شاڭحاي سەلبەستىك ۇيىمىنا مۇشە ەلدەر مەملەكەت باسشىلارى القالار كەڭەسىنىڭ 24 - رەتكى ماجىلىسىنە قاتىناسۋ ءارى قازاقستاندا، تاجىكستاندا مەملەكەتتىك ساپاردا بولۋ ءۇشىن بەيجيڭنەن اتتاندى

سول جەر ۋاقىتى 7 - ايدىڭ 2 - كۇنى تۇستە مەملەكەت ءتوراعاسى شي جينپيڭ ارناۋلى ۇشاقپەن استاناعا باردى، الدا شاڭحاي سەلبەستىك ۇيىمىنا مۇشە ەلدەر مەملەكەت باسشىلارى القالار كەڭەسىنىڭ 24 - رەتكى ماجىلىسىنە قاتىناسادى، قازاقستان رەسپۋبليكاسىنىڭ زۇڭتۇڭى توقايەۆتىڭ ۇسىنىسىمەن قازاقستاندا مەملەكەتتىك ساپاردا بولادى. توقايەۆ اۋەجايدا شي جينپيڭگە ارناپ دابىرالى دا سالتاناتتى قوناق قابىلداۋ سالتىن وتكىزدى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

«حالىق گازەتى»، 7 - ايدىڭ 2 - كۇنى، استانا (تىلشىلەر ۋاڭ جوۋ، لي چياڭ). سول جەر ۋاقىتى 7 - ايدىڭ 2 - كۇنى تۇستە مەملەكەت ءتوراعاسى شي جينپيڭ ارناۋلى ۇشاقپەن استاناعا باردى، الدا شاڭحاي سەلبەستىك ۇيىمىنا مۇشە ەلدەر مەملەكەت باسشىلارى القالار كەڭەسىنىڭ 24 - رەتكى ماجىلىسىنە قاتىناسادى، قازاقستان رەسپۋبليكاسىنىڭ زۇڭتۇڭى توقايەۆتىڭ ۇسىنىسىمەن قازاقستاندا مەملەكەتتىك ساپاردا بولادى.

شي جينپيڭ وتىرعان ارناۋلى ۇشاق قازاقستان اۋە كەڭىستىگىنە كىرگەننەن كەيىن قازاقستان اۋە ارمياسىنىڭ 3 سوعىس ۇشاعى كەڭىستىككە كوتەرىلىپ قورعادى.

ارناۋلى ۇشاق استانا نازاربايەۆ حالىقارالىق اۋەجايىنا جەتكەن كەزدە قازاقستان زۇڭتۇڭى توقايەۆ ۇكىمەتتىڭ ءبىرىنشى ورىنباسار زۇڭليى سكليار، ورىنباسار زۇڭلي، قوسىمشا سىرتقى ىستەر مينيسترى مۇرات نۇرتىلەۋ، زۇڭتۇڭنىڭ سىرتقى ىستەر اقىلشىسى ەرجان قازىحان، استانا قالاسىنىڭ باستىعى جەڭىس قاسىمبەك قاتارلى جوعارى دارەجەلى ءمانساپتىلاردى باستاپ ىستىق ىقىلاسپەن قارسى الدى. ءساندى كيىنگەن قازاقستاندىق بويجەتكەن شي جينپيڭگە گۇل ۇسىندى.

توقايەۆ اۋەجايدا شي جينپيڭگە ارناپ دابىرالى دا سالتاناتتى قوناق قابىلداۋ سالتىن وتكىزدى. 100 دەن استام قۇرمەت قاراۋىلى ايبىندى بەينەگە ەنىپ، اسكەري وركەستر قوناقتاردى قارسى الۋ مۋزىكاسىن جانە قوناقتاردى قارسى الۋ سىرنايىن ورىندادى. 100 گە جۋىق قازاقستاندىق بالا جۇڭگو مەن قازاقستاننىڭ مەملەكەت تۋىن بۇلعاپ، ”سالەمەتسىز بە“ دەپ الاقايلاپ، شي جينپيڭنىڭ ساپارلاي كەلگەنىن قىزۋ قارسى الدى.

شي جينپيڭ توقايەۆتىڭ سەرىك بولۋىندا قۇرمەت قاراۋىلىن كوزدەن كەشىردى. قازاقستاندىق ون قانشا ءوسپىرىم «وتاندى جىرلايمىز» ءانىن جۇڭگو تىلىندە ورىندادى.

شي جينپيڭ اۋەجايدا جازباشا ءسوز سويلەپ، جۇڭگو ۇكىمەتى مەن حالقى اتىنان دوس قازاقستان حالقىنا شىنايى سالەم جولدادى جانە ىزگى تىلەك ءبىلدىردى.

