شي جينپيڭ برازيليانىڭ زۇڭتۇڭى لۋلامەن تەلەفوندا سويلەستى

شينحۋا اگەنتتىگى، 7 - ايدىڭ 27 - كۇنى، بەيجيڭ. 7 - ايدىڭ 27 - كۇنى تۇستەن بۇرىن مەملەكەت ءتوراعاسى شي جينپيڭ ۇسىنىس بويىنشا برازيليانىڭ زۇڭتۇڭى لۋلامەن تەلەفوندا سويلەستى.

شي جينپيڭ بىلاي دەپ اتاپ كورسەتتى: تاياۋ جىلداردان بەرى جۇڭگو مەن برازيليانىڭ تاعدىرلاس ورتاق تۇلعا قۇرىلىسى مەن ەكى ەلدىڭ دامۋ ستراتەگياسىن ۇشتاستىرۋدا بەلسەندى ىلگەرىلەۋشىلىككە قول جەتىپ، جۇڭگو مەن برازيليانىڭ دامۋىن جانە ەكى ەل حالقىنىڭ باقىتىن جەبەۋدە ماڭىزدى رول اتقاردى، سونداي - اق اۋمالى - توكپەلى حالىقارالىق جاعدايعا باعالى ورنىقتىلىق ۇستەدى. بيىل − جۇڭگو كوممۋنيستىك پارتياسى قۇرىلعاندىعىنىڭ 105 جىلدىعى جانە جۇڭگونىڭ ”15 - بەسجىلدىق“ جوباسىنىڭ باستاما جىلى، برازيليا دا ەل ىشىندەگى ماڭىزدى ساياسي كۇن ءتارتىپتى قارسى الادى.

جۇڭگو جاق برازيليا جاقپەن ەكى جاقتى جانە كوپ جاقتى ستراتەگيالىق سەلبەستىكتى ونان ارى كۇشەيتىپ، ەكى ەلدىڭ تاعدىرلاس ورتاق تۇلعاسى قۇرىلىسىنىڭ تاماشا جاعدايىن جالعاستىرۋدى قالايدى.

شي جينپيڭ بىلاي دەپ باسا دارىپتەدى: جاڭا جاعداي، جاڭا سىن - سايىس الدىندا، جۇڭگو مەن برازيليا دۇنيە جۇزىندەگى وڭتۇستىكتىڭ ماڭىزدى مۇشەسى رەتىندە، تاريحتىڭ دۇرىس جاعى مەن وركەنيەتتىڭ العا باسۋى جاعىندا باتىل تۇرىپ، دۇنيە جۇزىلىك جونگە سالۋ جۇيەسىن رەفورمالاۋ، كەمەلدەندىرۋ، حالىقارالىق ادىلدىك پەن تۋراشىلدىقتى قورعاۋ ءۇشىن اناعۇرلىم زور ورەلى رول اتقارۋى كەرەك. ەكى جاق ”ۇلكەن بريكس سەلبەستىگىنىڭ“ جوعارى ساپالى دامۋىن قول ۇستاسا ىلگەرىلەتىپ، سەلبەستىك بەتالىسىن ءدال يگەرىپ، ىنتىماق بەتالىسىن قورعاپ، اناعۇرلىم كوپ ناتيجە جاراتىپ، دۇنيە جۇزىندەگى وڭتۇستىك ىنتىماعىنىڭ، ءوزىن الۋەتتەندىرۋىنىڭ جاڭا تاراۋىن جازۋى كەرەك. جۇڭگو جاق برازيليا جاقتىڭ حالىقارالىق ورنى مەن ماڭىزدى ىقپال كۇشىنە ايرىقشا ءمان بەرەدى، برازيليانىڭ ءوزىنىڭ يەلىك ۇقىعىن، تاۋەلسىزدىگىن قورعاۋىن، سىرتتىڭ كيلىگۋىنە قارسى تۇرۋىن، سونداي - اق ءوڭىردىڭ جانە دۇنيە ءجۇزىنىڭ بەيبىتشىلىگىن، ورنىقتىلىعىن قورعاۋعا برازيليا جاقتىڭ ۇلەسىن قوسۋىن قولدايدى.

لۋلا مىنالاردى ءبىلدىردى: برازيليا مەن جۇڭگو اناعۇرلىم ءادىل دۇنيە ءجۇزىن جانە اناعۇرلىم باياندى پلانەتا تاعدىرلاس ورتاق تۇلعاسىن قۇرۋدا بەلسەندى ىلگەرىلەۋشىلىككە قول جەتكىزدى، ءار سالاداعى سەلبەستىكتىڭ دامۋى تەزدەدى، ەكى ەلدىڭ ساۋدا سوماسى تاعى دا تىڭ دەڭگەيگە كوتەرىلدى، ”برازيليا - جۇڭگو مادەنيەت جىلىنىڭ“ ءتۇرلى قيمىلدارى ەكى ەل دوستىعىنىڭ حالىق رايى نەگىزىن ونان ارى بەكەمدەدى. برازيليا جاق جۇڭگو جاقپەن جاساندى زەردە، ەنەرگيا، كەن ونىمدەرى سياقتى سالالارداعى سەلبەستىكتى كۇشەيتۋدى كۇتەدى، اناعۇرلىم كوپ جۇڭگو كاسىپورىندارىنىڭ برازيلياعا بارىپ قارجى قوسۋىن قارسى الادى، ەكى ەل سەلبەستىگىنىڭ اناعۇرلىم كوپ نەگىزدەنۋىنە، اناعۇرلىم مول تابىسقا قول جەتكىزۋىنە مۇمكىندىك جاسايدى. برازيليا جاق جۇڭگونىڭ 2026 - جىلعى دۇنيە جۇزىلىك جاساندى زەردە جينالىسىن ءساتتى وتكىزگەندىگىن قۇتتىقتايدى، ءتوراعا شي جينپيڭ العا قويعان اشىق، سيىسىمدى جاساندى زەردە حالىقارالىق سەلبەستىگى جانە دۇنيە جۇزىلىك جونگە سالۋ ۇستانىمىن ايرىقشا القايدى. برازيليا جاق جۇڭگو جاقپەن كوپ جاقتى سايكەسۋدى جيىلەتىپ، بىرلەسكەن مەملەكەتتەر ۇيىمىنىڭ بەدەلىن قورعاپ، بريكس ىنتىماعىن، سەلبەستىگىن كۇشەيتىپ، كوپ جاقتىلىقتى باتىل قورعاپ، وكتەمدىك ساياسيعا باتىل قارسى تۇرىپ، قولامتالى ماسەلەلەردى تىلدەسۋ، كەڭەسۋ ارقىلى شەشۋگە تاباندى بولىپ، حالىقارالىق ادىلدىكتى، تۋراشىلدىقتى جانە دۇنيە ءجۇزىنىڭ بەيبىتشىلىگىن، ورنىقتىلىعىن بىرگە قورعاۋدى قالايدى.