شينجياڭ ۇيعۇر اۆتونوميالى رايونى ەكولوگيانى قورعاۋ، قالپىنا كەلتىرۋ بويىنشا الدىن الا ءبىر ميلليارد 700 ميلليون يۋانعا جۋىق قارجى ءبولدى

ءتىلشىنىڭ شينجياڭ ۇيعۇر اۆتونوميالى رايوندىق قازىنا مەڭگەرمەسىنەن ۇعىسۋىنشا، تاياۋدا شينجياڭ ۇيعۇر اۆتونوميالى رايونى 2026 - جىلى ورتالىقتىڭ ورمان شارۋاشىلىعى، جايىلىم ەكولوگياسىن قورعاۋ، قالپىنا كەلتىرۋ قارجىسىنان ءبىر ميلليارد 699 ميلليون يۋاندى الدىن الا تۇسىرگەن، بۇل قارجى شينجياڭنىڭ ورمان ەكولوگياسىن قورعاۋ، قالپىنا كەلتىرۋ تولەمىنە، باسقا دا تابيعي قورعالاتىن جەرلەر مەن جابايى حايۋاناتتاردى، وسىمدىكتەردى قورعاۋ، ەكولوگيالىق ورمان قورعاۋشىلارعا قوسىمشا قاراجات بەرۋ قاتارلى ءتۇيىندى قىزمەت شىعىسىنا جۇمسالادى.

ورمان شارۋاشىلىعى، جايىلىم ەكولوگياسىن قورعاۋ، قالپىنا كەلتىرۋ قارجىسى — ورتالىق مەجە ەسەبى بويىنشا ورنالاستىرىلعان مەملەكەتتىك باقشا، باسقا دا تابيعي قورعالاتىن جەرلەر جانە جابايى حايۋاناتتار مەن وسىمدىكتەردى قورعاۋ، ورمان ەكولوگياسىن قورعاۋ، قالپىنا كەلتىرۋ تولەمى، ەكولوگيالىق ورمان قورعاۋشى قاتارلى جاقتارعا جۇمسالاتىن ورتاق قازىنالىق ءىس ۇقىعىن اۋدارىپ تولەۋ قارجىسىن مەڭزەيدى.

وسى قازىنالىق قارجىنىڭ ەڭ زور ونىمدىلىكتى ساۋلەلەندىرۋىنە شىنايى كەپىلدىك ەتۋ ءۇشىن، 2024 - جىلى قازىنا مينيسترلىگى، مەملەكەتتىك ورمان - جايىلىم مەكەمەسى بىرلەسىپ باسىپ تاراتقان «ورمان شارۋاشىلىعى، جايىلىم ەكولوگياسىن قورعاۋ، قالپىنا كەلتىرۋ قارجىسىن باسقارۋ ءادىسىنىڭ» تالابىنا ساي، شينجياڭ ۇيعۇر اۆتونوميالى رايوندىق قازىنا مەڭگەرمەسى اۋدارىپ تولەۋگە قاتىستى بەلگىلەمەلەرگە قاتاڭ نەگىزدەلىپ، جەر ـ جەردى ورتالىقتىڭ ورمان شارۋاشىلىعى، جايىلىم ەكولوگياسىن قورعاۋ، قالپىنا كەلتىرۋ قارجىسىن دەر كەزىندە ءبولىپ بەرۋگە قۋزاپ، نىسانداردىڭ الدىڭعى مەرزىمدىك قىزمەتىن جەدەل ورىستەتىپ، ونىمدىلىك نىساناسىنىڭ جۇزەگە اسۋ دارەجەسى مەن مەجە ەسەپتىڭ اتقارىلۋ اياق الىسىن ”قوس باقىلاۋ ـ مەڭگەرۋدى“ اتقاردى.

قازىر بۇل قارجى تۇتاس شينجياڭداعى ايماق، وبلىس، قالالارعا تۇگەلدەي الدىن الا ءتۇسىرىلدى، ءارقايسى ايماق، وبلىس، قالالاردىڭ ورمان، جايىلىم تاراۋلارى قاتىستى نىسانداردىڭ الدىڭعى مەرزىمدىك ساتىپ الۋىنا مەردىگەر شاقىرۋ رەسمياتتارىن بىتىرە باستادى. ءتىلشى قاتىستى ۇكىمەتتىك ساتىپ الۋ تورابىنان التاي تاۋى مەملەكەت مەنشىگىندەگى ورمان باسقارۋ مەكەمەسىنە قاراستى بولىمشە مەكەمەسى، مارالباسى اۋدانى، قورعاس اۋدانى قاتارلى جەرلەردىڭ تۇگەلدەي نىسان ساتىپ الۋ ويىن جاريالاعاندىعىن بايقادى.

ۇعىسۋعا قاراعاندا، ورتالىقتىڭ ورمان شارۋاشىلىعى، جايىلىم ەكولوگياسىن قورعاۋ، قالپىنا كەلتىرۋ قارجىسى جىلىن اتقارۋ بارىسىندا، شينجياڭ ۇيعۇر اۆتونوميالى رايونىنىڭ ءار دارەجەلى قازىنا تاراۋلارى مەجە ەسەپ باسقارۋدى ءبىر تۇلعالاندىرۋ جۇيەسىنىڭ اۋدارىپ تولەۋدى باقىلاۋ ـ مەڭگەرۋ مودۋلى ارقىلى كۇندەلىكتى باقىلاۋ ـ باسقارۋدى كۇشەيتىپ، اۋدارىپ تولەنەتىن قارجىنى باسقارۋدىڭ، پايدالانۋدىڭ جۇيەلىلىگى مەن ونىمدىلىگىن جوعارىلاتادى.

كەلۋ قاينارى: حالىق تورابى