ديڭ شۋەشياڭ قازاقستاندا ساپاردا بولدى ءارى جۇڭگو - قازاقستان سەلبەستىك كوميتەتىنىڭ 11 - رەتكى ءماجىلىسىن باسقاردى
2023.11.28 16:56 كەلۋ قاينارى : حالىق تورابى
ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەس زۇڭليىنىڭ ورىنباسارى ديڭ شۋەشياڭ 11 - ايدىڭ 27 - كۇنى استانادا قازاقستاننىڭ زۇڭتۇڭى توقايەۆپەن كەزدەستى. سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن
شينحۋا اگەنتتىگى، 11 - ايدىڭ 27 – كۇنى، استانا (تىلشىلەر جىڭ ميڭدا، جاڭ جييە). ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەس زۇڭليىنىڭ ورىنباسارى ديڭ شۋەشياڭ 11 - ايدىڭ 26 - كۇنىنەن 27 - كۇنىنە دەيىن قازاقستاندا ساپاردا بولىپ، قازاقستاننىڭ زۇڭتۇڭى توقايەۆپەن، زۇڭليى سمايىلوۆپەن جەكە - جەكە كەزدەستى، زۇڭليدىڭ ءبىرىنشى ورىنباسارى سكاليارمەن كەڭەس وتكىزدى ءارى جۇڭگو - قازاقستان سەلبەستىك كوميتەتىنىڭ 11 - رەتكى ءماجىلىسىن بىرگە باسقاردى.
توقايەۆپەن كەزدەسكەندە، ديڭ شۋەشياڭ ءتوراعا شي جينپيڭنىڭ توقايەۆ زۇڭتۇڭعا جولداعان ىقىلاستى سالەمى مەن ىزگى تىلەگىن جەتكىزدى. ديڭ شۋەشياڭ مىنانى ءبىلدىردى: ءتوراعا شي جينپيڭ مەن زۇڭتۇڭ مىرزانىڭ تىكەلەي جوبالاۋى مەن جەتەكشىلىگىندە، جۇڭگو مەن قازاقستان ماڭگىلىك جان - جاقتى ستراتەگيالىق سەرىكتەستىك قارىم - قاتىناس ورناتىپ، ەكى جاقتى تاعدىرلاس ورتاق تۇلعانى الدىمەن قۇرىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ جاعىندا الدىڭعى لەكتە ءجۇردى. جۇڭگو مەن قازاقستان − ەتەنە جاقىن كورشىلەر جانە تاعدىرلاس ستراتەگيالىق سەرىكتەر. جۇڭگو جاق قازاقستان جاقپەن بىرگە ەكى ەل مەملەكەت باسشىلارىنىڭ ماڭىزدى ورتاق تانىمىن تياناقتاندىرۋدى جەتەكشى، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى ىلگەرىلەتۋدى نەگىزگى جەلى ەتىپ، جۇڭگو مەن قازاقستاننىڭ ماڭگىلىك جان - جاقتى ستراتەگيالىق سەرىكتەستىك قارىم - قاتىناسىنىڭ اناعۇرلىم جوعارى دەڭگەيگە، اناعۇرلىم كەڭ كەڭىستىككە قاراي قادام تاستاۋىن قول ۇستاسا ىلگەرىلەتۋدى قالايدى.
