قۇلتەمىر شىنىمەن ادامنىڭ ورنىن باسا ما
ۋاڭ شياۋلۇڭ \ تىلەك سىمان ۇلى
2018.12.03 16:52 كەلۋ قاينارى : شينجياڭ گازەتى
ەل قۇلاعىن ەلەڭدەتكەن ادام مەن قۇلتەمىردىڭ قورشامالى دويبى جارىسى ءوز مارەسىنە جەتكەنى كوپكە ايان. دۇنيە ءجۇزى بويىنشا الدىنا جان سالماي كەلگەن قورشامالى دويبىنىڭ 9 - دارەجەلى ساڭلاعى (كاسىپتىك قورشامالى دويبى شەبەرلىگى جالپى 9 دارەجەگە بولىنەدى، 9 - دارەجە ەڭ جوعارى دارەجە سانالادى. - اۋد) كورەيالىق ليسەدول 4كە قارسى 1 ۇپايمەن گوگلدىڭ جاساندى زەيىن باعدارلاماسى «AlphaGoدەن » جەڭىلىپ قالدى. ءسويتىپ، قۇلتەمىر ادامزات اقىل - پاراساتىنىڭ تاعى ءبىر «بەتكە ۇستارىن» بىت - شىت ەتتى. ليسەدولدى شاڭ قاپتىرعان «AlphaGo » دۇنيە ءجۇزى بويىنشا قارا ءۇزىپ كەلە جاتقان جۇڭگولىق شەبەر كى جيەدەن كەيىنگى 2 - ورىنعا كوتەرىلىپ، كورەيا قورشامالى دويبى اكادەمياسى بەرگەن 9 - دارەجە كۋالىگىن قانجىعاسىنا بايلادى. بىلايعى جۇرت: «قورشامالى دويبىدا قۇلتەمىر ادامنان اسىپ ءتۇستى، قالعان جۇمىستا قايتەر ەكەن دەشى؟» دەپ گۋىلدەستى.
ا ق ش رايسا ۋنيۆەرسيتەتىندەگى كومپيۋتەر عىلمى پروفەسسورى مويسەي ۆاردي: «ءبىز مىناداي ءبىر ساتكە، ياعني قۇلتەمىر جۇمىس بىتكەننىڭ ءبارىن دەرلىك ادامداردان اسىرا ىستەيتىن ساتكە ءدوپ كەلگەلى تۇرمىز. سونداي ءبىر ءسات كەلەردەن بۇرىن، <قۇلتەمىر ادامزات ىستەي الاتىن جۇمىستىڭ ءبارىن ىستەسە، وندا ادامزات نە ىستەۋى كەرەك؟> دەگەن ماسەلەنى ايقىنداپ الۋىمىز كەرەك» دەپ اتاپ كورسەتتى.
جۇك تاسىمالى شوفەرلىگىنە دە تىقىر تاياپ كەلەدى
جۇك تاسىمالى شوفەرلەرى جونىنەن بۇل ءبىر شارق ۇرىپ داميتىن كەزەڭ. ا ق ش - تىڭ جان سانىن جاپپاي تەكسەرۋ (NPR) ساناعىنا قاراعاندا، قازىرگى كەزدە جۇك تاسىمالى شوفەرى بولۋ ا ق ش - تىڭ 29 شتاتىندا تۇگەلدەي تاسى ورگە دومالاپ تۇرعان كاسىپ كورىنەدى. بولاشاعى نۇرلى، ونىڭ ۇستىنە كاسىپتەنۋ ورايى باسقا كاسىپتەرگە قاراعاندا مول، كىرىسى دە قوماقتى ەكەن.
