2024.09.30 16:39 كەلۋ قاينارى : حالىق تورابى
9 - ايدىڭ 29 - كۇنى كەشتە جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعىن قۇتتىقتاۋ مۋزىكا ساۋىعى بەيجيڭدە وتكىزىلدى. شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلى پارتيا مەن مەملەكەت باسشىلارى 3 مىڭنان استام كورەرمەنمەن بىرگە كونسەرتتى تاماشالادى.
سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن
«حالىق گازەتى»، 9 - ايدىڭ 29 – كۇنى، بەيجيڭ (ءتىلشى جاۋ چىڭ). اسەرلى اۋەن ايبىندى ەپوستى بەينەلەپ، تەرەڭ سۇيىسپەنشىلىككە تولى مۋزىكا داستانى ۇلى ءداۋىردى جىرلادى. جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعىن قۇتتىقتاۋ مۋزىكا ساۋىعى 9 - ايدىڭ 29 – كۇنى كەشتە بەيجيڭدە وتكىزىلدى. شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلى پارتيا مەن مەملەكەت باسشىلارى 3 مىڭنان استام كورەرمەنمەن بىرگە كونسەرتتى كورىپ، جاڭا جۇڭگو قۇرىلعان 75 جىلدان بەرگى شۇعىلالى بارىستى بىرگە ەسكە الىپ، ۇلى وتاننىڭ گۇلدەنىپ - كوركەيۋىن بىرگە تىلەدى.
حالىق سارايىنىڭ 10 مىڭ ادامدىق زالىندا شىراقتار سامالاداي جارقىراپ، مەرەكەلىك تۇسكە شومدى. ساعات 19 دان 55 مينۋت وتكەندە شات مەرەيلى مۋزىكا ءۇنى ىشىندە شي جينپيڭ قاتارلى باسشى جولداستار زالعا كىرىپ، از ۇلتتاردىڭ ۋاكىلدەرىمەن، ساقا جولداستاردىڭ ۋاكىلدەرىمەن ىقىلاسپەن قول الىستى، تۇتاس زالدان قىزۋ قول شاپالاق ءۇنى كوتەرىلدى.
الاڭدا ايبىندى «ەرىكتىلەر مارىشى» ورىندالدى، تۇتاس الاڭداعىلار جۇڭحۋا حالىق رەسپۋبليكاسىنىڭ مەملەكەت ءانىن اسقاقتاتا شىرقادى.
”بۇگىن سەنىڭ تۋعان كۇنىڭ، مەنىڭ جۇڭگوم...“ قويۋ سۇيىسپەنشىلىك، مەيىرگە تولى اۋەن ىشىندە كونسەرت شىمىلدىعىن اشتى. كونسەرت بەتاشار مۋزىكا مەن بەس مۋزىكالى بولەكتەن قۇرالدى، ادەبيەت - كوركەمونەر قىزمەتكەرلەرى سارا مۋزىكا، اسەرلى ءان اۋەنى ارقىلى جۇڭحۋا حالىق رەسپۋبليكاسى قۇرىلعان 75 جىلدىق تاريحتى مۋزىكا ساۋىعىنىڭ تاراۋ قۇرىلىمىمەن توعىستىرىپ، كلاسسيكالىق مۋزىكا تۋىندىلارىنداعى تاريح پەن داۋىرلىك ەستەمەلەردى جاڭعىرتتى.
تۇتىكتى - ىشەكتى اسپاپتار مۋزىكاسى «ءبىرىنشى سيمفونيالىق بەتاشار»، كولەمدى حور «حۋاڭحى حورى» اسقاق ايبىنمەن جاڭا دەموكراتيالىق توڭكەرىس كەزىندە جۇڭگو حالقىنىڭ قاندى شايقاس جۇرگىزىپ، قايىسپاس قايسارلىق كورسەتىپ، پارتيانىڭ باسشىلىعىندا ۇلى جەڭىسكە قول جەتكىزىپ، جاڭا جۇڭگو قۇرۋ شۇعىلالى بارىسىن تولىق ايگىلەدى. «وتاندى جىرلايمىز» ەكپىندى دە دۋماندى ورىندالىپ، «مول ءونىم جىرى» قۋانىشتى مەرەيگە شومىپ، 2 تۇتىكتى - ىشەكتى اسپاپتار مۋزىكاسى سوتسياليستىك توڭكەرىس پەن قۇرىلىس داۋىرىندە ءوز كۇشىنە سۇيەنىپ ءومىر ءسۇرىپ، قايراتتانا ۇمتىلعان ۇمىتىلماس جىلداردى قايتا ەسكە ءتۇسىرىپ، الاڭداعى كورەرمەندەردىڭ كۇشتى تىلەكتەستىگىن قوزعادى.
تۇتىكتى - ىشەكتى اسپاپتار مۋزىكاسى «بەيجيڭنەن شەكارا وڭىرگە جەتكە شات حابار»، ۇلت اسپاپتار مۋزىكاسى «الۋان ءتۇستى وركەستر» تۇرلىشە ۇلتتىڭ، تۇرلىشە ءوڭىردىڭ ەرەكشەلىككە يە اۋەندەرىن توعىستىرىپ، كوركەم اۋەنمەن وتانىمىزدىڭ كوركەم تاۋ - وزەنىن جانە حالىقتىڭ باقىتتى تۇرمىسىن جىرلادى. سيمفونيالىق حور «ءۇمىت اتىزى»، تۇتىكتى - ىشەكتى اسپاپتىق مۋزىكا «جاستار ارمانى ءبي – مۋزىكاسى» تامىلجىعان ۇنمەن ويناقى دا اسەرلى ورىندالىپ، رەفورما جاساپ، ەسىك اشقاننان بەرگى جۇڭگو حالقىنىڭ يدەيانى ازات ەتىپ، قايراتتانا العا ۇمتىلعان رۋحاني بەت - بەينەسىن بەينەلەدى.
