بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى جۇڭگو كوممۋنيستىك پارتياسى اقپارات تورابى

جۇڭحۋا حالىق رەسپۋبليكاسىنىڭ مەملەكەت وردەنىن جانە مەملەكەت داڭق اتاعىن تابىس ەتۋ سالتى بەيجيڭدە سالتاناتپەن وتكىزىلدى

شي جينپيڭ مەملەكەت وردەنىنىڭ جانە مەملەكەت داڭق اتاعىنىڭ يەگەرلەرىنە وردەن، مەدال بەردى ءارى ماڭىزدى ءسوز سويلەدى
لي چياڭ، جاۋ لىجي، ۋاڭ حۋنيڭ، ديڭ شۋەشياڭ، لي شي، حان جىڭ قاتىناستى، ساي چي باسقاردى

2024.09.30 16:37     كەلۋ قاينارى : حالىق تورابى

9 - ايدىڭ 29 - كۇنى جۇڭحۋا حالىق رەسپۋبليكاسىنىڭ مەملەكەت وردەنىن جانە مەملەكەت داڭق اتاعىن تابىس ەتۋ سالتى بەيجيڭدەگى حالىق سارايىنىڭ التىن ءتۇستى زالىندا سالتاناتپەن وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ مەملەكەت وردەنىنىڭ جانە مەملەكەت داڭق اتاعىنىڭ يەگەرلەرىنە وردەن، مەدال بەردى ءارى ماڭىزدى ءسوز سويلەدى.

سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن

9 - ايدىڭ 29 - كۇنى جۇڭحۋا حالىق رەسپۋبليكاسىنىڭ مەملەكەت وردەنىن جانە مەملەكەت داڭق اتاعىن تابىس ەتۋ سالتى بەيجيڭدەگى حالىق سارايىنىڭ التىن ءتۇستى زالىندا سالتاناتپەن وتكىزىلدى. شي جينپيڭ قاتارلى باسشى جولداستار مەملەكەت وردەنىنىڭ جانە مەملەكەت داڭق اتاعىنىڭ يەگەرلەرىمەن بىرگە سۋرەتكە ءتۇسىپ، ەستەلىك قالدىردى.

سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

«حالىق گازەتى»، 9 - ايدىڭ 29 - كۇنى، بەيجيڭ. جۇڭحۋا حالىق رەسپۋبليكاسىنىڭ مەملەكەت وردەنىن جانە مەملەكەت داڭق اتاعىن تابىس ەتۋ سالتى 9 - ايدىڭ 29 - كۇنى تۇستەن بۇرىن بەيجيڭدەگى حالىق سارايىنىڭ التىن ءتۇستى زالىندا سالتاناتپەن وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ مەملەكەت وردەنىنىڭ جانە مەملەكەت داڭق اتاعىنىڭ يەگەرلەرىنە وردەن، مەدال بەردى ءارى ماڭىزدى ءسوز سويلەدى (ءسوزدىڭ تولىق مازمۇنىن «حالىق گازەتىنىڭ» 2 – بەتىنەن وقي الاسىزدار). شي جينپيڭ بىلاي دەپ باسا دارىپتەدى: ۇلى ءداۋىر قاھارماندارعا ۇندەۋ تاستايدى، قاھارمانداردى سومدايدى. قاھارماندار توپ - توبىمەن شىقسا، پارتيا مەن حالىق ىستەرى گۇلدەنىپ - كوركەيەدى، قۇلدىراماي باياندى داميدى. ءار دارەجەلى پارتكومدار مەن ۇكىمەتتەر قاھارمان ۇلگىلەرگە كوڭىل ءبولىپ، قامقورلىق جاساپ، بۇكىل قوعامنىڭ قاھارمانداردى قۇرمەتتەۋىن، قاھارمانداردان ۇيرەنۋىن، قاھارمان بولۋعا ۇمتىلۋىن ىلگەرىلەتۋى كەرەك. ماداقتالىپ سيلانعان جولداستاردىڭ داڭقتى قاستەرلەپ، كۇش ۇستىنە كۇش قوسىپ، اناعۇرلىم زور داڭققا قول جەتكىزۋىن ءۇمىت ەتەمىن.