عالامتورلانۋ جانە اۆتوماتتانۋدىڭ سۇراپىل سوققىسىنا ۇشىراپ، ەڭبەككۇشكە بولعان قاجەت كۇن سايىن ازايىپ بارا جاتقان الدەبىر كاسىپتەرگە سالىستىرعاندا، جۇك تاسىمالى شوفەرلىگى ونشالىقتى زور ىقپالعا ۇشىراي قويعان جوق. نەشە ون جىلدان بەرى كومپيۋتەر حاتشىنىڭ، اۆتوماتتى اقشا شىعارۋ ماشيناسى كاسسردىڭ، اۆتوماتتى جانار ماي قۇيۋ ورنى ماي قۇيۋ قىزمەتكەرىنىڭ ورنىن بىرتىندەپ باسىپ كەلەدى. دەسەدە ۇزاق جولعا كولىك جۇرگىزۋ قازىرشە اۆتوماتتاسىپ ۇلگىرمەگەندىكتەن، زاتتى ۇيىنە دەيىن جەتكىزىپ بەرۋ قىزمەتىنىڭ بازارى ءالى دە بارشىلىق.
دەيتۇرعانمەن، جۇك كولىك شوفەرلەرىنە دە ءبىر تىقىر تاياعان سياقتى، قۇرىپ - جوعالۋدىڭ كەزەگى بالكىم وسى كاسىپكە ءتونىپ كەلە جاتسا كەرەك. گۋگل، ۋەيبىر (UBER) جانە تەسىلا سەكىلدى سەرىكتەستىكتەر شوفەرسىز كولىك جاساۋعا بار كۇشىن سالۋدا. ءمۇبادا، حالىقارادا شوفەرسىز كولىكتەر بارلىققا كەلە قالسا، جول اپاتىن ازايتىپ عانا قويماي، تۇتاس قاتىناس - تاسىمال ىستەرىنە وزگەرىس الا كەلەرى داۋسىز.
ا ق ش - تا جۇك تاسىمال كولىكتەرى تۋدىرعان جول اپاتىنان جىلىنا 4000 ادام قازا بولادى ءارى بۇنىڭ باسىم كوبى شوفەردىڭ الاڭعاسارلىعى نەمەسە شارشاپ - شالدىعۋىنا قاتىستى ەكەن. عالىمدار شوفەرسىز كولىكتەردىڭ كەلەسى 25 جىلدا جولعا شىعا باستايتىندىعىن مەجەلەپ وتىر. ۆاردي پروفەسسور «شوفەرسىز كولىكتەر وڭاي وقىس بولاتىن كادىمگى ادام شوفەرلەرگە سالىستىرعاندا، جول اپاتىن 90 پايىز نەمەسە ودان دا جوعارى دەڭگەيدە ازايتادى» دەپ قارايدى.
جۇك كولىگىن اۆتوماتتى جۇرگىزۋ بارلىق ادامعا بىردەي قۋانىش سيلاي قويماسا كەرەك. ساراپشىلار ەگەر بۇل تەحنيكادان قامال الىنسا، كوپتەگەن سالالاردىڭ جۇمىسپەن قامتۋىنا سوققى بولاتىندىعىن اتاپ ايتتى. ايتالىق، ا ق ش - تا 3 ميلليون 500 مىڭ شوفەر جانە وعان سايكەس 5 ميلليون 200 مىڭ قىزمەتكەر جۇمىسسىز قالىپ، ۇزاق جولدى تاسىمال مەن شوفەرلەرگە قىزمەت وتەيتىن جول بويىنداعى كوپتەگەن شاعىن قالاشىقتار «ەل كوشكەن جۇرتقا» اينالادى ەكەن. وسى تۇرعىدان العاندا، اۆتوماتتى جۇرەتىن جۇك كولىكتەرىنىڭ بارلىققا كەلۋى نەشە ميلليون ادامنىڭ تۇرمىسىن بۇلدىرۋمەن بىرگە ەكونوميكانى دا توقىراتۋى مۇمكىن.
بۇل جايت تەك زات تاسىمال كاسىبىنە عانا ەمەس، قايتا بۇكىل دۇنيە ءجۇزىنىڭ ەڭبەككۇش قۇرىلىمىنا اسەر ەتەتىن كورىنەدى.
