شي جينپيڭ جاڭا زەلانديا زۇڭليى لاكسونمەن كەزدەستى

6 - ايدىڭ 20 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارلاي كەلگەن جاڭا زەلانديا زۇڭليى لاكسونمەن كەزدەستى.

□ سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن

شينحۋا اگەنتتىگىنىڭ 6 ـ ايدىڭ 20 ـ كۇنى بەيجيڭنەن بەرگەن حابارى (ءتىلشى دۇڭ شۋە). 6 ـ ايدىڭ 20 ـ كۇنى تۇستەن بۇرىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارلاي كەلگەن جاڭا زەلانديا زۇڭليى لاكسونمەن كەزدەستى.

شي جينپيڭ بىلاي دەپ اتاپ كورسەتتى: ديپلوماتيالىق قارىم ـ قاتىناس ورناتقان 50 نەشە جىلدان بەرى، جۇڭگو - جاڭا زەلانديا قارىم ـ قاتىناسى اۋمالى ـ توكپەلى حالىقارالىق جاعدايدى باستان وتكەردى، ەكى جاق باستان ـ اياق ءوزارا قۇرمەت ەتىپ، قول ۇستاسا العا ىلگەرىلەپ، ەكى ەل قارىم ـ قاتىناسى ۇزاق مەزگىل جۇڭگو مەن باتىستاعى دامىعان ەلدەر قارىم ـ قاتىناسىنىڭ الدىندا ءجۇرىپ، ەكى ەل حالقىنا ناقتى قۇت ـ ىرىس سيلادى. جۇڭگو - جاڭا زەلانديا جاپپاي ستراتەگيالىق سەرىكتەستىك قارىم ـ قاتىناسىنىڭ ەكىنشى 10 جىلدىعىن باستاۋ قارساڭىندا ەكى جاق جۇڭگو - جاڭا زەلانديا قارىم ـ قاتىناسىنىڭ جاڭا 10 جىلدا اناعۇرلىم زور دامۋعا قول جەتكىزىپ، ەكى ەل حالقىنا اناعۇرلىم ويداعىداي باقىت جاراتۋىن بىرگە ىلگەرىلەتۋى كەرەك.

شي جينپيڭ بىلاي دەپ باسا دارىپتەدى: جۇڭگو - جاڭا زەلانديا ەكى جاق سەلبەستىك جاساسۋدى ەكى جاقتى قارىم ـ قاتىناسىندا اناعۇرلىم كورنەكتى ورىنعا قويىپ، ءوزارا تولىقتاۋ باسىمدىعىن ساۋلەلەندىرىپ، ساۋدا جانە قارجى قوسۋ سەلبەستىگىن تەرەڭدەتىپ، عىلىم ـ تەحنولوگيادا جاڭالىق اشۋ، كليمات وزگەرىسىنە توتەپ بەرۋ، نەگىزدىك قۇرىلعى سياقتى سالاداعى سەلبەستىكتىڭ كومەسكى كۇشىن اشىپ، وقۋ ـ اعارتۋ، مادەنيەت، جاستار، حالىق اراسى، جەرگىلىكتى ورىن اۋىس ـ كۇيىسىن كۇشەيتىپ، ەكى جاقتى قارىم ـ قاتىناستىڭ ىشكى ءمانىن بايىتۋ كەرەك. جۇڭگو - جاڭا زەلانديا اراسىندا تاريحي ارازدىق، تۇيىنشەك جوق، ءتۇبىرلى مۇددە قاقتىعىسى جوق، ءوزارا قۇرمەت ەتىپ، ورتاقتىققا ۇمتىلىپ، پارىقتاردى ساقتاپ، ەكى ەلدىڭ پارقىنا جانە الاۋىزدىققا دۇرىس مامىلە جاساۋ جانە ونى ءبىر جاقتى ەتۋ كەرەك. بيىل — دۇنيە جۇزىلىك فاشيزمگە قارسى سوعىسى جەڭىسىنىڭ 80 جىلدىعى جانە بىرلەسكەن مەملەكەتتەر ۇيىمى قۇرىلعاندىعىنىڭ 80 جىلدىعى، سوعىستان كەيىنگى حالىقارالىق ءتارتىپتىڭ قۇرۋشسى جانە قورعاۋشىسى رەتىندە، جۇڭگو - جاڭا زەلانديا ەكى ەل بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى بىرگە قورعاپ، دۇنيە جۇزىلىك ساۋدا ۇيىمىن وزەك ەتكەن كوپ جاقتى ساۋدا ءتۇزىلىسىن قورعاپ، حالىقارالىق ادىلدىكتى، تۋراشىلدىقتى بىرگە قورعاپ، حالىقارالىق ءتارتىپتىڭ اناعۇرلىم ءادىل، ۇيلەسىمدى بەتالىسقا قاراي دامۋىن ىلگەرىلەتۋى كەرەك.

لاكسون مىنالاردى ءبىلدىردى: جاڭا زەلانديا - جۇڭگو قارىم ـ قاتىناسىنىڭ ءمانى كەلەلى. 2014 ـ جىلى ءتوراعا شي جينپيڭ جاڭا زەلانديادا ساپاردا بولىپ، ەكى جاق جاپپاي ستراتەگيالىق سەرىكتەستىك قارىم ـ قاتىناس ورناتتى. ەكى ەل باسشىلارىنىڭ ستراتەگيالىق جەتەكشىلىگىندە ءار سالا سەلبەستىگى قارىشتاپ دامىدى. جاڭا زەلانديا جاق جۇڭگومەن قارىم ـ قاتىناسقا وسكەلەڭ ءمان بەرەدى، ءبىر جۇڭگو ساياساتىن ۇزدىكسىز اتقارادى، جۇڭگو جاقپەن ءوزارا قۇرمەت ەتۋگە، ءوزارا تۇسىنىسۋگە تاباندى بولىپ، جوعارى جىكتەگىلەردىڭ بارىس ـ كەلىسىن ساقتاپ، ساۋدا، قارجى قوسۋ كولەمىن كەڭەيتىپ، اۋىل شارۋاشىلىعى، بالىق شارۋاشىلىعى، ءسۇت شارۋاشىلىعى سەلبەستىگىن تەرەڭدەتىپ، ساياحات، وقۋ ـ اعارتۋ سياقتى سالالارداعى گۋمانيتارلىق اۋىس ـ كۇيىستى جيىلەتىپ، جاڭا زەلانديا - جۇڭگو قارىم ـ قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋدى قالايدى. قازىر دۇنيە ءجۇزى ايقىنسىزدىققا تولى، حالىقارالىق قوعام جۇڭگونىڭ اناعۇرلىم زور رول اتقارۋىن كۇتۋدە. جاڭا زەلانديا جاق جۇڭگو جاقپەن بەلسەندى تىلدەسىپ، سايكەسىپ، كوپ جاقتى ساۋدا ءتۇزىلىسىن قورعاپ، الەمدىك سىن ـ سايىسقا بىرگە توتەپ بەرۋدى قالايدى. جاڭا زەلانديا جاق جۇڭگونىڭ كەلەر جىلى ازيا - تىنىق مۇحيت ەكونوميكالىق سەلبەستىك ۇيىمى ءماجىلىسىن وتكىزۋىن قولدايدى.

ۋاڭ ي كەزدەسۋگە قاتىناستى.