ساۋدا مينيسترلىگى ا ق ش – نىڭ كەدەن باجىسىن ءتاسىل ەتىپ، باسقا مەملەكەتتەردىڭ جۇڭگومەن ساۋدا – ەكونوميكا سەلبەستىگىن ورىستەتۋىنە شەكتەۋ سالىپ، قىسىم كورسەتكەنى جونىندە جاۋاپ قايتاردى

شينحۋا اگەنتتىگىنىڭ 4 – ايدىڭ 21 – كۇنى بەيجيڭنەن بەرگەن حابارى. ساۋدا مينيسترلىگىنىڭ مالىمدەمەشىسى 4- ايدىڭ 21 – كۇنى مىنانى ءبىلدىردى: جۋىردا ا ق ش اتالمىش ”بارابار بولۋ“ دەگەندى جەلەۋ ەتىپ، بارلىق ساۋدا سەرىكتەرىنە كەدەن باجىسى شارالارىن الباتى اتقارۋمەن بىرگە، ءارقايسى جاقتاردى وزىمەن اتالمىش ”بارابار كەدەن باجىسى“ جونىندە كەڭەس وتكىزۋگە ماجبۇرلەدى. بۇل ”بارابار بولۋ“ دەگەندى جەلەۋ ەتىپ، ەكونوميكا – ساۋدا سالاسىندا زورەكەرلىك ساياسات اتقارىپ، سىڭار جاقتىلى زورلىقتى شارالاردى اتقارۋ سانالادى. جاراسىمپازدىق بەيبىتشىلىككە جەتكىزبەيدى، ىمىراعا كەلۋ دە قۇرمەتكە يە بولا المايدى. ءوزىنىڭ ءبىر ساتتىك مۇددەسىن كۇيتتەپ، باسقالاردىڭ مۇددەسىن زيانداۋ ارقىلى اتالمىش كەدەن باجىسىن ۇستەمەلەۋدى كۇشىنەن قالدىرۋعا قول جەتكىزۋ جولبارىستىڭ جونىنان تاسپا سۇراعاندىق سانالادى، ەڭ سوڭىندا ەكى جاقتان دا قۇر الاقان قالىپ، بىرەۋگە قاستىق سايلايمىن دەپ ءوزى ورعا تۇسەدى.

ءبىر ءتىلشى بىلاي دەپ سۇرادى: شەتەل اقپارات قۇرالدارىنىڭ حابارلاۋىنا قاراعاندا، بۇل ىستەن حابارلى ادامداردىڭ بىلدىرۋىنشە، ترامپ ۇكىمەتى كەدەن باجىسى جونىندەگى كەلىسسوز بارىسىندا باسقا مەملەكەتتەردىڭ ا ق ش جاقتىڭ كەدەن باجىسى شارالارىن كۇشىنەن قالدىرۋىنا قول جەتكىزۋ ءۇشىن، باسقا مەملەكەتتەردەن جۇڭگومەن ساۋدا سالاسىندا بارىس – كەلىس جاساۋعا شەكتەمە قويۋدى تالاپ ەتىپ، ولارعا قىسىم كورسەتكەن. مالىمدەمەشى وسى جونىندە قانداي پىكىر بىلدىرەدى؟ ساۋدا مينيسترلىگىنىڭ مالىمدەمەشىسى بۇل سۇراۋعا جوعارىدا ايتىلعانداي جاۋاپ قايتاردى.

مالىمدەمەشى بىلاي دەدى: جۇڭگو جاق ءارقايسى جاقتاردىڭ تەپە - تەڭ تۇرعىدا كەڭەسۋ ارقىلى وزدەرىنىڭ ا ق ش – جاقپەن بولعان ساۋدا – ەكونوميكا سالاسىنداعى الاۋىزدىقتارىن شەشۋىنە قۇرمەت ەتەدى. جۇڭگو جاق بىلاي دەپ قارايدى: ءارقايسى جاقتار ”بارابار كەدەن باجىسى“ ماسەلەسىندە ءادىل دە ادىلەتتى جاقتا تۇرۋى، تاريحتىڭ دۇرىس جاعىندا تۇرۋى، حالىقارالىق ساۋدا – ەكونوميكا ەرەجەلەرى مەن كوپ جاقتى ساۋدا ءتۇزىلىسىن قورعاۋى كەرەك. ەرەكشە اتاپ ءوتۋدى قاجەت ەتەتىنى، جۇڭگو جاق ءارقانداي جاقتىڭ جۇڭگونىڭ مۇددەسىن بوداۋ ەتۋ ارقىلى ايىرباس جاساسۋىنا باتىل قارسى تۇرادى. ەگەر وسىنداي جاعداي بايقالاتىن بولسا، جۇڭگو جاق مۇلدە قابىلدامايدى، باتىل تۇردە قارسى شارا قولدانادى. جۇڭگو جاق ءوزىنىڭ ۇقىق – مۇددەسىن قورعايتىن سەنىمگە جانە قۋاتقا يە.

مالىمدەمەشى مىنانى ءبىلدىردى: سىڭار جاقتىلىق پەن قورعانىمپازدىقتىڭ سوققىسىنا ءدوپ كەلگەندە، ەشكىم دە ءوزىنىڭ عانا قامىن جەۋى مۇمكىن ەمەس. حالىقارالىق ساۋدا الدا – جالدا السىزدەر ازۋلىلارعا جەم بولاتىن ”ادىلەتسىز الەمگە“ قايتىپ ورالسا، بارلىق مەملەكەت تە زياندالۋشىعا اينالادى. جۇڭگو جاق ءارقايسى جاقتارمەن بىرگە ىنتىماقتاسا سايكەسۋدى، قول ۇستاسا توتەپ بەرۋدى، سىڭار جاقتىلى زورەكەرلىك ارەكەتكە بىرگە قارسىلىق كورسەتۋدى ءوزىنىڭ ۇيلەسىمدى ۇقىق – مۇددەسىن قورعاۋدى، حالىقارالىق ادىلدىك پەن ادىلەتتىلىكتى قورعاۋدى قالايدى.

كەلۋ قاينارى: حالىق تورابى