ەڭ جاڭا ءبىر زەرتتەۋگە قاراعاندا، تەحنيكادا جاڭالىق جاراتۋدان كەلىپ شىققان «ادامنىڭ ورنىن قۇلتەمىر باسۋ» ءۇردىسى بۇكىل ا ق ش - تاعى جۇمىسپەن قامتىلاتىندار جالپى ساننىڭ %47ىنە ىقپال جاساعان. بۇلاي كەتە بەرسە، قۇلتەمىر ءبارىن مەڭگەرىپ، ادامزاتتى قۇددى فانتاستيكالىق فيلم «ۆاللدە» بەينەلەنگەندەي − جۇمساق ورىندىقتا وتىرۋدى عانا بىلەتىن «ومالبايعا» اينالدىرىپ قويۋى نەمەسە ادامداردى قىرۋار ۋاقىت پەن زەيىندى ونان دا كوپ جاسامپازدىق جاراتۋعا جۇمساپ، ونان دا مول قۇن جاراتۋعا جەبەي ءتۇسۋى مۇمكىن.
ادامنىڭ ورنىن قۇلتەمىردىڭ باسۋى تاڭىرقارلىق ءىس ەمەس
قۇلتەمىر ادامزاتپەن بىرگە جۇمىس ىستەپ كەلە جاتقالى 100 جىلعا تايادى. ماسساچيۋشەتس جاراتىلىستىق عىلىمدار ينستيتۋتىنىڭ ەكونوميكا عىلىمى پروفەسسورى داۆيد ياسى: بازار شارۋاشىلىعى ماڭگى ءوستىپ تۇرا بەرمەيدى. كاسىپتەردىڭ كوركەيىپ - قۇلدىراۋى، تاۋار مەن قىزمەت وتەۋ ورتاسىنداعى اۋىس - كۇيىس ءبىرتالاي ۋاقىتقا دەيىن جالعاستى. كەيبىر كاسىپتەر قۇرىپ - جوعالدى، كەرىسىنشە كەيبىر كاسىپتەر جاندانا ءتۇستى، - دەيدى.
1750 - جىلدارداعى ۇلى بريتانيادا قولمەن جاساۋ تەحنيكاسىنىڭ ورنىن وگەيسىتۋگە بولمايتىن - دى، ال 19 - عاسىرعا كەلگەندە كولەمدەنگەن ونەركاسىپتىك جاساۋ لەزدە ونىڭ ورنىن باسا قويدى؛ 20 - عاسىردىڭ 80 - جىلدارىنا كەلگەندە، ونەركاسىپ توڭكەرىسى كەزەڭىنەن كەلە جاتقان ءوندىرىس لەنيالارىنىڭ ورنىن ماشينا يەلەدى. الايدا بۇل وزگەرىستەردىڭ ەش زيانى بولعان جوق، قايتا قوعامنىڭ دامۋىنا پايداسى ءتيدى.
جالپى العاندا، ادامزات ماشينادان پايدالانىپ، ۋاقىتتىڭ قۇنىن ونان ارى ارتتىرىپ، اناعۇرلىم كوپ جۇمىستاردى تىندىردى. كىر جۋعىش بۇرىنعى ءبىرقانشا ساعاتتىق كىر جۋۋ بارىسىن تۇيمەشىكتەردى بىرنەشە رەت باسا سالۋعا قىسقارتسا؛ ءىرى تيپتەگى قۇرىلىس ماشينالارى قۇرىلىس سالۋ ونىمدىلىگىن ەسەلەپ ارتتىردى؛ كومپيۋتەر قولمەن جازىلاتىن نەمەسە ەسەپتەلەتىن قىرۋار ەڭبەككۇش سارىپ ەتەتىن جۇمىستاردى كەلمەسكە جونەلتتى. وسى بارىستا ادامزاتتىڭ دەنساۋلىعى مەن تۇرمىس ساپاسى دا جاقسارا ءتۇستى.