75 جىل بوران - شاشىندى باستان كەشىرىپ، 75 جىل اسقاقتاتا ءان شىرقادى. تۇتاس مۋزىكا ساۋىعى قىزۋ مەرەيگە شومىپ، جوعارى ورلەۋگە كوتەرىلدى. وركەستردىڭ سۇيەمەلدەۋىندە پيانينومەن ورىندالعان «جاڭا ءورىس» اسقاق ايبىنمەن شىعاندادى، تۇتىكتى - ىشەكتى اسپاپتار مۋزىكاسى «كوركەم سۋرەتتەي تاۋ - وزەن» اسقاق سەزىمدى بەينەلەدى، سيمفونيالىق حور «جاڭا ساپار» اسقاق جىگەرمەن اۋەلەدى، ءداۋىر اندەرى شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ پارمەندى باسشىلىعىندا، ءجۇز ميلليونداعان جۇڭحۋا پەرزەنتتەرىنىڭ وزىنە سەنىپ، ءوزىن الۋەتتەندىرگەن، تۋراشىلدىقتى ساقتاپ، جاڭالىق اشقان رۋحاني بەينەسىن ايگىلەپ، كورەرمەندەردىڭ قىزۋ قارسى الۋىنا بولەندى. ”بەس جۇلدىزدى قىزىل تۋ جەلبىرەپ، شارىقتاعان جەڭىستى اسقاق!“ بۇكىل الاڭداعىلار «وتاندى جىرلايمىز» ءانىن اسقاقتاتا شىرقادى، مۋزىكا ساۋىعى جابىلدى.
مۋزىكا ساۋىعىنا قاتىناسقانداردان تاعى تومەندەگىلەر بار: يىن لي، شى تايفىڭ، ليۋ گوجۇڭ، لي گانجيە، لي شۋلەي، لي حۇڭجۇڭ، حى ۋەيدۇڭ، حى ليفىڭ، جاڭ يوۋشيا، جاڭ گوچيڭ، چىن ۋىنچيڭ، جيا چيڭلين، جاڭ دىجياڭ، يۇي جىڭشىڭ، لي جانشۋ، ۋاڭ ياڭ، زىڭ چيڭحۇڭ، لي چاڭچۇن، حى گوچياڭ، ليۋ يۇنشان، ۋاڭ چيشان، جاڭ گاۋلي، جۇڭگو كوممۋنيستىك پارتياسى ورتالىق كوميتەتىنىڭ شۋجيچۋىنداعى، مەملەكەتتىك حالىق قۇرىلتايى تۇراقتى كوميتەتىندەگى، مەملەكەتتىك كەڭەستەگى، ەڭ جوعارى حالىق سوتى مەكەمەسىندەگى، ەڭ جوعارى حالىق پروكۋراتۋراسىنداعى، مەملەكەتتىك ساياسي كەڭەستەگى، ورتالىق اسكەري ىستەر كوميتەتىندەگى باسشى جولداستارى جانە باسشىلىق مىندەتىنەن بوساعان جولداستار.
ورتالىقتاعى پارتيا، ۇكىمەت، ارميا، بۇقارالىق ورىنداردىڭ تاراۋلارىنداعى جانە بەيجيڭ قالاسىنداعى نەگىزگى جاۋاپتى جولداستار، ءارقايسى دەموكراتيالىق پارتيا - توپتاردىڭ ورتالىق كوميتەتتەرىنىڭ، مەملەكەتتىك ساۋدا - ونەركاسىپشىلەر بىرلەستىگىنىڭ جاۋاپتىلارى جانە پارتيادا، توپتا جوق قايراتكەرلەردىڭ ۋاكىلدەرى، ”رەسپۋبليكا وردەنىنىڭ“، ”دوستىق وردەنىنىڭ“، ”1 - تامىز وردەنىنىڭ“ جانە مەملەكەت داڭق اتاعىنىڭ يەگەرلەرىنىڭ ۋاكىلدەرى، مەملەكەتتىك وزاتتاردىڭ، ۇلگىلى قايراتكەرلەردىڭ ۋاكىلدەرى، مەملەكەتتىك ءتۇيىندى قامقورلىق جاسالاتىن وبيەكتىلەردىڭ ۋاكىلدەرى، بۇكىل ەلدەگى از ۇلت ەكسكۋرسيا ۇيىرمەسىنىڭ مۇشەلەرى، ساقا جولداستاردىڭ ۋاكىلدەرى، شياڭگاڭدىق، اۋمىندىق باۋىرلاستاردىڭ، تايۋاندىق باۋىرلاستاردىڭ، شەتەلدەگى مۇھاجىر باۋىرلاستاردىڭ جانە وتانعا ورالعان مۇھاجىرلاردىڭ، مۇھاجىرلاردىڭ تۋىس - تۋعاندارىنىڭ ۋاكىلدەرى، بەيجيڭدە تۇراتىن ازاتتىق ارميا مەن قارۋلى ساقشى بولىمدەرىندەگى كوماندير - جاۋىنگەرلەردىڭ ۋاكىلدەرى، استاناداعى ءار سالا جۇرتشىلىعىنىڭ ۋاكىلدەرى، ءار ەلدىڭ جۇڭگودا تۇراتىن ەلشىلەرى، حالىقارالىق ۇيىمداردىڭ جۇڭگودا تۇراتىن ۋاكىلدەرى جانە جۇڭگودا قىزمەت ىستەيتىن شەتەلدىك مامانداردىڭ ۋاكىلدەرى قاتارلىلار كونسەرتتى تاماشالادى.
كەلۋ قاينارى: حالىق تورابى