لي چياڭ، جاۋ لىجي، ۋاڭ حۋنيڭ، ديڭ شۋەشياڭ، لي شي، حان جىڭ ماراپاتتاۋ سالتىنا قاتىناستى، ساي چي باسقاردى.

ساعات 9 مولشەرىندە مەملەكەت وردەنىنىڭ جانە مەملەكەت داڭق اتاعىنىڭ يەگەرلەرى قوناقتار كولىگىنە توپتىق وتىرىپ، تۇرعان جەرلەرىنەن جولعا شىعىپ، مەملەكەت قوناقتارىن قورعاۋ موتوتسيكل اترەتىنىڭ قورعاۋىندا حالىق سارايىنا قاراي بەت الدى. حالىق سارايىنىڭ شىعىس قاقپاسىنىڭ سىرتىندا قۇرمەت قاراۋىلى جولدىڭ ەكى جاعىنا قاتار تۇرىپ، جاستار مەن ورەندەر ىستىق ىقىلاسپەن الاقايلاپ قۇرمەت ءبىلدىردى. مەملەكەت وردەنىنىڭ جانە مەملەكەت داڭق اتاعىنىڭ يەگەرلەرى قىزىل كىلەمدى بويلاي باسپالداقپەن جوعارى كوتەرىلىپ، حالىق سارايىنا كىردى. پارتيا مەن مەملەكەتتىڭ وردەنمەن، داڭقپەن ماداقتاۋ - سيلاۋ قىزمەت كوميسسياسىنداعى باسشى جولداستار وسى ارادا ولاردى توپتىق قارسى الدى.

حالىق سارايىنىڭ التىن ءتۇستى زالى ايبىندى دا دۋماندى بەينەگە شومدى. قىزىل ءتۇستى الىپ ارتقى كورىنىستىك تاقتاداعى رەسپۋبليكا وردەنىنىڭ، دوستىق وردەنىنىڭ، مەملەكەت داڭق اتاعى مەدالىنىڭ ورنەگى جارقىراپ تۇردى. ارتقى كورىنىستىك تاقتا الدىنا كوزگە شوقتاي باسىلاتىن 18 بەس جۇلدىزدى قىزىل تۋ ەكى جاققا بولىنە قويىلدى، ازاتتىق ارميا قۇرمەت قاراۋىلىنىڭ 18 ەر تۇلعالى قۇرمەت قاراۋىلى وردەن الۋ تۇعىرىنىڭ ەكى جاعىنا مىلتىقتارىن سەرت ۇستاپ قاسقايىپ تۇردى.

ساعات 9 دان 58 مينۋت وتكەندە شات مەرەيلى مۋزىكا ءۇنى ىشىندە شي جينپيڭ مەملەكەت وردەنىنىڭ جانە مەملەكەت داڭق اتاعىنىڭ يەگەرلەرىمەن بىرگە جينالىس زالىنا كىردى، تۇتاس زالداعىلار ورىندارىنان تۇرىپ، قىزۋ شاپالاق سوقتى.

ساعات 10 دا اسكەري وركەستردىڭ كەرنايشىلارى سالت كەرنايىن تارتتى، ماراپاتتاۋ سالتى باستالدى. «ەرىكتىلەر مارىشى» ورىندالىپ، تۇتاس زالداعىلار مەملەكەت ءانىن اسقاقتاتا شىرقادى.