ويلاماعان جەردەن، كوز ءۇيىر بولىپ كەتكەن كەيبىر جۇمىستار دا عايىپ بولا باستادى. ماسەلەن، پويەز شوفەرى. دۋباي سياقتى كوپتەگەن قالالاردىڭ تەمىر جول جەلىلەرىندە پويەز اۆتوماتتى قاتىنايتىن بولدى. قورىتىپ ايتقاندا، ادامدار باقىتتى. جاڭا تەحنيكا ادامدارعا قىرۋار تىڭ ورايلاردى الا كەلدى. تەحنيكانىڭ دامۋىنا ىلەسە، بازاردا وزگەرىس بولا باستادى.
ادامزات باستى ورىننان كومەكشى ورىنعا قاراي اۋىستى
ونەركاسىپ توڭكەرىسىنەن بۇرىن، ءبىز قوعام مەن ەڭبەككۇش ورتاسىنداعى وزگەرىستىڭ بۇنشالىقتى تەز بولعانىن كورمەپ ەدىك. ساندى مالىمەتتەرگە جۇگىنسەك، دارىندىلار قۇرىلىمى مەن كاسىپتەنۋ بازارىنىڭ اياق الىسى ءبىرشاما باياۋ بولىپ، بۇنداي وزگەرىسكە دەرەۋ ىلەسە الماي وتىرعاندىعىن بايقايمىز. دامىعان ەلدەردە، جالپى جان سانىمەن سالىستىرعاندا، جۇمىسپەن قامتۋ سالىستىرماسى ءۇرتىس تومەندەۋدە. سيفر ەكونوميكاسىنىڭ گۇلدەنۋى كوپتەگەن كاسىپتەنۋ ورايىن تىكەلەي جاراتىپ بەرە المايتىن سياقتى كورىنگەنىمەن، ەگەر باجايلاپ قاراساق، بۇنى كەلتىرىپ شىعارىپ وتىرعان سەبەپ كاسىپتەنۋ ورايىنىڭ بىركەلكىسىزدىگىنەن ەكەنىن، ول جاراتقان كاسپتەنۋ ورايىنىڭ كوبىندە لوندون، سان - فرانتسيسكو، نيۋ - يورك جانە ستوكگولم سياقتى ءىرى قالالارعا شوعىرلانىپ قالعانىن بايقايمىز. ال، بۇل سونىمەن بىرگە سول جەرلەردىڭ زات باعاسى مەن تۇتىنۋ ورەسىن جوعارىلاتىپ، تاعى ءبىر تەڭسىزدىك تۋدىرىپ وتىر.
بوستون اقىل - كەڭەس بەرۋ سەرىكتەستىگىندەگى اليسن زاند: ءدال وسىنداي زور بۇرىلىس تۋىلعان كەزدە، سەگىز قىرلى، ءبىر سىرلى كوپ تەحنيكا مەڭگەرگەن دارىندىلارعا زارۋلىك ونان ارمان ارتا تۇسسە كەرەك - تى. وكىنەرلىگى، وقۋ - اعارتۋ سالاسى بۇل تۇيىنگە ءمان بەرە قويمادى. سودان بارىپ ونەرى ۇستەم، ماعلۇماتى جوعارى بەساسپاپ دارىندىلارعا بازار سۇرانىسى ارتىپ، ورتا دارەجەلى تاربيە العان جۇمىسشىلارعا بولعان قاجەتسىنۋ ازايدى. ناتيجەدە ءبىرسىپىرا ورتا بۋرجۋازيالار قازىرگى تۇرمىس ءتاسىلىن ساقتاپ قالۋعا شاراسىز قالىپ وتىر.
