10 نەشە ولكە جاساندى قۇلاق ۇلۋىن ەمدەۋدى قامسىزداندىرۋ كولەمىنە ەنگىزدى 

ورتالىق تەلەۆيزيا تورابىنىڭ حابارى. ەلىمىزدە ەستۋ قۋاتىندا اقاۋ بار ادامداردىڭ سانى شامامەن 27 ميلليون 800 مىڭ ادام، جاساندى قۇلاق ۇلۋىن اۋىستىرۋ ارقىلى ەمدەۋ قازىرگى تاڭدا قۇلاعى كەرەڭ ادامداردى ەمدەۋدەگى ەڭ ءونىمدى ءتاسىل سانالادى. الايدا، جاساندى قۇلاق ۇلۋىن اۋىستىرۋعا نەشە ءجۇز مىڭ يۋان ەمدەۋ قاراجاتى كەتەتىنىن ەستىگەن ناۋقاستاردىڭ كوبى ەمدەلۋدەن تايساقتايدى. جۋىرداعى جىلداردان بەرى، شاڭحاي، جياڭسۋ، جىجياڭ قاتارلى 10 نەشە ولكە جاساندى قۇلاق ۇلۋىن اۋىستىرۋدى ەمدەۋدى قامسىزداندىرۋ قورىنىڭ ەسەبىنەن كوتەرۋ كولەمىنە ەنگىزگەن، ەڭ جوعارى تولەۋ ولشەمى 450 مىڭ يۋانعا جەتەدى.

جياڭشي ولكەسى بىلتىر 9 – ايدا جاساندى قۇلاق ۇلۋىن اۋىستىرۋدى ەمدەۋدى قامسىزداندىرۋدىڭ كولەمىنە ەنگىزگەننەن بەرى، قازىرگە دەيىن 170 نەشە ناۋقاس ەمدەلگەن. جياڭشي ولكەلىك بالالار ەمحاناسىندا ەستۋ قۋاتىن سىناۋعا قاتىناسىپ جاتقان شياۋرۇي ەسىمدى ءسابي تەك 8 ايعا تولعان، الدىڭعى ايدا وعان جاساندى قۇلاق ۇلۋىن اۋىستىرۋ وپەراتسياسى جاسالعان. ءبىر ايدان استام ۋاقىت قالپىنا كەلۋ ارقىلى قازىر ونىڭ جاساندى قۇلاق ۇلۋىن ىسكە قوسۋعا دايىندىق جاسالۋدا.

داۋىستى ەستىگەن ساتتە، ءاسىلى بەيمازا بولىپ جاتقان شياۋرۇي دەرەۋ تىنىشتالا قالدى، كوزىن بادىرايتىپ، دىبىستىڭ قايدان شىققانىن ىزدەي باستادى. كوپشىلىك قۋانعانىنان قول سوعىپ، بالانىڭ ەسىمىن شاقىرعان ساتتە، ول دەرەۋ موينىن بۇرىپ قارادى.

شياۋرۇيدىڭ اكەسى چىن جيان بىلاي دەدى: وتە تەبىرەنىپ، قاتتى قۋانىپ تۇرعانىمىز داۋسىز، ەڭ كەمىندە ول بۇدان بىلاي قالىپتى ادامدار سياقتى بۇل الەمنىڭ ۇنىنە قۇلاق تۇرە الاتىن بولدى.

ومىرگە جاڭا كەلگەن كەزدە، شياۋرۇيدىڭ ەستۋ قۋاتىن سىناقتان وتكىزگەندە تولىمسىز بولعان. بىرنەشە ايدان كەيىن، شياۋرۇيدىڭ اتا – اناسى ونى جياڭشي ولكەلىك بالالار ەمحاناسىنا اپارىپ تەكسەرتكەن، وعان قوس قۇلاعى تۇگەل تۋما كەرەڭ دەگەن دياگنوز قويىلعان، قازىرگى تەحنيكالىق شارت – جاعدايدا، مۇنى ەمدەۋدىڭ ەڭ جاقسى ءتاسىلى جاساندى قۇلاق سالۋ ەكەنىن، الايدا، ەمدەۋ قاراجاتىنا ءتورت – بەس ءجۇز مىڭ يۋان كەتەتىنىن ەستىگەن شياۋرۇيدىڭ اتا – اناسى داعدارىپ قالعان.

شياۋرۇيدىڭ وتباسى جياڭشي ولكەسىنىڭ يىڭتان قالاسىنداعى اۋىل – قىستاقتا، اكەسى سىرت جەردە جۇمىس ىستەيدى، شەشەسى وتباسىندا اۋىل شارۋاشىلىعىمەن شۇعىلدانادى. ولار قايتەرىن بىلمەي تۇرعان كەزدە، جياڭشي ولكەسى بىلتىر 9 – ايدان باستاپ جاساندى قۇلاق ۇلۋىن اۋىستىرۋدى ەمدەۋدى قامسىزداندىرۋ قاراجاتىنىڭ ەسەبىنەن كوتەرۋ كولەمىنە ەنگىزىپ، ەسەپتەن كوتەرۋ سالىستىرماسى ورتا ەسەپپەن %70 اينالاسىندا بولعان. شياۋرۇيدىڭ وتباسى سياقتى ەڭ تومەنگى تۇرمىس دەڭگەيى قامسىزداندىرىلاتىن وتباسىلاردىڭ ەسەپتەن كوتەرتۋ سالىستىرماسى %90 كە جەتەدى.

شياۋرۇيدىڭ اكەسى چىن جيان بىلاي دەدى: اسىلگى باعاسى 540 مىڭ يۋان ەكەن، قازىر ەمدەۋدى قامسىزداندىرۋ ەسەبىنەن كوتەرەتىن كولەمگە ەنگىزىلگەن، جەرگىلىكتى ورىنداعى مۇگەدەكتەر بىرلەستىگى دە بىزگە كومەكتەسىپ ءبىر ءبولىمىن ەسەپتەن كوتەردى، ونان قالسا ەڭ تومەنگى تۇرمىس دەڭگەيىن قامسىزداندىرۋ قاراجاتى بار، وسىلاردىڭ بارلىعىن ەسەپتەي كەلگەندە، ءبىز ءوزىمىز شامامەن 37 – 38 مىڭ يۋانداي اقشا تولەدىك.

كەلۋ قاينارى: حالىق تورابى