ساي چي شي جينپيڭ قول قويعان جۇڭحۋا حالىق رەسپۋبليكاسى ءتوراعاسىنىڭ بۇيرىعىن وقىدى. ءتوراعا بۇيرىعىندا مىنالار اتاپ كورسەتىلدى: جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعىن قۇتتىقتاپ، جاڭا جۇڭگونىڭ قۇرىلىسى مەن دامۋىنا كورنەكتى ۇلەس قوسقان، ەڭبەك سىڭىرگەن ۇلگىلى قايراتكەرلەردى سالتاناتپەن ماداقتاپ - سيلاۋ، ۇلت رۋحىن جانە ءداۋىر رۋحىن اسقاقتاتۋ ءۇشىن، 14 - كەزەكتى مەملەكەتتىك حالىق قۇرىلتايى تۇراقتى كوميتەتى 11 - ءماجىلىسىنىڭ قارارىنا ساي، ۋاڭ يۇڭجى قاتارلى 4 ادامعا ”رەسپۋبليكا وردەنى“ بەرىلدى، ديلما رۋسسەۆكە ”دوستىق وردەنى“ بەرىلدى، ۋاڭ شياۋمو قاتارلى 10 ادامعا مەملەكەت داڭق اتاعى بەرىلدى.

2 تۋ قورعاۋشى بەس جۇلدىزدى قىزىل تۋدى بيىك ۇستاپ، 3 قۇرمەت قاراۋىلى رەسپۋبليكا وردەنىن، دوستىق وردەنىن جانە مەملەكەت داڭق اتاعى مەدالىن قولدارىنا الىپ، نىق قاداممەن سالت وتەتىن ناق مايدانعا كىردى.

ايبىندى دا اسقاق «وتان قاھارماندارىنا قۇرمەت» مۋزىكاسىنىڭ ءۇنى ىشىندە شي جينپيڭ مەملەكەت وردەنىنىڭ جانە مەملەكەت داڭق اتاعىنىڭ يەگەرلەرىنە وردەن، مەدال تاراتتى ءارى ولارمەن ىقىلاسپەن قول الىسىپ، قۇتتىقتادى، تۇتاس زالدا قىزۋ شاپالاق ءۇنى تولاستامادى. پيونەرلەر وسى ەڭبەك سىڭىرگەن ۇلگىلى قايراتكەرلەرگە جايناعان گۇل شوقتارىن ۇسىنىپ، سالەم بەرىپ، قۇرمەت ءبىلدىردى.

تۇتاس زالدا كوتەرىلگەن قىزۋ شاپالاق ءۇنى ىشىندە شي جينپيڭ ماڭىزدى ءسوز سويلەدى. ول الدىمەن پارتيا ورتالىق كوميتەتى، مەملەكەتتىك حالىق قۇرىلتايى، مەملەكەتتىك كەڭەس جانە ورتالىق اسكەري ىستەر كوميتەتى اتىنان ”رەسپۋبليكا وردەنىنە“ جانە مەملەكەت داڭق اتاعىنا يە بولعان قاھارمان ۇلگىلەردى، ”دوستىق وردەنىنە“ يە بولعان حالىقارالىق دوستاردى قىزۋ قۇتتىقتاپ، ولارعا وسكەلەڭ قۇرمەت ءبىلدىردى.

شي جينپيڭ بىلاي دەپ اتاپ كورسەتتى: جاڭا جۇڭگو قۇرىلعان 75 جىلدان بەرى جۇڭگو كوممۋنيستىك پارتياسى بۇكىل ەلدەگى ءار ۇلت حالقىن ىنتىماقتاستىرىپ جانە باستاپ، ەكونوميكانىڭ تەز قارقىنمەن دامۋى مەن قوعامنىڭ ۇزاق ۋاقىت ورنىقتى بولۋى سىندى ەكى ۇلكەن كەرەمەتتى جاراتتى، ۇلى وتانىمىزدا وراسان زور وزگەرىستەر تۋىلدى، جۇڭحۋا ۇلتىنىڭ ۇلى گۇلدەنۋى كەرى قايتپايتىن تاريحي بارىسقا ءوتتى. قۇلاشىن كەڭ جايعان وسى دامۋ بارىسىندا ءارقايسى شەپتە توپ - توپ قاھارمان ۇلگىلەر جارىققا شىقتى. بۇگىن ماراپاتتالعان جولداستار − سولاردىڭ كورنەكتى ۋاكىلدەرى. ولاردىڭ ىزگى ىستەرى مەن كورنەكتى ۇلەسى رەسپۋبليكا تاريحىنا ماڭگى جازىلادى، ولاردىڭ ادال، تاباندى، قاراپايىم تاڭداۋلى قاسيەتى بۇكىل پارتيانىڭ، بۇكىل ەلدەگى ءار ۇلت حالقىنىڭ ۇيرەنۋىنە تاتيدى.