ەندى ءبىرقانشا جىلدا بۇل ماسەلە ونان ارى شيەلەنىسە تۇسەدى، كوپتەگەن داعدىلى جۇمىستار مەن قايتالامالى جۇمىستار مەيلى دەنە ەڭبەگى نەمەسە اقىل - وي ەڭبەگى بولۋىنا قاراماستان اۆتوماتتاسۋدىڭ كولەڭكەسىندە قالا بەرەدى. دايىن تاعام جەتكىزۋشى، اقشا الۋشى، تەلەفون ساتۋشى، بۇعالتىر، داياشى قاتارلىلاردى، اۋەل دەسەڭىز، كەيبىر اقپارات ءتىلشىسىن كەلەشەك ءبىرقانشا جىلدا جوعالۋى مۇمكىن بولعان جۇمىس تۇرلەرىنە جاتقىزۋعا بولادى. بۇرىنعى ءار الۋن قىزمەتتەر وزگەرە كەلە كومپيۋتەردى ءتۇرتىپ قالسا بىتەتىن جۇمىسقا اينالدى. بۇرىنعى باسەكەلىك قۋاتى كۇشتى، جوعارى تەحنيكانى قاجەت ەتەتىن قىزمەتتەر اۆتوماتتاندىرۋ جانە جاساندى زەردەنىڭ اسەرىندە باعى تايىپ، قاراپايىم دا جاي جۇمىسقا اينالىپ قالدى. مىسالى، x ساۋلەسىمەن تەكسەرۋ جانە باسقا دا مەديتسينالىق ەستەلىككە الۋ جۇمىستارى كومپيۋتەرلىك ەسەپتەۋ ادىسىمەن وقىلىپ، ونان ارى تەز، ونان ارى دۇرىس بولا ءتۇستى. شيپاگەرلەر وزدەرىنىڭ قىزمەتى بارا - بارا ماشينانى پايدالانۋدان ماشينانىڭ كومەكشىسى بولۋعا قاراي بەت الىپ بارا جاتقانىن اڭعاردى. البەتتە، باسقا كاسىپتەردىڭ دە بۇدان وزگەشە بولىپ تۇرعانى شامالى. باسىم كوپ ساندى جۇمىستار مالىمەتتى ەنگىزىپ، ەكرانداعى مالىمەتتى وقي سالسا ورىندالا بەرەتىن دەڭگەيدە وڭايلاستى.
كونە كاسىپتەر جوعالدى، جاڭا كاسىپتەر بارلىققا كەلدى
اۆتوماتتاندىرۋ كوپتەگەن جۇمىستاردى وڭايلاستىرىپ، ءتىپتى، ءمان - ماعىناسىز كۇيگە تۇسىرگەنىمەن، ادامداردىڭ ءمالىم دارەجەدە ارالاسۋىن، ادام كۇشىمەن جالعاستىرۋىن قاجەت ەتەدى. ون نەشە جىلدىڭ الدىندا، گۋگل سەرىكتەستىگى ىزدەۋ جۇمساق بولشەگىن جاڭادان قولدانۋعا بەرگەندە، كوپتەگەن ادامدار «كىتاپحانا باسقارۋشىسى سياقتى قىزمەتتەر كوپ وتپەي كادەدەن قالادى» دەپ قارادى. ءىس جۇزىندە، بۇل كاسىپكە بولعان قاجەتسىنۋ ارتپاسا كەمىگەن جوق، ويتكەنى بۇل قىزمەتتى اناعۇرلىم مول تەحنيكا مەڭگەرگەن ادام ورىنداۋى قاجەت بولاتىن.
ۇلى بريتانيا وكسفورت ۋنيۆەرسيتەتى مارتين ينستيتۋتىنىڭ (وكسفورت ۋنيۆەرسيتەتى قاراماعىنداعى زەرتتەۋ جانە ساياسات ءبولىمى) تەحنيكا جانە كاسىپتەندىرۋ نىسانى بىرلەستىگىنىڭ مەڭگەرۋشىسى كاال بەنەديكت فرەۋ: «ەگەر ءبىر ماشينا ادامزاتتىڭ ورنىن بۇكىلدەي باسىپ كەتە السا، وندا مەنىڭ باسى ارتىق بولعانىم. الايدا ماشينانى مەڭگەرەتىن ادام مەن بولسام، وندا مەنىڭ قۇنىمنىڭ ونان ارمان ارتقانى. تەك كەيبىر ويلاماعان ىستەر تۋىلا قالماسا بولعانى، ماشينا جانە جۇمساق بولشەك ادامزاتتىڭ كەيبىر جۇمىستارىنىڭ ورنىن باسىپ كەتە المايدى» دەيدى.
