شي جينپيڭ كۋالالۋمپۋرعا باردى، مالايزيادا مەملەكەتتىك ساپاردا بولادى

سول جەر ۋاقىتى 4 - ايدىڭ 15 - كۇنى كەشتە مەملەكەت ءتوراعاسى شي جينپيڭ ارناۋلى ۇشاقپەن كۋالالۋمپۋرعا باردى، الدا مالايزيانىڭ ەڭ جوعارى مەملەكەت باسشىسى يبىراھيمنىڭ ۇسىنىسىمەن مالايزيادا مەملەكەتتىك ساپاردا بولادى. ارناۋلى ۇشاق كۋالالۋمپۋر حالىقارالىق اۋەجايىنا جەتكەن كەزدە مالايزيانىڭ زۇڭليى ءانۋار، سىرتقى ىستەر مينيسترى مۇحاممەد، سەرىك بولۋشى مينيستر، قاتىناس مينيسترى لۋ جاۋفۋ قاتارلى جوعارى دارەجەلى ءمانساپتىلار ىستىق ىقىلاسپەن قارسى الدى.

سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

«حالىق گازەتى»، 4 - ايدىڭ 15 - كۇنى، كۋالالۋمپۋر (تىلشىلەر يۇي ي - چۇن، ياڭ ي). سول جەر ۋاقىتى 4 - ايدىڭ 15 - كۇنى كەشتە مەملەكەت ءتوراعاسى شي جينپيڭ ارناۋلى ۇشاقپەن كۋالالۋمپۋر قالاسىنا باردى، الدا مالايزيانىڭ ەڭ جوعارى مەملەكەت باسشىسى يبىراھيمنىڭ ۇسىنىسى بويىنشا، مالايزيادا مەملەكەتتىك ساپاردا بولادى.

ارناۋلى ۇشاق كۋالالۋمپۋر حالىقارالىق اۋەجايىنا جەتكەن كەزدە مالايزيانىڭ زۇڭليى ءانۋار، سىرتقى ىستەر مينيسترى مۇحاممەد، سەرىك بولۋشى مينيستر، قاتىناس مينيسترى لۋ جاۋفۋ قاتارلى جوعارى دارەجەلى ءمانساپتىلار ىستىق ىقىلاسپەن قارسى الدى. مالايزيا بالالارى شي جينپيڭگە گۇل ۇسىندى، مالايزيا جاستارى مەن ورەندەرى جەرگىلىكتى ورىننىڭ ەرەكشەلىگىنە يە ءبي بيلەپ، جۇڭگو مەن مالايزيانىڭ مەملەكەت تۋىن بۇلعاپ، شي جينپيڭنىڭ ساپارلاي كەلگەندىگىن قىزۋ قارسى الدى.

شي جينپيڭ جازباشا ءسوز سويلەپ، جۇڭگو ۇكىمەتى مەن جۇڭگو حالقى اتىنان مالايزيا ۇكىمەتى مەن مالايزيا حالقىنا شىنايى سالەم جولدادى جانە ىزگى تىلەك ءبىلدىردى.

شي جينپيڭ بىلاي دەپ اتاپ كورسەتتى: جۇڭگو مەن مالايزيا − اراسىن تەڭىز ءبولىپ جاتقان دوس كورشى ەلدەر، ءداستۇرلى دوستىعى مىڭ جىلعا جالعاسقان.

ديپلوماتيالىق قارىم - قاتىناس ورناتقان جارتى عاسىردان استام ۋاقىتتان بەرى ەكى ەل ءوزارا قۇرمەت ەتۋگە، تەڭ تۇرعىدا مامىلە جاساۋعا، سەلبەسىپ تەڭ يگىلىككە كەنەلۋگە تاباندى بولىپ، مەملەكەت پەن مەملەكەت قاتىناسىنىڭ ۇلگىسىن ورناتتى.

2023 - جىلى ەكى جاق جۇڭگو - مالايزيا تاعدىرلاس ورتاق تۇلعاسىن بىرگە قۇرۋ جونىندە ماڭىزدى ورتاق تانىمعا كەلدى، بىلتىر ەكى ەل ديپلوماتيالىق قارىم - قاتىناس ورناتقاندىعىنىڭ 50 جىلدىعىن سالتاناتپەن قۇتتىقتادى. وركەندەپ كەلە جاتقان ماڭىزدى ەلدەر جانە دۇنيە جۇزىندەگى وڭتۇستىك ەلدەرى رەتىندە، جۇڭگو مەن مالايزيانىڭ جوعارى دەڭگەيدەگى ستراتەگيالىق سەلبەستىكتى تەرەڭدەتۋى ەكى ەلدىڭ ورتاق مۇددەسىنە ۇيلەسەدى، ءوڭىردىڭ، ءتىپتى، دۇنيە ءجۇزىنىڭ بەيبىتشىلىگىنە، ورنىقتىلىعىنا، گۇلدەنۋىنە ءتيىمدى. مەن وسى رەتكى ساپاردى وراي ەتىپ، ەكى ەلدىڭ ءداستۇرلى دوستىعىن ونان ارى تەرەڭدەتىپ، ەكى جاقتىڭ ساياسي ءوزارا سەنىمدىلىگىن ارتتىرىپ، وسىزامانداندىرۋ قۇرىلىسى سەلبەستىگىن ىلگەرىلەتىپ، وركەنيەتتەردىڭ اۋىس - كۇيىسىن، ءوزارا ۇلگى الۋىن بىرگە جەبەپ، جۇڭگو مەن مالايزيا تاعدىرلاس ورتاق تۇلعاسى قۇرىلىسىنىڭ ۇزدىكسىز تىڭ ساتىعا كوتەرىلۋىن ىلگەرىلەتىپ، جۇڭگو - مالايزيا قارىم - قاتىناسىنىڭ جاڭا ”التىن 50 جىلدىعىن“ باستاۋدى ءۇمىت ەتەمىن.

ساي چي، ۋاڭ ي، ۋاڭ شياۋحۇڭ قاتارلى ساپارلاستارى وسى ۇشاقپەن بىرگە باردى.

جۇڭگونىڭ مالايزياداعى باس ەلشىسى وۋياڭ يۇيجيڭ دە اۋەجايعا بارىپ قارسى الدى.

شي جينپيڭ اۋەجايدان قوناق ۇيگە بارا جاتقان جولدا جەرگىلىكتى ورىنداعى جۇڭگو قارجىلاندىرعان كاسىپورىنداردىڭ قىزمەتكەرلەرى، سوندا وقىپ جاتقان وقۋشىلار جولدىڭ ەكى جاعىندا جۇڭگو مەن مالايزيانىڭ مەملەكەت تۋىن بۇلعاپ، ”ءتوراعا شي جينپيڭنىڭ مالايزياعا ساپارلاي كەلۋىن قىزۋ قارسى الامىز“، ”جۇڭگو - مالايزيا دوستىعى جاساسىن“ دەگەن سياقتى جازۋلار جازىلعان قىزىل كەرمە تۋلاردى بيىك ۇستاپ تۇردى، حۋارىندار، حۋاچياۋلار ارىستان ءبيىن شات مەرەيمەن بيلەپ، شي جينپيڭنىڭ ساپارلاي كەلگەندىگىن قارسى الدى.