شي جينپيڭ بىلاي دەپ باسا دارىپتەدى: ەلىمىز جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتىڭ گۇلدەنۋى ۇلى ءىسىن جاپپاي ىلگەرىلەتۋدىڭ شەشۋشى كەزەڭىندە تۇر. بۇكىل پارتيا، بۇكىل ەلدەگى ءار ۇلت حالقى قاھارمان ۇلگىلەردى ۇلگى ەتىپ، ىنتىماقتاسا العا ۇمتىلىپ، ۇدەرە العا تارتىپ، مەملەكەتتى قۇدىرەتتەندىرۋدىڭ سالتاناتتى ارەكەتىن بىرگە ىسكە اسىراتىن جويقىن كۇش توپتاۋى كەرەك. مەملەكەتتى قۇدىرەتتەندىرۋ مۇراتىن، مەملەكەتتىڭ بايىپ - قۇدىرەتتەنۋىن كوكەيدە ساقتاپ، حالىقتىڭ باقىتىن ارمان ەتىپ، وتاندى ادالدىقپەن ءسۇيىپ، وتان ءۇمىتىن اقتاۋدى مۇرات ەتىپ، جەكە باستى مەملەكەتتىڭ جالپى جاعدايىمەن توعىستىرىپ، مەملەكەت ءۇشىن جاۋاپكەرشىلىگىن ادا ەتۋ، حالىق ءۇشىن قىزمەت ەتۋ بارىسىندا جەكە باستىڭ قۇنىن جۇزەگە اسىرىپ، ءومىر كەلبەتىن ايگىلەۋ كەرەك. مەملەكەتتى قۇدىرەتتەندىرۋ ونەرىن شىڭداپ، ءداۋىر دامۋىنىڭ جاڭا تالابىنا سايكەسىپ، جاڭا بىلىمدەردى ۇيرەنىپ، جاڭا شەبەرلىكتى يگەرىپ، شىنايى ونەرگە جاتتىعىپ، ءبىر كاسىپتى ءسۇيىپ، ءبىر كاسىپتى بەرىلە ۇيرەنىپ، ءىس تىندىرىپ، يگىلىك جاراتۋدىڭ شەبەرلەرى، قىزمەت ورنىنىڭ شەبەرلەرى، كاسىپ مايتالماندارى بولۋعا قۇلشىنۋ كەرەك. مەملەكەتتى قۇدىرەتتەندىرۋگە باتىلدىقپەن ۇلەس قوسىپ، ۋاقىتپەن جارىساتىن تاريحي ىرىقتىلىقپەن، قوجايىندىق جاۋاپكەرشىلىكپەن قايراتتانا العا ۇمتىلىپ، قيىندىقتان تايسالماي العا ۇمتىلىپ، قۋىپ جەتۋگە، باسىپ وزۋعا تالپىنىپ، كەمەلدەندىرە ءتۇسىپ، قاراپايىم قىزمەت ورنىندا ەرەكشە ناتيجە جاراتىپ، دامۋداعى قيىن ماسەلەلەردى شەشۋ، رەفورمادا قامال الۋ، قوعامنىڭ جاراسىمدىلىعى مەن ورنىقتىلىعىن قورعاۋ جاعىندا ۇزدىكسىز ىسكەرلىك كورسەتۋ كەرەك.

