ەكى تاراۋ 200 ميلليون يۋان قاراجات ءبولىپ، شۇعىل جاعدايدا حاۋىپتەن اراشالاۋ جانە اپاتتان قۇتقارۋعا پايدالاندى 

جۇڭگو شارۋالار گازەتىنىڭ ءتىلشىسى پاڭ بو حابارلايدى. جۋىردا ەلىمىزدىڭ وڭتۇستىك وڭىرلەرىندەگى كوپتەگەن جەردە ۇزدىكسىز كەڭ كولەمدى نوسەر جاۋىپ، جاۋىن – شاشىن مولشەرى وتە زور بولىپ، تاسقىن جانە گەولوگيالىق اپات تۋىلىپ، ادامداردىڭ جارالانۋى جانە ءولىم – ءجىتىمى، ۇيلەردىڭ قۇلاۋى جانە ءبۇلىنۋى سىندى جاعداي تۋىلعان. 9 - ايدىڭ 21 - كۇنى قازىنا مينيسترلىگى مەن شۇعىل جاعدايلارعا توتەپ بەرۋدى باسقارۋ مينيسترلىگى ورتالىقتىڭ جاراتىلىستىق اپاتتان قۇتقارۋ قاراجاتىنان 200 ميلليون يۋاندى شۇعىل ءبولىپ، سىچۋان، حاينان، جىجياڭ، فۋجيان سىندى 4 ولكەنىڭ تاسقىن جانە گەولوگيالىق اپات بارىسىندا حاۋىپتەن شۇعىل اراشالاۋ، قۇتقارۋ قىزمەتتەرىن ورىستەتۋىنە قولداۋ كورسەتىپ، اپاتقا ۇشىراعان بۇقارانى ورنالاستىرۋ، حاۋىپ - قاتەردى الاستاۋ قاتارلى شۇعىل جاعدايدى ءبىرجاقتى ەتۋ، وتپەلى مەزگىلدە تۇرمىستىق كومەك بەرۋ جانە بۇقارانىڭ قۇلاعان، بۇزىلعان ۇيلەرىن جوندەۋ قاتارلى قىزمەتتەردى ءتۇيىندى تۇردە ويداعىداي ىستەپ، اپاتقا ۇشىراعان بۇقارانىڭ نەگىزدىك تۇرمىسىنا شىنايى كەپىلدىك ەتىپ، اپاتقا ۇشىراعان رايونىنىڭ ءوندىرىس، تۇرمىس ءتارتىبىن ەرتەرەك قالپىنا كەلتىرۋدى ىلگەرىلەتتى.

قازىنا مينيسترلىگى اتالعان 4 ولكەدەگى قازىنا تاراۋلارىنان قاراجاتتى اپات تۋىلعان رايونعا دەر كەزىندە ءبولىپ جىبەرۋدى، اپاتتان قۇتقارۋعا ارنالعان قاراجاتتى باقىلاۋ - باسقارۋدى كۇشەيتىپ، اپاتتان قۇتقارۋ قاراجاتىنىڭ تۇگەلدەي اپات تۋىلعان رايون مەن اپاتقا ۇشىراعان بۇقاراعا جۇمسالۋىنا كەپىلدىك ەتىپ، حالىق بۇقاراسىنىڭ ءومىرى مەن مال - مۇلكىنىڭ حاۋىپسىزدىگىن شىنايى قامتاماسىزداندىرۋدى تالاپ ەتتى.

كەلۋ قاينارى: حالىق تورابى