شي جينپيڭ تاجىكستان زۇڭتۇڭى راحمونمەن بىرگە جۇڭگو جاقتىڭ كومەگىمەن سالىنعان تاجىكستان پارلامەنت عيماراتىنىڭ جانە ۇكىمەت عيماراتىنىڭ سالىنىپ بولۋ سالتىنا قاتىناستى

شينحۋا اگەنتتىگىنىڭ 7 ـ ايدىڭ 5 ـ كۇنى دۋشانبەدەن بەرگەن حابارى (تىلشىلەر سۇن ي، چىن شان). جەرگىلىكتى ۋاقىت 7 ـ ايدىڭ 5 ـ كۇنى تۇستەن كەيىن مەملەكەت ءتوراعاسى شي جينپيڭ تاجىكستان زۇڭتۇڭى راحمونمەن بىرگە دۋشانبەدە جۇڭگو جاقتىڭ كومەگىمەن سالىنعان تاجىكستان پارلامەنت عيماراتىنىڭ جانە ۇكىمەت عيماراتىنىڭ سالىنىپ بولۋ سالتىنا قاتىناستى.

جاڭا عانا سالىنىپ بولعان تاجىكستان پارلامەنت عيماراتى ايبىندى دا تىنىستى، ساۋلەتتى دە كوركەم بەينەگە ەندى. راحمون پارلامەنت عيماراتى الدىندا شي جينپيڭنىڭ كەلگەنىن ىستىق ىقىلاسپەن قارسى الدى.

راحمون شي جينپيڭگە سەرىك بولىپ پارلامەنت عيماراتىنا بىرگە كىردى. ەكى ەلدىڭ مەملەكەت باسشىلارى جۇڭگو جاقتىڭ كومەگىمەن سالىنعان تاجىكستان پارلامەنت عيماراتى مەن ۇكىمەت عيماراتى نىسانىنىڭ كورمە تاقتاسىن بىرگە ەكسكۋرسيالاپ، ەكى عيماراتتىڭ ماڭدايشالىعىن بىرگە اشتى.

قىزۋ قول شاپالاق ءۇنى ىشىندە شي جينپيڭ ارناۋ ءسوز سويلەدى.

شي جينپيڭ تاجىكستان پارلامەنت عيماراتىنىڭ جانە ۇكىمەت عيماراتىنىڭ تابىسپەن سالىنىپ بولعانىن قىزۋ قۇتتىقتايتىنىن ءبىلدىردى، ەكى ەل قۇرىلىسشىلارىنىڭ ءبىر نيەتپەن سەلبەسىپ، قامال الىپ، قيىنشىلىقتاردى جەڭىپ، ءتۇرلى مىندەتتەردى ساپاسىنا، سانىنا كەپىلدىك ەتە وتىرىپ ورىنداپ، ەكى عيماراتتىڭ ۋاعىندا سالىنىپ بولۋىنا شىنايى كەپىلدىك ەتكەنىنە وسكەلەڭ قۇرمەت بىلدىرەتىنىن جانە شىنايى العىس ايتاتىنىن ءبىلدىردى.

شي جينپيڭ بىلاي دەپ باسا دارىپتەدى: جۇڭگو مەن تاجىكستان ەكى ەل _ تاۋ ـ وزەنى تۇتاسقان دوس كورشىلەر. جۋىق جىلداردان بەرى ەكى ەل دامۋ ستراتەگياسىن ءتۇيىلىستىرۋدى كۇشەيتىپ، جان ـ جاقتى سەلبەستىكتى ىلگەرىلەتىپ، ”ءبىر بەلدەۋ، ءبىر جولدى“ بىرگە قۇرۋ جۇلگەسىندە ءبىر قىدىرۋ ستراتەگيالىق ۇلكەن نىسانداردى اتقارىپ، تاجىكستاننىڭ مەملەكەتتى دامىتۋىنا، گۇلدەندىرۋىنە دەم بەردى، سونداي ـ اق ءارقايسى سالاداعى حالىق بۇقاراسىنا ەكى ەلدىڭ دوستىق سەلبەستىگى اكەلگەن قۇت ـ ىرىستى سەزىندىردى. بۇگىن ەكى عيمارات رەسمي سالىنىپ بولىپ، تاجىكستان پارلامەنتى مەن ۇكىمەتىنىڭ قىزمەت ىستەۋ شارت ـ جاعدايىن بارىنشا جاقسارتىپ، جۇڭگو _ تاجىكستان دوستىق سەلبەستىگىنىڭ جاڭا جەر بەلگىسىنە اينالدى. جۇڭگو جاق تاجىكستان جاقپەن بىرگە، بىرگە كەڭەسۋ، بىرگە قۇرۋ، بىرگە يگىلىكتەنۋ پرينسيبىن ۇزدىكسىز ۇستانىپ، تاجىكستاندا ءتىپتى دە كوپ سەلبەستىك نىساندارىن اتقارىپ، تاجىكستان ەكونوميكاسىنىڭ، قوعامىنىڭ دامۋىنا اناعۇرلىم زور ۇلەس قوسۋدى قالايدى.

