فينانستى باقىلاۋ – باسقارۋ باس مەڭگەرمەسى قۇجات جاريالاپ، 2026 – جىلى اۋىل – قىستاقتى جاپپاي گۇلدەندىرۋگە فينانستىق جاقتان قولداۋ كورسەتۋ قىزمەتى جونىندە ورنالاستىرۋ جاسادى 

شينحۋا اگەنتتىگىنىڭ ءتىلشىسى جاڭ چيانچيان، لي يانشيا 4 – ايدىڭ 8 – كۇنى بەيجيڭنەن حابارلايدى. مەملەكەتتىك فينانستى باقىلاۋ – باسقارۋ باس مەڭگەرمەسى 4 – ايدىڭ 8 – كۇنى ۇقتىرۋ جاريالاپ، 2026 – جىلى اۋىل شارۋاشىلىعىن دامىتۋ بانكەسىنىڭ، ورتاشا – ءىرى ساۋدا بانكەلەرىنىڭ اۋىل شارۋاشىلىعىنا ساياتىن قارىز بەرۋ جوسپارىن تاعى دا ايىرىم ورنالاستىرىپ، ۇقساس تۇردەگى اۋىل شارۋاشىلىعىنا قاتىستى بەرىلەتىن قارىزداردىڭ قالدىق سوماسىن جىل باسىنداعىمەن سالىستىرعاندا ۇزدىكسىز ارتتىرۋ نىساناسىن كۇش سالا ورىندايتىنىن ايقىن تۇراقتاندىرعان.

«2026 - جىلى اۋىل – قىستاقتى جاپپاي گۇلدەندىرۋگە فينانستىق جاقتان قولداۋ كورسەتۋ قىزمەتىن ويداعىداي ىستەۋ تۋرالى ۇقتىرۋدا» مىنالار ايقىن تۇراقتاندىرىلعان: 2026 – جىلى ورتاشا – ءىرى بانكەلەردى اۋىل شارۋاشىلىعى كاسىپ سالاسى تىزبەگىندەگى فينانستى بەلسەندى دامىتۋعا، تۇڭعىش رەت قارىز العان وتباسىلار سانىن كوبەيتۋگە، رەفورما ارقىلى اۋىل – قىستاقتاعى ورتاشا – شاعىن بانكەلەردىڭ اۋىل شارۋاشىلىعىنا، شاعىن كاسىپورىندارعا قولداۋ كورسەتۋ قۋاتىن جوعارىلاتۋعا، اۋىل شارۋاشىلىعىنا ساياتىن جالپىعا ءتيىمدى قارىزعا ىشكى جاقتا ءمان بەرۋ ساياساتىن ۇيلەسىمدى تۇراقتاندىرۋعا، ”شەكتەن تىس باسەكەلەسۋ“ ارەكەتىنەن باتىل ساقتانۋعا جانە ونى تۇزەتۋگە جەتەلەيدى.

ۇقتىرۋدا مىنالار تالاپ ەتىلگەن: اۋىل شارۋاشىلىعىنا ساياتىن قارىز تۇرلەرى مەن قىزمەت وتەۋدى جاقسارتىپ، ”اۋىل شارۋاشىلىعى، اۋىل – قىستاق جانە ديقاندار“ قىزمەتىنىڭ ەرەكشەلىكتەرىمەن ۇشتاستىرىپ، اناعۇرلىم سايكەس كەلەتىن قارىز تۇرلەرىن دايىنداۋ، اۋىل شارۋاشىلىعىنا ساياتىن كاسىپورىندار مەن ديقاندارعا بەرىلەتىن قارىزدىڭ قايتارىلاتىن ۋاقىتىن زاڭ – تۇزىمگە ساي فورمادا ۇزارتۋ، جالعاستى قارىز بەرۋگە قولداۋ كورسەتۋ تەبىنىن ارتتىرۋ كەرەك. كۇرىش، ءبيداي، جۇگەرى، بۇرشاق قاتارلى داقىلداردى قامسىزداندىرۋ كولەمىنە ەنگىزۋ ارقىلى كەپىلدىك ەتۋدى كۇشەيتىپ، جەرگىلىكتى جاعدايمەن ۇشتاستىرىپ، جەرگىلىكتى ەرەكشەلىككە يە اۋىل شارۋاشىلىعى ونىمدەرىن قامسىزداندىرۋ كولەمىنە ەنگىزۋدى دامىتۋ كەرەك. اۋىل شارۋاشىلىعى قامسىزداندىرۋىنىڭ اپاتتان ساقتانۋ – اپات زيانىن ازايتۋ جاعىنداعى رولىن كۇشەيتۋ قاجەت.

ساندى مالىمەتتەرگە قاراعاندا، 2026 – جىلى 2 – ايدىڭ سوڭىنا دەيىن، بۇكىل ەلىمىز بويىنشا اۋىل شارۋاشىلىعىنا ساياتىن جالپىعا ءتيىمدى بەرىلەتىن قارىزدىڭ قالدىق سوماسى 14 تريلليون 520 ميلليارد يۋان بولىپ، سايكەستى مەزگىلدەگىدەن %10.34 ارتقان؛ 2026 – جىلى الدىڭعى ەكى ايدا، اۋىل شارۋاشىلىعىنا ساياتىن جالپىعا ءتيىمدى جاڭادان تاراتىلعان قارىزدىڭ ورتاشا ءوسىم مولشەرى %4.05 بولىپ، سايكەستى مەزگىلدەگىدەن 0.46 پايىز تومەندەگەن. 1 – ايدان 2 – ايعا دەيىن، اۋىل شارۋاشىلىعى قامسىزداندىرۋى 21 ميلليون ديقان وتباسىنا (رەت) حاۋىپ – قاتەردەن قامتاماسىزداندىرۋ قاراجاتىنان 900 ميلليارد يۋان ازىرلەپ، اۋىل شارۋاشىلىعى وندىرىسىنە ءونىمدى قولداۋ كورسەتكەن.

كەلۋ قاينارى: حالىق تورابى