ديڭ شۋەشياڭ مىنالاردى اتاپ كورسەتتى: جۇڭگو - قازاقستان سەلبەستىگىنىڭ نەگىزى بەرىك، كومەسكى كۇشى زور، بولاشاعى نۇرلى. جۇڭگو جاق قازاقستان جاقپەن ءوزارا سەنىمدىلىك نەگىزىن بەكەمدەپ، دامۋ ستراتەگياسىن ۇشتاستىرۋدى كۇشەيتىپ، ساياساتتاردى سايكەستىرۋدى نىعايتىپ، ءوزارا ءتيىمدى سەلبەستىكتى كەڭەيتىپ، ءبىر - ءبىرىنىڭ دامۋ نىساناسىن جۇزەگە اسىرۋىنا دەم بەرۋدى قالايدى. ەكى جاق ”ءبىر بەلدەۋ، ءبىر جول“ باستاماسىن ”نۇرلى جول“ جاڭا ەكونوميكالىق ساياساتىمەن ۇشتاستىرۋدى تەرەڭدەتىپ، سەلبەستىكتىڭ جاڭا ۇلگىسى، جاڭا جولى جونىندە بەلسەنە ىزدەنىس جاساپ، مادەنيەت، ساياحات، وقۋ - اعارتۋ، دەنە تاربيە، جاستار، جەرگىلىكتى ورىندار سياقتى جاقتارداعى سەلبەستىكتى تەرەڭدەتىپ، جۇڭگو مەن قازاقستاننىڭ ءداستۇرلى دوستىعىن ۇرپاقتان - ۇرپاققا جالعاستىرۋى كەرەك. جۇڭگو جاق قازاقستان جاقپەن قول ۇستاسا قۇلشىنىپ، جۇڭگو - ورتا ازيا مەحانيزمىنىڭ ورنىقتى، باياندى دامۋىن ىلگەرىلەتىپ، ورتا ازيانىڭ باياندى تىنىشتىعىن بىرگە قورعاۋدى قالايدى.
توقايەۆ ديڭ شۋەشياڭعا ءتوراعا شي جينپيڭگە ىقىلاستى سالەمىن جەتكىزۋدى تاپسىردى. ول مىنانى ءبىلدىردى: قازاقستان مەن جۇڭگو − مەملەكەت پەن مەملەكەتتىڭ دوستىق سەلبەستىگىنىڭ ۇلگىسى. قازاقستان 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىنىڭ تابىستى بولعانىن قۇتتىقتايدى، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى باتىل قولدايدى، جۇڭگو كاسىپورىندارىنىڭ قازاقستانعا كەلىپ قارجى قوسىپ، شارۋاشىلىقتى گۇلدەندىرۋىن قارسى الادى. قازاقستان جاق جۇڭگومەن بىرگە ءار سالاداعى ناقتى سەلبەستىكتى تەرەڭدەتىپ، ”ءۇش ءتۇرلى كۇشكە“ باتىل سوققى بەرىپ، گۋمانيتارلىق اۋىس – كۇيىس پەن جەرگىلىكتى جەرلەردىڭ سەلبەستىگىن جيىلەتىپ، قازاقستان مەن جۇڭگونىڭ ماڭگىلىك جان - جاقتى ستراتەگيالىق سەرىكتەستىك قارىم – قاتىناسىندا ۇزدىكسىز تىڭ تابىسقا قول جەتكىزىلۋىن ىلگەرىلەتۋدى قالايدى.
سمايىلوۆپەن كەزدەسكەندە ديڭ شۋەشياڭ مىنانى ءبىلدىردى: جۇڭگو مەن قازاقستان − ەتەنە دوس كورشىلەر، ءوزارا سەنەتىن دوستار جانە ءوزارا تابىس سيلاپ وتىرعان ارىپتەستەر. بيىل ءتوراعا شي جينپيڭ توقايەۆ زۇڭتۇڭمەن ەكى رەت ديدارلاسىپ، قازاقستان مەن جۇڭگونىڭ ماڭگىلىك جان - جاقتى ستراتەگيالىق سەرىكتەستىك قارىم – قاتىناسىن تەرەڭدەتۋ جونىنەن جاڭا ورتاق تانىمعا كەلدى. جۇڭگو جاق قازاقستان جاقپەن بىرگە ەكى ەل مەملەكەت باسشىلارىنىڭ كەلىسكەن ماڭىزدى ورتاق تانىمىن تياناقتاندىرىپ، جۇڭگو – قازاقستان قارىم – قاتىناسىن ۇزدىكسىز العا قاراي دامىتۋعا پەيىل.
