شي جينپيڭ ا ق ش - نىڭ مەملەكەت ىستەرى حاتشىسى بلينكەنمەن كەزدەستى

2024.04.28 16:15 كەلۋ قاينارى : حالىق تورابى

　　4 - ايدىڭ 26 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا ا ق ش - نىڭ مەملەكەت ىستەرى حاتشىسى بلينكەنمەن كەزدەستى. سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

　　شينحۋا اگەنتتىگى، 4 - ايدىڭ 26 - كۇنى، بەيجيڭ (ءتىلشى لۋ حۋا). 4 - ايدىڭ 26 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا ا ق ش - نىڭ مەملەكەت ىستەرى حاتشىسى بلينكەنمەن كەزدەستى.

　　شي جينپيڭ بىلاي دەپ اتاپ كورسەتتى: بيىل − جۇڭگو مەن ا ق ش - نىڭ ديپلوماتيالىق قارىم - قاتىناس ورناتقانىنىڭ 45 جىلدىعى. 45 جىلدىق جۇڭگو - ا ق ش قارىم - قاتىناسى بوران - شاشىندى باستان كەشىرىپ، بىزگە كوپتەگەن ماڭىزدى وي سالدى: ەكى ەل قارسىلاس ەمەس، سەرىك بولۋى؛ ءبىر - بىرىنە زيان ەمەس، تابىس جەتكىزۋى؛ كەسىرلى باسەكەگە تۇسپەي، پارىقتاردى ساقتاپ، ورتاقتىققا ۇمتىلۋى؛ ايتقانى ءبىر ءتۇرلى، ارەكەتى تاعى ءبىر ءتۇرلى بولماي، ءىس - ارەكەتى ءبىرىڭعاي بولۋى، ودان ناتيجە جاراتۋى كەرەك. مەن ءوزارا قۇرمەت ەتۋ، بەيبىت قاتار تۇرۋ، سەلبەسىپ تەڭ يگىلىكتەنۋ سىندى ءۇش ۇلكەن پرينسيپتى العا قويدىم، بۇل − ءارى بۇرىنعى تاجىريبەلەردىڭ قورىتىندىسى، ءارى بولاشاققا بەت الۋدىڭ جەتەكشىسى.

　　شي جينپيڭ بىلاي دەپ دارىپتەدى: 3 اپتانىڭ الدىندا مەن بايدەن زۇڭتۇڭمەن تەلەفوندا سويلەسىپ، بيىلعى جۇڭگو - ا ق ش قارىم - قاتىناسىن ورنىقتى دامىتۋ جونىندەگى ويلارىمدى تىلگە تيەك ەتىپ، ەكى جاقتىڭ تاتۋلىقتى باعالاپ، ورنىقتىلىقتى ماڭىزدى ورىنعا قويىپ، سەنىمدىلىكتى نەگىز ەتۋى كەرەكتىگىن العا قويدىم. مەن تاعى دا: ”ۇلكەنىنە قول جەتكىزگەندە كىشىسىنە قول جەتكىزۋگە بولادى“ دەگەندى دارىپتەگەن ەدىم. بۇگىنگى دۇنيە ءجۇزى 100 جىلدا بولماعان زور وزگەرىس جاعدايىندا تۇر، بۇل وزگەرىسكە قالاي توتەپ بەرۋ − داۋىرلىك سۇراۋ، دۇنيە جۇزىلىك سۇراۋ. مەنىڭ جاۋابىم − ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ، بۇل جۇڭگو ديپلوماتياسىنىڭ تۋىنا اينالدى، سونداي - اق دۇنيە جۇزىندەگى كوپتەگەن ەلدىڭ قارسى الۋىنا يە بولدى. جەر شارى وسىنشاما ۇلكەن، ادامزات وسىنشاما كوپ ورتاق سايىسقا ءدوپ كەلىپ وتىر. جۇڭگودا بۇرىنعىلار ”ءبىر كەمەدەگىلەر قيىنشىلىقتى سەلبەسىپ جەڭۋى كەرەك“ دەگەن ەكەن، مەنىڭشە، قازىر ”تۇتاس دۇنيە ءجۇزى قيىنشىلىقتى سەلبەسىپ جەڭۋى كەرەك“. ادامزات قوعامى بەينەت پەن زەينەتتى بىرگە وتكەرىپ، باقىت پەن سوردا ءبىر - بىرىنە ارقا سۇيەيدى، ءار ەل ءبىر - بىرىمەن بىتە قايناسقان، كوپشىلىك تەڭ يگىلىككە كەنەلۋدى، كوپ يگىلىككە كەنەلۋدى جۇزەگە اسىرۋ ءۇشىن ەڭ ۇلكەن ورتاق تانىم ۇيىستىرۋى كەرەك. بۇل − جۇڭگونىڭ دۇنيە ءجۇزى مەن جۇڭگو - ا ق ش قارىم - قاتىناسىنا مامىلە جاساۋداعى نەگىزگى شىعار ءتۇيىنى. مەن ءىرى ەلدە ءىرى ەلدىك بەينە، ءىرى ەلدىك پەيىل جانە جاۋاپكەرلىك بولۋ كەرەك دەپ قارايمىن. جۇڭگو مەن ا ق ش وسى ءۇشىن ۇلگى بولىپ، دۇنيە ءجۇزىنىڭ بەيبىتشىلىگى ءۇشىن جاۋاپكەرلىك ارقالاپ، ءار ەلدىڭ دامۋىنا وراي جاراتىپ، دۇنيە ءجۇزىن الەۋمەتتىك ونىمدەرمەن قامداپ، دۇنيە ءجۇزىنىڭ ىنتىماعى ءۇشىن بەلسەندى رول اتقارۋى كەرەك.

　　شي جينپيڭ بىلاي دەپ دارىپتەدى: مەن بايدەن زۇڭتۇڭمەن سان - فرانسيسكودا ديدارلاسقاندا دۇرىس تانىمدى بىرگە ورناتۋ، الاۋىزدىقتاردى بىرگە ءونىمدى تىزگىندەۋ، ءوزارا ءتيىمدى سەلبەستىكتى بىرگە ىلگەرىلەتۋ، ءىرى ەلدىك جاۋاپكەرلىكتى بىرگە ارقالاۋ، گۋمانيتارلىق اۋىس - كۇيىستى بىرگە جەبەۋ سىندى 5 تىرەكتى العا قويدىم. بۇل − جۇڭگو - ا ق ش قارىم - قاتىناسى سىندى وسى عيماراتتا بولۋعا ءتيىستى ارقالىق، تىرەۋ. ۇلكەن پرينسيپ بەلگىلەنسە، باسقا ماسەلەلەردى شەشۋ وڭايعا تۇسەدى. جۇڭگو جاق سەلبەسۋدى قالايدى، ءبىراق سەلبەستىك قوس باعىتتى بولۋعا ءتيىس. ءبىز باسەكەدەن قورىقپايمىز، ءبىراق باسەكە نولدىك جيىنتىق سايىسى ەمەس، ورتاق العا باسۋ بولۋعا ءتيىس. جۇڭگو جاق وداق جاساسپاۋدا تاباندى بولادى، ا ق ش جاق تا ”شاعىن شەڭبەرمەن“ اينالىسپاۋى كەرەك. ەكى جاقتىڭ دا ءوز دوستارى مەن سەرىكتەرى بولادى، قارسى جاققا باعىتتالماۋ، قارسى جاققا قارسى تۇرماۋ، قارسى جاققا زيان جەتكىزبەۋ كەرەك. جۇڭگو جاق سەنىمدى، اشىق، گۇلدەنگەن، دامىعان ا ق ش - نى كورىپ وتىر، ا ق ش - نىڭ دا جۇڭگونىڭ دامۋىنا بەلسەندى، ۇنامدى جاقتان مامىلە جاساۋىن ءۇمىت ەتەمىن.

