لي چياڭ ەكونوميكالىق جاعداي ماماندارى مەن كاسىپورىنشىلاردىڭ اڭگىمە ءماجىلىسىن باسقارىپ اشتى

شينحۋا اگەنتتىگى، 4 - ايدىڭ 9 - كۇنى، بەيجيڭ. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي چياڭ 4 - ايدىڭ 9 - كۇنى تۇستەن كەيىن ەكونوميكالىق جاعداي ماماندارى مەن كاسىپورىنشىلاردىڭ اڭگىمە ءماجىلىسىن باسقارىپ اشىپ، قازىرگى ەكونوميكالىق جاعداي جانە كەلەسى قادامداعى ەكونوميكالىق قىزمەت جونىندەگى ۇسىنىس - پىكىرلەردى تىڭدادى.

اڭگىمە ماجىلىسىندە جاڭ بين، لي شۇنلەي، شىن جيانگۋاڭ، ۋان مين، جىڭ جين، پىڭ جىحۇي، ۋاڭ زۋان قاتارلىلار ىلگەرىندى - كەيىندى لەبىز ءبىلدىردى. كوپشىلىك بىلاي دەپ قارادى: بيىل جىل باسىنان بەرى ەلىمىزدىڭ ەكونوميكالىق اينالىمى جالپى جاقتان ورنىقتى بولىپ، جاڭا بەتالىسقا قاراي جاقساردى، دامۋدىڭ جاڭا قوزعاۋشى كۇشى جەدەل زورايدى. وزگەرىس كوپتەگەن قيىنشىلىقتار تۋدىرعانىمەن، ەلىمىزد ەكونوميكاسىنىڭ ابزالدىعى كوپ، سەرپىمدىلىگى كۇشتى، كومەسكى قۋاتى زور، دامۋ بولاشاعى ۇزاق ۋاقىت جاقسارىپ كەلەدى. كوپشىلىك تاعى سىرتقى سوققىعا توتەپ بەرۋ، ەكونوميكانىڭ ۇزدىكسىز جاقسارۋىن ىلگەرىلەتۋ جونىندە ۇسىنىس - پىكىر بەردى.

ماماندار مەن كاسىپورىنشىلاردىڭ ءسوزىن مۇقيات تىڭداعاننان كەيىن لي چياڭ بىلاي دەدى: بيىلعى جاعداي ءبىرشاما ەرەكشە، شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ پارمەندى باسشىلىعىندا، ءبىز ءتۇرلى حاۋىپ - قاتەرلەر مەن سىن - سايىستارعا بايىپتىلىقپەن توتەپ بەردىك، 1 - توقسانداعى ەكونوميكالىق اينالىم ۇزدىكسىز جاقساردى. سونىمەن بىرگە سىرتقى سوققىنىڭ ەلىمىز ەكونوميكاسىنىڭ ورنىقتى اينالىمىنا بەلگىلى قىسىم تۇسىرەتىندىگىن سەرگەكتىكپەن كورە ءبىلۋىمىز كەرەك. ءبىز بۇل جونىندە تولىق مەجە جاساپ، ءتۇرلى تۇراقسىز فاكتورلارعا توتەپ بەرۋدىڭ دايىندىعىن جاقسى ىستەدىك. ەلىمىزدىڭ دامۋى ەجەلدەن قيىنشىلىقتار مەن سىن - سايىستاردى جەڭۋ بارىسىندا العا باسىپ كەلەدى، ءبىز تەك سەنىمدى بەكەمدەپ، ىنتىماقتاسا كۇرەس جۇرگىزىپ، ءوز ءىسىمىزدى تاباندىلىقپەن جاقسى ىستەسەك بولعانى، ءسوز جوق، حاۋىپ - قاتەردى ورايعا اينالدىرىپ، جۇڭگو ەكونوميكاسىنىڭ ورنىقتى، باياندى دامۋىن ىلگەرىلەتە الامىز.

