جۇڭگو - قازاقستان قارىم - قاتىناسىنىڭ جاڭا داستانىن ءبىر نيەت، ءبىر تىلەكپەن جازا بەرەيىك

«حالىق گازەتى»، 7 - ايدىڭ 2 – كۇنى، استانا. 7 – ايدىڭ 2 – كۇنى، استاناعا بارىپ قازاقستاندا مەملەكەتتىك ساپاردا بولۋ قارساڭىندا، مەملەكەت ءتوراعاسى شي جينپيڭ «قازاقستان پراۆدا گازەتىندە»، قازاقستان حالىقارالىق اقپارات اگەنتتىگىندە «جۇڭگو - قازاقستان قارىم - قاتىناسىنىڭ جاڭا داستانىن ءبىر نيەت، ءبىر تىلەكپەن جازا بەرەيىك» دەگەن تاقىرىپتا اۆتورلى ماقالا جاريالادى. ماقالانىڭ تولىق مازمۇنى تومەندەگىدەي:

جۇڭگو - قازاقستان قارىم - قاتىناسىنىڭ جاڭا داستانىن ءبىر نيەت، ءبىر تىلەكپەن جازا بەرەيىك

جۇڭحۋا حالىق رەسپۋبليكاسىنىڭ ءتوراعاسى شي جينپيڭ

جاز ايىندا كۇللى تىرشىلىك گۇلدەنىپ، قۇلپىردى. تىرشىلىك تىنىسى جالىن اتقان وسى تاماشا مەزگىلدە توقايەۆ زۇڭتۇڭنىڭ ۇسىنىسىمەن مەن تاياۋدا قازاقستاندا مەملەكەتتىك ساپاردا بولامىن ءارى شاڭحاي سەلبەستىك ۇيىمىنىڭ باسشىلار باس قوسۋىنا قاتىناسامىن. بۇل _ مەنىڭ جۇڭحۋا حالىق رەسپۋبليكاسىنىڭ ءتوراعاسى بولعاننان بەرى وسى ىرىستى جەرگە 5 - رەت ساپارلاي كەلۋىم. قازاقستاننىڭ شۇعىلالى مادەنيەتى، كەڭ - بايتاق كوركەم كورىنىسى، قاراپايىم دا مەيماندوس حالقى ماعان تەرەڭ اسەر قالدىردى. مەن وسى رەتكى ساپارىم ارقىلى قازاقستاننىڭ جاڭا دامۋىن، جاڭا وزگەرىسىن تىكەلەي سەزىنىپ، توقايەۆ زۇڭتۇڭمەن ەكى ەلدىڭ سەلبەستىك ۇلى جوسپارىن بىرگە اقىلداسىپ، جۇڭگو - قازاقستان قارىم - قاتىناسى مەن شاڭحاي سەلبەستىك ۇيىمى دامۋىنىڭ جاڭا جوباسىن قول ۇستاسا جاساۋدى ءۇمىت ەتەمىن.

2000 جىلدان استام ۋاقىتتىڭ الدىندا ەلشى جاڭ چيان باتىس وڭىرگە ەلشىلىككە بارىپ، جۇڭگونىڭ ورتا ازيامەن دوستىق بارىس - كەلىسىنىڭ قاقپاسىن اشتى. بايىرعى جىبەك جولى ەكى ۇلى ۇلتتىڭ دوستىق بارىس - كەلىسى مەن اۋىس - كۇيىسىن، ءوزارا ۇلگى الۋىن ىلگەرىلەتتى. 80 نەشە جىلدىڭ الدىندا جۇڭگو مەن قازاقستاننىڭ ەكى كومپوزيتورى شيان شيڭحاي مەن بايقاداموۆ الماتىدا تانىسىپ، ءوزارا ءتۇسىنىسىپ، مەملەكەت شەكاراسىن اتتاعان باۋىرلاستىق سۇيىسپەنشىلىك ورناتتى. 32 جىلدىڭ الدىندا جۇڭگو قازاقستاننىڭ تاۋەلسىزدىگىن ەڭ ەرتە مويىنداعان ەلدەردىڭ بىرىنە اينالىپ، ەكى ەل قارىم - قاتىناسى قايتادان جەلكەن جايدى. جۇڭگو مەن قازاقستاننىڭ دوستىق بارىس - كەلىس تاريحى ەكى ەل قارىم - قاتىناسىنىڭ دامۋى تاريحتىڭ ۇلكەن اۋقىمىنا ۇيلەسەتىنىن، ءداۋىر اعىمىنا ۇيلەسەتىنىن تولىق دالەلدەدى.

