جىجياڭداعى ءبىر كاسىپورىن تيجاراتشىسى 10 ەلگە بارىپ بازاردى كەڭەيتتى
ۇشاقپەن 200 مىڭ كيلومەتردەن استام جول باستى، 100 گە جۋىق تاپسىرىس قابىلدادى
«حالىق گازەتىنىڭ» تىلشىلەرى گو مۋلۇڭ، ليۋ جۇنگو
2024.04.12 15:46 كەلۋ قاينارى : حالىق تورابى
10 مەملەكەت، 20 نەشە قالا، جالپى ۇشۋ ارالىعى 200 مىڭ كيلومەتردەن استام، بۇل − رۇيلي وتباسى توقىماشىلىق ونىمدەرى توبىنىڭ باس جوراسى فەي جۇڭفۋدىڭ 2023 - جىلعى سىرتقا شىعۋ ساندى مالىمەتى. ول جان – جاقتى شاپقىلاپ، 100 گە جۋىق كاسىپورىننان تاپسىرىس قابىلدادى، سوماسى 5 ميلليون دوللاردان استى.
جىجياڭ ولكەسىنىڭ تۇڭشياڭ قالاسىنا ورنالاسقان رۇيلي وتباسى توقىماشىلىق ونىمدەرى توبى شەتەل بازارىن كۇش سالا اشۋشىلاردىڭ ءبىر مىسالى عانا. ءتىلشى تەكسەرۋ - زەرتتەۋ ارقىلى كاسىپورىن تيجاراتشىلارىنىڭ توپ - توبىمەن قايراتتانا العا ۇمتىلىپ، سىرتقا شىعىپ ءورىس اشىپ، ناقتى ىستەۋ بارىسىندا جۇڭگو ەكونوميكاسىنىڭ ومىرشەڭدىك كۇشىن قاۋلاتىپ وتىرعانىن بايقادى.
”قيىندىقتان تايسالماي العا ۇمتىلساق، اسپايتىن قامال جوق“
يگىلىك جاراتقان 20 جىلعا جۋىق ۋاقىتتان بەرى فەي جۇڭفۋ كرەسلو كەزدەمەسى جاعىندا تىڭعىلىقتى جۇمىس ىستەدى، باستى ۇلگىدەگى كرەسلولارى ەۆروپادا ءوتىمدى بولىپ، ءوندىرىس قۋاتى مەن ساتىلۋ مولشەرى ەل ىشىندە الدىڭعى ورىندا تۇردى. الايدا 2022 – جىلى كاسىپورىننىڭ ەكسپورت تاپسىرىس مولشەرى ءبىر مەزەت كورنەكتى تومەندەدى.
ءبىر جاعىنان، قارىم - قاتىناس ارناسى كەدەرگىگە ۇشىرادى. ءبىر تاپسىرىس ىلگەرىندى - كەيىندى 3 - 4 اي ۋاقىتتى جەپ، ەڭ سوڭىندا ءبىر شەتەل سەرىكتەستىگى تاپسىرىستى يەلەپ كەتكەن. فەي جۇڭفۋ بىلاي دەدى: بەتپە - بەت اۋىس - كۇيىس ازايعاندىقتان، شەتەلدەگى كەيبىر قاريدارلار ناق مايدانداعى جاعدايدى تۇسىنبەي، سەرىكتەستىكتىڭ ءوندىرىس مىندەتىن ورىنداي الماۋىنان الاڭدادى.
ەندى ءبىر جاعىنان، سىرتقى سۇرانىم السىرەدى. ۇزاق ۋاقىت ىستەستىك جاساعان ءبىر شەتەل سەرىكتەستىگى كەنەت تاراتىلعانىن جاريالادى، قۇنى 150 مىڭ امەريكا دوللارىندىق زات شىعارىلماي قالدى. ورتانىڭ وزگەرىسى كاسىپورىننىڭ ءبىر ءبولىم ءوندىرىسىن توقتاتتى. ءبىراق فەي جۇڭفۋ ”قيىندىقتان تايسالماي العا ۇمتىلساق، اسپايتىن قامال جوق“ دەگەندى ابدەن بىلەدى.
”ۋاقىتتى ۇتقاندا عانا، جۇگىرۋدەن ءۇمىت كۇتۋگە بولادى“
2023 - جىلعى سىرتقى ساۋدا بازارىن ەسكە العاندا، فەي جۇڭفۋ ەرەكشە تەبىرەنىپ: ”ۋاقىتتى ۇتقاندا عانا، جۇگىرۋدەن ءۇمىت كۇتۋگە بولادى“ دەدى.
