شي جينپيڭ وڭتۇستىك افريكانىڭ زۇڭتۇڭى رامافوسامەن كەڭەس وتكىزدى

9 - ايدىڭ 2 - كۇنى تۇستەن كەيىن، مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگو - افريكا سەلبەستىك تالقى مىنبەرى بەيجيڭ باسشىلار ماجىلىسىنە قاتىناسۋ ءارى مەملەكەتتىك ساپاردا بولۋ ءۇشىن ەلىمىزگە كەلگەن وڭتۇستىك افريكانىڭ زۇڭتۇڭى رامافوسامەن كەڭەس وتكىزدى.

سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

9 - ايدىڭ 2 - كۇنى تۇستەن كەيىن، مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگو - افريكا سەلبەستىك تالقى مىنبەرى بەيجيڭ باسشىلار ماجىلىسىنە قاتىناسۋ ءارى مەملەكەتتىك ساپاردا بولۋ ءۇشىن ەلىمىزگە كەلگەن وڭتۇستىك افريكانىڭ زۇڭتۇڭى رامافوسامەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ سولتۇستىك زالىندا رامافوسانى قارسى الۋ سالتىن وتكىزۋدە.

سۋرەتتى شينحۋا اگەنتتىگىنىڭ ءتىلشىسى ياۋ داۋەي تۇسىرگەن

شينحۋا اگەنتتىگى، 9 – ايدىڭ 2 – كۇنى، بەيجيڭ (تىلشىلەر جىڭ ميڭدا، ۋاڭ پۋ). 9 - ايدىڭ 2 - كۇنى تۇستەن كەيىن، مەملەكەت ءتوراعاسى شي جينپيڭ بەيجيڭدەگى جۇڭگو - افريكا سەلبەستىك تالقى مىنبەرى بەيجيڭ باسشىلار ماجىلىسىنە قاتىناسۋ ءارى مەملەكەتتىك ساپاردا بولۋ ءۇشىن ەلىمىزگە كەلگەن وڭتۇستىك افريكانىڭ زۇڭتۇڭى رامافوسامەن كەڭەس وتكىزدى. ەكى ەل مەملەكەت باسشىلارى جۇڭگو مەن وڭتۇستىك افريكانىڭ قارىم - قاتىناسىن جاڭا داۋىردەگى جاپپاي ستراتەگيالىق سەلبەستىك سەرىكتەستىك قارىم - قاتىناس دەڭگەيىنە كوتەرەتىندىكتەرىن جاريالادى.

شي جينپيڭ بىلاي دەپ اتاپ كورسەتتى: جۇڭگو مەن وڭتۇستىك افريكانىڭ دوستىعى ۇلت ازاتتىعىنا قول جەتكىزۋدە ءبىر - بىرىنە ادال بولۋدان، مەملەكەتتىڭ دامۋ قۇرىلىسىن ىلگەرىلەتۋدە ءبىر - بىرىنە سۇيەنىش بولۋدان، حالىقارالىق تەڭدىك پەن ادىلدىككە تالپىنۋداعى ىنتىماق پەن سەلبەستىكتەن باستاۋ الادى. بيىل − جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعى، سونداي - اق جاڭا وڭتۇستىك افريكا قۇرىلعاندىعىنىڭ 30 جىلدىعى. حالىقارالىق جاعداي اۋمالى - توكپەلى بولعانىمەن، جۇڭگو مەن وڭتۇستىك افريكانىڭ وسىزاماندانۋعا تالپىنۋ بورىشى وزگەرگەن جوق، جۇڭگو - افريكا سەلبەستىگىن ىلگەرىلەتۋ مۇراتى وزگەرگەن جوق، دۇنيە جۇزىلىك باسقارۋدى كەمەلدەندىرۋ تىلەگى وزگەرگەن جوق. جۇڭگو مەن وڭتۇستىك افريكانىڭ ىنتىماقتى، سەلبەستىكتى كۇشەيتۋى ەكى ەل حالىقتارىنىڭ ورتاق ۇمىتىنە ۇيلەسەدى، دۇنيە ءجۇزى وڭتۇستىگىنىڭ دامىپ زورايۋىنىڭ تاريحي اياق الىسىنا ۇيلەسەدى، ماڭىزدى داۋىرلىك مانگە جانە دۇنيە جۇزىلىك ىقپالعا يە.

