شي جينپيڭ اۋمىن ەرەكشە اكىمشىلىك رايونىنىڭ ەندى مىندەتكە وتىراتىن اكىمى سىن حاۋحۇيمەن كەزدەستى

11 - ايدىڭ 1 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جاڭادان سايلانعان ءارى ورتالىق ۇكىمەتتىڭ تاعايىنداۋىنان وتكەن اۋمىن ەرەكشە اكىمشىلىك رايونىنىڭ 6 - كەزەكتى اكىمى سىن حاۋحۇيمەن كەزدەستى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

«حالىق گازەتى»، 11 - ايدىڭ 1 - كۇنى، بەيجيڭ. مەملەكەت ءتوراعاسى شي جينپيڭ 11 - ايدىڭ 1 - كۇنى تۇستەن كەيىن حالىق سارايىندا جاڭادان سايلانعان ءارى ورتالىق ۇكىمەتتىڭ تاعايىنداۋىنان وتكەن اۋمىن ەرەكشە اكىمشىلىك رايونىنىڭ 6 - كەزەكتى اكىمى سىن حاۋحۇيمەن كەزدەستى.

شي جينپيڭنىڭ كۋا بولۋىندا، مەملەكەتتىك كەڭەستىڭ زۇڭليى لي چياڭ سىن حاۋحۇيعا ونى جۇڭحۋا حالىق رەسپۋبليكاسى اۋمىن ەرەكشە اكىمشىلىك رايونىنىڭ 6 - كەزەكتى اكىمى ەتىپ تاعايىنداۋ جونىندەگى مەملەكەتتىك كەڭەستىڭ 794 - ءنومىرلى بۇيرىعىن بەردى.

شي جينپيڭ سىن حاۋحۇيدىڭ ورتالىق ۇكىمەت تاعايىنداعان اۋمىن ەرەكشە اكىمشىلىك رايونىنىڭ 6 - كەزەكتى اكىمى بولعاندىعىن قۇتتىقتادى. شي جينپيڭ بىلاي دەدى: ءسىز ۇزاق ۋاقىت سوڭعى تەرگەۋ سوت مەكەمەسىنىڭ باستىعى بولدىڭىز، وتاندى ءسۇيۋ، اۋمىندى ءسۇيۋ تۇرعىڭىز بەرىك، زاڭ بويىنشا مىندەت اتقارىپ، مىندەتىڭىزدى ادا ەتىپ، اۋمىننىڭ گۇلدەنىپ - كوركەيۋىنە، ورنىقتىلىعىنا بەلسەندى ۇلەس قوستىڭىز. ءسىز اكىم سايلاۋىنا قاتىناسقاننان بەرى ناقتى ءىس ىستەۋ، حالىقپەن ەتەنە بولۋ، ماسەلەگە بەتپە - بەت كەلۋگە باتىل بولۋداي تاماشا وبراز ايگىلەدىڭىز، سايلاۋعا قاتىناسۋ ساياسي باعدارلاماڭىز جانە بيلىك جۇرگىزۋ ۇستانىمىڭىز اۋمىننىڭ ءىس جۇزىندىگىنە ۇيلەسەدى، قالىڭ اۋمىن تۇرعىندارىنىڭ تاماشا تۇرمىسقا دەگەن تىلەگىنە ساي كەلەدى. ءسىزدىڭ اكىم سايلاۋىندا جوعارى داۋىسپەن كورسەتىلىپ، جوعارى داۋىسپەن سايلانۋىڭىز اۋمىن قوعامىنىڭ ءسىزدى جاپپاي مويىندايتىندىعىن جانە قولدايتىندىعىن بىلدىرەدى. ورتالىق ءسىزدى تولىق تۇراقتاندىرادى، سىزگە تولىق سەنىم ارتادى.

شي جينپيڭ مىنالاردى ءبىلدىردى: ”ءبىر ەل، ەكى ءتۇزىم“ − مەملەكەتتىڭ، ۇلتتىڭ ءتۇبىرلى مۇددەسىنە ۇيلەسەتىن، اۋمىننىڭ ءتۇبىرلى مۇددەسىنە ۇيلەسەتىن جاقسى ءتۇزىم. اۋمىن وتان قۇشاعىنا ورالعان 25 جىلدان بەرى ورتالىق پەن وتانىمىزدىڭ ىشكى جەرلەرىنىڭ زور كۇشپەن قولداۋىندا، ەرەكشە اكىمشىلىك رايون ۇكىمەتى مەن قوعامنىڭ ءار سالاسى ۇزدىكسىز كۇرەس جۇرگىزىپ، اۋمىن ەرەكشەلىگىنە يە ”ءبىر ەل، ەكى ءتۇزىم“ امالياتىندا كۇللى دۇنيە ءجۇزىن جالت قاراتقان تابىستارعا قول جەتكىزدى، نەگىزگى زاڭ مەن اۋمىن ءتۇبىرلى زاڭىندا تۇراقتاندىرىلعان ەرەكشە اكىمشىلىك رايوننىڭ نەگىزگى زاڭدىق ءتۇزىم ءتارتىبى بەرىك ورناتىلدى، اۋمىننىڭ ءتۇرلى ىستەرى جاپپاي العا باستى، حالىقارالىق ىقپال قۋاتى كورنەكتى جوعارىلادى. ورتالىق ”ءبىر ەل، ەكى ءتۇزىم“، ”اۋمىندى اۋمىندىقتار باسقارۋ“، وسكەلەڭ اۆتونوميا باعىتىن ۇزدىكسىز جاپپاي، دالمە - ءدال، بۇلجىماي دايەكتىلەندىرىپ، ونىڭ وزگەرمەۋىنە، تۇرلەنبەۋىنە شىنايى كەپىلدىك ەتەدى.

