وڭتۇستىك شينجياڭدا دا سالمون بالىعى باعىلدى
2023.10.30 16:23 كەلۋ قاينارى : شينجياڭ گازەتى
انار بۇلت \ شينجياڭ گازەتىنىڭ ءتىلشىسى يۇي جياڭيان 10 - ايدىڭ 24 - كۇنى ءۇشتۇرپاننان حابارلايدى. شينجياڭدا سولتۇستىك شينجياڭداعى نىلقى اۋدانى مەن اراسان اۋدانىندا سالمون بالىعى باعىلۋدان سىرت، وڭتۇستىك شينجياڭداعى ءۇشتۇرپان اۋدانىندا دا سالمون بالىعى باعىلدى.
10 - ايدىڭ 21 - كۇنى ءتىلشى ءۇشتۇرپان اۋدانى وتباسى اۋىلى سارارال قىستاعىندا سۋى تۇپ - تۇنىق، ۇزىنشاق كولشىكتەن توپ - توپ سالمون بالىعىن كوردى. باقتاشى ءبىر ۋىس جەم شاشقاننان كەيىن، سالمون بالىقتارى تالاسا - تارماسا جەدى.
وتباسى اۋىلى توشقان وزەنىنە جاقىن بولعاندىقتان، وزەننەن جىلىستاپ اعىپ كەلگەن سۋ ۇزىنشاق كولشىككە باياۋ اعىپ كىرەدى. مۇنداعى 24 ۇزىنشاق كولشىكتىڭ ءبىر بولىگىنە سالمون بالىعى، ەندى ءبىر بولىگىنە بەكىرە وسىرىلگەن. ”سۋ تەمپەراتۋراسى جىل بويى 8 − 16 سەلتسي گرادۋس ارالىعىندا، سۋىق سۋ بالىعىن وسىرۋگە باپ كەلەدى“. ءۇشتۇرپان اۋدانى وتباسى اۋىلدىق پارتكومنىڭ ورىنباسار شۋجيى جياڭ پىڭفي بىلاي دەدى: قازىر وسى اۋىلدا باعىلعان سالمون بالىعى ءۇرىمجى، شاڭحاي، گۋاڭجوۋ، چىڭدۋ سياقتى جەرلەرگە ساتىلىپ جاتىر.
سالمون بالىعىن باعاتىن كاسىپورىن − ءۇشتۇرپان اۋدانى جۇنديڭ بالىق شارۋاشىلىعىن وركەندەتۋ شەكتى جاۋاپكەرشىلىك سەرىكتەستىگى، بۇل سەرىكتەستىك 2018 - جىلدان باستاپ وتباسى اۋىلىنداعى ۇزىنشاق كولشىكتە سالمون بالىعىن سىناق رەتىندە وسىرە باستاعان بولاتىن، 2021 - جىلدان كەيىن سالمون بالىعى ىركەس - تىركەس بازارعا شىعارىلدى. قازىرگە دەيىن 110 توننادان استام سالمون بالىعى ساتىلدى.
بيىل 8 - ايدان بەرى شينجياڭنىڭ ”جاس ونىمدەرىنىڭ“ اتاعى اسپانداپ، وسى كاسىپورىننىڭ سەنىمى بارىنشا ارتىپ، سالمون بالىعىنىڭ باعىمشىلىق كولەمىن ارتتىرۋدى ۇيعاردى. ”28 ميلليون 600 مىڭ يۋان قارجى قوسىپ، جاڭا ۇزىنشاق كولشىك باعىمشىلىق الاڭىن جانە جەتىلدىرۋ سەحىن سالدى، مەجەمەن 10 - ايدىڭ سوڭىندا پايدالانۋعا بولادى“، - دەدى ءۇشتۇرپان اۋدانى جۇنديڭ بالىقشىلىق اشۋ شەكتى جاۋاپكەرشىلىك سەرىكتەستىگىنىڭ باس ديرەكتورى شى زىپىڭ.
جاڭادان سالىنعان باعىمشىلىق الاڭىندا 60 ۇزىنشاق كولشىك بار، كولشىكتىڭ ۇزىندىعى 30 مەتر، كەڭدىگى 6 مەتر، تەرەڭدىگى 2. 1 مەتر، مەجەمەن ءاربىر ۇزىنشاق كولشىكتە ەڭ كوپ بولعاندا 4 توننا سالمون بالىعىن باعۋعا بولادى. 10 - ايدىڭ 21 - كۇنى 30 نەشە جۇمىسشى ۇزىنشاق كولشىكتەگى قيىرشىق تاستاردى تازالادى، جاڭادان سالىنعان ۇزىنشاق كولشىك پايدالانۋعا بەرىلگەننەن كەيىن، جىلىنا 440 توننا سالمون بالىعىن وسىرۋگە، جىلدىق ءونىم قۇنىن 30 ميلليون يۋانعا جەتكىزۋگە بولادى.
سۋىق سۋ بالىعىن باعۋداعى تاماشا بولاشاقتى كوزدەگەن وتباسى اۋىلى سۋىق سۋ بالىعىن باعۋ كاسىپ سالاسى جوباسىن جاساپ، 450 مۋلىق باعىمشىلىق اۋماعىن قۇرىپ، سالمون بالىعى، بەكىرە، الابۇعا سياقتىلاردى باعۋعا دايىندالدى. ”قازىر ساۋداگەر شاقىرىپ قارجى ەنگىزىپ جاتىرمىز، ەگەردە نىسان تياناقتاناتىن بولسا، جىلدىق ءونىم قۇنى 760 ميلليون يۋانعا جەتەدى دەپ مەجەلەنۋدە“، - دەدى جياڭ پىڭفي.
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
