شي جينپيڭ يتاليانىڭ زۇڭليى مەلونيمەن كەزدەستى

7 - ايدىڭ 29 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە جۇڭگوعا رەسمي ساپارمەن كەلگەن يتاليانىڭ زۇڭليى مەلونيمەن كەزدەستى.

سۋرەتتى شينحۋا اگەنتتىگىنىڭ ءتىلشىسى ديڭ حايتاۋ تۇسىرگەن

شينحۋا اگەنتتىگى، 7 ـ ايدىڭ 29 ـ كۇنى، بەيجيڭ (ءتىلشى سۇن ي). 7 ـ ايدىڭ 29 ـ كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە جۇڭگوعا رەسمي ساپارمەن كەلگەن يتاليانىڭ زۇڭليى مەلونيمەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن يتاليا بايىرعى جىبەك جولىنىڭ ەكى باسىنا ورنالاسقان، ەكى ەلدىڭ تاريحى ۇزاق دوستىق بارىس ـ كەلىسى كەزىندە شىعىس پەن باتىس وركەنيەتتەرىنىڭ اۋىس ـ كۇيىسىنە، ءوزارا ۇلگى الۋىنا جانە ادامزات قوعامىنىڭ دامۋىنا، العا باسۋىنا ماڭىزدى ۇلەس قوسقان، بەيبىت بولۋ جانە سەلبەسۋ، اشىق جانە سيىسىمدى بولۋ، ءوزارا ۇيرەنىپ، ءوزارا ۇلگى الۋ، ءوزارا تيىمدىلىك جاساپ، تەڭ يگىلىككە كەنەلۋ سىندى جىبەك جولى رۋحى − جۇڭگو مەن يتاليا ەلدەرىنىڭ ورتاق بايلىعى. قازىر دۇنيە جۇزىندەگى 100 جىلدىق وزگەرىس جەدەل قۇبىلۋدا، ءار ەل توعىسسا، ىنتىماقتاسسا، بىرگە ىلگەرىلەيدى، تۇيىقتالسا، بولشەكتەنسە، ءارقايسىسى كەرى شەگىنەدى. جۇڭگو مەن يتاليا جىبەك جولى رۋحىن ۇستانىپ جانە ساۋلەلەندىرىپ، ەكى جاقتى قارىم -قاتىناسقا تاريحي، ستراتەگيالىق جانە ۇزاق بولاشاقتىق تۇرعىدان مامىلە جاساپ جانە ونى دامىتىپ، جۇڭگو ـ يتاليا قارىم - قاتىناسىنىڭ ورنىقتى، باياندى دامۋىن ىلگەرىلەتۋى كەرەك.

شي جينپيڭ بىلاي دەپ باسا دارىپتەدى: جۇڭگو - يتاليا قارىم - قاتىناسىنىڭ اقاۋسىز، ورنىقتى دامۋى ەكى ەلدىڭ جانە ەكى ەل حالىقتارىنىڭ ورتاق مۇددەسىنە ۇيلەسەدى. قازىر حالىقارالىق جاعدايدا ۇزدىكسىز تەرەڭ وزگەرىستەر تۋىلعانىمەن، جۇڭگونىڭ جۇڭگو ـ يتاليا قارىم - قاتىناسىنا ءمان بەرۋ جانە ونى ويداعىداي دامىتۋ تىلەگى وزگەرگەن جوق، جۇڭگو ـ يتاليا قارىم - قاتىناسىنىڭ سەلبەسىپ تەڭ يگىلىككە كەنەلۋ ءمانى وزگەرگەن جوق، ەكى ەل حالىقتارىنىڭ دوستىق سۇيىسپەنشىلىگى وزگەرگەن جوق. ەكى جاق دوستىق بارىس ـ كەلىس ءداستۇرىن جالعاستىرىپ، ءوزارا ءتۇسىنىسۋى جانە وزدەرى تاڭداعان دامۋ جولىنا قۇرمەت ەتۋى كەرەك. جۇڭگو مەن يتاليا ەكى ەلدىڭ كاسىپ سالاسى ابزالدىقتارىمەن ءبىرىن ـ ءبىرى تولىقتاپ، ءبىر ـ بىرىنە وراي جاراتىپ بەردى، ەكى جاق ءوزارا ەسىك اشۋعا، سەلبەسۋگە تاباندى بولۋى كەرەك. جۇڭگو كوممۋنيستىك پارتياسى 20 ـ كەزەكتى ورتالىق كوميتەتىنىڭ ءۇشىنشى جالپى ءماجىلىسى ەندى عانا جابىلدى، جۇڭگو جوعارى دەڭگەيدەگى سىرتقا ەسىك اشۋدى ۇزدىكسىز ىلگەرىلەتىپ، جۇڭگو ۇلگىسىندەگى وسىزامانداندىرۋعا پارمەندى قوزعاۋشى كۇش قوسادى، سونداي ـ اق يتاليا سياقتى ەلدەرمەن سەلبەستىكتى كەڭەيتۋگە تىڭ وراي اكەلەدى. جۇڭگو جاق ەكونوميكا ـ ساۋدا، قارجى قوسۋ، ونەركاسىپ - جاساۋ، عىلىم ـ تەحنيكادا جاڭالىق اشۋ، ءۇشىنشى جاق بازارى سياقتى ءداستۇرلى سەلبەستىكتەردىڭ ساپالىلانۋىن، دارەجەسىن جوعارىلاتۋدى ىلگەرىلەتىپ، ەلەكترلى اۆتوموبيل، جاساندى زەردە سياقتى جاڭادان گۇلدەنگەن سالالارداعى سەلبەستىكتى تالقىلاۋدى قالايدى. جۇڭگو جاق يتاليا كاسىپورىندارىنىڭ جۇڭگوعا كەلىپ قارجى قوسۋىن قارسى الادى، يتاليانىڭ اناعۇرلىم كوپ ساپالى ونىمدەرىن يمپورت ەتۋدى قالايدى، يتاليا جاقتىڭ دا جۇڭگو كاسىپورىندارىنىڭ يتالياعا بارىپ دامۋىنا ءادىل، جاريالى، حاۋىپسىز، كەمسىتپەيتىن تيجارات ـ ساۋدا ورتاسىن ازىرلەۋىن ءۇمىت ەتەمىن. ەكى جاق وركەنيەتتەردىڭ ءوزارا ۇلگى الۋ جەتىستىكتەرىن قاستەرلەپ، مادەنيەتكە مۇراگەرلىك ەتۋ مەن جاڭالىق اشۋدىڭ قوس باعىتتا ءبىرىن ـ ءبىرى جەبەۋىن ىلگەرىلەتىپ، ەكى ەل حالىقتارىنىڭ ەتەنە بولۋىن جەبەۋى كەرەك. جۇڭگو جاق يتاليا جاقتىڭ 2026 ـ جىلعى قىسقى وليمپيادا سپورت جارىسىن وتكىزۋىن قولدايدى، يتاليا جاقتىڭ جۇڭگو ازاماتتارىنىڭ يتالياعا بارىپ ۆيزا اشتىرۋىنا قولايلى شارالار قولدانۋىن ءۇمىت ەتەمىن.

شي جينپيڭ مىنالاردى باسا دارىپتەدى: ەكونوميكانىڭ جاھاندانۋ داۋىرىندە، دۇنيە جۇزىلىك كاسىپ تىزبەگى مەن قامداۋ تىزبەگىن اشىق ۇستاۋعا، سەلبەسۋگە تاباندى بولعاندا عانا، تەڭ يگىلىككە كەنەلەتىن دامۋعا قول جەتكىزە الامىز. جۇڭگو بەيبىت دامۋ جولىمەن جۇرۋگە تاباندى بولادى، زورەكەرلىككە بوي ۇرمايدى، ءار ەلمەن دامۋ ورايىنان بىرگە يگىلىكتەنۋدى قالايدى. يتاليا جاقتىڭ جۇڭگونىڭ دامۋ ۇستانىمىن ءتۇسىنىپ جانە قولداپ، جۇڭگو مەن ەۆروپانىڭ تىلدەسۋدى، سەلبەستىكتى كۇشەيتۋىن ىلگەرىلەتۋدە، جۇڭگو ـ ەۆروپا قارىم ـ قاتىناسىنىڭ بەلسەندى، ورنىقتى دامۋىن جەبەۋدە سىندارلى رول اتقارۋىن ءۇمىت ەتەمىن.