شي جينپيڭ بىلاي دەپ باسا دارىپتەدى: جۇڭگو مەن وڭتۇستىك افريكا قارىم - قاتىناسىنىڭ جاڭا ورنىن كوزدە ۇستاي وتىرىپ، ەكى جاق مىناداي ”3 بەتالىستى“ ويداعىداي يگەرۋى كەرەك. ءبىرىنشى، بىرگە العا باساتىن ساياسي بەتالىس، جوعارى دەڭگەيدەگى ستراتەگيالىق ءوزارا سەنىمدىلىك ارقىلى ەكى ەل قارىم - قاتىناسىنىڭ ارشىندى قاداممەن العا باسۋىنا جەتەكشىلىك ەتۋ كەرەك. ەكىنشى، ءوزارا پايدا جەتكىزىپ، ورتاق يگىلىككە كەنەلەتىن سەلبەستىك بەتالىسى، ەكى ەل سەلبەستىگىنىڭ جوعارى دەڭگەيلى جوباسىن كەمەلدەندىرىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرىپ، سيفرلى ەكونوميكا، جاساندى زەردە، جاڭا ەنەرگيا سياقتى سالالارداعى سەلبەستىكتى ىلگەرىلەتۋ كەرەك. ءۇشىنشى، ۇرپاقتان - ۇرپاققا جالعاسقان دوستىقتىڭ حالىق تىلەگى بەتالىسى، ادام كۇشى بايلىعىن اشۋ، اۋىس - كۇيىس جاساۋ سەلبەستىگىن كۇشەيتىپ، كاسىپتىك وقۋ - اعارتۋدان ۇلگى كورسەتەتىن مەكتەپتەر، كاسىپتىك تاربيەلەۋ ورتالىعى نىساندارىن جەدەل ىلگەرىلەتىپ، وڭتۇستىك افريكا جاستارىنا ءتىپتى دە كوپ وقۋ سيلىق اقشاسى مەن ءبىلىم تولىقتاۋ، تاربيەلەۋ ورايىن ازىرلەۋ كەرەك.

شي جينپيڭ بىلاي دەپ اتاپ كورسەتتى: جۇڭگو - افريكا سەلبەستىك تالقى مىنبەرى − وڭتۇستىكتەگىلەر سەلبەستىگىنىڭ ۇلگىسى جانە حالىقارانىڭ افريكامەن سەلبەسۋىنە جەتەكشىلىك ەتەتىن تۋ. جۇڭگو مەن افريكا وسى رەتكى باسشىلار ماجىلىسىندە جاڭا داۋىردەگى جۇڭگو - افريكا قارىم - قاتىناسىنىڭ جاڭا ورنىن تۇراقتاندىرىپ، وسىزامانداندىرۋدى قول ۇستاسا ىلگەرىلەتۋدىڭ ناقتى جولىن بىرگە اقىلداسادى. جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءۇشىنشى جالپى ماجىلىسىندە جوعارى دەڭگەيدەگى سىرتقا ەسىك اشۋ ءتۇزىلىس، مەحانيزمىن كەمەلدەندىرۋ جونىندە ورنالاستىرۋ جاسالدى، جۇڭگو افريكا ەلدەرىنە ەسىكتى بارعان سايىن ايقارا اشادى. جۇڭگو جاق وڭتۇستىك افريكا سياقتى افريكا ەلدەرىمەن سەلبەستىكتىڭ جاڭا قوزعاۋشى كۇشىن ۇزدىكسىز قالىپتاستىرۋدى، جۇڭگو - افريكا سەلبەستىگىنىڭ جوعارى ساپالى دامۋىن جەبەۋدى، جۇڭگو - افريكا سەلبەستىگىنىڭ جۇردەك پويەزىن، ءسوز جوق، بارعان سايىن تەزدەتىپ، بارعان سايىن جاقسارتۋدى قالايدى.

