دامىپ جاتقان جۇڭگو | جياڭشي يۇڭشيۋ: تەڭىز شايانى ءىرى بازارعا قاراي ”بەتتەدى“ 

يۇڭشيۋ اۋدانى تۋبۋ قالاشىعىنداعى شايان مەن كۇرىش بىرگە وسىرىلەتىن سۋلى اتىزدا، شايان باعىمشىلارى جەتىلگەن تەڭىز شاياندارىن اۋلاۋدا. حالىق تورابىنىڭ ءتىلشىسى شي يۇي فوتوسى

حالىق تورابىنىڭ ءتىلشىسى شي يۇي 6 - ايدىڭ 1 – كۇنى يۇڭشيۋدان حابارلايدى. جۋىردا، جياڭشي ولكەسى جيۋجياڭ قالاسى يۇڭشيۋ اۋدانى تۋبۋ قالاشىعىنداعى شايان مەن كۇرىش بىرگە وسىرىلەتىن سۋلى اتىزدا، شايان باعىمشىلارى قايىقتارىن جۇرگىزىپ، جەتىلگەن تەڭىز شاياندارىن اۋلادى. جاڭا اۋلانعان تەڭىز شاياندارى تەز ارادا جياڭشيدەگى تەڭىز شايانى ساۋدا ورتالىعىنا جەتكىزىلىپ، سۇرىپتاپ قوراپتالعان سوڭ، تاسىمال اۆتوكولىگىمەن ەلىمىزدىڭ جەر - جەرىندەگى بازارلارعا جىبەرىلەدى.

جەرگىلىكتى ورىننىڭ ەرەكشەلىككە، باسىمدىلىققا يە كاسىپ سالاسى رەتىندە، يۇڭشيۋ اۋدانىندا شايان مەن كۇرىش بىرگە وسىرىلەتىن اۋماق 300 مىڭ مۋدان اسادى، ءبىر – بىرىمەن تۇتاستىرىلعان ون مىڭ مۋدان جوعارى 6 ۇلكەن اۋماقتا، مىڭ مۋدان جوعارى 30 نەشە اۋماقتا بازا قۇرىلعان. شايان مەن كۇرىش بىرگە وسىرىلەتىن كاسىپ سالاسى بويىنشا كوكتەمدە تەڭىز شايانى وسىرىلەدى، شايان جەمىنىڭ قالدىقتارى مەن شايان دايراقتارى ەگىستىككە تابيعي تۇردە ءسىڭىپ، ساپالى ورگانيكالىق تىڭايتقىشقا اينالادى؛ كۇرىش وسىرىلگەن مەزگىلدە كەلەسى رەتكى شايان ءوسىرۋ ءۇشىن سۋ ساپاسىن تازارتادى، وسىلايشا ەگىستىككە اۋىل شارۋاشىلىعى دارىلەرىن، حيميالىق تىڭايتقىشتاردى قولدانۋدى زور مولشەردە تومەندەتەدى.

”ءبىر كولشىكتىڭ سۋىن ەكى رەت پايدالانۋ، ءبىر اتىزدان ەكى رەت ءونىم الۋ“ ارقىلى، تەك قانا كۇرىش ەگۋمەن سالىستىرعاندا، ءار مۋ جەردەن مىڭ يۋاننان ارتىق كىرىس كىرگىزۋگە بولادى، اۋدان بويىنشا تەڭىز شايانىنىڭ جىلدىق ءونىم مولشەرى 45 مىڭ توننادان اسادى.

جياڭشي تەڭىز شايانى ساۋدا ورتالىعىنداعى ”شاياندى جەدەل تاسىمالداۋ“ قىزمەتىنە سۇيەنىپ، يۇڭشيۋ اۋدانى تاسىمال ارناۋلى لەنياسىنان 15 لەنيانى اشتى، جاڭا اۋلانعان شاياندار ەلىمىزدىڭ 100 دەن استام قالاسىنا تىكەلەي جەتەدى. سونىمەن بىرگە، ساۋدا ورتالىعى تەڭىز شايانىن ىشكەرىلەي وڭدەيتىن كاسىپورىنداردى ىسكە قوسىپ، كۇندىك وڭدەۋ قۋاتى 300 تونناعا جەتەدى، جاڭا اۋلانعان تەڭىز شاياندارىن وڭدەۋ ارقىلى شايان قۇيرىعى، سۇيىق ازوتپەن جۋىلعان شايان قاتارلى الدىن الا دايىندالعان ونىمدەردى ءوندىرىپ، ءونىم ءوندىرۋ مەن ساتۋدىڭ ”ماۋسىممەن شەكتەلۋى“ سىندى قيىنشىلىقتى شەشتى.

قازىرگى تاڭدا، شايان باعۋ مەن كۇرىش ءوسىرۋ كاسىبى يۇڭشيۋ اۋدانىنىڭ اۋىل - قىستاقتى گۇلدەندىرۋدەگى تىرەكتى كاسىبىنە اينالىپ، 150 مىڭ حالىق جۇرتشىلىعىنىڭ كىرىسىن ارتتىرۋىنا تىكەلەي دەم بەردى.