11 جىلدىڭ الدىندا مەن قازاقستاندا ”جىبەك جولى ەكونوميكالىق بەلدەۋى“ باستاماسىن العاش رەت العا قويعانىمدا، قازاقستان قوعامىنىڭ ءار سالاسىنىڭ بەلسەندى جاۋابىنا يە بولدىم. ەكى ەلدىڭ ”ءبىر بەلدەۋ، ءبىر جولدى“ بىرگە قۇرۋىنىڭ ايبىندى كارتيناسى وسىلايشا اشىلدى، جۇڭگو - قازاقستان قارىم - قاتىناسىنىڭ دامۋى جاڭا كەزەڭگە ءوتتى.

ءبىز ءبىرىن - ءبىرى قولداپ، قيىندىقتى بىلەك بىرىكتىرە جەڭىپ، ساياسي ءوزارا سەنىمدىلىكتىڭ جاڭا دەڭگەيىن اشتىق. جۇڭگو - قازاقستان قارىم - قاتىناسى جان - جاقتى ستراتەگيالىق سەرىكتەردەن ماڭگىلىك جان - جاقتى ستراتەگيالىق سەرىكتەرگە دەيىنگى سەكىرۋدى جۇزەگە اسىردى ءارى ۇرپاقتان - ۇرپاققا جالعاسقان دوس، وسكەلەڭ ءوزارا سەنىمدى، بەينەت پەن زەينەتتى بىرگە وتكەرەتىن جۇڭگو - قازاقستان تاعدىرلاس ورتاق تۇلعاسىن قۇرۋ ارمانىنا كەلدى. ەكى جاق ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە باستان - اياق ءبىرىن - ءبىرى تاباندىلىقپەن قولداپ، ءبىر - ءبىرىنىڭ مەملەكەت جاعدايىنا قاراي دەربەس تاڭداعان دامۋ جولىنا باستان - اياق قۇرمەت ەتتى. تاسقىن، ىندەت سياقتى اپاتتارعا تاپ بولعاندا ءبىر - بىرىنە كومەكتەسىپ، بار كۇشپەن قارايلاسىپ، باستان - اياق ءبىر - بىرىنە سەنەتىن، سۇيەنەتىن بەرىك تىرەك بولدى. مۇنداي مىزعىماس سەنىم مەن قولداۋ اسا باعالى بولىپ، جۇڭگو مەن قازاقستان سەلبەستىگىنىڭ ەڭ ۇلكەن ساياسي كەپىلىنە اينالدى.

ءبىز ءوزارا پايدا جەتكىزىپ، تەڭ يگىلىككە كەنەلىپ، سەلبەسىپ دامىپ، ناقتى سەلبەستىكتىڭ جاڭا تاماشا ناتيجەسىن جاراتتىق. بىلتىر جۇڭگو مەن قازاقستاننىڭ ەكى جاقتى ساۋدا سوماسى 41 ميلليارد دوللارعا جەتتى. جۇڭگو قازاقستاننىڭ ءبىرىنشى ۇلكەن ساۋدا سەرىگىنە، ءبىرىنشى ۇلكەن ەكسپورت نىسانالى ەلىنە اينالدى. جاڭاتاس جەل ەلەكتر ستانسياسى، تۇرعىسىن سۋ ەلەكتر ستانسياسى، شىمكەنت مۇناي ايىرۋ زاۆودىن وسىزامانداندىرۋ قۇرىلىسى سياقتى كەلەلى ستراتەگيالىق نىساندار ءساتتى سالىنىپ وندىرىسكە قوسىلدى، جۇڭگو - قازاقستان وڭدەلمەگەن مۇناي قۇبىرى، تابيعي گاز قۇبىرى حاۋىپسىز، ورنىقتى ىسكە قوسىلدى، اۋىل شارۋاشىلىق ونىمدەرىنىڭ كەدەننەن تەز وتۋدەگى ”جاسىل ارناسىمەن“ جاپپاي قامتۋ جۇزەگە اسىرىلدى، قازاقستاننىڭ ساپالى، جاسىل اۋىل شارۋاشىلىق ونىمدەرى جۇڭگونىڭ سان مىڭداعان وتباسىلارىنا جەتكىزىلدى. ەكى ەلدىڭ جاڭا ەنەرگيا، قاتىناس نەگىزدىك قۇرىلعىلارى سياقتى سالالارداعى سەلبەستىگىنىڭ كومەسكى كۇشى ۇزدىكسىز جارىققا شىقتى، شي ـ ان قۇرلىق پورتى كەمەجايى سالىنىپ ءبىتىپ، ىسكە قوسىلدى، ”باتىس ەۆروپا – جۇڭگونىڭ باتىس بولەگى تاس جولى“، جۇڭگو ـ ەۆروپا كەزەكشى پويەزى ىركىلىسسىز قاتىناپ، ەكى ەلدىڭ دامۋىنا قۋاتتى قوزعاۋشى قۋات ۇستەدى.

