جۇڭگو كوممۋنيستىك پارتياسى ورتالىق كوميتەتى پارتيا سىرتىنداعى قايراتكەرلەردىڭ اڭگىمە ءماجىلىسىن اشتى

شينحۋا اگەنتتىگى، 7 ـ ايدىڭ 30 ـ كۇنى، بەيجيڭ. 7 ـ ايدىڭ 26 ـ كۇنى جۇڭگو كوممۋنيستىك پارتياسى ورتالىق كوميتەتى جۇڭنانحايدا پارتيا سىرتىنداعى قايراتكەرلەردىڭ اڭگىمە ءماجىلىسىن اشىپ، قازىرگى ەكونوميكالىق جاعداي جانە سوڭعى جارتى جىلداعى ەكونوميكالىق قىزمەت جونىندە دەموكراتيالىق پارتيا ـ توپتاردىڭ ورتالىق كوميتەتتەرىنىڭ، مەملەكەتتىك ساۋدا ـ ونەركاسىپشىلەر بىرلەستىگىنىڭ جاۋاپتىلارىنىڭ جانە پارتيادا، توپتا جوق قايراتكەرلەردىڭ ۋاكىلدەرىنىڭ پىكىرلەرى مەن ۇسىنىستارىن تىڭدادى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ اڭگىمە ءماجىلىسىن باسقاردى ءارى ماڭىزدى ءسوز سويلەپ بىلاي دەپ باسا دارىپتەدى: سوڭعى جارتى جىلداعى ەكونوميكالىق قىزمەتتى ويداعىداي ىستەۋدە جۇڭگو كوممۋنيستىك پارتياسى 20 ـ قۇرىلتايىنىڭ جانە 20 ـ كەزەكتى ورتالىق كوميتەت ەكىنشى، ءۇشىنشى جالپى ماجىلىستەرىنىڭ رۋحىن جاپپاي دايەكتىلەندىرىپ، تياناقتاندىرىپ، ورنىقتىلىق بارىسىندا ىلگەرىلەۋ سىندى قىزمەت نەگىزگى ارناسىنان جازباي، جاڭا دامۋ ۇستانىمىن تولىق، دۇرىس، جاپپاي دايەكتىلەندىرىپ، جاڭا دامۋ جاعدايىن جەدەل قالىپتاستىرىپ، جەرگىلىكتى جاعدايعا قاراي جاڭاشا وندىرگىش كۇشتەردى دامىتىپ، جوعارى ساپالى دامۋدى كۇش سالا ىلگەرىلەتىپ، جۇڭگو ۇلگىسىندەگى وسىزامانداندىرۋدى ىلگەرىلەتۋدى ارقاۋ ەتىپ، رەفورمانى ونان ارى جاپپاي تەرەڭدەتىپ، ماكرولىق تىزگىندەۋ تەبىنىن ارتتىرىپ، جاڭالىق اشۋ ارقىلى دامۋعا دەم بەرۋدى تەرەڭدەتىپ، ىشكى سۇرانىستىڭ كومەسكى كۇشىن ىشكەرىلەي اشىپ، جاڭا قوزعاۋشى كۇشتى، جاڭا ابزالدىقتى ۇزدىكسىز كۇشەيتىپ، تيجارات تۇلعالارىنىڭ ومىرشەڭدىك كۇشىن ارتتىرىپ، بازار مەجەسىن ورنىقتىرىپ، قوعامدىق سەنىمدى كۇشەيتىپ، ەكونوميكانىڭ ۇزدىكسىز جوعارىلاۋ، جاقسارۋ جاعدايىن نىعايتىپ، حالىق تۇرمىسىن شىنايى قامتاماسىزداندىرىپ جانە جاقسارتىپ، قوعام ورنىقتىلىعىن ساقتاپ، تۇتاس جىلدىق ەكونوميكالىق، قوعامدىق دامۋ نىساناسىن تاباندىلىقپەن جۇزەگە اسىرۋ كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەلەرى لي چياڭ، ۋاڭ حۋنيڭ، ساي چي، ديڭ شۋەشياڭ اڭگىمە ماجىلىسىنە قاتىناستى. لي چياڭ جۇڭگو كوممۋنيستىك پارتياسى ورتالىق كوميتەتىنىڭ تاپسىرۋىمەن الدىڭعى جارتى جىلداعى ەكونوميكالىق قىزمەتكە قاتىستى جاعدايلاردى حابارلاندىرىپ، سوڭعى جارتى جىلداعى ەكونوميكالىق قىزمەتكە قاتىستى ويلاردى تانىستىردى.