قازىرگە دەيىن، جاسامپازدىق، كاسىپ جاراتۋ، قوعامدىق بارىس - كەلىس جانە ۇستامدىلىق جاقتارىندا قۇلتەمىر مەن باعدارلامالار ادامزاتتىڭ ماڭعاراسىن كورە العان ەمەس. جاپپاي اۆتوماتتاسۋ ۇلى دۇبىرىندە پوپ، مەدبيكە، لەكسياشى، تاربيەلەۋشى جانە كاسىبي ارتيست قاتارلىلاردىڭ بەدەلى ارتپاسا كەمي قويمايدى.
ودان قالا بەردى، اۆتوماتتاندىرۋدى ەلدىڭ ءبارى قۇپتاپ كەتپەيدى ەكەن. فرەۋ: تاعامجايلار تاقتا كومپيۋتەرمەن تاپسىرىس قابىلداپ، قۇلتەمىرگە تاباق تارتتىرىپ، شىنى الدىرا باستاعان بولسا دا، قوعامنىڭ بۇنداي وزگەرىستى بىردەن قابىلداي قويۋى ەكىتالاي. كەيبىرەۋلەر ءوزى كوشەگە شىعىپ قىدىرعاندى، شوفەرى بار كىرەكولىكتەرىنە وتىرعاندى جاقسى كورەدى، - دەيدى.
بۇنداي جاعداي دۇنيە ءجۇزىنىڭ جەر - جەرىندە ءومىر ءسۇرىپ وتىر. مەيلى برۋكلين، الدە لوندون نەمەسە بەرليندە بولسىن، قولونەر ۇستالارىنىڭ ساۋداسى قايتادان جاندانا تۇسۋدە. ناعىز قولمەن جاسالعان ويىنشىق، ناۋشنيك، ازىق - تۇلىك قاتارلىلاردىڭ ساۋداسى كۇننەن - كۇنگە كۇسەت بولۋدا. بۇنداي شەبەرحانالار مەن سەرىكتەستىكتەر ءوندىرىس بارىسىندا اۆتوماتتى جابدىقتارعا وتە از يەك ارتامىز دەپ جار سالعانىمەن، قالايدا تەحنيكاعا سۇيەنەدى عوي، ايتالىق، كەيبىر ەلەكتروندى ساۋدا توراپ بەكەتتەرى ولاردىڭ تاۋارلارىنا بازار ىزدەيدى.
شىنتۋايتىندا، ءىشىنارا كاسىپتەردىڭ قاقپاسى تارس جابىلعانىمەن، ادامدار تاعى ءبىرسىپىرا جاڭا كاسىپتەردى جاراتتى جانە ويلاپ تاپتى. بۇگىنگى كۇنى جارىققا شىعىپ وتىرعان الەۋمەتتىك قارىم - قاتىناس مەدياسىنداعى اۋماق ديرەكتورى، APP جوبالاۋشىسى، قورشاعان ورتانى لاستاماي جەرلەۋ ىستەرىن باسقارۋ قاتارلى كاسىپتەردى وسىدان 10 جىل بۇرىن قيالعا دا كەلتىرە المايتىن ەدىك. سوندىقتان ءبىز قازىردە بولاشاقتا قانداي تىڭ كاسىپتەردىڭ بارلىققا كەلەتىندىگىنە دۇرىس مەجە جاساي المايمىز.
زاند ساندى مالىمەتتەرمەن قوعامنىڭ دامۋ ۇردىسىنە نەگىزدەلە وتىرىپ، بولاشاقتا تۇقىم قۋالاۋ جونىندە كەڭەس بەرۋ، جۇمساق بولشەك رەتتەۋشى، بيوبانكە قىزمەتكەرى، رەالدىقتى باسا جازاتىن جازۋشى، قارتايۋدىڭ الدىن الاتىن مامان جانە قالاعا تونەتىن اپاتتاردى ازايتاتىن مامان قاتارلى كاسىپتەر توتەنشە قارسى الۋعا يە بولادى دەپ جورامالدايدى. ول تاعى قالاعا ورىن تەبەتىن ادامداردىڭ كۇن ساناپ كوبەيۋىنە بايلانىستى قالا ديقانى، دەگبىرسىزدىك پسيحيكاسىنا كەڭەس بەرۋشى، اۋەل دەسەڭىز، ەرمەك حايۋاناتتار پسيحولوگى تەكتەس كاسىپتەر دە بارا - بار «مودىعا» اينالۋى مۇمكىن دەگەن بولجام ايتادى.