ءبىز ءوزارا كومەكتەسىپ، ءوزارا ۇيرەنىپ، ءوزارا ۇلگى الىپ، گۋمانيتارلىق اۋىس - كۇيىستىڭ جاڭا ورلەۋىن كوتەردىك. جۇڭگو مەن قازاقستان ءوزارا مادەنيەت ورتالىعىن قۇرۋ كەلىسىمىنە ءساتتى قول قويدى، تۇڭعىش رەت بىرلەسىپ تۇسىرىلگەن كينو «كومپوزيتور» فيلمى ءتۇسىرىلدى. جۇڭگو جوعارى مەكتەپتەرىنىڭ قازاقستان بولىمشە مەكتەبى، لۋبان شەبەرحاناسى، جۇڭگو ءداستۇرلى مەديتسينا ورتالىعى سياقتى گۋمانيتارلىق سەلبەستىك نىساندارى جوقتان بار بولىپ، بىرتىندەپ ساپالىلاندى. ۆيزا كەشىرىم ەتۋ ەكى ەل بۇقاراسىنىڭ تۋىس - تۋعاندارداي بارىس - كەلىس جاساۋىن جۇزەگە اسىردى، بىلتىر ەكى ەل ادامدارىنىڭ بارىس - كەلىسى 600 مىڭ ادام - رەتكە تايادى، بيىل الدىڭعى 3 ايدا 200 مىڭ ادام - رەتتەن اسىپ، تاعى دا تىڭ دەڭگەيگە كوتەرىلدى. جەرگىلىكتى ورىنداردىڭ سەلبەستىگى قارىشتاپ دامىپ، دوس ولكە، قالالاردىڭ سانى 26 جۇپقا جەتتى. جۇڭگولىقتاردىڭ قۇرمەتىنە بولەنگەن كوز اۋرۋلار مامانى قابىلبەكوۆ، ”سيرەك قاندى تارتۋ ەتۋدىڭ ەگەيى“ دەگەن تاماشا اتى بار قان بەرۋ ەرىكتىسى رۋسلان، جۇڭگودا كەڭىنەن تانىمال بولعان قازاقستاننىڭ ءانشىسى ديماش قاتارلىلار جاڭا داۋىردەگى جۇڭگو مەن قازاقستاننىڭ دوستىعىنىڭ ەلشىسىنە اينالدى.

ءبىز ىنتىماقتاسا سەلبەسىپ، سىن - سايىسقا بىرگە توتەپ بەرىپ، حالىقارالىق سەلبەستىكتىڭ جاڭا ناقتى ونىمدىلىگىنە قول جەتكىزدىك. جۇڭگو مەن قازاقستاننىڭ حالىقارالىق جانە وڭىرلىك ىستەردە تۇرعىسى قارايلاس، ەكەۋى دە ورتاق، كەشەندى، سەلبەسكەن، باياندى حاۋىپسىزدىك كوزقاراسىن امالياتتا ايگىلەۋدى دارىپتەيدى، ەكەۋى دە دۇنيە ءجۇزى بەيبىتشىلىگىنىڭ قۇرۋشىسى، دۇنيە جۇزىلىك دامۋدىڭ ۇلەس قوسۋشىسى، حالىقارالىق ءتارتىپتىڭ قورعاۋشىسى بولۋعا كۇش سالادى. ءبىز جۇڭگو - ورتا ازيا مەحانيزمىن بىرگە قۇرىپ، بىرلەسكەن مەملەكەتتەر ۇيىمى، شاڭحاي سەلبەستىك ۇيىمى، ازيا ءوزارا سەلبەستىك جانە سەنىمدىلىك شارالارى ءماجىلىسى سياقتى كوپ جاقتى ۇيىمدار جۇلگەسىندە تىعىز سايكەسىپ جانە سەلبەسىپ، ءوزارا العا قويعان سىندارلى حالىقارالىق سەلبەستىك باستاماسىن بەلسەنە قولداپ، ەكى ەلدىڭ ورتاق ستراتەگياسىن، حاۋىپسىزدىگىن، دامۋ مۇددەسىن باتىل قورعادىق.