اڭگىمە ماجىلىسىندە جۇڭگو گومينداڭ توڭكەرىستىك كوميتەتى ورتالىق كوميتەتىنىڭ ءتوراعاسى جىڭ جيانباڭ، جۇڭگو دەموكراتيالىق وداعى ورتالىق كوميتەتىنىڭ ءتوراعاسى ديڭ جۇڭلي، جۇڭگو دەموكراتيالىق مەملەكەت قۇرۋ قوعامى ورتالىق كوميتەتىنىڭ ءتوراعاسى حاۋ ميڭجين، جۇڭگو دەموكراتيانى ىلگەرىلەتۋ قوعامى ورتالىق كوميتەتىنىڭ ءتوراعاسى ساي دافىڭ، جۇڭگو شارۋا - جۇمىسشى دەموكراتيالىق پارتياسى ورتالىق كوميتەتىنىڭ ءتوراعاسى حى ۋەي، جۇڭگو ادىلەت پارتياسى ورتالىق كوميتەتىنىڭ ءتوراعاسى جياڭ زوجۇن، 3 - قىركۇيەك ءىلمي قوعامىنىڭ ءتوراعاسى ۋ ۋەيحۋا، تايۋان دەموكراتيالىق اۆتونوميا وداعى ورتالىق كوميتەتىنىڭ ءتوراعاسى سۋ حۇي، مەملەكەتتىك ساۋدا - ونەركاسىپشىلەر بىرلەستىگىنىڭ ءتوراعاسى گاۋ يۇنلۇڭ، پارتيادا، توپتا جوق قايراتكەرلەردىڭ ۋاكىلى وۋياڭ چاڭچيۇڭ ىلگەرىندى – كەيىندى ءسوز سويلەدى. ولار جۇڭگو كوممۋنيستىك پارتياسى ورتالىق كوميتەتىنىڭ قازىرگى ەكونوميكالىق جاعداي جونىندەگى تالداۋ، تۇجىرىمىن جانە كەيىنگى جارىم جىلدىق ەكونوميكالىق قىزمەتتى جوسپارلاپ، ويلاسۋىن بۇكىلدەي قۇپتادى ءارى رەفورمانى ونان ارى جاپپاي تەرەڭدەتۋ، جوعارى دەڭگەيدەگى سىرتقا ەسىك اشۋدى ىلگەرىلەتۋ، جاڭاشا وندىرگىش كۇشتەردىڭ كاسىپ سالاسى مەن تەحنيكالىق نەگىزىن بەكەمدەۋ، عىلىم - تەحنيكا ءتۇزىلىسى رەفورماسىن تەرەڭدەتۋ، جاراتىلىستىق بايلىقتى باسقارۋ رەفورماسىن ىلگەرىلەتۋ، بيولوگيالىق جاساۋ كاسىبىنىڭ دامۋىن ءبىر تۇتاس جوسپارلاۋ، ۇلى قۇرلىقتاعى تايۋان قارجىلاندىرعان ەلەكتروندىق ينفورماتسيا كاسىبىنىڭ تيپىن وزگەرتىپ، دارەجەسىن جوعارىلاتۋدى قولداۋ، جۇمىس ورنىن ورنىقتىرۋ جانە جاستاردىڭ جۇمىستانۋىن كەڭەيتۋ، تۇتىنۋدى جەبەۋ ساياساتىنىڭ تەبىنىن ارتتىرۋ، كاسىپورىندار مەن ءۇي - جاي كاسىبىنىڭ اقاۋسىز دامۋىنا دەم بەرۋ، حالىقتىق شارۋاشىلىقتىڭ دامۋ سەنىمىن ونان ارى سەرپىلتۋ سياقتىلار جونىندە پىكىر جانە ۇسىنىس بەردى.

