى تاراۋلارىنداعى جاۋاپتى جولداستار قاتارلىلار جينالىسقا قاتىناستى.

كەلۋ قاينارى: حالىق تورابى