مەملەكەتتىك اۋرۋدان ساقتانۋ جانە ونى تىزگىندەۋ مەڭگەرمەسى جۇقپالى اۋرۋ ىندەتىنە بايلانىستى ساقتىق دابىلىن قاعۋدى باسقارۋ ءادسىن باسىپ تاراتتى 

حالىق گازەتىنىڭ ءتىلشىسى شىن شاۋتيە 8 – ايدىڭ 12 – كۇنى بەيجيڭنەن حابارلايدى. مەملەكەتتىك اۋرۋدان ساقتانۋ جانە ونى تىزگىندەۋ مەڭگەرمەسى جۋىردا «جۇقپالى اۋرۋ ىندەتىنە بايلانىستى دابىل قاعۋدى باسقارۋ ءادىسىن (سىناق رەتىندە اتقارىلادى)» باسىپ تاراتقان، مۇنداعى ماقسات — جۇقپالى اۋرۋ ىندەتىنە بايلانىستى دابىل قاعۋ قىزمەتىن جۇيەگە ءتۇسىرۋ جانە وعان جەتەكشىلىك ەتۋ، جۇقپالى اۋرۋ ىندەتىنىڭ حاۋىپ – قاتەرىنەن ساقتانۋ جانە ونى ارىلتۋ، جۇقپالى اۋرۋدىڭ حالىق جۇرتشىلىعىنىڭ ءومىرى مەن دەنساۋلىعىنا زيان جەتكىزۋىنەن ساقتانۋ.

ءادىس 4 بولىمنەن قۇرالادى، جيىنى 19 تارماق قامتىلعان، ماقساتى، پايدالانىلاتىن كولەمى جانە انىقتاماسى، قىزمەت پرينسيبى مەن قىزمەت جاۋاپكەرشىلىگى، باستى بارىستاعى تۇيىندەر جانە اتقارۋ مەحانيزمى، ساياسات جانە قامتاماسىزداندىرۋ قاتارلى مازمۇندار ايقىن تۇراقتاندىرىلعان.

ادىسكە نەگىزدەلگەندە، دابىل قاعىلاتىن جاعداي زاڭدا بەلگىلەنگەن جۇقپالى اۋرۋلار، جاڭادان بايقالعان جۇقپالى اۋرۋلار، تارالۋ سەبەبى بەلگىسىز جۇقپالى اۋرۋلار، سونداي – اق، باسقا دا ءتۇيىندى جۇقپالى اۋرۋلار قاتارلىلار تۋىنداتقان نەمەسە تۋىنداتۋى ىقتيمال بولعان الەۋمەتتىك دەنساۋلىق ساقتاۋ جاعىنداعى حاۋىپ – قاتەرلەردى، ونىڭ ىقپالىنا ۇشىراۋى مۇمكىن بولعان ادامدار توبىنا، قاتىستى تاراۋلار نەمەسە قۇرىلىمدارعا الدىن الا بەلگىلى دەڭگەيدەگى ساقتانۋ، دايىندالۋ شارالارىن اتقارۋدى ەسكەرتۋدىڭ قاجەتتىلىگىن قامتيدى.

ادىستە مىنالار دا ورتاعا قويىلعان: ءار دارەجەلى اۋرۋدان ساقتانۋ – تىزگىندەۋ قۇرىلىمدارى كوپ ءتۇرلى ارنا ارقىلى جۇقپالى اۋرۋلاردى باقىلاۋ – تەكسەرۋ ينفورماتسياسىن جيناقتاپ، جۇقپالى اۋرۋ ىندەتىنىڭ حاۋىپ – قاتەرىن مولشەرلەۋ قىزمەتىن ورىستەتىپ، الەۋمەتتىك دەنساۋلىق ساقتاۋعا ساياتىن حاۋىپ – قاتەردىڭ تۋىلۋ ىقتيمالدىعىن پارىقتاپ، ىندەتتىڭ حاۋىپ – قاتەر دارەجەسىن ساراپتاۋ كەرەك. حاۋىپ – قاتەر دارەجەسى ەرەكشە تومەن دارەجەلى، تومەندارەجەلى، ورتاشا دارەجەلى، جوعارى دارەجەلى بولىپ تورتكە بولىنەدى.

ۇعىسۋعا قاراعاندا، حاۋىپ – قاتەردى دارەجەگە ءبولۋ ولشەمىن بەلگىلەۋدى مەملەكەتتىك اۋرۋدان ساقتانۋ جانە تىزگىندەۋ مەڭگەرمەسى ارناۋلى ۇيىمداستىرادى.

كەلۋ قاينارى: حالىق تورابى