وزگەرىسكە قاراي وزگەرىپ، سايكەسە العاندار عانا ءومىر سۇرە الادى
اۆتوماتتاندىرۋ ادامزات قوعامىن اناعۇرلىم كوركەيتىپ - گۇلدەندىرۋمەن بىرگە تابىس ءبولىسى جاعىندا تىڭ ماسەلەلەردى الا كەلدى. ونشا كوپ ەڭبەككۇش قاجەت ەتپەي - اق زور مولشەردە بايلىق جاراتىلسا، ءبىز ونى قالاي بولىسكە سالامىز؟ − وسىنى ويلاپ كورەلىكشى. قوعامىمىزعا ۋاقىتشا جۇمىسسىز قالعانداردى دەمەپ، قاجەتىنە قاراي تاربيەلەۋ ءارى ولاردىڭ جاڭا كاسىپكە ويىسۋىنا كومەكتەسۋ مىندەتى جۇكتەلىپ وتىر.ماسساچيۋشەتس جاراتىلىستىق عىلىمدار ينستيتۋتى سيفرلى ساۋدا ورتالىعىنىڭ مەڭگەرۋشىسى ەريك بلەينيۋەفوسىن ءوزىنىڭ «ەكىنشى رەتكى قۇلتەمىر توڭكەرىسى» دەگەن شىعارماسىندا: «كىرىس كوبەيگەن سايىن، ءبىز كاسىپسىزدەر نەمەسە بازاردا باعى جانباعانداردىڭ قوعامدىق اماندىعىن قامتاماسىزداندىرۋ ءۇشىن ءتىپتى كوپ بوداۋ بەرۋىمىز كەرەك» دەگەن.
«وقۋ - اعارتۋدى قوعامدىق وزگەرىستىڭ قادامىنا سايكەستىرۋ − قاجەتتىلىك. ءبىز ەڭ جاڭا بىلىمدەردى بەرىلە ۇيرەنۋمەن بىرگە ونى ەڭ جاڭا جۇمىس ورىندارىمەن سايكەستىرە ءبىلۋىمىز كەرەك، سونداي - اق وزىمىزگە بولاشاقتى كۇتىپ الۋعا ازىرلەنە الدىق پا؟ دەگەن سۇراۋدى قويا ءبىلۋىمىز قاجەت. بۇرىن ۇيرەنگەن كوپ ونەرىمىز قازىرگى قىزمەتكە سايكەسە بەرمەيتىن بولىپ قالدى، سونىمەن بۇل جاعداي قاجەتسىنۋ مەن قامداۋ ورتاسىندا كورنەكتى سايكەسپەۋشىلىك تۋدىردى»، - دەيدى زاند.