ديڭ شۋەشياڭ بىلاي دەپ اتاپ كورسەتتى: جۇڭگو مەن قازاقستان ەكى ەلدىڭ دامۋ تانىمى جاقىن، ءوزارا تولىقتاۋ ابزالدىعى كورنەكتى، سەلبەستىك بولاشاعى كەڭ. ەكى جاق ءۇرتىس تاعدىرلاس ورتاق تۇلعا رۋحىن ۇستانىپ، ءبىر – ءبىرىنىڭ وزەكتى مۇددەسىنە ساياتىن ماسەلەلەردە ءبىر – ءبىرىن قولداپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرىپ، ۇلاستىرۋ – تۇتاستىرۋدى كەڭەيتىپ، گۋمانيتارلىق اۋىس – كۇيىستى جيىلەتىپ، جۇڭگو مەن قازاقستاننىڭ جان – جاقتى، ءوزارا ءتيىمدى سەلبەستىگىنىڭ ساپاسىن، دارەجەسىن جوعارىلاتۋدى ىلگەرىلەتۋى كەرەك.
سمايىلوۆ مىنانى ءبىلدىردى: قازاقستان - جۇڭگو قارىم - قاتىناسى تەرەڭ دوستىق پەن بەرىك ءوزارا سەنىمدىلىكتى نەگىز ەتەدى، ەكى ەلدىڭ جوعارى جىكتەگىلەرىنىڭ بارىس - كەلىسى جيىلەپ، سەلبەستىگى سۇبەلى تابىستارعا قول جەتكىزدى. قازاقستان جاق ءبىر جۇڭگو ساياساتىن باتىل اتقارادى، جۇڭگو جاقپەن بىرگە قازاقستان مەن جۇڭگونىڭ ماڭگىلىك جان - جاقتى ستراتەگيالىق سەرىكتەستىك قارىم - قاتىناسىن ونان ارى كۇشەيتىپ، ءار سالاداعى ناقتى سەلبەستىكتى ۇزدىكسىز كەڭەيتۋدى قالايدى.
11 – ايدىڭ 27 - كۇنى ديڭ شۋەشياڭ سكليارمەن بىرگە جۇڭگو - قازاقستان سەلبەستىك كوميتەتىنىڭ 11 - رەتكى ءماجىلىسىن باسقاردى. ءماجىلىس جۇڭگو مەن قازاقستاننىڭ ءار سالاداعى ناقتى سەلبەستىگىندە قول جەتكەن ىلگەرىلەۋشىلىكتەردى جان - جاقتى، تولىق تۇراقتاندىرىپ، نازاردى ەنەرگيا، ەكونوميكا - ساۋدا، فينانس، قاتىناس، عىلىم - تەحنيكا، گۋمانيتارلىق، قورشاعان ورتانى قورعاۋ جانە حاۋىپسىزدىك سياقتى كەڭەستىك تاقىرىپتارعا شوعىرلاندىرىپ، تولىق پىكىر اۋىستىردى ءارى كەلەسى ساتىداعى سەلبەستىكتىڭ ماڭىزدى ءتۇيىنىن جوبالادى. ماجىلىستەن كەيىن ديڭ شۋە شياڭ مەن سكليار «جۇڭگو - قازاقستان سەلبەستىك كوميتەتى 11 - رەتكى ءماجىلىسىنىڭ ماڭىزدى ەستەلىگىنە» قول قويدى ءارى ءوزارا مادەنيەت ورتالىعىن قۇرۋ جونىندەگى كەلىسىم، قازاقستاننىڭ جاس جەمىس - جيدەگىن جۇڭگوعا جەتكىزۋدەگى وسىمدىكتەردى كارەنتيندەۋ تالابى جونىندەگى كەلىسىم سياقتى سەلبەستىك قۇجاتتارىنا قول قويۋعا كۋا بولدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