راحمون مىنالاردى ءبىلدىردى: 5 جىلدىڭ الدىندا ءتوراعا شي جينپيڭ تاجىكستاندا مەملەكەتتىك ساپاردا بولعان مەزگىلدە، مەن جانە ءتوراعا شي جينپيڭ بىرگە ەكى عيماراتتىڭ مودەلىن اشۋ سالتىنا قاتىناسقان بولاتىنبىز. بۇگىن مەن ءتوراعا شي جينپيڭمەن بىرگە ەكى عيماراتتىڭ سالىنىپ بولۋ سالتىنا قاتىناسقاندىعىما وتە قۋانىشتىمىن. بۇل ءتوراعا شي جينپيڭنىڭ تاجىكستانعا تۇڭعىش مەملەكەتتىك ساپارىنىڭ 10 جىلدىعى ساتىندە تاجىكستان حالقىنا سيلاعان ەڭ قۇندى تارتۋى. ەكى عيمارات تاجىكستاننىڭ ارحيتەكتۋرالىق ستيلى مەن جۇڭگونىڭ قۇرىلىس تەحنيكاسىن قاپىسىز توعىستىرعان، بۇل تاجىكستان مەن جۇڭگونىڭ تەرەڭ دوستىعىنىڭ تاعى ءبىر كۋاسى، ءسوز جوق، تاجىكستان _ جۇڭگو قارىم ـ قاتىناسىنىڭ تاريحىنا جازىلىپ، تاجىكستان حالقى جاعىنان ۇرپاقتار بويى جىرلانادى. مەن تاجىكستان حالقى اتىنان جۇڭگونىڭ قالتقىسىز كومەگىنە جانە جۇڭگو قۇرىلىسشىلارىنىڭ قاجىرلى بوداۋىنا شىن جۇرەكتەن العىس ايتامىن.

تاجىكستان پارلامەنتى جوعارى پالاتاسىنىڭ باستىعى رۇستەم العىس ايتۋ ءسوزىن سويلەپ، مىنالاردى ءبىلدىردى: جۇڭگو ۇكىمەتى مەن حالقىنىڭ ۇزاق ۋاقىتتان بەرى تاجىكستاننىڭ ءتۇرلى ىستەرىنە قىمباتتى قولداۋ كورسەتىپ جاتقاندىعىنا العىس ايتامىز. جاڭادان سالىنىپ بولعان عيمارات تاجىكستان پارلامەنتى مەن ۇكىمەتىنىڭ قىزمەت ىستەۋ شارت ـ جاعدايىن بارىنشا جاقسارتىپ قانا قويماي، دۋشانبەگە جاڭا باۋراۋ قۋاتى مەن ومىرشەڭدىك قوسىپ، تاجىكستان مەن جۇڭگونىڭ مىزعىماس تەرەڭ دوستىعىنىڭ جاڭا سيمۆولىنا اينالدى. تاجىكستان جاق تاجىكستان _ جۇڭگو جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناسىن تاباندىلىقپەن ىلگەرىلەتەدى، ەكى ەل قارىم ـ قاتىناسىنىڭ نۇرلى بولاشاعىنا كامىل سەنەدى.

سالت كەزىندە تۇتاس الاڭدا سان رەت قىزۋ قول شاپالاق ءۇنى كوتەرىلىپ، كوپكە دەيىن تولاستامادى.

ساي چي، ۋاڭ ي قاتارلىلار جوعارىداعى قيمىلدارعا قاتىناستى.

جۇڭگو جاقتىڭ كومەگىمەن سالىنعان تاجىكستان پارلامەنت عيماراتى مەن ۇكىمەت عيماراتى نىسانى _ جۇڭگونىڭ شەتەلگە كومەكتەسۋ نىسانى بارىسىندا تۇڭعىش رەت بىرلەسىپ جوبالاۋ ۇلگىسىن اتقارۋى، تاجىكستان ارحيتەكتۋرا ستيلى مەن جۇڭگو قۇرىلىس تەحنيكاسىن جاندى ۇشتاستىرۋدىڭ ۇلگىسى، سونداي ـ اق ەكى ەلدىڭ ”ءبىر بەلدەۋ، ءبىر جولدى“ بىرگە قۇرۋىنداعى ماڭىزدى جەتىستىك.