كوپشىلىكتىڭ ءسوزىن مۇقيات تىڭداعاننان كەيىن شي جينپيڭ ماڭىزدى ءسوز سويلەدى. ول مىنانى ءبىلدىردى: بيىل الدىڭعى جارتى جىلدا جۇڭگو كوممۋنيستىك پارتياسى ورتالىق كوميتەتىنىڭ پارمەندى باسشىلىعىندا، كۇردەلى دە قۇبىلمالى ىشكى ـ سىرتقى جاعداي الدىندا، ءبىز قىسىمعا توتەپ بەرىپ، بەلسەنە ءىس تىندىرىپ، ماكرولىق تىزگىندەۋدى كۇشەيتىپ، رەفورما جاساپ، ەسىك اشۋدى تەرەڭدەتىپ، حاۋىپ ـ قاتەر مەن سىن ـ سايىستقا ءونىمدى توتەپ بەرىپ، ەكونوميكانىڭ قايتا ورلەۋ جاعدايىن جالعاستىرىپ، جوعارى ساپالى دامۋدا تاعى دا تىڭ قادام تاستادىق.

شي جينپيڭ بىلاي دەپ باسا دارىپتەدى: قازىر ەلىمىزدىڭ ەكونوميكالىق دامۋى كەيبىر قيىنشىلىقتار مەن ماسەلەلەرگە ءدوپ كەلىپ وتىر، بۇل − دامۋ بارىسىنداعى، بۇرىلىس جاساۋ بارىسىنداعى ماسەلە، قۇلشىنۋ ارقىلى ونى بۇكىلدەي جەڭۋگە بولادى. ءبىز دامۋ سەنىمىن بەكەمدەپ، ستراتەگيالىق تاباندىلىقتى ساقتاپ، ماسەلەلەر مەن سىن ـ سايىسقا بەلسەندى، ىرىقتى تۇردە توتەپ بەرىپ، ناقتى جوعارى ساپالى دامۋ جەتىستىكتەرى ارقىلى جۇڭگو ەكونوميكاسىنىڭ بولاشاعى نۇرلى ايتىلىمىن اسقاقتاتۋىمىز كەرەك.

شي جينپيڭ بىلاي دەپ اتاپ كورسەتتى: الدىڭعى جارتى جىلدا دەموكراتيالىق پارتيا - توپتاردىڭ ورتالىق كوميتەتتەرى مەن پارتيادا، توپتا جوق قايراتكەرلەر پارتيا مەن مەملەكەتتىڭ وزەكتى قىزمەتىن تىعىز ارقاۋ ەتىپ، نازاردى جەرگىلىكتى جاعدايعا قاراي جاڭاشا وندىرگىش كۇشتەردى دامىتۋ، ەل ىشىندەگى ۇلكەن اينالىمدى ىركىلىسسىزدەندىرۋ، مەملەكەتتىڭ جاڭالىق اشۋ جۇيەسىنىڭ جالپى تۇلعالىق ونىمدىلىگىن جوعارىلاتۋ، جاساندى زەردە مەن ەكونوميكانىڭ، قوعامنىڭ توعىسپالى دامۋىن ىلگەرىلەتۋ، جەرگىلىكتى قازىنانىڭ قيىنشىلىعىن باسەڭدەتۋ سياقتىلارعا شوعىرلاندىرىپ، اقىل - كەڭەس بەرىپ، چاڭجياڭ وزەنىنىڭ ەكولوگيالىق ورتاسىن قورعاۋدى دەموكراتيالىق باقىلاۋدى ۇزدىكسىز ورىستەتىپ، جۇڭگو كوممۋنيستىك پارتياسى ورتالىق كوميتەتىنىڭ عىلمي شەشىم جاساۋىنا ماڭىزدى پايدالانۋ ماتەريالىن ازىرلەدى. ول جۇڭگو كوممۋنيستىك پارتياسى ورتالىق كوميتەتى اتىنان كوپشىلىككە شىن جۇرەكتەن العىس ايتتى.

