شي جينپيڭ حانويعا بارىپ، ۆيەتنامدا مەملەكەتتىك ساپاردا بولدى

سول جەر ۋاقىتى 4 - ايدىڭ 14 - كۇنى تۇستە جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ ارناۋلى ۇشاقپەن حانويعا بارىپ، ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى سۋ ليننىڭ، ۆيەتنام سوتسياليستىك رەسپۋبليكاسىنىڭ ءتوراعاسى لياڭ چياڭنىڭ ۇسىنىسىمەن ۆيەتنامدا مەملەكەتتىك ساپاردا بولدى. شي جينپيڭ ارناۋلى ۇشاقپەن حانوي حالىقارالىق اۋەجايىنا جەتكەندە، ۆيەتنامنىڭ مەملەكەت ءتوراعاسى لياڭ چياڭ، ۆيەتنام كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق كوميتەت شۋجيچۋىنىڭ ۇنەمىلىك ىستەرگە جاۋاپتى شۋجيى چىن جينشيۋ، ۆيەتنام كوممۋنيستىك پارتياسى ورتالىق كوميتەتى شۋجيچۋىنىڭ شۋجيى، ورتالىق كوميتەت كەڭسە مەڭگەرمەسىنىڭ مەڭگەرۋشىسى لي حۋايجۇڭ قاتارلى ۆيەتنامنىڭ پارتيا، ۇكىمەت باسشىلارى مەن جەرگىلىكتى ورىندارىنىڭ ۋاكىلدەرى ىستىق ىقىلاسپەن قارسى الدى.

سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

«حالىق گازەتى»، 4 - ايدىڭ 14 - كۇنى، حانوي (تىلشىلەر ياڭ يە، شيە جياجۇن). سول جەر ۋاقىتى 4 - ايدىڭ 14 - كۇنى تۇستە جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ ارناۋلى ۇشاقپەن حانويعا بارىپ، ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى سۋ ليننىڭ، ۆيەتنام سوتسياليستىك رەسپۋبليكاسىنىڭ ءتوراعاسى لياڭ چياڭنىڭ ۇسىنىسى بويىنشا، ۆيەتنامدا مەملەكەتتىك ساپاردا بولدى.

شي جينپيڭ ارناۋلى ۇشاقپەن حانوي نويباي حالىقارالىق اۋەجايىنا بارعاندا، ۆيەتنامنىڭ مەملەكەت ءتوراعاسى لياڭ چياڭ، ۆيەتنام كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق كوميتەت شۋجيچۋىنىڭ ۇنەمىلىك ىستەرگە جاۋاپتى شۋجيى چىن جينشيۋ، ۆيەتنام كوممۋنيستىك پارتياسى ورتالىق كوميتەتى شۋجيچۋىنىڭ شۋجيى، ورتالىق كوميتەت كەڭسە مەڭگەرمەسىنىڭ مەڭگەرۋشىسى لي حۋايجۇڭ قاتارلى ۆيەتنامنىڭ پارتيا، ۇكىمەت باسشىلارى مەن جەرگىلىكتى ورىندارىنىڭ ۋاكىلدەرى ىستىق ىقىلاسپەن قارسى الدى. ۆيەتنامدىق بويجەتكەن شي جينپيڭگە گۇل ۇسىندى.

قۇرمەت قاراۋىلى قىزىل كىلەمنىڭ ەكى جاعىندا ساپ تۇزەپ، مىلتىق ۇستاپ قۇرمەت ءبىلدىردى. سول جەردەگى جاستار ۇلتتىق كيىم كيىپ، دابىل سوعىپ، ءان ايتىپ، ءبي بيلەپ، ەكى پارتيا، ەكى ەل تۋىن بۇلعاپ، شي جينپيڭنىڭ ساپارلاي كەلگەندىگىن قىزۋ قارسى الدى.

شي جينپيڭ جازباشا ءسوز سويلەپ، جۇڭگو كوممۋنيستىك پارتياسى، جۇڭگو ۇكىمەتى جانە جۇڭگو حالقى اتىنان باۋىرلاس ۆيەتنام كوممۋنيستىك پارتياسىنا، ۆيەتنام ۇكىمەتىنە جانە ۆيەتنامنىڭ حالقىنا شىن ىقىلاستى سالەم جولدادى جانە ىزگى تىلەك ءبىلدىردى.

