شي جينپيڭ ۆيەتنام مەملەكەتتىك كەڭەسىنىڭ ءتوراعاسى چىن چيڭمينمەن كەزدەستى

مەملەكەت ءتوراعاسى شي جينپيڭ 4 - ايدىڭ 14 – كۇنى كەشتە ۆيەتنام كوممۋنيستىك پارتياسى ورتالىق كوميتەتى تۇرعان جەردە ۆيەتنام مەملەكەتتىك كەڭەسىنىڭ ءتوراعاسى چىن چيڭمينمەن كەزدەستى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

«حالىق گازەتى»، 4 - ايدىڭ 14 – كۇنى، حانوي (تىلشىلەر ليۋ گاڭ، جاڭ جينرو). 4 - ايدىڭ 14 - كۇنى كەشتە مەملەكەت ءتوراعاسى شي جينپيڭ ۆيەتنام كوممۋنيستىك پارتياسى ورتالىق كوميتەتى تۇرعان جەردە ۆيەتنام مەملەكەتتىك كەڭەسىنىڭ ءتوراعاسى چىن چيڭمينمەن كەزدەستى.

شي جينپيڭ بىلاي دەپ اتاپ كورسەتتى: ۆيەتنامعا تاعى دا مەملەكەتتىك ساپاردا بولىپ، ۆيەتنامنىڭ جاڭارتۋ ىستەرىندە قول جەتكىزگەن جاڭا تابىستارىنا ءوز كوزىممەن كۋا بولىپ، جۇڭگو ـ ۆيەتنام دوستىعىنىڭ تەرەڭ نەگىزىن شىنايى سەزىندىم. قازىر جۇڭگو جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋدە، ۆيەتنام ۇلت دامۋىنىڭ جاڭا عاسىرىن باستاۋ الدىندا تۇر، ەكى جاق ءوز دامۋىنىڭ، گۇلدەنۋىنىڭ شەشۋشى كەزەڭىندە تۇر. اۋمالى ـ توكپەلى حالىقارالىق جاعداي الدىندا، جۇڭگو مەن ۆيەتنام جول سەنىمى مەن ءتۇزىم سەنىمىن بەكەمدەپ، ىنتىماقتى، سەلبەستىكتى كۇشەيتىپ، ستراتەگيالىق مانگە يە جۇڭگو ـ ۆيەتنام تاعدىرلاس ورتاق تۇلعاسى قۇرىلىسىن ۇزدىكسىز تەرەڭدەتىپ، وسىزاماندانۋعا قول ۇستاسا قادام تاستاپ، دۇنيە جۇزىنە اناعۇرلىم كوپ ورنىقتىلىق جانە وڭ ەنەرگيا ۇستەۋى كەرەك.

شي جينپيڭ بىلاي دەپ باسا دارىپتەدى: جۇڭگو دا، ۆيەتنام دا _ كوممۋنيستىك پارتيا باسشىلىعىنداعى سوتسياليستىك مەملەكەت، ساياسي بەتالىس پارتيا مەن مەملەكەتتىڭ بولاشاعى مەن تاعدىرىنا جانە ىستەردىڭ گۇلدەنۋى مەن قۇلدىراۋىنا، جەڭىس پەن جەڭىلىسكە سايادى. ەكى پارتيانىڭ، ەكى ەلدىڭ جوعارى جىكتەگىلەرى ەكى جاقتى قارىم ـ قاتىناس جانە ورتاق كوڭىل ءبولىپ وتىرعان كەلەلى كەڭەستىك تاقىرىپتار جونىندە دەر كەزىندە پىكىر اۋىستىرىپ، ورتاق تانىمدى ۇزدىكسىز ۇيىستىرىپ، ءوزارا سەنىمدىلىكتى ارتتىرىپ، بەتالىستى ورنىقتىرىپ، جۇڭگو ـ ۆيەتنام قارىم ـ قاتىناسى كەمەسىنىڭ ورنىقتى العا باسۋىنا شىنايى كەپىلدىك ەتۋى كەرەك. پارتيالار ارا، زاڭ شىعارۋ قۇرىلىمدارى، ساياسي كەڭەس ۇيىمدارى اراسىندا سالالار بويىنشا اۋىس ـ كۇيىس پەن سەلبەستىكتى ۇزدىكسىز ساقتاپ، ەل باسقارۋ تاجىريبەلەرى جونىندە اۋىس ـ كۇيىس جاساۋدى تەرەڭدەتۋ كەرەك. ەكى جاق جۇڭگو مەن ۆيەتنام ديپلوماتيالىق قارىم - قاتىناس ورناتقاندىعىنىڭ 75 جىلدىعىن جانە ”جۇڭگو - ۆيەتنام گۋمانيتارلىق اۋىس - كۇيىس جىلىن“ قۇتتىقتاۋدى وراي ەتىپ، قىزىل گەندى جالعاستىرىپ، قىزىل بايلىقتان ويداعىداي پايدالانىپ، ەكى ەل بۇقاراسىنىڭ، اسىرەسە، جاس بۋىنداردىڭ ءوزارا تۇسىنىستىگى مەن دوستىق سۇيىسپەنشىلىگىن نىعايتىپ، ەكى ەلدىڭ دوستىق دانەكەرىن اناعۇرلىم نىعايتۋى كەرەك.

