ۋيشيندە الدانۋشىنىڭ قىزىنىڭ اتىن جامىلعان الدامكوس 49.8 مىڭ يۋاندى الداپ اكەتكەن 

انار بۇلت | شينجياڭ زاڭمەن باسقارۋ گازەتىنىڭ ءتىلشىسى حان جين، ەرىكتى ءتىلشىسى دۇڭ سىحاۋ حابارلايدى. 10 – ايدىڭ 10 – كۇنى، جاۋ مىرزا كورلا قالالىق قوعام حاۋىپسىزدىگى مەكەمەسى الدامكوستىككە قارسى تۇرۋ ورتالىعىنىڭ حالىق ساقشىسى بەرگەن بانكە تالونىن كورگەن كەزدە: ”اقشا ءبىر تيىن دا كەمىمەپتى، سەندەرگە راقىمەت!“ دەپ العىسىن جاۋدىردى.

بانكە تالونىنا جازىلعان ”تولىق سومادا قايتارىلدى“ دەگەن ءسوز كوزگە ەرەكشە تۇسەدى، وسىنىڭ الدىندا بۇل 49.8 مىڭ يۋان الدامكوستەردىڭ قالتاسىنا تۇسە جازداعان.

9 – ايدىڭ 28 – كۇنى، جاۋ مىرزا ۋيشيندە بىرەۋدىڭ دوستار قاتارىنا قوسۋ تۋرالى ءوتىنشىن تاپسىرىپ الادى، قارسى جاقتىڭ باس سۋرەتى مەن اتى ءوزىنىڭ قىزىنىڭ ۋيشيندەگى تىركەلگىسىمەن ۇقساس بولعاندىقتان، ول قىزىم ۋيشين ءنومىرىن وزگەرتكەن ەكەن عوي دەپ ويلاپ، قارسى جاقتى دەرەۋ قوسادى. قارسى جاق دەرەۋ ءسوز جولداپ، مەكتەپتەگى مايتالمان پروفەسسوردىڭ ”اسپيرانتۋراعا ەمتيحان بەرۋشىلەرگە ارنالعان ساباق پىسىقتاۋ كلاسىن“ ۇيىمداستىرعانىن، كۋرس اقىسى 49.8 مىڭ يۋان ەكەنىن ايتادى، ءارى ”بۇگىن تىزىمدەلۋ اياقتالاتىن كۇن ەكەن“ دەپ اسىقتىرادى.

جاۋ مىرزا قىزىنىڭ مەكتەپتە جالعاستى ءبىلىم اسىرۋىن ءۇمىت ەتەتىندىكتەن، ”قىزىنىڭ“ ايتۋى بويىنشا ”پىسىقتاۋ كلاسىنىڭ وقىتۋ قىزمەتىنە جاۋاپتى لي مۇعالىمنىڭ“ ۋيشين ءنومىرىن قوسىپ، وعان 49.8 مىڭ يۋان اقشا جولدايدى.

ەكى كۇننەن كەيىن، جاۋ مىرزا بۇل ىستە كادىك بار ەكەنىن بايقايدى: قىزى وعان ەشقاشان اسپيرانتۋراعا ەمتيحان بەرۋشىلەرگە ارنالعان جوعارى باعاداعى پىسىقتاۋ كلاسى تۋرالى اڭگىمە ايتپاعان بولاتىن، ۋيشيندەگى سويلەۋ مانەرى دە قىزىنىڭ ادەتتەگى سويلەۋ داعدىسىمەن ۇقسامايدى، ول دەرەۋ قىزىنا تەلەفون جالعاپ سۇراستىرعاندا، قىزىنىڭ بۇل ىستەن حابارسىز ەكەنىن بىلەدى. جاۋ مىرزا الدانىپ قالعانىن ءبىلىپ، دەرەۋ ساقشىعا مالىمدەيدى.

حالىق ساقشىلارى ”مالىمدەۋدى تاپسىرىپ العان ساتتە اقشا تولەۋ بارىسىن توقتاتۋ“ ءتارتىبى بويىنشا، دەلوعا قاتىستى ەسەپ ءنومىرى، جوتكەگەن اقشانىڭ سوماسى قاتارلى ينفورماتسيالاردى جيناپ، مەملەكەتتىك تەلەكومنان پايدالانعان الدامكوستىك دەلولارىن بارلاۋ تەكشەسىنە شىعارىپ، دەلوعا قاتىستى ەسەپ ءنومىرىن دەرەۋ قۇلىپتايدى. سونىمەن بىرگە، حالىق ساقشىلارى بانكەمەن بىرگە قاراجات اينالىمىن وكشەلەي باقىلاپ، قاراجاتتىڭ باعدارىن انىقتايدى.

ساقشى جاق پەن بانكەنىڭ سايكەسۋىندە، حالىق ساقشىلارى گانسۋ، سىچۋان، چيڭحاي، شىعىس -سولتۇستىك قاتارلى جەرلەرگە بارىپ، دەلوعا قاتىستى ەسەپ ءنومىرىن اشقان بانكەنىڭ شىنياڭدا ەكەنىن تۇراقتاندىرادى. 10 – ايدىڭ 5 – كۇنى، حالىق ساقشىلارى شىنياڭعا بارىپ، سول جەردەگى ساقشى جاقپەن جانە بانكەمەن بىرگە قاراجات اينالىمىن وكشەلەي باقىلاپ جانە ساراپتاپ، ەڭ سوڭىندا 49.8 مىڭ يۋاننىڭ الدامكوستەردىڭ قالتاسىنا ءتۇسۋىن ءساتتى تۇردە توسىپ قالادى.

كەلۋ قاينارى: حالىق تورابى