ءيت ادامدى سوعىپ كەتىپ جارالاعاندىقتان، ءيتتىڭ يەسى 120 مىڭ يۋان تولەم تولەدى

انار بۇلت \ شينجياڭ زاڭمەن جونگە سالۋ گازەتىنىڭ ءتىلشىسى لي شۇيچۇن، ەرىكتى ءتىلشىسى ايبوتا سەرجان حابارلايدى. موتوتسيكلمەن كوشەگە شىققاندا ءيت سوعىپ كەتىپ جىعىلىپ، وسىنىڭ سالدارىنان زاقىمدالسا، ءيتتىڭ يەسى جاۋاپكەرشىلىك ارقالاي ما؟

2024 – جىلى 4 – ايدىڭ 2 – كۇنى، حى X ليۋ X تىڭ ۇستىنەن كۇيتۇن قالالىق حالىق سوتىنا ارىزدانىپ، ودان ءتۇرلى زياننىڭ تولەمى رەتىندە 120 مىڭ يۋان بەرۋدى تالاپ ەتكەن.

ءبىرىنشى رەت اشىلعان سوتتا، ليۋ X دەلوعا قاتىستى ءيتتى باعۋشى بولعاندىقتان، ءيتتى باسقارۋ بورىشى بار دەپ قاراعان. ول باققان يتىنە حاۋىپسىزدىك شارالارىن اتقارماي، حى X تىڭ جارالانۋىنا سەبەپكەر بولعاندىقتان، سوت مەكەمەسى ليۋ X حى X تىڭ 120 مىڭ يۋاندىق ەكونوميكالىق زيانىن تولەپ بەرۋى كەرەك دەپ ۇكىم شىعارعان. ليۋ X ۇكىمگە موينسال بولماي، شينجياڭ ۇيعۇر اۆتونوميالى رايوندىق جوعارى دارەجەلى حالىق سوتى مەكەمەسىنىڭ ىلە قازاق اۆتونوميالى وبلىستىق بولىمشە سوت مەكەمەسىنە جوعارىلاپ ارىزدانعان.

ەكىنشى رەت اشىلعان سوتتا سوت مەكەمەسى تەرگەۋ ارقىلى بىلاي دەپ قاراعان: حى X تىڭ جارالانۋى دەلوعا قاتىستى ءيتتىڭ ونى تىكەلەي قابۋى سەبەبىنەن بولماعانىمەن، الايدا، زاقىمدالۋ ناتيجەسىنىڭ ليۋ X تىڭ ءيتىنىڭ توساتتان جۇگىرىپ شىعىپ موتوتسيكلگە سوعىلۋىمەن تىكەلەي سەبەپ – سالدارلىق قاتىناسى بار. ليۋ X دەلوعا قاتىستى ءيتتىڭ باعۋشىسى بولعاندىقتان، ءوزى باققان ءيتتى باقىلاۋ – باسقارۋ بورىشىن ادا ەتپەگەن، وسىنىڭ سالدارىنان زاقىمدالۋ وقيعاسى تۋىلعان، ونىڭ ۇستىنە، ليۋ X دەلوعا قاتىستى شىرعالاڭدى حى X تىڭ قاساقانا ىستەگەنىن نەمەسە ونىڭ وزىنەن زور قاتەلىك كەتكەنىن راستايتىن ىسپات كورسەتە الماعان، سوندىقتان حى X تىڭ جارالانۋىنا بايلانىستى سايكەستى ۇقىققا قول سۇعۋ جاۋاپكەرشىلىگى بويىنشا تولەم بەرۋى كەرەك. 8 – ايدىڭ 29 – كۇنى ەكىنشى رەتكى سوت ۇكىم شىعارىپ، جوعارىلاپ ارىزدانۋدى تويتارىپ، اسىلگى ۇكىمدى وزگەرتپەي ساقتاعان.

سۋديانىڭ زاڭدى ءتۇسىندىرۋى: حايۋانات باعۋشى حايۋاناتتى باققان مەزگىلدە قاتىستى زاڭ – تۇزىمدەرگە بويسۇنۋى، حايۋاناتتى باسقارۋ جانە تەجەۋدى كۇشەيتۋى، باسقالاردىڭ تۇرمىسىنا ىقپال جەتكىزبەۋى كەرەك. حايۋاناتتى باعۋشى الەۋمەتتىك ورىندا حايۋاناتتى قاراۋ، باسقارۋ بورىشىن وتەۋى كەرەك، باعۋشىنىڭ حايۋاناتى باسقالاردى زاقىمداعان جاعدايدا، باعۋشى نەمەسە باسقارۋشى ۇقىققا قول سۇعۋ جاۋاپكەرشىلىگىن ارقالاۋى كەرەك.

كەلۋ قاينارى: حالىق تورابى