بولاشاققا كوز جىبەرسەك، جۇڭگو مەن قازاقستاننىڭ سەلبەستىگىنىڭ بولاشاعى نۇرلى، ونىڭ ۇستىنە ءىرى ىستەر تىندىرۋعا بولادى. مەن وسى رەتكى ساپارىم ارقىلى توقايەۆ زۇڭتۇڭمەن بىرگە ءداستۇرلى دوستىقتى جالعاستىرىپ، جان - جاقتى سەلبەستىكتى تەرەڭدەتىپ، جۇڭگو - قازاقستان قارىم - قاتىناسىنىڭ كەلەشەگى جونىندە جاڭا جوبا ازىرلەپ، جاڭا ورنالاستىرۋ جاساپ، جۇڭگو مەن قازاقستاننىڭ ماڭگىلىك جالپى بەتتىك ستراتەگيالىق سەرىكتەستىك قارىم - قاتىناسىنىڭ ۇزدىكسىز تىڭ ساتىعا كوتەرىلۋىن ىلگەرىلەتۋدى ءۇمىت ەتەمىن.

ءبىرىنشى، ءوزارا قولدايتىن ساياسي ءداستۇردى بەكەمدەۋ كەرەك. ”دوستارىڭمەن سىرلاسساڭ، سوزىڭدە سەنىم بولسىن“. جۇڭگو قازاقستانمەن ۇزدىكسىز ءبىر - بىرىنە ادال مامىلە جاساپ، سەنىم ارقىلى قارىم - قاتىناس جاساپ، ساياسي ءوزارا سەنىمدىلىكتى ۇزدىكسىز بەكەمدەپ، ستراتەگيالىق تىلدەسۋدى كۇشەيتىپ، ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءبىرىن - ءبىرى باتىل قولدايدى. جۇڭگو جاق قازاقستان جاقتىڭ مەملەكەتتىڭ تاۋەلسىزدىگىن، يەلىك ۇقىعىن، تەرريتوريا تۇتاستىعىن قورعاۋىن بۇرىنعىداي قولدايدى، قازاقستان جاقتىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن قولدايدى، قازاقستان جاقتىڭ مەملەكەتتىڭ دامۋىن، گۇلدەنۋىن كوزدەي وتىرىپ قولدانعان ءتۇرلى ىشكى - سىرتقى ساياساتتارىن قولدايدى، ءارقانداي سىرتقى كۇشتىڭ قازاقستاننىڭ ىشكى ىسىنە كيلىگۋىنە قارسى تۇرادى. ءبىز ءوزارا قۇرمەت ەتۋ، تاتۋ كورشىلىك، دوستىق، تار جول، تايعاق كەشۋدەن بىرگە ءوتۋ، ءوزارا پايدا جەتكىزىپ، تەڭ يگىلىككە كەنەلۋ سىندى 4 سەلبەستىك اسىلىنا ويداعىداي مۇراگەرلىك ەتىپ، ونى ويداعىداي ساۋلەلەندىرىپ، جۇڭگو - قازاقستان قارىم - قاتىناسىنىڭ ورنىقتى، باياندى دامۋىن ىلگەرىلەتۋىمىز كەرەك.