شي جينپيڭ بىلاي دەپ باسا دارىپتەدى: قازىر دۇنيە جۇزىندە 100 جىلدىق وزگەرىس جەدەل قۇبىلىپ، ادامزات قوعامى بۇرىن - سوڭدى بولماعان سىن - سايىسقا ءدوپ كەلۋدە. حالىقارالىق جاعداي نەعۇرلىم كۇردەلى بولعان سايىن، دۇنيە ءجۇزىنىڭ وڭتۇستىگىندەگى ەلدەر دەربەس، ءوز - وزىنە قوجايىن بولۋعا، ىنتىماقتاسا سەلبەسۋگە سولعۇرلىم تاباندى بولىپ، حالىقارالىق تەڭدىك پەن ادىلدىكتى بىرگە قورعاۋى كەرەك. جۇڭگو جاق وڭتۇستىك افريكامەن حالىقارالىق كوپ جاقتى سەلبەستىكتى كۇشەيتۋدى قالايدى، وڭتۇستىك افريكانىڭ كەلەر جىلى 20 ەل توبىنىڭ كەزەكتى ءتوراعا ەلى بولۋ قىزمەتىن بار كۇشپەن قولدايدى.

رامافوسا مىنالاردى ءبىلدىردى: بىلتىر ءتوراعا شي جينپيڭ وڭتۇستىك افريكادا 4 - رەت تابىستى مەملەكەتتىك ساپاردا بولدى، ءبىز وڭتۇستىك افريكا مەن جۇڭگونىڭ ديپلوماتيالىق قارىم - قاتىناس ورناتقاندىعىنىڭ 25 جىلدىعىن بىرگە قۇتتىقتاپ، وڭتۇستىك افريكا - جۇڭگو قارىم - قاتىناسىنىڭ ”التىن داۋىرگە“ ءوتۋىن ىلگەرىلەتتىك. وڭتۇستىك افريكا مەن جۇڭگو وسكەلەڭ ساياسي سەنىمدىلىككە جانە تەرەڭ ءداستۇرلى دوستىققا يە، كوپتەگەن ماسەلەدە تۇرعىسى ۇقساستاۋ، نىساناسى بىردەي. ەكونوميكا - ساۋدا سەلبەستىگى تەڭ تۇرعىدا قۇرمەت ەتۋدى، ءوزارا پايدا جەتكىزىپ، ورتاق يگىلىككە كەنەلۋدى نەگىز ەتىپ، بايلانىس كۇن سايىن قويۋلاي ءتۇستى. جۇڭگو جاقتىڭ ۇزاق ۋاقىتتان بەرى وڭتۇستىك افريكانىڭ ەكونوميكالىق، قوعامدىق دامۋىنا قاستەرلى قولداۋ كورسەتكەندىگىنە العىس ايتامىن، جۇڭگو كوممۋنيستىك پارتياسى 20 - كەزەكتى ورتالىق كوميتەتى ءۇشىنشى جالپى ءماجىلىسىنىڭ ءساتتى اشىلعاندىعىن قۇتتىقتايمىن، جۇڭگونىڭ رەفورمانى ونان ارى جاپپاي تەرەڭدەتۋىنىڭ، جۇڭگو ۇلگىسىندەگى وسىزامانداندىرۋدى ىلگەرىلەتۋىنىڭ وڭتۇستىك افريكا مەن دۇنيە ءجۇزىنىڭ وڭتۇستىگىندەگى باسقا دا ەلدەرگە اناعۇرلىم كوپ وراي ازىرلەيتىندىگىنە سەنەمىن. وڭتۇستىك افريكا ۇزدىكسىز جۇڭگونىڭ سەنىمدى دوسى بولىپ، جۇڭگو جاقپەن جاڭا داۋىردەگى جاپپاي ستراتەگيالىق سەلبەستىك سەرىكتەستىك قارىم - قاتىناس ورناتۋدى وراي ەتىپ، ەكونوميكا - ساۋدا، قارجى قوسۋ، نەگىزدىك قۇرىلعى، جاڭا ەنەرگيا، كەدەيلىكتەن ارىلتۋ سياقتى سالالارداعى ناقتى سەلبەستىكتى كەڭەيتىپ، تەرەڭدەتىپ، گۋمانيتارلىق بارىس - كەلىس پەن وقۋ - اعارتۋ، مادەنيەت سەلبەستىگىن جيىلەتىپ، ەكى ەل قارىم - قاتىناسىنىڭ اناعۇرلىم كوپ تابىستارعا قول جەتكىزۋىن ىلگەرىلەتىپ، وڭتۇستىك افريكانىڭ وسىزاماندانۋىن جۇزەگە اسىرۋىنا دەم بەرۋدى قالايدى. وڭتۇستىك افريكا ءبىر جۇڭگو ساياساتىن ۇزدىكسىز تاباندىلىقپەن اتقارادى. جۇڭگو - افريكا سەلبەستىك تالقى مىنبەرى جۇلگەسىندەگى سەلبەستىك وڭتۇستىك افريكانى قامتىعان افريكا ەلدەرىن كوپ يگىلىككە كەنەلتتى. وڭتۇستىك افريكا جۇڭگونىڭ وسى رەتكى جۇڭگو - افريكا سەلبەستىك تالقى مىنبەرىنىڭ بەيجيڭ باسشىلار ءماجىلىسىن ءساتتى وتكىزۋىن قولدايدى، افريكا مەن جۇڭگونىڭ ىنتىماعىن كۇشەيتىپ، ءوزارا باتىل قولداۋ كورسەتىپ، افريكا قۇرلىعى مەن دۇنيە ءجۇزىنىڭ وڭتۇستىگىندەگى ەلدەردىڭ بىرگە دامۋىن جەبەيدى. وڭتۇستىك افريكا جۇڭگو مەن برازيليانىڭ ۋكراينا ماسەلەسىن ساياسي جولمەن شەشۋ جونىندە العا قويعان ”6 ءتۇرلى ورتاق تانىمىن“ قولدايدى، جۇڭگونىڭ بىلتىر وڭتۇستىك افريكانىڭ بريكس ەلدەرى باسشىلارىنىڭ ديدارلاسۋىن وتكىزۋىن قولداعاندىعىنا العىس ايتادى، وڭتۇستىك افريكا جاق جۇڭگو جاقپەن بريكس ەلدەرى جانە 20 ەل توبى سياقتى كوپ جاقتى جۇلگەدە ءجيى پىكىرلەسۋدى، سەلبەسۋدى قالايدى.