شي جينپيڭ بىلاي دەپ اتاپ كورسەتتى: بيىل _ ۆيەتنام كوممۋنيستىك پارتياسى قۇرىلعاندىعىنىڭ 95 جىلدىعى، ۆيەتنام مەملەكەتى قۇرىلعاندىعىنىڭ 80 جىلدىعى جانە وڭتۇستىگىنىڭ ازات بولعاندىعىنىڭ 50 جىلدىعى. ۆيەتنام كوممۋنيستىك پارتياسى ۆيەتنام حالقىن ىنتىماقتاستىرىپ، باستاپ، پارتيا قۇرۋدىڭ، مەملەكەت قۇرۋدىڭ ”ەكى 100 جىلدىق“ نىساناسىن بەتكە الىپ ۇدەرە العا تارتىپ، حالىقارالىق جانە وڭىرلىك ىقپال كۇشىن ۇزدىكسىز كۇشەيتىپ، سوتسياليستىك ونەركاسىپتەندىرۋ، وسىزامانداندىرۋ قۇرىلىسىندا قۋانارلىق تابىستارعا قول جەتكىزدى. جۇڭگو مەن ۆيەتنام _ تاۋ ـ سۋى تۇتاسقان سوتسياليستىك كورشى ەلدەر، ستراتەگيالىق مانگە يە تاعدىرلاس ورتاق تۇلعا.

مەملەكەتتىڭ تاۋەلسىزدىگى مەن ۇلتتىڭ ازاتتىعىنا قول جەتكىزۋ سىندى داڭقتى جىلداردا ەكى جاق تىزە قوسا شايقاس جاساپ، ءبىرىن - ءبىرى قولداپ، تەرەڭ دوستىق ورناتتى.

ءوز ەلىنىڭ مەملەكەت جاعدايىنا ۇيلەسەتىن سوتسياليزم جولىن قاراستىرۋدا، ەكى جاق ءوزارا ۇيرەنىپ، ءوزارا ۇلگى الىپ، قول ۇستاسا العا باسىپ، دۇنيە جۇزىنە سوتسياليستىك ءتۇزىمنىڭ نۇرلى بولاشاعىن ايگىلەدى. بيىل _ جۇڭگو مەن ۆيەتنامنىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعى جانە ”جۇڭگو - ۆيەتنام گۋمانيتارلىق اۋىس - كۇيىس جىلى“، جۇڭگو - ۆيەتنام تاعدىرلاس ورتاق تۇلعاسى قۇرىلىسى جاڭا دامۋ ورايىن قارسى الدى. مەن وسى رەتكى ساپاردى وراي ەتىپ، ۆيەتنامداعى باسشى جولداستارمەن جۇڭگو ـ ۆيەتنام ەكى پارتيا، ەكى ەل قارىم ـ قاتىناسىنىڭ جالپى جاعدايلىق، ستراتەگيالىق، باعدارلىق ماسەلەلەرى، سونداي ـ اق بىرگە كوڭىل ءبولىپ وتىرعان حالىقارالىق جانە وڭىرلىك ماسەلەلەر جونىندە ىشكەرىلەي پىكىر اۋىستىرىپ، جۇڭگو ـ ۆيەتنام تاعدىرلاس ورتاق تۇلعاسى قۇرىلىسىنىڭ جاڭا جوباسىن بىرگە جاساۋدى كۇتەمىن.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسە مەڭگەرمەسىنىڭ مەڭگەرۋشىسى ساي چي، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، سىرتقى ىستەر مينيسترلىگىنىڭ مينيسترى ۋاڭ ي، جۇڭگو كوممۋنيستىك پارتياسى ورتالىق كوميتەتى شۋجيچۋىنىڭ شۋجيى، قوعام حاۋىپسىزدىگى مينيسترلىگىنىڭ مينيسترى ۋاڭ شياۋحۇڭ قاتارلى ساپارلاستارى وسى ۇشاقپەن بىرگە باردى.

جۇڭگونىڭ ۆيەتنامدا تۇراتىن باس ەلشىسى حى ۋەي دە اۋەجايعا بارىپ قارسى الدى.

شي جينپيڭ اۋەجايدان قونالقىعا بارا جاتقان جولىندا جۇڭگو - ۆيەتنام پارتيالارىنىڭ، ەلدەرىنىڭ تۋلارى جەلبىرەپ، ”جۇڭگو - ۆيەتنام دوستىعى ماڭگى جالعاسادى“، ”تاۋ - سۋى جالعاسقان، تاعدىرى ءبىر“، ”جۇڭگو - ۆيەتنامنىڭ دوستىق سۇيىسپەنشىلىگى تەرەڭ، جولداس ۇستىنە باۋىرلاس“ دەگەن جازۋلار جازىلعان قىزىل كەرمە تۋلار كوزدىڭ جاۋىن الادى. سول جەردەگى بۇقارا مەن جۇڭگو قارجىلاندىرعان قۇرىلىمداردىڭ، شەتەلدە وقىپ جاتقان وقۋشىلاردىڭ ۋاكىلدەرى جولدىڭ ەكى جاعىنا جينالىپ، شي جينپيڭنىڭ ساپارلاي كەلگەندىگىن قىزۋ قارسى الدى.

كەلۋ قاينارى: حالىق تورابى