شي جينپيڭ مالايزيانىڭ ەڭ جوعارى مەملەكەت باسشىسى يبىراھيممەن كەزدەستى

4 - ايدىڭ 16 - كۇنى تۇستەن بۇرىن مالايزيانىڭ ەڭ جوعارى مەملەكەت باسشىسى يبىراھيم مالايزيا مەملەكەتىنىڭ پاتشا سارايىندا جۇڭگونىڭ مەملەكەت ءتوراعاسى شي جينپيڭمەن كەزدەسۋ وتكىزدى. يبىراھيم مەملەكەتتىڭ پاتشا سارايى الاڭىندا شي جينپيڭگە ارناپ سالتاناتتى قارسى الۋ سالتىن وتكىزدى. سۋرەتتە: شي جينپيڭ قۇرمەت قاراۋىلىن كوزدەن كەشىرۋدە.

سۋرەتتى شينحۋا اگەنتتىگىنىڭ ءتىلشىسى جاي جيانلان تۇسىرگەن

4 - ايدىڭ 16 - كۇنى تۇستەن بۇرىن مالايزيانىڭ ەڭ جوعارى مەملەكەت باسشىسى يبىراھيم مالايزيا مەملەكەتىنىڭ پاتشا سارايىندا جۇڭگونىڭ مەملەكەت ءتوراعاسى شي جينپيڭمەن كەزدەسۋ وتكىزدى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

«حالىق گازەتى»، 4 - ايدىڭ 16 - كۇنى، كۋالالۋمپۋر (تىلشىلەر گۋان كىجياڭ، ليۋ حۇي). مالايزيانىڭ ەڭ جوعارى مەملەكەت باسشىسى يبىراھيم 4 - ايدىڭ 16 - كۇنى تۇستەن بۇرىن مالايزيا مەملەكەتىنىڭ پاتشا سارايىندا جۇڭگونىڭ مەملەكەت ءتوراعاسى شي جينپيڭمەن كەزدەسۋ وتكىزدى.

4 - ايداعى كۋالالۋمپىر كۇننىڭ شۇلەن شۋاعىنا مالىنىپ، اعاشپەن، كوگالمەن كومكەرىلىپ تۇر.

يبىراھيم مەملەكەتتىڭ پاتشا سارايى الاڭىندا شي جينپيڭگە ارناپ سالتاناتتى قارسى الۋ سالتىن وتكىزدى.

شي جينپيڭ اۆتوكولىكپەن جەتكەن كەزدە يبىراھيم مەن مالايزيانىڭ زۇڭليى ءانۋار اۆتوكولىكتەن تۇسكەن جەردە ىستىق ىقىلاسپەن قارسى الدى. ەكى ەلدىڭ مەملەكەت باسشىلارى قۇرمەت قاراۋىلى مىنبەسىنە شىقتى، اسكەري وركەستر جۇڭگو مەن مالايزيانىڭ مەملەكەت اندەرىن ورىندادى، قۇرمەت ساليۋتى 21 رەت اتىلدى. شي جينپيڭ قۇرمەت قاراۋىلىن كوزدەن كەشىردى. ەكى ەلدىڭ مەملەكەت باسشىلارى مەملەكەت پاتشا سارايىنىڭ زالىنا كىرىپ، ەكى جاقتان سەرىك بولىپ كەلگەندەرمەن قول الىسىپ قۇرمەت ءبىلدىردى.

قارسى الۋ سالتىنان كەيىن شي جينپيڭ يبىراھيممەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن مالايزيا − جاقسى كورشى، جاقسى دوس، جاقسى سەرىكتەر، ۇنەمى بارىس - كەلىس جاساپ، ءبىر ءۇيلى جانداي بولىپ كەلەدى. ەكى ەل قارىم - قاتىناسى قۇلاشىن كەڭ جايعان جارتى عاسىردى باستان كەشىرىپ، اناعۇرلىم كوركەم بولاشاقتى قارسى الۋدا. مەن ەڭ جوعارى مەملەكەت باسشىسىمەن بىرگە قۇلشىنىپ، جۇڭگو - مالايزيا قارىم - قاتىناسىنىڭ ۇزاق ۋاقىت ورنىقتى دامۋىنا جەتەكشىلىك ەتىپ، جوعارى دەڭگەيلى ستراتەگيالىق جۇڭگو - مالايزيا تاعدىرلاس ورتاق تۇلعاسىن بىرگە قۇرىپ، تاتۋ كورشىلىك دوستىقتىڭ، ىنتىماقتاسىپ سەلبەسۋدىڭ جاڭا تاراۋىن جازىپ، جۇڭگو - مالايزيا قارىم - قاتىناسىنىڭ جاڭا ”التىن 50 جىلدىعىن“ باستاۋدى قالايمىن.

شي جينپيڭ بىلاي دەپ باسا دارىپتەدى: جۇڭگو مەن مالايزيا ەكى جاق ساياسي ءوزارا سەنىمدىلىكتى ۇزدىكسىز تەرەڭدەتىپ، ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءوزارا قولداۋ كورسەتۋى كەرەك.