　　شي جينپيڭ بىلاي دەپ دارىپتەدى: جۇڭگودا ”ىلگەرىلەمەيدى ەكەنبىز، كەرى كەتەمىز“ دەگەن ءسوز بار. جۇڭگو - ا ق ش قارىم - قاتىناسى دا وسىنداي. جۇڭگو - ا ق ش قارىم - قاتىناسىنىڭ ورنىقتى بولۋ اۋقىمى وڭاي - وسپاق قولعا كەلگەن جوق. ەكى جاق ۇيىرمەلەرىنىڭ ۇزدىكسىز قۇلشىنىپ، بايدەن زۇڭتۇڭ ەكەۋىمىز كەلىسكەن ”“سان - فرانسيسكو بولاشاق جوباسىن“ بەلسەنە تياناقتاندىرىپ، جۇڭگو - ا ق ش قارىم - قاتىناسىن شىن مانىندە ورنىقتىرۋىن، جاقسارتۋىن، العا باستىرۋىن ءۇمىت ەتەمىن.

　　بلينكەن الدىمەن بايدەن زۇڭتۇڭنىڭ ءتوراعا شي جينپيڭگە جولداعان سالەمىن جەتكىزىپ، مىنانى ءبىلدىردى: بايدەن زۇڭتۇڭ ءتوراعا شي جينپيڭمەن سان - فرانسيسكودا ديدارلاسقاننان بەرى ەكى جاق ەكى ەلدىڭ بارىس - كەلىسى، ەسىرتكىگە تيىم سالۋ، جاساندى زەردە، گۋمانيتارلىق اۋىس - كۇيىس سياقتى سالالارداعى سەلبەستىكتە بەلسەندى ىلگەرىلەۋشىلىككە قول جەتكىزدى. بۇگىنگى دۇنيە ءجۇزى كوپتەگەن كۇردەلى سىن - سايىسقا ءدوپ كەلىپ وتىر، ا ق ش مەن جۇڭگونىڭ سەلبەسىپ توتەپ بەرۋىن قاجەت ەتەدى. جۇڭگوعا ساپارلاي كەلگەن كەزدە مەن كەزدەسكەن ا ق ش - نىڭ ءار سالاسىنان جۇڭگوعا كەلگەن قايراتكەرلەر دە ا ق ش - جۇڭگو قارىم - قاتىناسىنىڭ جاقسارۋىن ءۇمىت ەتەدى ەكەن. ا ق ش جاق ”جاڭا قىرعي قاباقتىق سوعىسقا“ ۇرىنبايدى، جۇڭگونىڭ ءتۇزىلىسىن وزگەرتۋگە ۇرىنبايدى، جۇڭگونىڭ دامۋىن شاۋجايلاۋعا ۇرىنبايدى، وداقتىق قارىم - قاتىناس ارقىلى جۇڭگوعا قارسى تۇرۋعا ۇرىنبايدى، جۇڭگومەن قاقتىعىس تۋدىرۋ ويى جوق. ا ق ش ءبىر جۇڭگو ساياساتىندا تاباندى بولادى، جۇڭگومەن قارىم - قاتىناستى ساقتاپ، ەكى ەل مەملەكەت باسشىلارى كەلىسكەن سان - فرانسيسكو ورتاق تانىمىن مۇقيات تياناقتاندىرىپ، اناعۇرلىم كوپ سەلبەستىك قاراستىرىپ، قاتە تۇسىنۋدەن، قاتە تۇجىرىمداۋدان ساقتانىپ، الاۋىزدىقتاردى جاۋاپكەرلىكپەن تىزگىندەپ، ا ق ش - جۇڭگو قارىم - قاتىناسىنىڭ ورنىقتى دامۋىن ىلگەرىلەتۋدى ءۇمىت ەتەدى.

　　شي جينپيڭ بلينكەنگە زۇڭتۇڭ بايدەنگە سالەمىن جەتكىزىپ قويۋدى تاپسىردى.

　　ۋاڭ ي كەزدەسۋدە بىرگە بولدى.

　　كەلۋ قاينارى: حالىق تورابى

جاۋاپتى رەداكتورى : نۇرعيسا قۇرمانجان ۇلى

تەلەفون: 65367915-010 ‍حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved