لي چياڭ ەۆروپا وداعى كوميتەتىنىڭ ءتوراعاسى ۆوندەرلەيەنمەن تەلەفوندا سويلەستى

شينحۋا اگەنتتىگى، 4 ـ ايدىڭ 8 ـ كۇنى، بەيجيڭ. مەملەكەتتىك كەڭەستىڭ زۇڭليى لي چياڭ 4 ـ ايدىڭ 8 ـ كۇنى تۇستەن كەيىن ەۆروپا وداعى كوميتەتىنىڭ ءتوراعاسى ۆوندەرلەيەنمەن تەلەفوندا سويلەستى.

لي چياڭ مىنالاردى ءبىلدىردى: قازىر جۇڭگو ـ ەۆروپا قارىم - قاتىناسىندا ورنىقتىلىق بارىسىندا جاقسارۋ بەتالىسى جارىققا شىقتى. بيىل _ جۇڭگو مەن ەۆروپانىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعى، ەكى جاق قارىم - قاتىناسىنىڭ دامۋى ماڭىزدى ورايعا ءدوپ كەلدى. جىل باسىندا ءتوراعا شي جينپيڭ ءتوراعا كوستامەن تەلەفوندا سويلەسىپ، جۇڭگو - ەۆروپا قارىم - قاتىناسىن تەرەڭدەتۋگە نەگىزگى ارنا ازىرلەپ، ايقىن بەتالىس كورسەتتى. جۇڭگو مەن ەۆروپا وداعى ءبىر - ءبىرىنىڭ ەڭ ماڭىزدى ساۋدا سەرىگى، ەكونوميكاسى جوعارى دارەجەدە ءبىرىن - ءبىرى تولىقتايدى، مۇددەسى تىعىز توعىسقان. جۇڭگو جاق ەۆروپا وداعى جاقپەن قول ۇستاسا قۇلشىنىپ، جوعارى جىكتەگىلەردىڭ تاماشا، ىركىلىسسىز بارىس - كەلىسىن ساقتاپ، ساياسي ءوزارا سەنىمدىلىكتى كۇشەيتىپ، ناقتى ىستەر سەلبەستىگىن كەڭەيتىپ، تىلدەسۋ، كەڭەسۋ ارقىلى ءوز - ءوزىنىڭ ءجىتى قاداعالاپ وتىرعان ىستەرىن شەشۋگە تاباندى بولىپ، جۇڭگو - ەۆروپا وداعى قارىم - قاتىناسىنىڭ ۇزدىكسىز جاقسارۋىن، العا قاراي دامۋىن ىلگەرىلەتۋدى قالايدى. ەكى جاق جاڭا ءبىر رەتكى جۇڭگو ـ ەۆروپا ستراتەگياسى، ەكونوميكا ـ ساۋدا، جاسىل، سيفرلى سالاداعى جوعارى جىكتەگىلەردىڭ تىلدەسۋىن ەرتەرەك وتكىزۋدى ىلگەرىلەتۋى كەرەك.

