4 ادام تۇتقىندالدى! دەلوعا قاتىستى سوما 800 ميلليون يۋان 

جۋىردا بەيجيڭ قالاسىنداعى ساقشى جاق قىزمەت ۇقىعىنان پايدالانىپ يەلەپ الۋ دەلوسىن تەكسەرۋ بارىسىندا، دەلوعا قاتىستى ادامنىڭ قىسقا مەرزىم ىشىندە كوپ مولشەردەگى قاراجاتتى يەلەپ الىپ، ونى شەتەل ازاماتتىعىنداعى جۇڭگولىقتىڭ ەل ىشىندەگى ەسەپ نومىرىنە شوعىرلى تۇردە جوتكەگەنىن بايقايدى. اتالعان دەرەككە باعىتتاي وتىرىپ، بەيجيڭ قالالىق قوعام حاۋىپسىزدىگى مەكەمەسىنىڭ ەكونوميكالىق بارلاۋ باس اترەتى مەن شىعىس قالا رايوندىق بولىمشە اترەتى سايكەسە شايقاس جاساپ، ەلىمىزدەگى كوپتەگەن ولكەلەر مەن قالالارعا بارىپ، ۆيرتۋالدى ۆاليۋتا ارقىلى اقشا جىلدىرتپالاتۋ قىلمىسىن وتكىزگەن جاسىرىن بانكە ۇيىمىنا سوققى بەردى. قازىر دەلوعا قاتىستى باستى قىلمىس كۇماندىلارىنان 4 ادامدى زاڭسىز تيجارات جۇرگىزۋ قىلمسى بويىنشا تۇتقىنداۋ بۇيرىعىن پروكۋراتۋرا ورگانى بەكىتتى.

تەكسەرۋگە قاراعاندا، ۇيىمنىڭ باستى مۇشەسى لۇي X ءبىرتالاي جىلدىڭ الدىندا شەتەلدىڭ ازاماتتىعىنا وتكەن، شەتەلدە تۇرمىس كەشىرگەن مەزگىلدە، ۆيرتۋالدى ۆاليۋتامەن ساۋدا جاساۋ ارقىلى ەل ىشىندەگى حالىق اقشاسىن شەكارا سىرتىنا جوتكەۋگە ءارى شەتەل اقشاسىنا ايىرباستاۋعا بولاتىنىن بايقايدى. لۇي X چىن X قاتارلىلارمەن بىرگە ۆيرتۋالدى ۆاليۋتامەن ساۋدا جاساۋ تەكشەسىنەن پايدالانىپ، قاراجات جوتكەۋ ويى بار ەل ىشىندەگى ادامداردىڭ ۆيرتۋالدى ۆاليۋتانى ولەرمەندەنە ساتىپ الىپ، اقشاسىن شەكارا سىرتىنا جوتكەۋىنە سايكەسكەن، دەلوعا قاتىستى سوما 800 ميلليون يۋاننان اسقان. سونىمەن بىرگە، بەيجيڭ ساقشى جاعى اتالعان توپتىڭ كوپ رەتكى تەلەكومنان پايدالانعان الدامكوستىك دەلوسى، قىزمەت ۇقىعىنان پايدالانىپ يەلەپ الۋ دەلوسى قاتارلى دەلولاردا قاراجات جوتكەيتىن ارنا ازىرلەپ، دەلوعا قاتىستى زاڭسىز قاراجاتتى جوتكەپ اكەتۋگە كومەكتەسكەنىن انىقتايدى.

بەيجيڭ ساقشى جاعى مىنانى ەسكەرتەدى: كۇندەلىكتى تۇرمىس بارىسىندا، بارشا جۇرتشىلىق اقشا جىلدىرتپالاتۋدان ساقتانۋ تانىمىن جوعارىلاتۋى، جەكەلىك بانكە ەسەپ ءنومىرى ارقىلى بوتەن ادامداردىڭ اقشاسىن قابىلداماۋى، ءوزىنىڭ ازاماتتىق كۋالىگىن، بانكە كارتوچكاسىن مايعا بەرمەۋى كەرەك، ەگەر شەتەل اقشاسىنا قاجەتى تۇسسە، رەسمي ارنالار ارقىلى اۋىستىرىپ الۋىنا بولادى.

كەلۋ قاينارى: حالىق تورابى