شي جينپيڭ مىنالاردى اتاپ كورسەتتى: جۇڭگو مەن قازاقستاننىڭ دوستىعى ارىدان باستاۋ الادى. ەكى ەل ديپلوماتيالىق قارىم - قاتىناس ورناتقان 32 جىلدان بەرى جۇڭگو - قازاقستان قارىم - قاتىناسى ءداۋىر وزگەرىسى مەن حالىقارالىق الماعايىپ وزگەرىستەردىڭ سىنىنان ءوتىپ، بىردەن - ءبىر ماڭگىلىك جان - جاقتى ستراتەگيالىق سەرىكتەستىك قارىم - قاتىناس ورناتىپ، كورشى ەلدەر ءبىر جاعادان باس، ءبىر جەڭنەن قول شىعاراتىن، ءوزارا پايدا جەتكىزىپ، تەڭ يگىلىككە كەنەلەتىن، ءوزارا تابىسقا جەتەتىن قارىم - قاتىناستىڭ ۇلگىسىن ورناتتى. 11 جىلدىڭ الدىندا، مەن قازاقستاندا ”جىبەك جولى ەكونوميكالىق بەلدەۋىن“ بىرگە قۇرۋ باستاماسىن تۇڭعىش رەت ورتاعا قويعان ەدىم. بۇل كۇندەرى جۇڭگو مەن قازاقستاننىڭ ”ءبىر بەلدەۋ، ءبىر جولدى“ بىرگە قۇرۋى سۇبەلى تابىستارعا قول جەتكىزدى. مەن توقايەۆ زۇڭتۇڭمەن جۇڭگو - قازاقستان قارىم - قاتىناسى، سونداي - اق ورتاق كوڭىل ءبولىپ وتىرعان حالىقارالىق جانە وڭىرلىك ماسەلەلەر جونىندە ىشكەرىلەي پىكىر اۋىستىرىپ، جۇڭگو مەن قازاقستاننىڭ باياندى، جان - جاقتى ستراتەگيالىق سەرىكتەستىك قارىم - قاتىناسىنىڭ دامۋى ءۇشىن جاڭا جوبا ازىرلەپ، جاڭا ورنالاستىرۋ جاساۋدى كۇتەمىن. مەن دە شاڭحاي سەلبەستىك ۇيىمىنىڭ استانا باسشىلار باس قوسۋىنا قاتىناسىپ، ءار جاقپەن بولاشاقتى تىلگە تيەك ەتىپ، سەلبەستىك ۇلى جوسپارىن بىرگە اقىلداسىپ، وسى ماڭىزدى كوپ جاقتى مەحانيزمنىڭ جاڭا، اناعۇرلىم زور دامۋدى جۇزەگە اسىرۋىن ىلگەرىلەتۋدى كۇتەمىن.

ساي چي، ۋاڭ ي قاتارلى ساپارلاستارى وسى ۇشاقپەن بىرگە باردى.

جۇڭگونىڭ قازاقستانداعى باس ەلشىسى جاڭ شياۋ دا اۋەجايعا بارىپ قارسى الدى.

شي جينپيڭ اۋەجايدان قوناقجايعا بارار جولىندا جەرگىلىكتى ورىنداعى جۇڭگو قارجىلاندىرعان كاسىپورىنداردىڭ ۋاكىلدەرى جولدىڭ ەكى جاعىندا كۇتىپ تۇرىپ، جۇڭگو مەن قازاقستاننىڭ مەملەكەت تۋىن بۇلعاپ، ”ءتوراعا شي جينپيڭنىڭ قازاقستانعا ساپارلاي كەلگەنىن قىزۋ قارسى الامىز“ دەگەن قىزىل كەرمە تۋدى بيىك ۇستاپ، ءتوراعا شي جينپيڭنىڭ ساپارلاي كەلگەنىن قىزۋ قارسى الدى.

«حالىق گازەتى»، 7 - ايدىڭ 2 – كۇنى، بەيجيڭ. مەملەكەت ءتوراعاسى شي جينپيڭ 7 - ايدىڭ 2 - كۇنى تۇستەن بۇرىن ارناۋلى ۇشاقپەن بەيجيڭنەن اتتاندى، الدا استاناعا بارىپ شاڭحاي سەلبەستىك ۇيىمىنا مۇشە ەلدەر مەملەكەت باسشىلارى القالار كەڭەسىنىڭ 24 - رەتكى ماجىلىسىنە قاتىناسادى، قازاقستان رەسپۋبليكاسىنىڭ زۇڭتۇڭى توقايەۆتىڭ، تاجىكستان رەسپۋبليكاسىنىڭ زۇڭتۇڭى راحموننىڭ ۇسىنىسىمەن ەكى ەلدە مەملەكەتتىك ساپاردا بولادى.

شي جينپيڭگە سەرىك بولىپ ساپارعا اتتانعانداردان جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسە مەڭگەرمەسىنىڭ مەڭگەرۋشىسى ساي چي، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، سىرتقى ىستەر مينيسترى ۋاڭ ي قاتارلىلار بار.

   كەلۋ قاينارى: حالىق تورابى