وسى جىلى ساپار قاۋىرت ورنالاستىرىلدى: 1 – ايدا گەرمانيانىڭ فرانكفۋرت قالاسىندا ءۇي توقىما كورمەسىنە قاتىناسىپ، جاڭا، كونە قاريدارلارمەن كەڭەسىپ، دانيانىڭ وحۋس، پولشانىڭ كاتوۆيز قالاسىندا جەكە - جەكە 100 مىڭ دوللار، 200 مىڭ دوللار تاپسىرىس قابىلدادى. 3 – ايدا گەرمانيانىڭ بەرلين قالاسىندا ءۇي جيھازدارى بازارىنا جاعداي ۇعىسا باردى. 5 – ايدا ۆەنگريانىڭ بۋداپەشت قالاسىندا 70 مىڭ امەريكا دوللارىندىق تاپسىرىسقا قول قويىلىپ، گەرمانيانىڭ كولون قالاسىندا ءبىر ميلليون 200 مىڭ امەريكا دوللارىندىق تاپسىرىسقا قول قويىلدى. 6 – ايدا فرانسيانىڭ ليون قالاسىندا كونە الارماندارعا جاعداي ۇعىسا باردى. 9 - ايداجاپونيانىڭ داجيڭ قالاسىندا كورمەگە قاتىناستى. 11 – ايدا پولشانىڭ ۆارشاۆا قالاسىندا 350 مىڭ امەريكا دوللارىندىق تاپسىرىس قابىلدادى...
جاعداي ۇعىسۋداعى ادالدىق پەن جۇڭگو ونىمدەرىنىڭ ساپاسى قاريدارلاردى ارت - ارتىنان اسەرلەندىردى. گەرمانيانىڭ فرەيبۋرگ قالاسىندا جەرگىلىكتى ءبىر كاسىپورىن ەرەكشە تارتۋ دايىندادى: سەرىكتەستىكتىڭ بىرنەشە باسقارۋشىسى ۋاقىتتىق وركەستر ۇيىمداستىرىپ، جۇڭگونىڭ «قوڭىرالا قاز» ءانىن ورىندادى. بۇل ءان كوپ جىلدىڭ الدىندا ولار جۇڭگوعا كەلىپ ەكسكۋرسيالاعاندا، فەي جۇڭفۋددىڭ ماشيناسىندا قويىلعان ەدى. ەكى جاق ناق مايداندا 450 مىڭ امەريكا دوللارىندىق تاپسىرىسقا قول قويدى ءارى ىشكەرىلەي سەلبەستىك جاساۋ نيەتىنە كەلدى. قايتا - قايتا ۇشۋ، سان رەتكى كەلىسسوز ارقىلى فەي جۇڭفۋ تاپسىرىستى قايتا - قايتا قابىلداپ وتىردى، سەح تاعى دا قاربالاستىققا ءتۇستى. ”سەنىمدى بەكەمدەگەندە كەلەشەك، ءسوز جوق، ورايعا تولى بولادى“
بيىل 2 - ايدىڭ 29 - كۇنى فرانسيانىڭ پاريج وليمپيادا قىستاعى رەسمي پايدالانۋعا بەرىلدى، رۇيلي ءۇي توقىماشىلىعى وندىرگەن 3000 كرەسلو جاتاقحانادان ورىن الدى. وڭاي - وسپاق قولعا كەلمەگەن وليمپيادا قىستاعىنىڭ ”كىرۋ بەلەتى“ فەي جۇڭفۋدىڭ تاپسىرىس بەرۋ حيكاياسىنىڭ جالعاسى ەدى.
حالىقارالىق بازاردىڭ مويىنداۋىنىڭ استارىندا ونىمدە جاڭالىق جاراتۋ مەن ساپانى جوعارىلاتۋعا دەگەن تالپىنىس جاتىر. سۇرانىستىڭ وزگەرىسىنە توتەپ بەرۋ ءۇشىن، رۇيلي وتباسى توقىماشىلىعى يتاليادا قىزمەت كەڭسەسىن قۇرىپ، جوبالاۋ تەحنولوگياسىن دەن قويا زەرتتەدى؛ گەرمانيانىڭ ايگىلى ءۇي جيھازدارى كاسىپورىندارىمەن سەلبەسىپ، جاڭا ونىمدەردى زەرتتەپ اشۋدى كۇشەيتتى؛ ەل ىشىندەگى زاۆودتاردا شيكىزات ساتىپ الۋ، ءوندىرۋ، مانەرلەۋ، ساپانى باسقارۋ - مەڭگەرۋ سياقتى جۇمىس ءتارتىبى جۇيەسىن ۇزدىكسىز ساپالىلاندىرىپ، سەنىمدى ساپا كەپىلدىگىمەن قامدادى.
فەي جۇڭفۋ بىلاي دەپ قارادى: بازار بار، قاجەتسىنۋ بار، ساياسات بار، كومەكتەسۋ - سۇيەمەلدەۋ بار، ەندىگى ماسەلە كىمنىڭ شىنايى كۇش سالۋىندا تۇر. بيىل جىل باسىنان بەرى كاسىپورىننىڭ تاپسىرىس قابىلداۋ، بازار اشۋ كولەمى دە اناعۇرلىم كوپ مەملەكەتكە كەڭەيدى. ”سەنىمدى بەكەمدەگەندە كەلەشەك، ءسوز جوق، ورايعا تولى بولادى“ دەدى فەي جۇڭفۋ.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