شي جينپيڭ بىلاي دەپ اتاپ كورسەتتى: جۇڭگو مەملەكەتتىك حالىق قۇرىلتايى مەن ۆيەتنام مەملەكەتتىك كەڭەسىنىڭ بارىس - كەلىسى، ىقپالداستىعى جيىلەپ، سەلبەستىگى سۇبەلى تابىستارعا قول جەتكىزدى. ەكى ەلدىڭ زاڭ شىعارۋ قۇرىلىمدارى ءداستۇرلى دوستىقتى كۇشەيتۋ، ناقتى سەلبەستىكتىڭ تياناقتانۋىن قامتاماسىز ەتۋ، كوپ جاقتى سايكەسۋدى كۇشەيتۋ جاقتارىندا كوبىرەك قىزمەت ىستەپ، ءوز ەلدەرىنىڭ سوتسياليستىك دەموكراتيالىق زاڭمەن جونگە سالۋ قۇرىلىسى جونىندە اۋىس ـ كۇيىس ورىستەتىپ، جۇڭگو ـ ۆيەتنام تاعدىرلاس ورتاق تۇلعاسىنىڭ مازمۇنىن ۇزدىكسىز بايىتۋى كەرەك.

چىن چيڭمين مىنالاردى ءبىلدىردى: ۆيەتنام مەن جۇڭگو _ ىرگەلەس كورشىلەر، ەكى پارتيانىڭ، ەكى ەلدىڭ تاريحتان بەرگى باسشىلارىنىڭ دەن قويا جەتىلدىرۋىندە ”جولداس ۇستىنە باۋىرلاس بولۋ“ سىندى شىنايى سۇيىسپەنشىلىك ورناتتى، ەكى جاقتى قارىم - قاتىناس ۇزاق ۋاقىت دوسجار بەينەدە بولدى. باس شۋجي شي جينپيڭنىڭ وسى رەتكى ساپارى جۇڭگو پارتياسىنىڭ، مەملەكەتىنىڭ جانە حالقىنىڭ ۆيەتنام ـ جۇڭگو قارىم - قاتىناسىنا ءمان بەرەتىندىگىن تولىق ايگىلەدى. ەكى پارتيانىڭ باس شۋجيلەرى ستراتەگيالىق مانگە يە ۆيەتنام ـ جۇڭگو تاعدىرلاس ورتاق تۇلعاسى قۇرىلىسىن ىلگەرىلەتۋ جونىندە ماڭىزدى ستراتەگيالىق جەتەكشىلىك جاسادى، بۇل ۆيەتنام ـ جۇڭگو قارىم ـ قاتىناسىندا تىڭ پاراق اشۋدى ىلگەرىلەتەدى. ۆيەتنام پارلامەنتى جۇڭگونىڭ مەملەكەتتىك ەكى ءماجىلىسىنىڭ ءساتتى اشىلعاندىعىن قىزۋ قۇتتىقتايدى، جۇڭگونىڭ مەملەكەتتىك حالىق قۇرىلتايىمەن تىعىز بايلانىس جاساپ، سەلبەستىك جاساپ، ەكى پارتيانىڭ، ەكى ەلدىڭ ەڭ جوعارى باسشىلارى كەلىسكەن ماڭىزدى ورتاق تانىمدى شىن مانىندە ويداعىداي تياناقتاندىرىپ، ەكى ەلدىڭ بىرگە گۇلدەنىپ ـ كوركەيۋىن، دامۋىن جەبەۋگە، حالىقتىڭ دوستىعىن نىعايتۋعا بەلسەندى ۇلەس قوسۋدى ءۇمىت ەتەدى.

ساي چي، ۋاڭ ي، ۋاڭ شياۋحۇڭ قاتارلىلار قاتىناستى.

كەلۋ قاينارى: حالىق تورابى