15 مەملەكەت بىرلەسكەن مەملەكەتتەر ۇيىمى ادامدىق ۇقىق القالار كەڭەسىنىڭ مۇشەلىگىنە سايلاندى، مۇنىڭ ىشىندە 6 مەملەكەت جالعاستى سايلاندى 

شينحۋا اگەنتتىگىنىڭ 10 – ايدىڭ 13 – كۇنى بىرلەسكەن مەملەكەتتەر ۇيىمىنان بەرگەن حابارى (ءتىلشى شاڭ شۇيچيان) بىرلەسكەن مەملەكەتتەر ۇيىمىنىڭ 81 – كەزەكتى جينالىسى 10 – ايدىڭ 13 – كۇنى برازيليا قاتارلى 15 مەملەكەتتى بىرلەسكەن مەملەكەتتەر ۇيىمى ادامدىق ۇقىق القالار كەڭەسىنىڭ مۇشەلىگىنە سايلادى، بۇل مۇشەلەر بيىل جىل سوڭىندا مىندەت اۋىستىراتىن مۇشەلەردىڭ ورنىن باسادى.

بىرلەسكەن مەملەكەتتەر ۇيىمى ادامدىق ۇقىق القالار كەڭەسىنە وسى رەت سايلانعان مۇشەلەر: افريكا رايونىنان برۋندي، گانا، نيگەريا، زامبيا؛ ازيا – تىنىق مۇحيت رايونىنان جاپونيا، يوردانيا، كۆەيت، نەپال؛ شىعىس ەۋروپا رايونىنان مولدوۆا، ۋكراينا؛ لاتىن امەريكاسى جانە كارايب وڭىرىنەن برازيليا، دومينيكا رەسپۋبليكاسى، ۋرۋگۆاي؛ باتىس ەۋروپا جانە باسقا وڭىرلەردەن گەرمانيا، يرلانديا. مۇنىڭ ىشىندە، برۋندي، گانا، جاپونيا، كۆەيت، برازيليا، دومينيكا رەسپۋبليكاسى جالعاستى مىندەت وتەيتىن ەلدەر سانالادى. جاڭادان سايلانعان 15 مۇشەنىڭ مىندەت وتەۋ مەرزىمى 2027 – جىلى 1 – ايدىڭ 1 – كۇنى باستالادى، مەرزىم شەگى 3 جىل.

بيىل 15 مۇشەلىك ورىنعا باسەكەلەستىك بولماعاندىقتان، 15 مەملەكەت ءساتتى تۇردە سايلاندى.

بىرلەسكەن مەملەكەتتەر ۇيىمى ادامدىق ۇقىق القالار كەڭەسى 2006 – جىلى قۇرىلعان، باس شتابى شۆەتساريانىڭ جەنەۆا قالاسىندا. ادامدىق ۇقىق القالار كەڭەسىندە جيىنى 47 ورىن بار، مۇنىڭ ىشىندە افريكا ءوڭىرى مەن ازيا – تىنىق مۇحيت وڭىرىنە جەكە – جەكە 13 ورىن، لاتىن امەريكاسى جانە كارايب وڭىرىنە 8 ورىن، شىعىس ەۆروپا وڭىرىنە 6 ورىن، باتىس ەۆروپا جانە باسقا وڭىرلەرگە 7 ورىن بولىنگەن. بىرلەسكەن مەملەكەتتەر ۇيىمى ءار جىلى ادامدىق ۇقىعى القالار كەڭەسىنىڭ مۇشەلەرىنىڭ ۇشتەن ءبىرىن وزگەرتىپ سايلايدى، مۇشەلەردىڭ مىندەت وتەۋ ۋاقىتى 3 جىل بولىپ، ءبىر رەتكى مىندەت وتەۋ مەرزىمى تولعان سوڭ قايتالاي سايلانۋىنا بولادى. ارت – ارتىنان ەكى كەزەك مىندەت وتەگەن سوڭ، اراعا تاعى ءبىر جىل سالىپ قايتالاي مىندەت وتەۋگە ۇمتىلۋىنا بولادى.

بىرلەسكەن مەملەكەتتەر ۇيىمى ادامدىق ۇقىق القالار كەڭەسىنىڭ مۇشەلەرى بىرلەسكەن مەملەكەتتەر ۇيىمى جينالىسىندا جاسىرىن داۋىسقا سالۋ ءتاسىلى بويىنشا سايلانادى، كانديدات مەملەكەتتەر سايلانۋ ءۇشىن مۇشە ەلدەردىڭ جارىمىنان استامىنىڭ داۋىسىنا يە بولۋى قاجەت.

كەلۋ قاينارى: حالىق تورابى