شي جينپيڭ بىلاي دەپ اتاپ كورسەتتى: جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءۇشىنشى جالپى ماجىلىسىندە رەفورمانى ونان ارى جاپپاي تەرەڭدەتۋ، جۇڭگو ۇلگىسىندەگى وسىزامانداندىرۋدى ىلگەرىلەتۋ جونىندە جۇيەلى ورنالاستىرۋ جاسالىپ، ”ءبىر ەل، ەكى ءتۇزىم“ ءتۇزىمىنىڭ ابزالدىعىن ساۋلەلەندىرۋ، شياڭگاڭنىڭ، اۋمىننىڭ مەملەكەتتىڭ سىرتقا ەسىك اشۋداعى رولىن اناعۇرلىم ويداعىداي ساۋلەلەندىرۋ مەحانيزمىن اقاۋسىزداندىرۋ كەرەكتىگى باسا دارىپتەلدى. بۇل اۋمىننىڭ جۇڭگو ۇلگىسىندەگى وسىزامانداندىرۋمەن توعىسۋىنا، ءوزىنىڭ اناعۇرلىم جاقسى دامۋىن جۇزەگە اسىرۋىنا ايقىن بەتالىس كورسەتىپ، جاڭا تاريحي وراي ازىرلەدى. اكىمدىك مىندەت وتەۋ − اۋىر جاۋاپكەرشىلىك، وندا ورتالىقتىڭ ماڭىزدى تاپسىرماسى جانە قالىڭ اۋمىن تۇرعىندارىنىڭ زور ءۇمىتى جاتىر. ءسىزدىڭ اۋىر مىندەتتى باتىلدىقپەن ارقالاپ، بورىشتى ادا ەتىپ، ەرەكشە اكىمشىلىك رايوننىڭ جاڭا كەزەكتى ۇكىمەتىن باستاپ، قوعامنىڭ ءار سالاسىنداعىلاردى ىنتىماقتاستىرىپ، ءبىر جاعادان باس، ءبىر جەڭنەن قول شىعارىپ، تۋراشىلدىقتان اينىماي جاڭالىق اشىپ، جاۋاپكەرشىلىك ارقالاپ، العا باسىپ، ءىستى ءساتتى باستاپ، تابىستى اياقتاتىپ، اۋمىن ەرەكشەلىگىنە يە ”ءبىر ەل، ەكى ءتۇزىم“ امالياتىنىڭ جاڭا جاعدايىن ۇزدىكسىز اشىپ، مەملەكەتتى قۇدىرەتتەندىرۋ قۇرىلىسىنا، ۇلتتىڭ گۇلدەنۋىنە اناعۇرلىم زور ۇلەس قوسۋىڭىزدى ءۇمىت ەتەمىن.

سىن حاۋحۇي ورتالىق ۇكىمەتتىڭ ءوزىن اۋمىن ەرەكشە اكىمشىلىك رايونىنىڭ 6 - كەزەكتى اكىمى ەتىپ تاعايىنداعانىن ەرەكشە داڭق سەزىندى، ءتوراعا شي جينپيڭ مەن ورتالىق ۇكىمەتتىڭ باسشىلىعىندا، ”ءبىر ەل، ەكى ءتۇزىم“ باعىتىن جاپپاي دالمە - ءدال، بۇلجىماي دايەكتىلەندىرىپ، مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاپ، مەملەكەتتىڭ دامۋ كەلەلى جاعدايىمەن اناعۇرلىم ويداعىداي توعىسىپ جانە وعان قىزمەت وتەپ، الەۋمەتتىك باسقارۋ قابىلەتى مەن باسقارۋ، جونگە سالۋ دەڭگەيىن جوعارىلاتىپ، ەكونوميكانىڭ ۇيلەسىمدى، كوپ نەگىزدى دامۋىن جەدەل ىلگەرىلەتىپ، حالىق تۇرمىسىن بار كۇشپەن جاقسارتىپ، اۋمىننىڭ ءتۇرلى ىستەرىنىڭ جالپى بەتتىك دامۋىن ىلگەرىلەتۋگە بەل بايلادى.

لي چياڭ، ساي چي، ديڭ شۋەشياڭ، شى تايفىڭ، چىن ۋىنچيڭ، شيا باۋلۇڭ قاتارلىلار كەزدەسۋدە بىرگە بولدى.

كەلۋ قاينارى: حالىق تورابى