ەكىنشى، ءوزارا پايدا جەتكىزىپ، تەڭ يگىلىككە كەنەلەتىن سەلبەستىك اسىلىنان ويداعىداي پايدالانۋ كەرەك. جۇڭگو مەن قازاقستاننىڭ مول بايلىعى بار، ونىڭ ۇستىنە دارالىعى بار، ەكونوميكالىق كاسىپتەرى وزىندىك ەرەكشەلىككە يە ، ءبىرىن - ءبىرى تولىقتاۋ ابزالدىعى كورنەكتى، سەلبەستىك كومەسكى كۇشى وراسان زور. جۇڭگو جاق ”ءبىر بەلدەۋ، ءبىر جولدى“ بىرگە قۇرۋ باستاماسىن ”ءادىل قازاقستان“ ەكونوميكالىق ساياساتىمەن ىشكەرىلەي ۇشتاستىرۋدى جەدەل ىلگەرىلەتىپ، قازاقستانعا جۇڭگونىڭ ەرەن كولەمدى بازارىن اناعۇرلىم اشىپ، جۇڭگونىڭ دامۋ ورايىنان بىرگە يگىلىكتەندىرۋدى قالايدى. ءبىز ەكونوميكا - ساۋدا، ءوندىرىس قۋاتى، قارجى قوسۋ، ەنەرگيا، كەن ونىمدەرى، اۋىل شارۋاشىلىعى سياقتى ءداستۇرلى سالالارداعى سەلبەستىكتى تەرەڭدەتىپ، شەكارا وتكەلدەرىنىڭ كەدەننەن ءوتۋ ونىمدىلىگىن جوعارىلاتىپ، جۇڭگو - ەۆروپا كەزەكشى پويەزدەرىنىڭ جوعارى ساپالى اينالىمىن جانە كاسپي تەڭىزى حالىقارالىق تاسىمال ءدالىزى قۇرىلىسىن ىلگەرىلەتىپ، ستەرەولدى، كوپ نەگىزدى، جوعارى ءونىمدى ۇلاستىرۋ - تۇتاستىرۋ جاعدايىن كەمەلدەندىرۋىمىز كەرەك. جاڭا ەنەرگيا، سيفرلى ەكونوميكا، جاساندى زەردە، شەكارا اتتاعان ەلەكتروندىق ساۋدا، اۆياتسيا - عارىش سياقتى جوعارى تەحنيكا سالاسىنداعى سەلبەستىك كومەسكى كۇشىن تولىق اشىپ، جوعارى قوسىمشا قۇندى كاسىپ تىزبەگى مەن قامداۋ تىزبەگىن قالىپتاستىرىپ، ەكى ەلدىڭ سەلبەستىگىنە اناعۇرلىم كوپ جاڭا قوزعاۋشى كۇش ۇستەۋ كەرەك.

ءۇشىنشى، دوستىقتىڭ حالىق رايى نەگىزىن بەكەمدەۋ كەرەك. جۇڭگو مەن قازاقستاننىڭ دوستىعىن تەرەڭدەتۋ ەكى ەل حالىقتارىنىڭ تىلەگى، حالىق ارمانى. ءبىز وسى دوستىق سۇيىسپەنشىلىكتى ويداعىداي جالعاستىرىپ، باي مازمۇندى، الۋان ءتۇرلى گۋمانيتارلىق اۋىس - كۇيىس قيمىلدارىن ورىستەتىپ، ەكى ەل حالىقتارىنىڭ ءبىرىن - ءبىرى ءتۇسىنۋىن، ەتەنە بولۋىن اناعۇرلىم جەبەۋىمىز كەرەك. لۋبان شەبەرحاناسىن، كۇڭزى شۋەيۋانىن، باتىس سولتۇستىك ونەركاسىپ داشۋەسىنىڭ قازاقستان بولىمشە مەكتەبىن بىرگە ويداعىداي باسقارىپ، جۇڭگو - قازاقستان دوستىق ىستەرىنىڭ اناعۇرلىم كوپ ءىزباسارلارىن تاربيەلەۋ كەرەك. ەكى ەلدىڭ جوعارى مەكتەپتەرىنىڭ، اقىل - پاراسات قويمالارىنىڭ، عىلمي زەرتتەۋ قۇرىلىمدارىنىڭ بىرلەسىپ مەكتەپ اشۋىن، سەلبەسىپ عىلمي زەرتتەۋ جۇرگىزۋىن قارسى الامىز، ەكى ەلدىڭ قوعامىنداعى ءار سالانىڭ اۋىس - كۇيىستى ارتتىرۋىن قولدايمىز، ەكى ەلدىڭ ءتىپتى دە كوپ جەرگىلىكتى ولكە، قالالارىن جاقسى سەلبەسۋگە شابىتتاندىرامىز، وقۋ - اعارتۋ، ساياحات، ارحەولوگيا، كوركەمونەر، اقپارات قۇرالدارى سياقتى سالالارداعى سەلبەستىكتى ۇزدىكسىز تەرەڭدەتىپ، گۋمانيتارلىق اۋىس - كۇيىستىڭ تەرەڭدىگى مەن كەڭدىگىن كەڭەيتەمىز.

