شي جينپيڭ ازەربايجاننىڭ زۇڭتۇڭى اليەۆپەن كەڭەس وتكىزدى

4 - ايدىڭ 23 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن ازەربايجاننىڭ زۇڭتۇڭى اليەۆپەن كەڭەس وتكىزدى. سۋرەتتە: شي جينپيڭ مەن حانىمى پىڭ لييۋان اليەۆ جانە حانىمى اليەۆامەن بىرگە سۋرەتكە تۇسۋدە.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

4 - ايدىڭ 23 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن ازەربايجاننىڭ زۇڭتۇڭى اليەۆپەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا اليەۆتى قارسى الۋ سالتىن وتكىزۋدە.

سۋرەتتى شينحۋا اگەنتتىگىنىڭ ءتىلشىسى راۋ ايمين تۇسىرگەن

شينحۋا اگەنتتىگى، 4 - ايدىڭ 23 - كۇنى، بەيجيڭ (تىلشىلەر دۇڭ شۋە، فىڭ شينران). 4 - ايدىڭ 23 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن ازەربايجاننىڭ زۇڭتۇڭى اليەۆپەن كەڭەس وتكىزدى. ەكى ەل مەملەكەت باسشىلارى جۇڭگو مەن ازەربايجاننىڭ جالپى بەتتىك ستراتەگيالىق ارىپتەستىك قارىم - قاتىناس ورناتقاندىعىن جاريالادى.

شي جينپيڭ بىلاي دەپ اتاپ كورسەتتى: كوڭىل توعىسسا، جەر الىستىق ەتپەيدى. حالىقارالىق جاعداي اۋمالى - توكپەلى بولعانىمەن، جۇڭگو - ازەربايجان قارىم - قاتىناسى ۇزاق ۋاقىت بويى بەكەمدەلدى. ەكى ەل ديپلوماتيالىق قارىم - قاتىناس ورناتۋداعى اۋەلگى ماقساتتى باستان - اياق ەستە بەرىك ساقتاپ، ءوزارا قۇرمەت ەتۋگە، ادىلدىك پەن ادىلەتتىلىككە، سەلبەسىپ تەڭ يگىلىككە كەنەلۋگە تاباندى بولىپ، جۇڭگو - ازەربايجان قارى - قاتىناسىنا ستراتەگيالىق جانە ۇزاق بولاشاقتىق تۇرعىدان مامىلە جاسادى جانە ونى دامىتتى. ەكى جاق ساياسي سەنىمدىلىكتى ۇزدىكسىز كۇشەيتىپ، ناقتى سەلبەستىكتى تەرەڭدەتىپ، حالىقارالىق سەلبەستىكتى جيىلەتىپ، جۇڭگو مەن ازەربايجاننىڭ جان - جاقتى سەلبەستىگىنىڭ تىڭ پاراعىن اشىپ، ەكى ەلدىڭ دامۋىنا، گۇلدەنۋىنە دەم بەرىپ، ەكى ەل حالقىن اناعۇرلىم ويداعىداي باقىتقا كەنەلتۋى كەرەك.

شي جينپيڭ بىلاي دەپ باسا دارىپتەدى: ءبىر - ءبىرىنىڭ وزەكتى مۇددەسىنە ساياتىن ماسەلەلەردە ءبىرىن - ءبىرى باتىل قولداۋ − جۇڭگو مەن ازەربايجاننىڭ تاڭداۋلى ءداستۇرى ءارى ستراتەگيالىق سەرىكتەستەردە بولۋعا ءتيىستى مىندەت.

جۇڭگو جاق ازەربايجان جاقتىڭ مەملەكەتتىڭ يەلىك ۇقىعىن، تاۋەلسىزدىگىن جانە تەرريتوريا تۇتاستىعىن قورعاپ، ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ۇزدىكسىز ءجۇرۋىن قولدايدى. ازەربايجانمەن زاڭ اتقارۋ جانە حاۋىپسىزدىك سەلبەستىگىن ىشكەرىلەي ورىستەتىپ، ”ءۇش ءتۇرلى كۇشكە“ باتىل سوققى بەرۋدى قالايدى. جۇڭگو مەن ازەربايجاننىڭ ”ءبىر بەلدەۋ، ءبىر جولدى“ بىرگە قۇرۋى سۇبەلى تابىستارعا قول جەتكىزىپ، ەكى ەل حالقىنا ناقتى باقىت سيلادى. جوعارى دەڭگەيدە جوبالاۋدى ساپالىلاندىرىپ، دامۋ ستراتەگياسىن ۇشتاستىرۋدى كۇشەيتىپ، سەلبەستىك مەحانيزمىن كەمەلدەندىرىپ، سەلبەستىك كومەسكى كۇشىن ىشكەرىلەي اشىپ، ”ءبىر بەلدەۋ، ءبىر جولدى“ بىرگە قۇرۋدىڭ تەرەڭدەۋىن، ناقتىلانۋىن ىلگەرىلەتىپ، جوعارى ساپالى دامۋدى جۇزەگە اسىرۋ كەرەك. وقۋ - اعارتۋ، مادەنيەت، ساياحات، جاستار، جەرگىلىكتى ورىندار سياقتى جاقتارداعى سەلبەستىكتى شابىتتاندىرىپ جانە قولداپ، حالىق تىلەگىنىڭ توعىسۋىن جەبەپ، ەكى ەل دوستىعىنىڭ حالىق رايى نەگىزىن بەكەمدەۋ كەرەك.