شي جينپيڭ دەموكراتيالىق پارتيا ـ توپتارعا، مەملەكەتتىك ساۋدا ـ ونەركاسىپشىلەر بىرلەستىگىنە جانە پارتيادا، توپتا جوق قايراتكەرلەرگە 3 ءتۇرلى ءۇمىت ارتتى. ءبىرىنشى، جۇڭگو كوممۋنيستىك پارتياسى 20 - كەزەكتى ورتالىق كوميتەتى ءۇشىنشى جالپى ءماجىلىسىنىڭ رۋحىن ىشكەرىلەي ۇيرەنىپ، دايەكتىلەندىرىپ، قالىڭ مۇشەلەر مەن وزدەرى بايلانىس جاسايتىن بۇقارانى رەفورمانى ونان ارى جاپپاي تەرەڭدەتۋدىڭ كەلەلى ءمانىن، كەلەلى پرينسيپتەرىن جانە كەلەلى شارالارىن ىشكەرىلەي يگەرۋگە جەتەكتەپ، جۇڭگو كوممۋنيستىك پارتياسى ورتالىق كوميتەتىنىڭ شەشىمدەرى مەن ورنالاستىرۋلارىن قوعامداعى ءار سالانىڭ ورتاق ەركى مەن سانالى ارەكەتىنە اينالدىرۋ كەرەك. ەكىنشى، بىرلىكساپتىڭ ورتاق يدەيالىق - ساياسي نەگىزىن ۇزدىكسىز بەكەمدەپ، يدەيالىق تانىمدى جۇڭگو كوممۋنيستىك پارتياسى ورتالىق كوميتەتىنىڭ ەكونوميكالىق جاعداي جونىندەگى تالداۋىمەن، تۇجىرىمىمەن شىنايى بىرلىككە كەلتىرىپ، جاعداي مەن رەفورما، دامۋ بارىسىنداعى ماسەلەلەرگە دۇرىس مامىلە جاساپ، العا باسۋ بارىسىنداعى ءتۇرلى حاۋىپ - قاتەر مەن سىن - سايىستى تىزە قوسا جەڭۋ كەرەك. ءۇشىنشى، ەكونوميكالىق، قوعامدىق دامۋ نىساناسىن جۇزەگە اسىرۋعا ۇزدىكسىز اقىل - كەڭەس بەرىپ، كۇش شىعارىپ، جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءۇشىنشى جالپى ماجىلىسىندە العا قويىلعان كەلەلى رەفورما شارالارىن، ەكونوميكالىق، قوعامدىق دامۋداعى كەلەلى ماسەلەلەردى، سونداي - اق ”15 - بەسجىلدىق“ جوبانىڭ الدىڭعى مەرزىمدىك زەرتتەۋ، جوسپارلاۋ قىزمەتى سياقتىلاردى تياناقتاندىرۋدى ارقاۋ ەتىپ، ىشكەرىلەي تەكسەرۋ - زەرتتەۋ جۇرگىزىپ، جۇڭگو كوممۋنيستىك پارتياسى ورتالىق كوميتەتىنىڭ عىلمي شەشىم جاساۋىنا پايدالانۋ ماتەريالىن ازىرلەۋ كەرەك.

شى تايفىڭ، ليۋ گوجۇڭ، حى ليفىڭ، جاڭ گوچيڭ، ۋ جىڭلۇڭ، جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك كەڭەستىڭ قاتىستى تاراۋلارىنىڭ جاۋاپتىلارى اڭگىمە ماجىلىسىنە قاتىناستى.

پارتيا سىرتىنداعى قايراتكەرلەردەن شاۋ حۇڭ، حى شۋشياڭ، ۋاڭ گۋاڭچيان، چين بويۇڭ، جۋ يۇڭشين، ياڭ جىن جانە جاڭ ىندي، جياڭ ليپيڭ، ان ليجيا، لي لين قاتارلىلار اڭگىمە ماجىلىسىنە قاتىناستى.

كەلۋ قاينارى: حالىق تورابى