شي جينپيڭ برازيليانىڭ زۇڭتۇڭى لۋلامەن تەلەفوندا سويلەستى

شينحۋا اگەنتتىگى، 8 - ايدىڭ 12 ، كۇنى، بەيجيڭ. 8 - ايدىڭ 12 - كۇنى مەملەكەت ءتوراعاسى شي جينپيڭ ۋادە بويىنشا برازيليانىڭ زۇڭتۇڭى لۋلامەن تەلەفوندا سويلەستى.

شي جينپيڭ بىلاي دەپ اتاپ كورسەتتى: جۇڭگو - برازيليا قارىم - قاتىناسى تاريحتاعى ەڭ جاقسى مەزگىلدە تۇر، جۇڭگو - برازيليا تاعدىرلاس ورتاق تۇلعاسى قۇرىلىسى مەن ەكى ەلدىڭ دامۋ ستراتەگياسىن ۇشتاستىرۋدىڭ باستاماسى جاقسى، اياق الىسى ءساتتى بولدى. جۇڭگو جاق برازيليا جاقپەن بىرگە ورايدى مىقتى يگەرىپ، ءبىر تۇتاس جوسپارلاۋدى كۇشەيتىپ، اناعۇرلىم كوپ ءوزارا ءتيىمدى سەلبەستىك جەتىستىكتەرىن قالىپتاستىرىپ، دۇنيە ءجۇزىنىڭ وڭتۇستىگىندەگى ءىرى ەلدەردىڭ ىنتىماقتاسا ءوزىن الۋەتتەندىرۋىنىڭ ۇلگىسىن ورناتىپ، اناعۇرلىم ءادىل دۇنيە ءجۇزى مەن اناعۇرلىم باياندى پلانەتانى قول ۇستاسا قۇرۋدى قالايدى.

لۋلا مىنالاردى ءبىلدىردى: برازيليا جاق جۇڭگومەن قارىم - قاتىناسىنا ايرىقشا ءمان بەرەدى، جۇڭگومەن سەلبەستىكتى كۇشەيتىپ، ستراتەگيالىق ۇشتاسۋدى تەرەڭدەتىپ، ەكى ەل قارىم - قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋدى ءۇمىت ەتەدى. لۋلا برازيليانىڭ ا ق ش - مەن قارىم - قاتىناسىنىڭ تاياۋداغى جاعدايىن جانە برازيليانىڭ ءوزىنىڭ يەلىك ۇقىعىن باتىل قورعاۋداعى پرينسيپتىك مايدانىن تانىستىرىپ، جۇڭگونىڭ كوپ جاقتىلىققا تاباندى بولىپ، ەركىن ساۋدا ەرەجەسىن قورعاپ، حالىقارالىق ىستەردە جاۋاپكەرشىلىك ارقالاۋ رولىن ساۋلەلەندىرگەندىگىن القادى. برازيليا جاق جۇڭگو جاقپەن بريكس سياقتى كوپ جاقتى مەحانيزمدەگى تىلدەسۋدى، سايكەسۋدى كۇشەيتىپ، سىڭار جاقتى زورەكەرلىك ارەكەتتەرگە قارسى تۇرىپ، ءار ەلدىڭ ورتاق مۇددەسىن قورعاۋدى قالايدى.

شي جينپيڭ مىنالاردى ءبىلدىردى: جۇڭگو جاق برازيليا حالقىنىڭ مەملەكەتتىڭ يەلىك ۇقىعىن قورعاۋىن قولدايدى، برازيليا جاقتىڭ ءوزىنىڭ ورىندى ۇقىق - مۇددەسىن قورعاۋىن قولدايدى. ءار ەل ىنتىماقتاسىپ، سىڭار جاقتىلىققا، قورعانىمپازدىققا تۋدى ايقىن ۇستاپ قارسى تۇرۋى كەرەك. بريكس مەحانيزمى _ دۇنيە ءجۇزىنىڭ وڭتۇستىگىنىڭ ورتاق تانىمىن ۇيىستىراتىن ماڭىزدى تۇعىر، برازيليانىڭ بريكس ەلدەرى باسشىلارىنىڭ ديدارلاسۋىن ءساتتى وتكىزگەندىگىن قۇتتىقتايمىن. دۇنيە جۇزىندەگى وڭتۇستىك ەلدەرى حالىقارالىق ادىلدىك پەن ادىلەتتىلىكتى، حالىقارالىق قارىم - قاتىناستىڭ نەگىزگى ولشەمىن، وركەندەپ كەلە جاتقان ەلدەردىڭ ورىندى ۇقىق - مۇددەسىن قول ۇستاسا قورعاۋى كەرەك. جۇڭگو مەن برازيليا دۇنيە جۇزىلىك سايىستارعا ۇزدىكسىز بىرگە توتەپ بەرىپ، بىرلەسكەن مەملەكەتتەر ۇيىمىنىڭ كليمات وزگەرىسى جونىندەگى بەللەن جينالىسىنىڭ تابىستى بولۋىنا كەپىلدىك ەتىپ، ”بەيبىتشىلىك دوسى“ توبىنىڭ ۋكراينا داعدارىسىن ساياسي جولمەن شەشۋدە رولىن ساۋلەلەندىرۋىن ىلگەرىلەتۋى كەرەك.