لي چياڭ بىلاي دەپ اتاپ كورسەتتى: بىرنەشە كۇننىڭ الدىندا ا ق ش ءتۇرلى سىلتاۋلارمەن جۇڭگو مەن ەۆروپانى قامتىعان بارلىق ساۋدا سەرىكتەرىنە كەدەن باجىسىن بەتالدى اتقاراتىندىعىن جاريالادى، بۇل _ تيپتىك سىڭار جاقتىلىق، قورعانىمپازدىق جانە ەكونوميكالىق زورەكەرلىك ارەكەت. جۇڭگونىڭ قولدانعان باتىل شاراسى ءوزىنىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋ ءۇشىن عانا ەمەس، حالىقارالىق ساۋدا ەرەجەسى مەن حالىقارالىق ادىلدىكتى جانە ادىلەتتىلىكتى قورعاۋ ءۇشىن دە بولىپ تابىلادى. ادامزات ۇقساس ءبىر جەر شارى قىستاعىندا تىرشىلىك ەتەدى، ءارقانداي مەملەكەتتىڭ ءوز باسىن عانا كۇيتتەۋىنە بولمايدى، قورعانىمپازدىقتىڭ شىعار جولى جوق، ەسىك اشۋ، سەلبەسۋ عانا _ ادامدار اراسىنداعى دۇرىس جول. جۇڭگو مەن ەۆروپا _ ەكونوميكانىڭ جاھاندانۋىن جانە ساۋدانى ەركىندەستىرۋدى دارىپتەۋشى، دۇنيە جۇزىلىك ساۋدا ۇيىمىنىڭ باتىل قورعاۋشىسى جانە قولداۋشىسى، پىكىرلەسۋدى، سايكەسۋدى كۇشەيتىپ، ءوزارا ەسىك اشۋدى كەڭەيتىپ، ەركىن، اشىق ساۋدانى، قارجى قوسۋدى بىرگە قورعاپ، دۇنيە جۇزىلىك كاسىپ تىزبەگى مەن قامداۋ تىزبەگىنىڭ ورنىقتىلىعىن، ىركىلىسسىزدىگىن قورعاپ، ەكى جاق پەن دۇنيە ءجۇزى ەكونوميكاسىنا اناعۇرلىم كوپ ورنىقتىلىق، تۇراقتىلىق ۇستەۋى كەرەك. جۇڭگونىڭ بيىلعى ماكرولىق ساياساتىندا ءتۇرلى تۇراقسىز فاكتورلار تولىق ويلاستىرىلعان، سونداي - اق جەتكىلىكتى زاپاس ساياسات قۇرالدارى دا بار، ول سىرتقى ءتيىمسىز ىقپالعا بۇكىلدەي توتەپ بەرىپ، ءوز ەكونوميكاسىنىڭ باياندى، اقاۋسىز دامۋىن ساقتاي الادى. جۇڭگو ەسىك اشۋدى ۇزدىكسىز تاباندىلىقپەن كەڭەيتىپ، ەۆروپا وداعىن قامتىعان دۇنيە جۇزىندەگى ەلدەرمەن سەلبەستىكتى كۇشەيتىپ، دامۋ ورايىنان بىرگە يگىلىكتەنەدى.

ۆوندەرلەيەن مىنالاردى ءبىلدىردى: ەۆروپا وداعى جۇڭگومەن قارىم - قاتىناسىنا باستان - اياق باساءمان بەرەدى. قازىرگى اۋقىمدا ەۆروپا – جۇڭگو قارىم – قاتىناسىندا ۇلاسپالىقتى، ورنىقتىلىقتى ساقتاۋ توتەنشە ماڭىزدى. ەۆروپا جاق لايىقتى مەزگىلدە ءبىر رەتكى ەۆروپا – جۇڭگو باسشىلار ديدارلاسۋىن وتكىزىپ، وتكەندى قورىتىندىلاپ، بولاشاققا نازار سالىپ، ەۆروپا مەن جۇڭگونىڭ قارىم – قاتىناس ورناتقاندىعىنىڭ 50 جىلدىعىن قۇتتىقتاۋدى كۇتەدى. ەۆروپا جاق جۇڭگو جاقپەن ءارقايسى سالاداعى جوعارى جىكتەگىلەر ديالوگىن ىلگەرىلەتىپ، ەكونوميكا – ساۋدا، جاسىل ەكونوميكا، كليمات وزگەرىسى سياقتى سالالاردا ءتيىمدى سەلبەستىك ورىستەتۋگە پەيىل. ا ق ش – نىڭ كەدەن سالىعىن ۇستەمەلەپ الۋى حالىقارالىق ساۋداعا اۋىر سوققى بولدى، ەۆروپاعا جانە ءالسىز ەلدەرگە اۋىر ىقپال جەتكىزدى. ەۆروپا مەن جۇڭگو دۇنيە جۇزىلىك ساۋدا ۇيىمىن وزەك ەتكەن، ءادىل، ەركىن كوپ جاقتى ساۋدا ءتۇزىلىسىن قورعاۋعا كۇش سالىپ، دۇنيە جۇزىلىك ەكونوميكا، ساۋدا قاتىناسىنىڭ اقاۋسىز، ورنىقتى دامۋىن قورعاۋى كەرەك، بۇل ەكى جاقتىڭ جانە دۇنيە ءجۇزىنىڭ ورتاق مۇددەسىنە ۇيلەسەدى.

كەلۋ قاينارى: حالىق تورابى