مەلوني مىنانى ءبىلدىردى: 2022 ـ جىلى 11 ـ ايدا بالي ارالىندا كەزدەسكەننەن كەيىن ۋادە بويىنشا جۇڭگوعا ساپارلاي كەلگەنىمە توتەنشە قۋانىشتامىن. بيىل − يتاليا مەن جۇڭگونىڭ جالپى بەتتىك ستراتەگيالىق سەرىكتەستىك قارىم - قاتىناس ورناتقاندىعىنىڭ 20 جىلدىعى جانە ماركوپولونىڭ قايتىس بولعاندىعىنىڭ 700 جىلدىعى. يتاليا مەن جۇڭگو وركەنيەتتى بايىرعى ەل رەتىندە، باستان ـ اياق ءبىر ـ بىرىنەن ونەگە، ۇلگى الىپ كەلەدى. قازىر حالىقارالىق جاعدايدا تەرەڭ وزگەرىستەر تۋىلۋدا، جۇڭگونىڭ ماڭىزدى ءىرى ەل رەتىندە دۇنيە جۇزىلىك سايىستارعا توتەپ بەرۋ جاعىنداعى رولىنىڭ ورنىن وگەيسىتۋگە بولمايدى. يتاليا جاق جۇڭگونىڭ حالىقارالىق ورنى مەن رولىنا ايرىقشا ءمان بەرەدى، جىبەك جولى رۋحىنا مۇراگەرلىك ەتىپ، جۇڭگومەن اناعۇرلىم تىعىز، اناعۇرلىم جوعارى دەڭگەيدەگى سەرىكتەستىك قارىم - قاتىناستى دامىتىپ، يتاليا مەن جۇڭگونىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ تىڭ پاراعىن اشىپ، دۇنيە ءجۇزىنىڭ بەيبىتشىلىگى مەن العا باسۋىنا تىڭ ۇلەس قوسۋدى قالايدى. يتاليا جاق ءبىر جۇڭگو ساياساتىنا تاباندى بولادى، جۇڭگو جاقپەن تىلدەسۋدى، سەلبەستىكتى كۇشەيتىپ، اناعۇرلىم كوپ كومەسكى كۇشتەردى اشىپ، ەكى ەلدىڭ ەكونوميكا ـ ساۋدا، قارجى قوسۋ، ەلەكترلى اۆتوموبيل، جاساندى زەردە سياقتى سالالارداعى سەلبەستىگىن تەرەڭدەتىپ، گۋمانيتارلىق اۋىس ـ كۇيىستى جيىلەتىپ، اناعۇرلىم كوپ يتاليا ونىمدەرىنىڭ جۇڭگو بازارىنا كىرۋىن ىلگەرىلەتۋدى ءۇمىت ەتەدى. يتاليا جاق قول ۇزۋگە جانە قورعانىمپازدىققا قارسى تۇرادى، ەۆروپا وداعىنىڭ جۇڭگومەن قارىم - قاتىناسىنىڭ تەرەڭدەۋىن، ناقتىلانۋىن ىلگەرىلەتۋدە بەلسەندى رول اتقارۋدى قالايدى.

ەكى جاق «جۇڭحۋا حالىق رەسپۋبليكاسى مەن يتاليا رەسپۋبليكاسىنىڭ جان - جاقتى ستراتەگيالىق سەرىكتەستىك قارىم - قاتىناستى كۇشەيتۋ جونىندەگى ارەكەت جوسپارىن (2024 − 2027 - جىل)» جاريالادى.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى