ورتالىقتىڭ توڭىرەكتىك قىزمەت ءماجىلىسى بەيجيڭدە وتكىزىلدى

ورتالىقتىڭ توڭىرەكتىك قىزمەت ءماجىلىسى 4 - ايدىڭ 8 - كۇنىنەن 9 - كۇنىنە دەيىن بەيجيڭدە وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ماجىلىسكە قاتىناستى ءارى ماڭىزدى ءسوز سويلەدى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

شينحۋا اگەنتتىگى، 4 - ايدىڭ 9 - كۇنى، بەيجيڭ. ورتالىقتىڭ توڭىرەكتىك قىزمەت ءماجىلىسى 4 - ايدىڭ 8 - كۇنىنەن 9 - كۇنىنە دەيىن بەيجيڭدە وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ماجىلىسكە قاتىناستى ءارى ماڭىزدى ءسوز سويلەدى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەلەرى لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، مەملەكەت ءتوراعاسىنىڭ ورىنباسارى حان جىڭ ماجىلىسكە قاتىناستى.

شي جينپيڭ ماڭىزدى سوزىندە جاڭا داۋىردەن بەرگى ەلىمىزدىڭ توڭىرەكتىك قىزمەتىنىڭ تابىستارى مەن تاجىريبەلەرىن جۇيەلى قورىتىندىلاپ، جاعدايعا عىلمي تالداۋ جاساپ، بۇدان بىلايعى ءبىر مەزگىلدەگى توڭىرەكتىك قىزمەتتىڭ نىسانالىق مىندەتتەرى مەن وي جەلىسىن، شارالارىن ايقىنداپ، نازاردى توڭىرەكتىك تاعدىرلاس ورتاق تۇلعاعا شوعىرلاندىرىپ، توڭىرەكتىك قىزمەتتىڭ جاڭا جاعدايىن قۇلشىنا اشۋدى باسا دارىپتەدى. لي چياڭ ءماجىلىستى باسقارعاندا بىلاي دەپ باسا دارىپتەدى: باس شۋجي شي جينپيڭنىڭ ماڭىزدى ءسوزىنىڭ رۋحىن مۇقيات دايەكتىلەندىرىپ، توڭىرەكتىك قىزمەتتىڭ ءتۇرلى مىندەتتەرىن تياناقتاندىرۋدى تىڭعىلىقتى يگەرۋ كەرەك.

ءماجىلىس بىلاي دەپ اتاپ كورسەتتى: ەلىمىزدىڭ جەرى كەڭ، شەكارا جەلىسى ۇزىن، توڭىرەگى _ دامۋدى، گۇلدەنۋدى جۇزەگە اسىرۋدىڭ ماڭىزدى نەگىزى، مەملەكەت حاۋىپسىزدىگىن قورعاۋدىڭ ءتۇيىنى، ديپلوماتيالىق جالپى جاعدايدىڭ ماڭداي الدى ورنىن جوسپارلاۋدىڭ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدىڭ تەتىگى. توڭىرەكتى دۇنيە جۇزىلىك كوز ايامەن بارلاپ، توڭىرەكتىك قىزمەتتى ويداعىداي ىستەۋدىڭ جاۋاپكەرشىلىك سەزىمى مەن بورىشتىلىق سەزىمىن كۇشەيتۋ كەرەك.

ءماجىلىس بىلاي دەپ قارادى: پارتيا 18 - قۇرىلتايىنان بەرى شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ پارمەندى باسشىلىعىندا، ءبىز ەتەنە، ادال، ءتيىمدى، سيىسىمدى توڭىرەكتىك ديپلوماتيا ۇستانىمىن العا قويىپ، توڭىرەكتەگى ەلدەردىڭ تاعدىرلاس ورتاق تۇلعاسىن قۇرۋدى ىلگەرىلەتۋدى دارىپتەپ، مەملەكەت باسشىسى ديپلوماتياسىن جەتەكشى ەتىپ، توڭىرەكتەگى ەلدەرمەن جان - جاقتى سەلبەستىكتى تەرەڭدەتىپ، ءار سالاداعى اۋىس - كۇيىستى كۇشەيتىپ، بەيبىتشىلىكتى، ورنىقتىلىقتى بىرگە قورعاپ، توڭىرەكتىك قىزمەتتىڭ ناقتى، جوعارى ءونىمدى جۇلگەسىن قالىپتاستىرىپ، توڭىرەكتىك قىزمەتتەردە تاريحي جەتىستىكتەرگە قول جەتكىزۋدى، تاريحي وزگەرىستەردىڭ تۋىلۋىن ىلگەرىلەتتىك. اماليات بارىسىندا ىزدەنىس جاساۋ ارقىلى قالىپتاسقان تاجىريبەلەرگە ويداعىداي تاباندى بولۋ، ودان ويداعىداي پايدالانۋ كەرەك.