كەڭەستەن كەيىن ەكى ەل مەملەكەت باسشىلارى جەتىقاراقشى جاساندى سەرىك باعدار سىلتەۋ جۇيەسىن قولدانۋ، تۇرعىن ءۇي قۇرىلىسى، ەكى جاقتى ساۋدا، اۋىل شارۋاشىلىق ونىمدەرىنىڭ بازارعا كىرۋىنە رۇقسات ەتۋ، مادەنيەت مۇرالارى سياقتى كوپتەگەن ەكى جاقتى سەلبەستىك قۇجاتتارىنا قول قويۋعا بىرگە كۋا بولدى.

ەكى جاق «جۇڭحۋا حالىق رەسپۋبليكاسى مەن وڭتۇستىك افريكا رەسپۋبليكاسىنىڭ جاڭا داۋىردە جاپپاي ستراتەگيالىق سەلبەستىك سەرىكتەستىك قارىم - قاتىناس ورناتۋ جونىندەگى بىرلەسكەن مالىمدەمەسىن» جاريالادى.

كەڭەستەن بۇرىن شي جينپيڭ حالىق سارايىنىڭ سولتۇستىك زالىندا رامافوسانى قارسى الۋ سالتىن وتكىزدى.

ۋاڭ ي جوعارىداعى قيمىلدارعا قاتىناستى.

كەلۋ قاينارى: حالىق تورابى