شي جينپيڭ بىلاي دەپ اتاپ كورسەتتى: 75 جىلدان بەرى دۇنيە جۇزىندە جۇڭگو حالقىمەن تىلەكتەس، تار جول، تايعاق كەشۋدى بىرگە وتكەرگەن كوپتەگەن كونە دوستار، جاقسى دوستار بولدى، بۇگىن ”دوستىق وردەنى“ بەرىلگەن ديلما رۋسسەۆ حانىم − سولاردىڭ تاڭداۋلى ۋاكىلى. جۇڭگو حالقى جۇڭگونىڭ دامۋى ءۇشىن، جۇڭگو حالقىنىڭ ءار ەل حالقىمەن دوستىعىن نىعايتۋ ءۇشىن كورنەكتى ۇلەس قوسقان حالىقارالىق دوستاردى ماڭگى ۇمىتپايدى. جۇڭگو حالقى دۇنيە جۇزىندەگى ءار ەل حالقىمەن قول ۇستاسىپ، دۇنيە ءجۇزىنىڭ بەيبىتشىلىگىن قورعاپ، بىرگە دامۋدى جەبەپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتىپ، ادامزاتتىڭ اناعۇرلىم كوركەم بولاشاعىن اشۋدى قالايدى.

شي جينپيڭ بىلاي دەپ باسا دارىپتەدى: جاڭا كارتينا ءبىزدىڭ بىرگە سىزۋىمىزعا مۇقتاج، جاڭا تاريح ءبىزدىڭ بىرگە اشۋىمىزعا مۇقتاج. نىسانانى كوزدەپ، ءبىر جاعادان باس، ءبىر جەڭنەن قول شىعارىپ، ءورىس اشا العا ىلگەرىلەپ، حالىق رەسپۋبليكاسىنىڭ اناعۇرلىم شۇعىلالى، تارتىمدى جاڭا تاراۋىن بىرگە جازۋ كەرەك.

تابىستاۋ سالتىندا ”رەسپۋبليكا وردەنىنىڭ“ يەگەرى حۋاڭ زۇڭدى، ”دوستىق وردەنىنىڭ“ يەگەرى ديلما رۋسسەۆ مەملەكەت وردەنىنىڭ جانە مەملەكەت داڭق اتاعىنىڭ يەگەرلەرى اتىنان لەبىز ءبىلدىردى.

تابىس ەتۋ سالتىنان كەيىن شي جينپيڭ قاتارلى باسشى جولداستار مەملەكەت وردەنىنىڭ جانە مەملەكەت داڭق اتاعىنىڭ يەگەرلەرىمەن توپتىق ەستەلىك سۋرەتكە ءتۇستى.

بەيجيڭدەگى جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك حالىق قۇرىلتايى تۇراقتى كوميتەتى باستىعىنىڭ ءبىر ءبولىم ورىنباسارلارى، مەملەكەتتىك كەڭەستىڭ مۇشەلەرى، ەڭ جوعارى حالىق سوتى مەكەمەسىنىڭ باستىعى، ەڭ جوعارى حالىق پروكۋراتۋراسىنىڭ باس پروكۋرورى، مەملەكەتتىك ساياسي كەڭەس ءتوراعاسىنىڭ ءبىر ءبولىم ورىنباسارلارى، ورتالىق اسكەري ىستەر كوميتەتىنىڭ مۇشەلەرى تابىس ەتۋ سالتىنا قاتىناستى.

ورتالىقتاعى پارتيا، ۇكىمەت، ارميا، بۇقارالىق ورىنداردىڭ قاتىستى تاراۋلارىنداعى جانە بەيجيڭ قالاسىنداعى جاۋاپتى جولداستار، مەملەكەت وردەنىنىڭ جانە مەملەكەت داڭق اتاعىنىڭ يەگەرلەرى جانە ولاردىڭ تۋىس - تۋعاندارىنىڭ ۋاكىلدەرى، تۇرعان ورىندارىنىڭ ۋاكىلدەرى، بۇرىن ەڭبەك ءسىڭىرىپ، داڭققا يە بولعانداردىڭ ۋاكىلدەرى، قاتىستى مەملەكەتتەردىڭ جۇڭگودا تۇراتىن ەلشىلەرى، ءار سالا كادر - جۇرتشىلىعى ۋاكىلدەرى قاتارلىلاردان مىڭعا تاياۋ ادام تابىس ەتۋ سالتىنا قاتىناستى.

كەلۋ قاينارى: حالىق تورابى

جاۋاپتى رەداكتورى : مانەپ ەربول ۇلى