ءتورتىنشى، جەدەل قۇبىلعان 100 جىلدىق وزگەرىسكە بەيىمدەلۋ كەرەك. دۇنيە ءجۇزىنىڭ جاعدايى اۋمالى - توكپەلى بولۋدا، جۇڭگو مەن قازاقستاننىڭ جان - جاقتى ءوزارا ءتيىمدى سەلبەستىگى جاڭا قاتەرگە، جاڭا سىن - سايىسقا ءدوپ كەلۋمەن بىرگە، جاڭا وراي، جاڭا كەڭىستىكتى دە قارسى الدى. جۇڭگولىقتار حاۋىپ - قاتەر مەن وراي قاشان دا ءبىر - بىرىنە سۇيەنىپ ءومىر سۇرەدى، حاۋىپ - قاتەر ىشىندە وراي بولادى، حاۋىپ - قاتەردى ورايعا اينالدىرۋعا بولادى دەپ قارايدى. جۇڭگو جاق قازاقستان جاقپەن بىرگە دۇنيە ءجۇزىنىڭ وزگەرىسىنە، ءداۋىردىڭ وزگەرىسىنە، تاريحتىڭ وزگەرىسىنە قول ۇستاسا توتەپ بەرىپ، داعدارىس بارىسىندا جاڭا وراي جەتىلدىرىپ، وزگەرىس بارىسىندا جاڭا جاعداي اشىپ، بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى جانە حالىقارالىق زاڭدى نەگىز ەتكەن حالىقارالىق ءتارتىپتى باتىل قورعاپ، ناعىز كوپ جاقتىلىقتى امالياتتا ايگىلەپ، زورەكەرلىككە، وكتەمدىك ساياسيعا، توپقا ءبولىنىپ قارسىلاسۋعا قارسى تۇرىپ، دۇنيە ءجۇزىنىڭ بارابار، ءتارتىپتى كوپ ۇيەكتەنۋى مەن قامتىمدى ەكونوميكانىڭ جاھاندانۋىن ىلگەرىلەتىپ، دۇنيە ءجۇزىنىڭ بەيبىتشىلىگى مەن ورنىقتىلىعىن قورعاۋعا ءتىپتى دە كوپ وڭ ەنەرگيا جانە ورنىقتىلىق ۇستەپ، ءتىپتى دە كوپ ۇلەس قوسۋعا پەيىل.

مەنىڭ بۇل جولعى قازاقستانداعى تاعى ءبىر ماڭىزدى كۇنتارتىبىم شاڭحاي سەلبەستىك ۇيىمىنىڭ باسشىلار باس قوسۋىنا قاتىناسۋ بولماق. قازاقستان شاڭحاي سەلبەستىك ۇيىمىنا كەزەكتى ءتوراعا ەل مىندەتىن اتقارعاننان بەرى قىرۋار ءونىمدى قىزمەتتەر ىستەپ، وسى ۇيىمنىڭ ىقپالىن كەڭەيتتى، جۇڭگو مۇنى جوعارى باعالايدى. ءار جاقتىڭ بىرگە قۇلشىنۋىندا، استانا باس قوسۋىنىڭ، ءسوز جوق، تولىق تابىستى بولاتىنىنا، شاڭحاي سەلبەستىك ۇيىمىنىڭ ۇلى شاڭىراعىن ونان ارى ۇيىستىرىپ، ۇيىمدىق سەلبەستىكتىڭ جاڭا جاعدايىن اشاتىنىنا سەنەمىن.

جۇڭگودا ەجەلدەن بەرى ”جوعارىدان تومەنگە دەيىن ءبىر نيەتتە بولعاندار جەڭىسكە جەتەدى، قيىندىقتى بىرگە ەڭسەرگەندەر كوركەيەدى“ دەگەن ءسوز بار. قازاق ۇلتىندا ”ءبىر جاعادان باس، ءبىر جەڭنەن قول شىعارۋ“ دەگەن ءسوز بار.

جۇڭگو قازاقستانمەن بىرگە مەملەكەتتىڭ گۇلدەنىپ - كوركەيۋىن جۇزەگە اسىرۋ ساپارىندا قول ۇستاسا قۇلشىنىپ، تىزە قوسا العا باسىپ، ەكى ەل سەلبەستىگىنىڭ جاڭا جوباسىن جاساپ، جۇڭگو - قازاقستان دوستىعىنىڭ تىڭ داستانىن جازۋدى قالايدى.

كەلۋ قاينارى: حالىق تورابى