بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى جۇڭگو كوممۋنيستىك پارتياسى اقپارات تورابى

دۇنيە جۇزىلىك دەنساۋلىق ساقتاۋ ۇيىمى جاڭا تيپتى ايدارشا ۆيرۋس ىندەتى بۇدان بىلاي ”حالىقارا نازار اۋدارعان، الەۋمەتتىك دەنساۋلىق سالاسىندا توساتتان تۋىلعان وقيعا“ سانالمايدى دەپ جاريالادى

2023.05.06 13:23     كەلۋ قاينارى : حالىق تورابى

سۋرەتتە: شۆەتساريانىڭ جەنەۆا قالاسىنداعى دۇنيە جۇزىلىك دەنساۋلىق ساقتاۋ ۇيىمى باس شتابىنىڭ عيماراتى (5 – ايدىڭ 5 – كۇنى تۇسىرىلگەن). شينحۋا اگەنتتىگىنىڭ ءتىلشىسى ليان چي فوتوسى

  شينحۋا اگەنتتىگىنىڭ ءتىلشىسى ۋاڭ چيبيڭ، چىن بينجيە، گو شۋاڭ 5 – ايدىڭ 5 – كۇنى جەنەۆادان حابارلايدى. دۇنيە جۇزىلىك دەنساۋلىق ساقتاۋ ۇيىمى 5 – ايدىڭ 5 – كۇنى جاڭا تيپتى ايدارشا ۆيرۋس ىندەتى بۇدان بىلاي ”حالىقارا نازار اۋدارعان، الەۋمەتتىك دەنساۋلىق سالاسىندا توساتتان تۋىلعان وقيعا“ ەسەپتەلمەيدى دەپ جاريالاپ، 2020 – جىلى 1 – ايدىڭ 30 – كۇنى جاريالاعان ەڭ جوعارى دارەجەلى ساقتىق دابىلىن كۇشىنەن قالدىردى.

  دۇنيە جۇزىلىك دەنساۋلىق ساقتاۋ ۇيىمىنىڭ شۇعىل جاعدايلارعا جاۋاپتى كوميتەتى 5 – ايدىڭ 4 – كۇنى ءماجىلىس اشىپ، دۇنيە جۇزىلىك ىندەت جاعدايىنا ساراپتاۋ جاسادى، دۇنيە جۇزىلىك دەنساۋلىق ساقتاۋ ۇيىمىنىڭ ءتوراعاسى تەدروس ماجىلىستە شىغارىلغان قورىتىندىغا ساي جوعارىداعىداي شەشىمدى جاريالادى.

  5 – ايدىڭ 5 – كۇنى وتكىزىلگەن تىلشىلەردى قابىلداۋ ماجىلىسىندە تەدروس: ” جاڭا تيپتى ايدارشا ۆيرۋس ىندەتىنە قاتىستى دۇنيە جۇزىلىك شۇعىل كۇيدىڭ اياقتاعانىن تولىق سەنىممەن جاريالايمىن“، — دەدى. جۋىردان بەرى، دۇنيە جۇزىندە ىندەت جاعدايى جالپى جاقتان ايتقاندا باسەڭدەۋ بەتالىسىن بايقاتىپ، ادامداردىڭ يممۋنيتەت قۋاتى جوعارىلاپ، ءولىم – ءجىتىم مولشەرى بىرتىندەپ ازايدى، دۇنيە جۇزىلىك دەنساۋلىق ساقتاۋ جۇيەسىنە تۇسكەن قىسىم باسەڭدەدى، كوپتەگەن مەملەكەتتەر بۇرىنعى ۇيرەنشىكتى تۇرمىسقا قايتىپ ورالدى.

  سونىمەن بىرگە، تەدروس مىنانى اتاپ كورسەتتى: ”بۇل جاڭا تيپتى ايدارشا ۆيرۋس بۇدان بىلاي دۇنيە جۇزىندە دەنساۋلىققا قاتەر توندىرمەيدى دەگەندىك ەمەس“، الدا – جالدا جاڭا تيپتى ايدارشا ۆيرۋستىڭ سەبەبىنەن دۇنيە ءجۇزى حاۋىپ – قاتەرگە قايتالاي تاپ بولسا، ول ەشقانداي ءارى – ءسارى بولماستان مامانداردىڭ باسىن قوسىپ، جاعدايعا ساراپتاما جۇرگىزەتىنىن ءبىلدىردى.

  وتكەن ءۇش جىلدا، دۇنيە ءجۇزى الفا، دەلتا، وميكرون قاتارلى وزگەرگەن ۆيرۋس تۇبىرشىكتەرىنەن تۋىنداعان كوپ رەتكى ىندەت كەزەڭىن باستان كەشىردى. دۇنيە جۇزىلىك دەنساۋلىق ساقتاۋ ۇيىمىنىڭ ساندى مالىمەتىنە قاراعاندا، دۇنيە ءجۇزى بويىنشا دياگنوزى تۇراقتاندىرىلعانداردىڭ سانى جيىنى 760 ميلليون ادامنان اسقان، قازا بولعانداردىڭ سانى 6 ميلليون 900 مىڭ ادامنان اسقان.

  كەلۋ قاينارى: حالىق تورابى
سۋرەتتە: شۆەتساريانىڭ جەنەۆا قالاسىنداعى دۇنيە جۇزىلىك دەنساۋلىق ساقتاۋ ۇيىمى باس شتابىنىڭ بەلگى تاقتاسى (5 – ايدىڭ 5 – كۇنى تۇسىرىلگەن). شينحۋا اگەنتتىگىنىڭ ءتىلشىسى ليان چي فوتوسى

جاۋاپتى رەداكتورى : نۇرعيسا قۇرمانجان ۇلى