ءماجىلىس بىلاي دەپ اتاپ كورسەتتى: قازىر ەلىمىزدىڭ توڭىرەكپەن قاتىناسى تاياۋ زاماننان بەرگى ەڭ جاقسى مەزگىلدە تۇر، سونىمەن بىرگە، توڭىرەكتەگى جاعداي مەن دۇنيە ءجۇزى وزگەرىسىنىڭ ىشكەرىلەي ىقپالداستىعىنىڭ ماڭىزدى كەزەڭىنە ءوتتى. شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، پارتيا مەن مەملەكەتتىڭ وزەكتى مىندەتىن تىعىز ارقاۋ ەتىپ، ەل ءىشى جانە حالىقارا سىندى ەكى كەلەلى جاعدايدى، دامۋ مەن حاۋىپسىزدىك سىندى ەكى ءىرى ءىستى ءبىر تۇتاس جوسپارلاپ، ادامزاتتىڭ تاعدىرلاس ورتاق تۇلعاسى تۋىن بيىك ۇستاپ، بەيبىت، تىنىش، گۇلدەنگەن، كورىكتى، دوسجار بولۋ سىندى ”5 ۇلكەن مەكەن“ قۇرۋدى ورتاق ارمان، كورشىلەرمەن تاتۋ - ءتاتتى بولۋ، كورشىلەردى الاڭسىز ەتۋ، كورشىلەردى بايىتۋ، جاقىن، ادال بولۋ، تيىمدىلىك جەتكىزۋ، تاعدىرلاس بولۋدى ۇستانىم، باعىت، بەيبىتشىلىك، سەلبەسۋ، اشىق ۇستاۋ، سيىسىمدى بولۋ سىندى ازيا قۇن كوزقاراسىن نەگىزگى تياناق، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى نەگىزگى تۇعىر، حاۋىپ - قاتەردە بىرگە بولاتىن، پارىقتاردى ساقتاپ، ورتاقتىققا ۇمتىلاتىن، تىلدەسىپ، اقىلداساتىن ازيا حاۋىپسىزدىك ۇلگىسىن ستراتەگيالىق تىرەك ەتىپ، توڭىرەكتەگى ەلدەرمەن قول ۇستاسىپ، كوركەم بولاشاقتى بىرگە اشۋ كەرەك.

ءماجىلىس مىنالاردى باسا دارىپتەدى: توڭىرەكتەگى ەلدەردىڭ تاعدىرلاس ورتاق تۇلعاسىن قۇرۋدا توڭىرەكتەگى ەلدەرمەن ستراتەگيالىق ءوزارا سەنىمدىلىكتى بەكەمدەپ، وڭىردەگى ەلدەردىڭ وزىندىك دامۋ جولىمەن ءجۇرۋىن قولداپ، قايشىلىقتار مەن الاۋىزدىقتاردى ۇيلەسىمدى مەڭگەرۋ؛ دامۋدىڭ توعىسۋىن تەرەڭدەتىپ، جوعارى دەڭگەيدەگى ۇلاستىرۋ - تۇتاستىرۋ تورىن قۇرىپ، كاسىپ سالاسى تىزبەگىنىڭ، قامداۋ تىزبەگىنىڭ سەلبەستىگىن كۇشەيتۋ؛ ءوڭىردىڭ ورنىقتىلىعىن بىرگە قورعاپ، حاۋىپسىزدىك جانە زاڭ اتقارۋ سەلبەستىگىن ورىستەتىپ، ءتۇرلى حاۋىپ - قاتەرلەر مەن سىن - سايىستارعا توتەپ بەرۋ؛ بارىس - كەلىستى، اۋىس - كۇيىستى كەڭەيتىپ، ادامداردىڭ بارىس - كەلىسىنە قولايلىلىق جاساۋ كەرەك.

ءماجىلىس بىلاي دەپ اتاپ كورسەتتى: توڭىرەكتىك قىزمەتتى ويداعىداي ىستەۋدە پارتيا ورتالىق كوميتەتىنىڭ ورتالىقتانعان ءبىر تۇتاس باسشىلىعىن كۇشەيتۋ، ءار جاقتىڭ سايكەسۋىن، سەلبەسۋىن كۇشەيتۋ كەرەك. ءتۇزىلىس، مەحانيزمىرەفورماسىن تەرەڭدەتىپ، شەتەلگە ساياتىن زاڭدار مەن زاڭدىق ەرەجەلەر جۇيەسىن كەمەلدەندىرۋ كەرەك. قابىلەت جانە قوسىن قۇرىلىسىن كۇشەيتىپ، توڭىرەكتىك قىزمەتتىڭ نازاريالىق جانە امالياتتىق جاسامپازدىعىن ىلگەرىلەتۋ كەرەك.

ۋاڭ ي قورىتىندى ءسوز سويلەدى.

پارتيا مەن مەملەكەتتىڭ قاتىستى باسشى جولداستارى، قاتىستى جاقتاردىڭ جاۋاپتى جولداستارى ماجىلىسكە قاتىناستى.

كەلۋ قاينارى: حالىق تورابى