شي جينپيڭ بىلاي دەپ اتاپ كورسەتتى: كەدەن باجىسى سوعىسى، ساۋدا سوعىسى ءار ەلدىڭ ورىندى ۇقىق - مۇددەسىنە زيان جەتكىزىپ، كوپ جاقتى ساۋدا ءتۇزىلىسىن ءبۇلدىرىپ، دۇنيە ءجۇزىنىڭ ەكونوميكالىق تارتىبىنە سوقتىقتى.

جۇڭگو جاق ازەربايجان جاقپەن بىرگە بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى جانە حالىقارالىق زاڭدى نەگىز ەتكەن حالىقارالىق ءتارتىپتى قورعاۋدى، ءوزىنىڭ ورىندى ۇقىق - مۇددەسىن باتىل قورعاۋدى، حالىقارالىق ادىلدىك پەن تۋراشىلدىقتى قورعاۋدى قالايدى.

اليەۆ مىنالاردى ءبىلدىردى: ءتوراعا شي جينپيڭنىڭ پارمەندى باسشىلىعىندا، جۇڭگونىڭ ەكونوميكاسى مەن قوعامى تەز دامىپ، حالىقارالىق ورنى مەن ىقپالى ۇزدىكسىز جوعارىلادى. دۇنيە ءجۇزى عاسىرلىق وزگەرىستە تۇرعانىمەن، ازەربايجان مەن جۇڭگو باستان - اياق ءوزارا قۇرمەت ەتىپ، ءوزارا سەنىم ارتىپ، سەلبەستىگى ۇزدىكسىز تەرەڭدەپ، ەكونوميكا - ساۋدا قارى - قاتىناسى تەز قارقىنمەن دامىپ، جەرگىلىكتى ورىنداردىڭ اۋىس - كۇيىسى كۇن سايىن جيىلەپ، ۇلاستىرۋ - تۇتاستىرۋ باياندى ىلگەرىلەۋشىلىككە قول جەتكىزدى. ازەربايجان جاق ءبىر جۇڭگو پرينسيبىنە تاباندى بولادى، تايۋان − جۇڭگو تەرريتورياسىنىڭ ايرىلماس ءبىر بولەگى دەگەنگە تاباندى بولادى، جۇڭگو ۇكىمەتىنىڭ مەملەكەتتىڭ تۇتاستىعىن جۇزەگە اسىرۋ ءۇشىن جاساعان بارلىق قۇلشىنىسىن قولدايدى.

ءتوراعا شي جينپيڭ العا قويعان ادامزاتتىڭ تاعدىرلاس ورتاق تۇلعاسىن قۇرۋ ۇستانىمى مەن 3 ۇلكەن دۇنيە جۇزىلىك باستاما دۇنيە ءجۇزىنىڭ بەيبىتشىلىگىنە، ورنىقتىلىعىنا، گۇلدەنۋىنە ءتيىمدى، ازەربايجان جاق مۇنى ايرىقشا القايدى، بەلسەنە قولدايدى. ازەربايجان جاق جۇڭگو جاقپەن جاپپاي ستراتەگيالىق سەرىكتەستىك قارىم - قاتىناس قۇرىلىسىن ىشكەرىلەي ىلگەرىلەتىپ، ”ءبىر بەلدەۋ، ءبىر جول“ قۇرىلىسى، سيفرلى ەكونوميكا، جاسىل ەنەرگيا، عىلىم - تەحنيكا سياقتى سالالارداعى سەلبەستىكتى كەڭەيتىپ، ساياسي پارتيالار مەن گۋمانيتارلىق اۋىس - كۇيىستى تەرەڭدەتىپ، حالىقارالىق جانە وڭىرلىك ىستەردەگى سەلبەستىكتى كۇشەيتىپ، ەكى ەل قارىم - قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋدى قالايدى.

كەڭەستەن كەيىن ەكى ەلدىڭ مەملەكەت باسشىلارى «جۇڭحۋا حالىق رەسپۋبليكاسى مەن ازەربايجان رەسپۋبليكاسىنىڭ جالپى بەتتىك ستراتەگيالىق سەرىكتەستىك قارىم - قاتىناس ورناتۋ جونىندەگى بىرلەسكەن مالىمدەمەسىنە» بىرگە قول قويىپ، ”ءبىر بەلدەۋ، ءبىر جولدى“ بىرگە قۇرۋ، ءادىليا، جاسىل دامۋ، سيفرلى ەكونوميكا، ءبىلىم مەنشىك ۇقىعى، عارىش سياقتى سالالارداعى 20 سەلبەستىك قۇجاتىنا قول قويۋعا كۋا بولدى.

كەڭەستىڭ الدىندا شي جينپيڭ مەن حانىمى پىڭ لييۋان حالىق سارايىنىڭ شىعىس قاقپاسىنىڭ سىرتىنداعى الاڭدا اليەۆ پەن حانىمى اليەۆانى قارسى الۋ سالتىن وتكىزدى.

اليەۆ جەتكەن كەزدە قۇرمەت قاراۋىلى ساپ تۇزەپ قۇرمەت ءبىلدىردى. شي جينپيڭ اليەۆپەن بىرگە پارات مىنبەسىنە شىقتى، اسكەري وركەستر جۇڭگو مەن ازەربايجاننىڭ مەملەكەت اندەرىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى. اليەۆ شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.

سول كۇنى تۇستە شي جينپيڭ مەن پىڭ لييۋان حالىق سارايىنىڭ التىن ءتۇستى زالىندا اليەۆ پەن حانىمىنا ارناپ قارسى الۋ قوناعاسىن وتكىزدى.

ۋاڭ ي جوعارىداعى قيمىلدارعا قاتىناستى.

كەلۋ قاينارى: حالىق تورابى