شينجياڭدىق 5 سپورتشى پاريج وليمپيادا سپورت جارىسىنا قاتىناسۋ بەلەتىن الدى

تاياۋدا ءتىلشىنىڭ شينجياڭ ۇيعۇر اۆتونوميالى رايوندىق دەنە تاربيە مەكەمەسىنەن ۇعىسۋىنشا، قازىر شينجياڭنان 5 سپورتشى 2024 – جىلعى پاريج وليمپيادا سپورت جارىسىنا قاتىناسۋ بەلەتىن العان، ولار ەلىمىز ءۇشىن باسەكەگە تۇسەدى.

وسى بەس سپورتشى مىنالار: بوكس 80 كيلوگرامدىق سالماق دارەجەسىنىڭ سپورتشىسى توقتاربەك تاڭاتقان ۇلى؛ ايەلدەر قايراڭ ۆاليبول سپورتشىسى شيا شين - ي، ايەلدەر ساداق اتۋ سپورتشىسى ان چيشۋان، ەرلەر ەركىن كۇرەس 97 كيلوگرامدىق دارەجەسىنىڭ بالۋانى كابيران ابۇشايمان ۇلى؛ باسكەتبول سپورتشىسى ۋ تۇڭتۇڭ (ايەل).

بۇل رەتكى وليمپيادا سپورت جارىسى توقتاربەك تاڭاتقان ۇلى مەن شيا شين – يدىڭ وليمپيادا جارىسىنا ەكىنشى رەت قاتىناسۋى، توكيو وليمپيادا سپورت جارىسىندا ەكەۋى دە جاقسى بەينە كورسەتكەن، 2023 – جىلعى حاڭجوۋ ازيا سپورت جارىسىندا ءوز تۇرلەرىنىڭ التىن مەدالىن قانجىعالاپ، پاريج وليمپيادا سپورت جارىسىنا تىكە جولداما العان.

ان چيشۋان مەن كابيران ابۇشايمان ۇلىنىڭ وليمپيادا سپورت جارىسىنا تۇڭعىش رەت قاتىناسۋى بولىپ، ان چيشۋان شينجياڭ ايەلدەرى كومانداسىنان ساداق اتۋ ءتۇرى بويىنشا وليمپيادا سپورت جارىسىنا قاتىناسقان تۇڭعىش ادامعا اينالدى، كابيران ابۇشايمان ۇلى شينجياڭداعى ەرلەر ەركىن كۇرەس ءتۇرى بويىنشا وليمپيادا جارىسىنا قاتىناسقان ءبىرىنشى ادامعا اينالدى. ۋ تۇڭتۇڭ شينجياڭ تيانشان ايەلدەر باسكەتبول كلوبىنىڭ سپورتشىسى، 1994 – جىلى تۋعان، جۇڭگو ايەلدەر باسكەتبول كومانداسىنىڭ سپورتشىسى، الاڭدا ارتقى شەپتە قورعانىستا وينايدى، بيىل جازعى جاتتىعۋدا بولىپ، جاڭا عانا شينجياڭ ايەلدەر باسكەتبول كومانداسىنا كىرگەن.

ۇعىسۋعا قاراعاندا، پاريج وليمپيادا سپورت جارىسى 7 – ايدىڭ 26 – كۇنى باستالادى، قازىر جۇڭگو ۋاكىلدەر ۇيىرمەسىنىڭ مۇشەلەرى ىلگەرىندى – كەيىندى پاريج وليمپيادا سپورت جارىسىنىڭ سالتانات كيىمى مەن سيلىق تاراتۋ كيىمىن تاپسىرىپ الۋدا.

توقتاربەك تاڭاتقان ۇلى ءوزىنىڭ جەكەلىك قوعامدىق قارىم – قاتىناس تەكشەسىندە 2024 – جىلعى پاريج وليمپيادا سپورت جارىسىنا قاتىناساتىن جۇڭگو ۋاكىلدەر ۇيىرمەسىنىڭ سالتانات كيىمىن كيگەن سۋرەتىن شىعاردى، ونىڭ قىزىل ءتۇستى قۇپ جاراسقان كيىمىن كورگەن توراپتاستار ”بۇل كيىم قۇپ جاراسىپتى“ دەپ ءسوز قالدىردى، توقتاربەك تاڭاتقان ۇلى توراپتاستارعا جاۋاپ قايتارىپ، ”وتانعا داڭق اپەرۋگە بارىنشا قۇلشىنامىن!“ دەدى.

كەلۋ قاينارى: حالىق تورابى