كەيبىر مەملەكەتتەر بۇنداي وزگەرىستەرگە ءدوپ كەلگەندە باسقالارعا قاراعاندا اناعۇرلىم جاقسى جۇمىستار جاساپ جاتىر. كەيبىرەۋلەرى ساياسات ارقىلى جاڭالىق جاراتۋعا كەدەرگى جاساۋدا، ماسەلەن، فرانسيا كىرە كولىك شاقىرۋ جۇمساق بولشەگىنە تيىم سالدى. ال كەيبىر مەملەكەتتەر جاڭالىق جاراتۋعا بەلسەنە ات سالىسۋدا. گەرمانيادا جىلىنا ءبىر ميلليون 500 مىڭ ادام اقىلى كۋرستارعا قاتىناسادى. سول سياقتى دۇنيە ءجۇزىنىڭ تۇكپىر - تۇكپىرىندەگى 4000نان استام كاسىپورىن تاربيەلەۋ بازاسىن قۇرىپ ۇلگىردى، بۇنىڭ ىشىندە ەڭ ۇلكەنى ءۇندىستاننىڭ مۋسورە قالاسىنا ورنالاسقان ءۇندىست IT سەرىكتەستىگى Infosys جۇرگىزىپ وتىرعان تاربيەلەۋ قۇرىلىمى سانالادى. 2001 - جىلدان بەرى قاراي وسىندا 100 مىڭنىڭ ۇستىندە ينجەنەر تاربيەلەندى. تاعى ءبىرسىپىرا ادامدار ۇزدىكسىز رەتتەۋلەر جۇرگىزىپ، ادامنىڭ ورنىن قۇلتەمىر باسۋ تولقىنىندا الدىمەن ەكشەلىپ كەتۋدەن ساقتانعانسىماق بولىپ وتىر. ماسەلەن، BMW سەرىكتەستىگى زاۆودقا وزگەرىس ەنگىزىپ، قارت جۇمىسشىلاردىڭ قىزمەت ىستەۋىنە جاعداي جاساپ، ولاردىڭ دەمالىسقا شاراسىزدان شىعىپ كەتۋىنىڭ الدىن الدى.
كۇندەردىڭ بىرىندە قۇلتەمىر جانە جاساندى زەردە ادامزات قازىر شۇعىلدانىپ وتىرعان باسىم كوپ ساندى كاسىپتەردىڭ ورنىن باسادى. اۋەلى، ءبىز بۇگىنگى كۇنى ىستەپ جۇرگەن قىزمەتتەردىڭ باسىم كوبىن دەڭگەلەك اينالدىراتىن دا بولۋى مۇمكىن، سونىمەن ادامدار ىستەگىسى كەلمەسە جۇمىسقا بارماي - اق قوياتىن بولادى. ەريك برينولفسسون: بۇعان بولا ابىرجىپ كەتۋدىڭ تۇك قاجەتى جوق، بۇنداي جاعدايدىڭ قاشان جۇزەگە اساتىنىنا مەن دە بىردەڭە دەي المايمىن، قاس پەن كوزدىڭ اراسىندا تۋىلا قويادى دەپ تە قارامايمىن، - دەيدى.
بارلىق جۇمىستى قۇلتەمىرگە تاپسىرىپ بەرۋ بەلگىلى تۇرعىدان العاندا جامان ءىس تە ەمەس، اسىرەسە، ونىڭ ءمانى جاعىنان العاندا تۇتاس قوعامعا بايلىق پەن باقىت اكەلەتىن يگى باستاما. نورۆەگيا وسىنىڭ ءبىر جاندى مىسالى. باتىس ەۆروپاداعى ەڭ ۇلكەن مۇناي ءوندىرۋشى جانە دۇنيە جۇزىلىك 3 - ۇلكەن مۇناي شىعارۋشى ەل بولعان نورۆەگيا دۇنيە ءجۇزى بويىنشا كىسى باسىنا تۋرا كەلەتىن بايلىعى جاعىنان ەڭ باي (ەۆروپا ساناق مەكەمەسىنىڭ 2013 - جىلى جاريالاعان مالىمەتى بويىنشا) مەملەكەت سانالادى، سونداي - اق اپتالىق ورتاشا قىزمەت ۋاقىتى ەڭ قىسقا (33 ساعات عانا)، قونىستانۋعا ەڭ جايلى مەملەكەت ەسەپتەلەدى.
«از ىستەپ، كوپ اقشا تابۋدىڭ» اۋىلى الىستا ەمەس. ايتكەنمەن، ادامزات پەن جاساندى زەردەنىڭ شىنداپ بەلدەسۋى ءدال سول اقشا كوپ، قول بوس جاعداي جارىققا شىققان سوڭ عانا رەسمي باستالۋى مۇمكىن.
(«جۇڭگو عىلىم − تەحنيكا گازەتىنەن»)
كەلۋ قاينارى: شينجياڭ گازەتى
جاۋاپتى رەداكتورى : مانەپ ەربول ۇلى
وقىرمان نازارىنا
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