لي چياڭ بىلاي دەپ باسا دارىپتەدى: ەل ءىشى - سىرتى جاعدايىنداعى جاڭا وزگەرىستەر الدىندا، 2 - توقسانداعى جانە كەلەسى قادامداعى ەكونوميكالىق قىزمەتتى ويداعىداي ىستەۋ توتەنشە ماڭىزدى، ءتۇرلى قىزمەتتەر ۇزدىكسىز كۇش سالۋدى، اناعۇرلىم كۇش سالۋدى قاجەت ەتەدى. اناعۇرلىم بەلسەندى، ۇتىمدى ماكرولىق ساياساتتى ويداعىداي اتقارىپ، الدىن الا كۇش سالۋ ارقىلى بەلگىلەنگەن ساياساتتىڭ تەز ارادا تياناقتانۋىن ىلگەرىلەتىپ، جاعدايدىڭ قاجەتىنە قاراي جاڭا ساياساتتى دەر كەزىندە العا قويىپ، پارمەندى، ءونىمدى ساياسات ارقىلى سىرتقى ورتانىڭ تۇراقسىزدىعىنا توتەپ بەرۋ كەرەك. ىشكى ۇلكەن اينالىمدى ۇلعايتىپ، كۇشەيتىپ، ىشكى سۇرانىمدى ۇلعايتۋدى ۇزاق ۋاقىتتىق ستراتەگيا ەتىپ، سەرپىندى ارتتىرىپ، جۇمىستانۋدى ورنىقتىرىپ، كىرىستى ارتتىرۋدى جەبەپ، تۇتىنۋ بۇيىمدارىنىڭ كونەسىن جاڭاعا اۋىستىرۋدى ويداعىداي يگەرۋمەن بىرگە، قىزمەت وتەۋ تۇتىنۋىنىڭ كومەسكى كۇشىن جەدەل جارىققا شىعارىپ، عىلىم - تەحنيكادا جاڭالىق اشۋ مەن كاسىپ سالاسىندا جاڭالىق اشۋدىڭ توعىسپالى دامۋىن ىلگەرىلەتىپ، جوعارى ساپالى قامداۋ ارقىلى سۇرانىسقا جەتەكشىلىك ەتۋ، سۇرانىستى جاراتۋ كەرەك. ءتۇرلى شارۋاشىلىق تۇلعالارىنىڭ ومىرشەڭدىك كۇشىن تولىق قاۋلاتىپ، قولداۋ سيپاتتى ساياساتتاردى ىشكەرىلەي تياناقتاندىرىپ، كاسىپورىندارعا قاتىستى زاڭ اتقارۋدى كۇش سالا ارناعا ءتۇسىرىپ، قارىز اقشانى كەشەۋىلدەتۋ، قارجى قۇراۋدىڭ قيىندىعى، قارجى قۇراۋدىڭ قىمبات بولۋى سياقتى ماسەلەلەردى ىشكەرىلەي شەشىپ، كاسىپورىنداردىڭ دامۋ بارىسىنداعى قيىنشىلىقتارىن شەشۋىنە شىنايى كومەكتەسىپ، كاسىپورىندارعا اناعۇرلىم جاقسى دامۋ ورتاسىن جاراتۋعا جانە ساياساتتىق قىزمەت وتەۋگە قۇلشىنۋ كەرەك.

لي چياڭ قالىڭ كاسىپورىنشىلاردان وتباسى، وتان سۇيىسپەنشىلىگىن نىعايتىپ، جاعدايعا قاراي دامۋدى جەبەپ، كاسىپورىنداردى الۋەتتەندىرىپ، ساپالىلاندىرىپ، مەملەكەتتىڭ دامۋ جالپى جاعدايىنا كوبىرەك ۇلەس قوسۋدى ءۇمىت ەتتى. مامان - وقىمىستىلاردىڭ كاسىپتىك ابزالدىعىن ساۋلەلەندىرىپ، ەكونوميكالىق اينالىمداعى جاڭا جاعدايلاردى، جاڭا ماسەلەلەردى ارقاۋ ەتە وتىرىپ كوبىرەك الدىن الا كورەگەندىك تانىتىپ، سىندارلى پىكىر بەرۋىن ءۇمىت ەتتى.

ۋ جىڭلۇڭ اڭگىمە ماجىلىسىنە قاتىناستى.

كەلۋ قاينارى: حالىق تورابى