دامۋ ستراتەگياسىن ۇشتاستىرۋدى تەرەڭدەتىپ، ابزالدىقتار ارقىلى ءبىرىن - ءبىرى تولىقتاپ، ءوزارا پايدا جەتكىزىپ، تەڭ يگىلىككە كەنەلىپ، وسىزامانداندىرۋ جولىمەن قول ۇستاسا ويداعىداي ءجۇرۋ كەرەك. ”ەكى ەل، ەكى باقشا“، شىعىس تەڭىز جاعالاۋى تەمىر جولى سياقتى كەلەلى نىسانداردى ويداعىداي جۇرگىزىپ، جاساندى زەردە، سيفرلى ەكونوميكا، جاسىل ەكونوميكا سياقتى بولاشاقتاعى كاسىپ سالاسى سەلبەستىگىن جەتىلدىرۋدى مىقتى يگەرۋ كەرەك. جۇڭگو جاق مالايزيانىڭ ءتىپتى دە كوپ ساپالى اۋىل شارۋاشىلىق ونىمدەرىنىڭ جۇڭگو بازارىنا كىرۋىن قارسى الادى، جۇڭگو كاسىپورىندارىن مالايزياعا بارىپ قارجى قوسىپ، شارۋاشىلىقتى گۇلدەندىرۋگە شابىتتاندىرادى. مالايزيا جاقپەن ”تاعىلىمشىلدار وركەنيەتى مەن ءسىلام وركەنيەتى تىلدەسۋىن“ ىلگەرىلەتىپ، اناعۇرلىم كوپ مادەنيەت، ساياحات، وقۋ - اعارتۋ سەلبەستىگىن ورىستەتىپ، ەكى ەل حالىقتارى تىلەگىنىڭ توعىسۋىن كۇشەيتۋدى قالايدى. جۇڭگو جاق مالايزيانىڭ شىعىس وڭتۇستىك ازيا ەلدەرى وداعىنىڭ كەزەكتى ءتوراعا ەلى بولۋ قىزمەتىن قولدايدى، مالايزيا جاقپەن بىرگە دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن تياناقتاندىرىپ، دۇنيە ءجۇزىنىڭ وڭتۇستىگىنىڭ بىرلەسىپ ءوزىن الۋەتتەندىرۋىن، بىرگە دامۋىن ىلگەرىلەتىپ، ءوڭىر مەن دۇنيە ءجۇزىن اناعۇرلىم كوپ وڭ ەنەرگيامەن قامداۋدى قالايدى.

يبىراھيم مىنالاردى ءبىلدىردى: ءتوراعا شي جينپيڭنىڭ مالايزيادا مەملەكەتتىك ساپاردا بولۋى − ەكى ەل قارىم - قاتىناسىنداعى ءىرى ءىس، بۇل مالايزيا - جۇڭگو قارىم - قاتىناسىنىڭ جوعارى دەڭگەيىن تولىق ايگىلەدى. بىلتىر 9 - ايدا جۇڭگوعا ءساتتى ساپارلاي بارعانىم كۇنى كەشەگىدەي ەسىمدە. ءتوراعا شي جينپيڭنىڭ وسى رەتكى ساپارىنىڭ ەكى ەل قارىم - قاتىناسىن جاپپاي جوعارىلاتىپ، ءار سالاداعى سەلبەستىكتىڭ قارىشتاپ دامۋىن ىلگەرىلەتەتىندىگىنە سەنەمىن. جۇڭگونىڭ تاڭعالارلىق دامۋ جەتىستىكتەرىنە قول جەتكىزۋى − ءتوراعا شي جينپيڭنىڭ كورەگەندىگىنىڭ جانە جۇڭگو حالقىنىڭ قاجىرلى ەڭبەگىنىڭ ارقاسى. مالايزيا جۇڭگومەن قارىم - قاتىناسقا ايرىقشا ءمان بەرەدى، حالىقارالىق جاعداي قالاي وزگەرسە دە، قول ۇستاسا بىرگە ىلگەرىلەپ، سەلبەسىپ تەڭ يگىلىككە كەنەلىپ، جوعارى دەڭگەيدەگى ستراتەگيالىق تاعدىرلاس ورتاق تۇلعا قۇرىلىسىن ىلگەرىلەتەدى.

مالايزيا جاق وڭىرلىك ەكونوميكانى ءبىر تۇلعالاندىرۋعا ءمان بەرەدى، ”ءبىر بەلدەۋ، ءبىر جول“ باستاماسىن باتىل قولدايدى، جۇڭگو جاقپەن ساۋدا، قارجى قوسۋ سەلبەستىگىن كۇشەيتىپ، كاسىپ سالاسى تىزبەگىن، قامداۋ تىزبەگىن بىرگە ورنىقتىرىپ، ۇلاستىرۋ - تۇتاستىرۋ دەڭگەيىن جوعارىلاتىپ، وقۋ - اعارتۋ، گۋمانيتارلىق جاقتارىنداعى اۋىس - كۇيىستى كۇشەيتۋدى قالايدى. مالايزيا جاق تاياۋدا جۇڭگو اشقان ورتالىقتىڭ توڭىرەكتىك قىزمەت ءماجىلىسىن جوعارى باعالايدى، جۇڭگونىڭ دۇنيە جۇزىلىك جانە وڭىرلىك سىن - سايىستارعا توتەپ بەرۋدە اتقارعان ماڭىزدى رولىنا ءمان بەرەدى. شىعىس وڭتۇستىك ازيا ەلدەرى وداعىنىڭ كەزەكتى ءتوراعا ەلى جانە شىعىس وڭتۇستىك ازيا ەلدەرى وداعى - جۇڭگو قارىم - قاتىناسىن سايكەستىرۋشى ەل رەتىندە، مالايزيا شىعىس وڭتۇستىك ازيا وداعى - جۇڭگو قارىم - قاتىناسىنىڭ اناعۇرلىم زور دامۋىن ىلگەرىلەتۋگە كۇش سالىپ، بەيبىت، گۇلدەنگەن بولاشاقتى بىرگە جاراتادى.

كەزدەسۋدەن كەيىن شي جينپيڭ يبىراھيم وتكىزگەن قارسى الۋ قوناعاسىنا قاتىناستى.

ساي چي، ۋاڭ ي، ۋاڭ شياۋحۇڭ قاتارلىلار جوعارىداعى قيمىلدارعا قاتىناستى.

كەلۋ قاينارى: حالىق تورابى